Iliyaas macha yigaabil al‑malik Akhaab
18
1 Wa baʼad muddit ayyaam katiiriin,
Allah hajja le Iliyaas fi l‑sana al‑taalta hana jafaaf wa gaal :
« Amchi gaddim nafsak le l‑malik Akhaab wa ana ninazzil matara fi wijh al‑ard. »
2 Wa khalaas,
Iliyaas gamma macha le yigaabil Akhaab.
Wa fi l‑wakit da,
al‑juuʼ bigi chadiid marra waahid fi madiinat al‑Saamira.
3 Wa Akhaab naada khaddaamah Ubadya hu al‑masʼuul fi gasrah.
Wa Ubadya da khaayif ziyaada min Allah.
4 Wa wakit Izabiil marit al‑malik Akhaab dammarat anbiya Allah,
Ubadya chaal minhum 100 wa labbadaahum fi karaakiir.
Wa gassamaahum khamsiin khamsiin wa ayyachaahum be khubza wa almi.
5 Wa Akhaab gaal le khaddaamah Ubadya :
« Amchi ruukh wa chiif kulla l‑uyuun al‑almi wa kulla l‑wudyaan al‑fi l‑balad.
Akuun talga gechch al‑niʼayyuchu beyah al‑kheel wa l‑bikhaal.
Wa be da,
maalna ma yumuut. »
6 Wa humman gassamooha le l‑balad di achaan yuruukhuuha kullaha ke.
Wa Akhaab macha wiheedah be derib waahid wa Ubadya kula macha wiheedah be derib aakhar.
7 Wa wakit Ubadya maachi,
lamma maʼa Iliyaas fi l‑derib.
Wa Ubadya irifah wa wagaʼ be wijhah fi l‑ard wa gaal :
« Akiid inta bas sayyidi Iliyaas walla ? »
8 Wa Iliyaas radda leyah wa gaal :
« Aywa,
da ana.
Amchi guul le siidak Akhaab :
‹ Daahu Iliyaas jaayi.
› »
9 Wa Ubadya gaal :
« Chunu al‑zanib al‑ana sawweetah achaan tisallimni fi iid Akhaab le yaktulni ?
10 Nahlif be Allah al‑Hayy Ilaahak wa niʼakkid leek kadar ma fi umma wa la mamlaka al‑siidi ma rassal naas le yifattuchuuk foogha.
Wa kan naas al‑umma di wa l‑mamlaka gaalo ma chaafook,
yihallufuuhum lahaddi yuguulu ma ligook.
11 Wa hassaʼ,
inta tuguul leyi :
‹ Amchi guul le siidak :
“Daahu Iliyaas jaayi.” ›
12 Wa wakit ana nufuut minnak,
Ruuh Allah yiwaddiik fi bakaan al‑ana ma naʼarfah.
Wa kan ana macheet wa khabbartah le Akhaab beek wa ma ligaak,
khalaas yaktulni.
Wa laakin ana abdak khaayif min Allah min ana sabi.
13 Ya sayyidi,
inta ma khabbarook be l‑cheyy al‑ana sawweetah wakit Izabiil gaaʼide taktul fi anbiya Allah da walla ?
Ana labbadt 100 min al‑anbiya dool wa gassamtuhum khamsiin khamsiin fi l‑karaakiir wa ayyachtuhum be khubza wa almi.
14 Wa hassaʼ,
inta tuguul leyi ‹ Amchi guul le siidak :
“Daahu Iliyaas jaayi.”
› Kan ke da,
hu ma yaktulni walla ? »
15 Wa khalaas,
Iliyaas radda leyah wa gaal :
« Nahlif be Allah al‑Hayy al‑Gaadir al‑ana gaaʼid naʼabudah wa niʼakkid leek kadar al‑yoom bas namchi nigaabil Akhaab. »
16 Wa Ubadya macha lihigah le Akhaab wa khabbarah.
Wa Akhaab macha achaan yigaabil Iliyaas.
