Al‑madbah wa l‑hoot al‑kabiir
4
1 Wa sanaʼo madbah hana nahaas al‑tuulah 20 duraaʼ wa urdah kula 20 duraaʼ wa tuulah foog kamaan 10 duraaʼ.
2 Wa sanaʼo hoot kabiir mudawwar.
Wa khachmah yisaawi 10 duraaʼ min tarafah le tarafah.
Wa tuulah foog yisaawi 5 duraaʼ wa daayirah kamaan 30 duraaʼ.
3 Wa jammalo al‑hoot be suwar hana tiiraan wa fi ayyi duraaʼ,
rasamo 10 toor wa da,
fi kulla daayira al‑hoot.
Wa l‑tiiraan dool rassoohum ale roogeen.
Wa humman wa l‑hoot kulluhum ke sunʼa waahide bas.
4 Wa l‑hoot da khattooh fi 12 tiiraan hana nahaas.
Wa l‑tiiraan dool muwajjihiin ale l‑arbaʼa jiihaat.
Talaata muwajjihiin ale jiihat al‑munchaakh wa talaata ale jiihat al‑kharib wa talaata ale jiihat al‑wati wa talaata ale jiihat al‑sabaah.
Wa duhuurhum daakhal tihit al‑hoot.
5 Wa khachum al‑hoot da tukhnah yisaawi arbaʼa usbaʼ wa khachmah misil nuwwaar al‑sitteeb.
Wa l‑hoot da yichiil 300 birmiil hana almi.
6 Wa sanaʼo achara hiitaan aakhariin hana nahaas.
Al‑khamsa khattoohum be nuss al‑zeene hana beet Allah wa l‑khamsa al‑aakhariin kamaan khattoohum be nuss al‑isra achaan yikhassulu al‑dahaaya al‑muharragiin al‑yigaddumuuhum.
Wa laakin rujaal al‑diin yilwaddo be almi hana l‑hoot al‑kabiir.
Muʼiddaat beet Allah
7 Wa sanaʼo achara faanuus min dahab hasab al‑churuut wa khattoohum fi lubb beet Allah,
al‑khamsa be nuss al‑zeene wa l‑khamsa al‑aakhariin be nuss al‑isra.
8 Wa sawwo achara tarabeeza wa khattoohum fi lubb beet Allah,
al‑khamsa be nuss al‑zeene wa l‑khamsa al‑aakhariin be nuss al‑isra.
Wa sanaʼo miya kaas hana dahab.
9 Wa sawwo fadaay le rujaal al‑diin.
Wa battaan sawwo fadaay aakhara kabiire wa biibaanha masahoohum be nahaas.
10 Wa kan le l‑hoot al‑kabiir kamaan,
khattooh be nuss al‑zeene hana l‑beet fi ruknah mugaabil wati sabaah.
Huuraam sanaʼ khumaam aakhariin
11 Wa Huuraam sanaʼ al‑buraam wa l‑feelaat wa l‑kiisaan.
Wa hu kammal kulla l‑khidme hana beet Allah al‑kallafah beeha al‑malik Suleymaan.
12 Wa hu sanaʼ
al‑amad al‑itneen
wa ruuseehum al‑khattaahum fi raas al‑amad
wa l‑silsilateen hana nahaas al‑madfuuriin al‑khattaahum fi ruuse al‑amad dool
13 wa l‑urbuʼmiya rummaan al‑muʼallagiin roogeen fi l‑silsilateen hana nahaas al‑madfuuriin al‑khattaahum fi ruuse al‑amad dool
14 wa l‑achara asaas
wa l‑achara hiitaan al‑khattaahum fooghum
15 wa l‑hoot al‑kabiir al‑wahiid
wa l‑atnaachar tiiraan al‑tihtah
16 wa l‑buraam wa l‑feelaat wa l‑hadaayid al‑yisillu beehum al‑laham.
Kulla l‑muʼiddaat dool,
Huuraam Abi sanaʼaahum be nahaas nagi le beet Allah be amur al‑malik Suleymaan.
17 Wa l‑malik amar yasnaʼo kulla l‑muʼiddaat dool fi gawaalib hana tiine fi turaab bahar al‑Urdun ambeen Sukkuut wa Sariida.
18 Wa Suleymaan sawwa muʼiddaat katiiriin marra waahid lahaddi naadum ma yagdar yaʼarif wazin al‑nahaas al‑sawwoohum beyah.
Suleymaan sawwa muʼiddaat aakhariin
19 Wa battaan kula Suleymaan sawwa muʼiddaat aakhariin le beet Allah.
Wa humman
mukhbar al‑bakhuur hana l‑dahab
wa l‑taraabiiz hana l‑dahab al‑yigaddumu fooghum al‑khubza le Allah
20 wa l‑fawaaniis wa tiyeesaathum kulluhum ke min dahab saafi wa dool al‑yiʼooguduuhum giddaam al‑bakaan al‑mukhaddas marra waahid hasab al‑churuut
21 wa l‑zuhuur wa l‑tiyeesaat le l‑naar wa l‑kalaaliib kulluhum ke min dahab saafi
22 wa l‑sakaakiin wa l‑kiisaan wa l‑sufar wa khammaamaat al‑naar kulluhum ke min dahab saafi
wa l‑biibaan hana l‑bakaan al‑mukhaddas marra waahid wa l‑biibaan hana beet Allah kulluhum ke min dahab.