7
1 Wa Alyasaʼ radda leyah wa gaal :
« Asmaʼo kalaam Allah !
Daahu Allah gaal :
‹ Ambaakir fi nafs al‑saaʼa fi khachum baab madiinat al‑Saamira,
yachru 3 kooro hana dagiig gameh ahmar aw 6 kooro hana gameh abyad be hajar waahid bas hana fudda.
› »
2 Wa l‑khaayid al‑muraafig al‑malik hajja le nabi Allah wa gaal :
« Kan Allah yaftah biibaan al‑sama kula,
hal kalaamak al‑gultah da yilhaggag ?
» Wa Alyasaʼ radda leyah wa gaal :
« Tichiifah be eenak wa laakin ma taakul minnah ! »
Al‑Araamiyiin khallo muʼaskarhum
3 Wa fiyah arbaʼa rujaal mujaddimiin gaaʼidiin fi khachum baab al‑madiina.
Wa humman gaalo ambeenaathum :
« Maala nagoodu hini wa narjo al‑moot ?
4 Hassaʼ da,
kan nuguulu nadkhulu fi lubb al‑madiina,
numuutu min al‑juuʼ wa kan nagoodu hini kula,
numuutu.
Wa be da,
khalli namchu nisallumu nufuusna fi muʼaskar al‑Araamiyiin.
Kan khalloona,
niʼiichu wa kan kataloona kamaan,
numuutu. »
5 Wa khalaas fi wakt al‑makhrib,
al‑mujaddimiin gammo macho fi muʼaskar al‑Araamiyiin.
Wa wakit wassalo fi taraf al‑muʼaskar,
ma ligo naadum waahid kula
6 achaan al‑Rabb khalla al‑Araamiyiin yasmaʼo haraka chadiide hana arabaat al‑harib wa hana kheel wa hana askar.
Wa humman gaalo ambeenaathum :
« Daahu malik mamlakat Israaʼiil ajjar muluuk al‑Hittiyiin wa l‑Masriyiin le yugummu diddina. »
7 Wa khalaas,
askar al‑Araamiyiin gammo wa arrado be makhrib wa khallo khiyamhum wa kheelhum wa hamiirhum.
Wa khallo muʼaskarhum fi haalah misil awwal le yinajju nufuushum.
8 Wa wakit al‑rujaal al‑mujaddimiin dool wassalo fi taraf al‑muʼaskar,
dakhalo fi kheema waahide akalo wa chirbo.
Wa chaalo min hinaak fudda wa dahab wa khulgaan wa macho labbadoohum.
Wa gabbalo battaan wa dakhalo fi kheema aakhara wa chaalo khumaam min hinaak kula wa macho labbadooh.
Al‑mujaddimiin khabbaro al‑malik
9 Wa baʼad da,
gaalo ambeenaathum :
« Al‑cheyy al‑aniina gaaʼidiin nisawwuuh da ma adiil.
Al‑yoom da,
yoom hana khabar halu !
Wa kan sakatna ma ballakhnaah lahaddi l‑sabaah da,
aniina khaatiyiin.
Hassaʼ da,
taʼaalu niwaddu al‑khabar fi gasir al‑malik. »
10 Wa humman macho wa naado al‑haaris hana baab al‑madiina wa gaalo leyah :
« Aniina macheena fi muʼaskar al‑Araamiyiin wa ma ligiina naadum wa la simiʼna hiss insaan.
Wa illa faddalo bas al‑kheel wa l‑hamiir marbuutiin wa l‑khiyam kula khalloohum. »
11 Wa l‑haaris naada naadum waahid min daakhal wa hu macha wadda al‑khabar fi gasir al‑malik.
12 Wa l‑malik gamma be l‑leel wa gaal le masaaʼiilah :
« Asmaʼo !
Niʼooriiku be l‑cheyy al‑Araamiyiin yidooru yisawwuuh leena.
Humman yaʼarfu kadar aniina jiiʼaaniin.
Wa gammo marago min muʼaskarhum achaan yillabbado leena fi l‑kadaade wa yuguulu :
‹ Al‑muhaasariin dool yamurgu min al‑madiina wa khalaas,
nikarrubuuhum hayyiin wa nadkhulu fi l‑madiina.
› »
13 Wa waahid min masaaʼiil al‑malik radda leyah wa gaal :
« Hassaʼ da,
khalli nichiilu khamsa min al‑kheel al‑faddalo fi l‑madiina.
Be l‑aks kan yagoodu kula,
al‑kheel dool yumuutu maʼa sukkaan al‑madiina.
Wa khalli naas yarkabo fooghum wa yamchu yichiifu al‑cheyy al‑hasal hinaak. »
14 Wa jahhazo arabaat itneen be kheelhum wa l‑malik rassal naas wara askar al‑Araamiyiin.
Wa gaal leehum :
« Amchu akkudu min al‑cheyy al‑hasal. »
15 Wa khalaas,
al‑naas dool gammo wa macho wara l‑askar lahaddi bahar al‑Urdun.
Wa chaafo al‑derib malaan be khulgaan wa khumaam al‑Araamiyiin al‑daffagooh wakit muʼarridiin.
Wa khalaas,
al‑naas dool gabbalo wa khabbaro al‑malik.
Kalaam nabi Allah alhaggag
16 Wa tawwaali,
naas madiinat al‑Saamira marago wa macho kasabo muʼaskar al‑Araamiyiin.
Wa be misil da,
humman charo 3 kooro hana dagiig gameh ahmar aw 6 kooro hana gameh abyad be hajar waahid bas hana fudda.
Wa da bigi hasab kalaam Allah.
17 Wa l‑malik kallaf al‑khaayid al‑muraafgah le yiraakhib khachum baab al‑madiina.
Wa laakin al‑chaʼab fajjakhooh wa hu maat misil nabi Allah gaalah wakit al‑malik macha leyah.
18 Achaan awwal al‑nabi gaal :
« Ambaakir fi nafs al‑saaʼa fi khachum baab madiinat al‑Saamira,
yachru 6 kooro hana gameh abyad aw 3 kooro hana dagiig gameh ahmar be hajar waahid bas hana fudda. »
19 Wa l‑khaayid al‑muraafig al‑malik radda le nabi Allah wa gaal :
« Kan Allah yaftah biibaan al‑sama kula,
hal kalaamak al‑gultah da yilhaggag ?
» Wa fi l‑wakit da,
Alyasaʼ radda leyah wa gaal :
« Tichiifah be eenak wa laakin ma taakul minnah ! »
20 Wa da l‑cheyy al‑hasal le l‑khaayid da.
Al‑chaʼab fajjakhooh wa hu maat fi khachum baab madiinat al‑Saamira.