Alyasaʼ fazaʼ al‑armala
4
1 Wa fi mara armala al‑raajilha awwal hu min majmuuʼat al‑anbiya.
Hi jaat chahadat Alyasaʼ wa gaalat leyah :
« Abdak raajli maat wa inta taʼarfah kadar abdak khaayif min Allah.
Wa daahu siid deen waahid ja wa gaal yichiil iyaali al‑itneen wa yisawwiihum abiid. »
2 Wa Alyasaʼ gaal leeha :
« Tidoori nisawwi leeki chunu ?
Ooriini indiki chunu fi l‑beet ?
» Wa hi raddat leyah wa gaalat :
« Khaadmak indaha illa gazzaaza hint dihin. »
3 Wa hu gaal leeha :
« Amchi asʼale min jiiraanki mawaaʼiin yaabsiin wa katiiriin,
ma chiyya.
4 Wa wakit tijiibiihum,
adkhuli fi beetki wa siddi al‑baab foogki wa foog iyaalki.
Wa subbi al‑dihin fi kulla l‑mawaaʼiin dool wa ayyi maaʼuun kan malaan khalaas,
khuttiih taraf. »
5 Wa khalaas,
hi gammat machat wa saddat al‑baab foogha wa foog iyaalha.
Wa humman gaaʼidiin yantuuha al‑mawaaʼiin wa hi tamlaahum.
6 Wa wakit al‑mawaaʼiin anmalo khalaas,
gaalat le wileedha :
« Antiini maaʼuun aakhar battaan.
» Wa hu gaal leeha :
« Ma fi maaʼuun aakhar.
» Wa tawwaali,
al‑dihin wagaf ma gaaʼid yusubb.
7 Wa khalaas,
al‑mara gammat machat bakaan nabi Allah wa khabbaratah be l‑cheyy al‑kaan.
Wa hu gaal leeha :
« Amchi biiʼi al‑dihin da wa kaffi beyah deenki.
Wa l‑faddal kamaan,
iichu beyah inti wa iyaalki. »
Alyasaʼ wa l‑mara al‑khaniiye
8 Yoom waahid,
Alyasaʼ ja faayit be hillit Chuunam.
Wa fi l‑hille di,
fiyah mara khaniiye talabat minnah achaan yaji yaakul fi beetha.
Wa min al‑yoom da,
ayyi wakit kan Alyasaʼ faayit,
yakhchaaha achaan yaakul fi bakaanha.
9 Wa l‑mara di gaalat le raajilha :
« Al‑raajil al‑daayman gaaʼid yaji leena da,
ana naʼarfah hu nabi mukhassas le Allah.
10 Hassaʼ da,
khalli nabnu leyah kuuzi sakhayyar fi l‑gasir foog.
Wa nukhuttu fi lubbah sariir wa tarabeeza wa gaʼʼaada wa faanuus achaan kan yoom ja leena,
yargud fi l‑kuuzi da. »
11 Wa yoom waahid,
Alyasaʼ ja fi bakaanhum wa anjamma fi l‑kuuzi al‑fi l‑gasir da wa ragad.
12 Wa gaal le khaddaamah Gihaazi :
« Naadi leyi al‑Chuunamiiye di.
» Wa Gihaazi naadaaha wa hi jaat wa wagafat giddaamah.
13 Wa Alyasaʼ gaal le khaddaamah :
« Guul leeha :
‹ Inti tiʼibti katiir fi chaanna.
Tidoori nisawwu leeki chunu ?
Tidoori nihajju le l‑malik wa le khaayid al‑deech fi chaanki walla ?
› » Wa hi raddat wa gaalat :
« La !
Ana aayche be l‑salaama fi usut ahali. »
14 Wa Alyasaʼ gaal le khaddaamah :
« Kan ke da,
nisawwi leeha chunu ?
» Wa khaddaamah Gihaazi radda leyah wa gaal :
« Hi ma indaha iyaal wa raajilha kula chaayib. »
15 Wa Alyasaʼ gaal leyah :
« Naadiiha battaan !