17 Wa wakit Akhaab chaafah le Iliyaas,
gaal leyah :
« Da bas inta,
inta al‑jibt al‑barjaal le Bani Israaʼiil walla ? »
18 Wa Iliyaas radda leyah wa gaal :
« Ana ma jibt barjaal le Bani Israaʼiil.
Laakin inta wa aayilat abuuk bas jibtuuh achaan khalleetu wasaaya Allah wa taabaʼtu ilaahaat Baʼal.
19 Wa hassaʼ da,
rassil le kulla Bani Israaʼiil yaju yilimmu leyi fi jabal al‑Karmal.
Wa limm al‑urbuʼmiya wa khamsiin anbiya hana l‑ilaah Baʼal wa l‑urbuʼmiya anbiya hana l‑ilaaha Achiira al‑gaaʼidiin yaakulu min tarabeezit Izabiil marit al‑malik. »
Iliyaas wa anbiya Baʼal fi jabal Karmal
20 Wa khalaas,
Akhaab rassal naadaahum le kulla Bani Israaʼiil wa lamma al‑anbiya fi raas jabal al‑Karmal.
21 Wa fi l‑bakaan da,
Iliyaas garrab le kulla l‑chaʼab wa gaal :
« Le mata tamchu jaay wa jaay misil jaʼabaat al‑rahhaak ?
Kan Allah bas al‑Ilaah,
taabuʼuuh !
Kan Baʼal bas al‑ilaah,
taabuʼuuh !
» Wa laakin humman ma gidro raddo leyah kilme waahide kula.
22 Wa Iliyaas gaal leehum :
« Ana wiheedi bas faddalt min anbiya Allah laakin anbiya Baʼal humman 450.
23 Khalli yijiibu leena tiiraan itneen.
Wa anbiya Baʼal yiʼazzulu leehum toor waahid yadbahooh wa yigattuʼuuh wa yukhuttuuh fi raas al‑hatab laakin ma yiʼoogudu foogah naar.
Wa ana kula nisawwi nafs al‑cheyy be l‑toor al‑aakhar da.
Nukhuttah fi l‑madbah fi raas al‑hatab wa laakin ma niʼoogid foogah naar.
24 Wa intu asʼalo ilaahku wa ana kula nasʼal be usum Allah.
Wa l‑ilaah al‑yurudd fi l‑suʼaal da wa yiʼoogid al‑naar,
hu da bas al‑Ilaah al‑sahiih.
» Wa kulla l‑chaʼab gaalo :
« Kalaamak adiil. »
25 Wa khalaas,
Iliyaas gaal le anbiya Baʼal :
« Aʼazulu leeku waahid min al‑tiiraan dool wa jahhuzuuh intu bas al‑awwal achaan intu katiiriin.
Wa asʼalo ilaahku laakin ma tiʼoogudu foogah naar. »
26 Wa humman chaalo al‑toor al‑antooh leehum wa jahhazooh wa gammo yasʼalo be usum Baʼal min fajur lahaddi gaayle wa yuguulu :
« Ya Baʼal,
rudd leena !
» Laakin ma fi hiss wa la radd.
Wa humman gaaʼidiin yinattutu giddaam al‑madbah al‑addalooh.
27 Wa fi wakit al‑gaayle,
Iliyaas bada yichchammat fooghum wa gaal :
« Kooruku be hiss foog,
hu ilaah !
Akuun anchakhal walla khaayib walla saafar.
Akuun hu naayim,
khalli yugumm ! »
28 Wa humman gammo yikooruku ziyaada.
Wa misil fi aadithum,
bado yijarruhu jilidhum be suyuuf wa be huraab lahaddi damm yidaffig minhum.
29 Wa wakit al‑gaayle faatat,
humman gammo yitnabbaʼo be usum Baʼal lahaddi l‑wakit al‑yigaddumu foogah hadaaya hana achiiye.
Laakin humman ma ligo wa la radd wa la kilme wa la alaama.
30 Wa fi l‑bakaan da,
Iliyaas gaal le kulla l‑chaʼab :
« Garrubu leyi.
» Wa kulla l‑chaʼab garrabo leyah.
Wa hu addal madbah Allah al‑awwal haddamooh.
31 Wa Iliyaas chaal 12 hajar ale hasab adad gabaayil iyaal Yaakhuub hu al‑Allah hajja leyah wa gaal :
« Min al‑yoom,
yinaaduuk Israaʼiil. »*
32 Wa be l‑hujaar dool,
addal madbah le Allah.
Wa hawwag al‑madbah be nugra al‑tagdar tichiil 12 kooro almi.
33 Wa khalaas,
hu rassa al‑hatab wa dabah al‑toor wa gattaʼah wa khattaah fi raas al‑hatab.
*Wa baʼad da,
hu gaal :
« Amlo arbaʼa jiraar hana almi wa subbuuh fi l‑dahiiye al‑muharraga wa fi l‑hatab. »
34 Wa gaal battaan :
« Subbuuh marra taaniye.
» Wa humman sabbooh marra taaniye.
Wa gaal battaan :
« Subbuuh marra taalta.
» Wa humman sabbooh marra taalta.
35 Wa l‑almi jara wa mala al‑nugra al‑muhawwige al‑madbah.
36 Wa fi l‑wakit al‑yigaddumu foogah hadaaya al‑achiiye,
al‑nabi Iliyaas gaal :
« Ya Allah,
inta Allah Rabb juduudna Ibraahiim wa Ishaakh wa Yaakhuub.
Wa l‑yoom,
wassif le l‑naas kadar inta bas Ilaah Bani Israaʼiil.
Wa hasab kalaamak,
ana abdak sawweet kulla l‑cheyy da.
37 Ya Allah,
rudd leyi.
Rudd leyi achaan al‑chaʼab da yaʼarif kadar inta bas al‑Rabb Allah.
Wa inta bas al‑tigabbil al‑chaʼab da aleek. »
38 Wa tawwaali,
Allah nazzal naar min al‑sama.
Wa l‑naar akalat al‑dahiiye al‑muharraga wa l‑hatab wa l‑hujaar wa l‑ajaaj wa chirbat al‑almi al‑gaaʼid fi l‑nugra.
39 Wa wakit kulla l‑chaʼab chaafo al‑cheyy da,
wagaʼo kulluhum be wujuuhhum fi l‑ard wa gaalo :
« La Ilaah illa Allah !
La Ilaah illa Allah ! »
40 Wa Iliyaas gaal leehum :
« Karrubu kulla anbiya Baʼal wa khalli waahid minhum kula ma yinbalis.
» Wa khalaas,
karaboohum.
Wa Iliyaas nazal beehum fi waadi Khiichuun wa dabahaahum.
Iliyaas khabbar al‑malik be l‑matara
41 Wa baʼad al‑cheyy al‑kaan da,
Iliyaas gaal le Akhaab :
« Amchi aakul wa achrab achaan ana gaaʼid nasmaʼ dagdaag hana matara. »
42 Wa Akhaab macha le yaakul wa yachrab.
Wa laakin Iliyaas macha talaʼ fi raas jabal al‑Karmal wa sajad wa dassa raasah ambeenaat rikabbah.
43 Wa baʼad da,
Iliyaas gaal le khaddaamah :
« Atlaʼ foog wa chiif ale l‑bahar al‑Abyad.
» Wa khaddaamah talaʼ wa chaaf wa gaal leyah :
« Ma chift cheyy.
» Wa sabʼa marraat Iliyaas gaal leyah :
« Amchi chiif battaan. »
44 Wa fi l‑marra al‑saabʼe al‑khaddaam gaal :
« Daahu chift sahaabaay sakhayre gadur al‑kaff gaaʼide tatlaʼ min al‑bahar.
» Wa khalaas,
Iliyaas gaal le khaddaamah :
« Amchi guul le Akhaab :
‹ Chidd kheelak wa amchi gubbaal al‑matara ma tiwaggifak.
› »