» Wa hu naadaaha.
Wa hi jaat wa wagafat fi khachum al‑baab.
16 Wa Alyasaʼ gaal leeha :
« Fi nafs al‑wakit fi l‑sana al‑jaaye,
takurbi wileed fi hudunki.
» Wa laakin al‑mara gaalat :
« La !
Ya siidi nabi Allah,
ma takdib le khaadmak. »
17 Wa khalaas,
fi nafs al‑wakit hana l‑sana al‑aakhara,
al‑mara di bigat khalbaane.
Wa hi wildat wileed hasab al‑kalaam al‑Alyasaʼ gaalah leeha.
Wileed al‑mara al‑khaniiye maat
18 Wa l‑wileed kibir.
Wa yoom waahid,
al‑wileed macha wara abuuh al‑gaaʼid yakhdim maʼa l‑naas al‑yagtaʼo al‑khalla fi l‑zereʼ.
19 Wa khalaas,
al‑wileed gamma yabki le abuuh wa gaal :
« Raasi !
Raasi boojaʼni !
» Wa abuuh gaal le khaddaamah :
« Chiilah wa waddiih le ammah. »
20 Wa l‑khaddaam chaalah wa waddaah le ammah.
Wa l‑wileed ragad fi rijileen ammah lahaddi l‑gaayle wa baʼad da,
maat.
21 Wa fi l‑bakaan da,
ammah talaʼat beyah fi l‑kuuzi hana nabi Allah wa raggadatah fi l‑sariir wa saddat foogah al‑baab wa maragat.
22 Wa hi naadat raajilha wa gaalat leyah :
« Min fadlak,
rassil leyi waahid min al‑khaddaamiin wa humaara min al‑hamiir achaan namchi ajala bakaan nabi Allah wa nigabbil. »
23 Wa raajilha saʼalha wa gaal :
« Maala tidoori tamchi leyah al‑yoom ?
Al‑yoom wa la iid hana awwal yoom fi kulli chahar wa la yoom al‑sabt.
» Wa hi gaalat leyah :
« Aafe bas. »
24 Wa hi chaddat al‑humaara wa gaalat le khaddaamha :
« Waddiini ajala !
Ma tagiif fi l‑derib kan ana ma gult leek cheyy. »
25 Wa hi machat wara nabi Allah fi jabal al‑Karmal.
Wa wakit nabi Allah chaafha min baʼiid gaal le khaddaamah Gihaazi :
« Di hi al‑mara al‑min hillit Chuunam.
26 Hassaʼ da,
gumm ajri laagiiha wa asʼalha guul leeha :
‹ Keef haalki ?
Raajilki aafe walla ?
Wa wileedki kula aafe walla ?
› » Wa hi gaalat :
« Aafe ! »
27 Wa wakit wassalat fi raas al‑jabal bakaan nabi Allah kamaan,
karabat rijileenah.
Wa Gihaazi garrab leeha achaan yitarrifha wa laakin nabi Allah gaal leyah :
« Khalliiha !
Hi haznaane wa Allah labbadah minni ma khabbaraani beyah. »
28 Wa khalaas,
hi gaalat leyah :
« Hal ana saʼalt sakhiir min siidi ?
Gabul da kula,
ana ma gult leek ma takdib leyi walla ? »
29 Wa Alyasaʼ gaal le Gihaazi :
« Gumm arbut sulbak wa chiil asaati di fi iidak wa amchi !
Wa kan lammeet maʼa naadum fi l‑derib,
ma tisallimah wa kan naadum sallamaak kula,
ma turudd leyah.
Wa khutt asaati di fi wijh al‑wileed. »
30 Wa amm al‑wileed gaalat :
« Nahlif be Allah al‑Hayy wa be hayaatak inta kadar ana ma namchi balaak inta min al‑bakaan da.
» Wa khalaas,
Alyasaʼ gamma macha maʼaaha.
31 Wa Gihaazi gaddam leehum wa khatta al‑asa fi wijih al‑wileed.
Wa laakin ma fi haraka wa la alaama hint haya.
Wa hu gabbal bakaan al‑nabi wa khabbarah wa gaal leyah :
« Al‑wileed ma gamma. »
32 Wa wakit Alyasaʼ wassal fi l‑beet,
ligi al‑wileed mayyit wa raagid fi sariirah.
33 Wa Alyasaʼ dakhal wa sadda al‑baab foogah maʼa l‑wileed wa chahad Allah.
34 Wa hu rikib fi l‑sariir wa anbatah min foog le l‑wileed wa lamma khachmah maʼa khachum al‑wileed wa uyuunah maʼa uyuun al‑wileed wa iideenah maʼa iideen al‑wileed.
Wa hu almattat min foog leyah lahaddi jisim al‑wileed himi.
35 Wa Alyasaʼ dalla min al‑sariir wa raayikh jaay wa jaay fi lubb al‑kuuzi wa baʼadeen,
gabbal almattat battaan min foog le l‑wileed.
Wa khalaas,
al‑wileed attach sabʼa marra wa fatah uyuunah.
36 Wa Alyasaʼ naadaah le Gihaazi wa gaal leyah :
« Naadi al‑mara di.
» Wa hu naadaaha.
Wa hi jaat le Alyasaʼ wa hu gaal leeha :
« Chiili wileedki. »
37 Wa hi jaat wa wagaʼat fi rijileenah wa sajadat.
Wa baʼad da,
chaalat wileedha wa machat.
Al‑churba al‑ma tincharib
38 Wa Alyasaʼ gabbal hillit Gilgaal.
Wa fi l‑wakit da,
juuʼ chadiid gaaʼid fi l‑balad.
Wa naas majmuuʼat al‑anbiya lammo wa gaaʼidiin giddaamah.
Wa Alyasaʼ gaal le khaddaamah :
« Jahhiz al‑burma al‑kabiire di wa sawwi churba le l‑anbiya. »
39 Wa waahid min al‑anbiya macha al‑kadaade achaan yifattich khadaar.
Wa hu ligi fagguus al‑kadaade wa mala khalagah be fawaakihah.
Wa wakit gabbal,
gattaʼaahum wa sabbaahum fi l‑burma al‑jahhazooha.
Wa ma fi naadum minhum yaʼarif al‑nabaat da hu chunu.
40 Wa anto al‑akil le l‑naas le yaakuluuh.
Wa laakin wakit humman daakhooh,
gammo yikooruku wa buguulu :
« Al‑moot gaaʼid fi lubb al‑burma,
ya nabi Allah !
» Wa humman ma gidro yaakuluuh.
41 Wa nabi Allah gaal :
« Jiibu leyi dagiig.
» Wa hu sabba al‑dagiig da fi l‑burma wa gaal :
« Antuuhum yaakuluuh.
» Achaan al‑churba battaan ma fasle.
Alyasaʼ anta akil le miya naas
42 Wa yoom waahid,
naadum ja min Baʼal Chaliicha.
Jaab le nabi Allah khubza min al‑intaaj al‑awwal wa da 20 khubza min dagiig al‑gameh al‑abyad wa gameh jadiid kula fi mukhlaatah.
Wa Alyasaʼ gaal le khaddaamah :
« Antiihum le l‑naas yaakulu. »
43 Wa khaddaamah gaal leyah :
« Kikkeef tidoor nigassimah le 100 naadum ?
» Wa Alyasaʼ gaal leyah :
« Antiihum le l‑naas yaakulu achaan daahu Allah gaal :
‹ Ayyi waahid yaakul wa yifaddilah.
› »
44 Wa khalaas,
al‑khaddaam gassam al‑akil da le l‑naas.
Wa kulluhum akalo lahaddi faddalooh kula.
Wa da bigi hasab kalaam Allah.