16
1 Wa Allah hajja le l‑nabi Yaahu wileed Hanaani kalaam bukhuss al‑malik Baʼaacha wa gaal :
2 « Inta al‑ma tisaawi cheyy kula,
ana darrajtak wa sawweetak kabiir hana chaʼabi Bani Israaʼiil.
Wa laakin inta taabaʼt derib Yarubaʼaam wa lazzeet chaʼabi Bani Israaʼiil fi l‑zunuub wa be zunuubhum da,
humman khaddabooni.
3 Wa hassaʼ da,
ana nuguchchak inta wa aayiltak.
Wa aayiltak tabga misil aayilat Yarubaʼaam wileed Nabaat.
4 Wa ayyi naadum min aayilat Baʼaacha al‑yumuut fi lubb al‑hille,
al‑kulaab yaakuluuh.
Wa l‑yumuut fi l‑kadaade,
tuyuur al‑sama yaakuluuh. »
5 Wa l‑baagi min amal Baʼaacha wa kulla cheyy al‑sawwaah wa faraasiiytah maktuubiin fi kitaab taariikh muluuk Bani Israaʼiil.
6 Wa Baʼaacha maat wa lihig abbahaatah wa dafanooh fi hillit Tirsa.
Wa wileedah Iila hakam fi badalah.
7 Wa Allah hajja be waasitat al‑nabi Yaahu wileed Hanaani le Baʼaacha wa aayiltah be sabab kulla l‑fasaala al‑khaddabo beeha Allah wa l‑achya al‑sawwoohum be iidhum le yabgo sawa sawa misil Yarubaʼaam wa aayiltah.
Wa achaan Baʼaacha dammar aayilat Yarubaʼaam.
Iila bigi malik fi Israaʼiil
8 Wa fi sanit 26 hana hukum Aasa malik mamlakat Yahuuza,
Iila wileed Baʼaacha bigi malik fi mamlakat Israaʼiil fi hillit Tirsa.
Wa hakam santeen.
9 Wa waahid min masaaʼiilah al‑usmah Zimri atmarrad diddah.
Wa hu da khaayid deech Iila al‑indah masʼuuliiye fi nuss min arabaat al‑harib.
Wa wakit Iila gaaʼid yachrab wa yaskar fi Tirsa fi beet Arsa al‑hu masʼuul fi gasir al‑malik,
10 Zimri dakhal leyah wa darabah wa katalah.
Wa da fi sanit 27 hana hukum Aasa malik mamlakat Yahuuza.
Wa Zimri hakam fi badal Iila.
11 Wa min gaʼad fi kursi al‑muluk,
katal kulla aayilat Baʼaacha.
Ma khalla naadum waahid kula min al‑dukuura wa la min aayiltah wa la min rufgaanah.
12 Wa hasab kalaam Allah al‑gaalah didd Baʼaacha be waasitat al‑nabi Yaahu,
Zimri dammar kulla aayilat Baʼaacha.
13 Wa da be sabab kulla zunuub Baʼaacha wa wileedah Iila.
Humman aznabo wa lazzo naas mamlakat Israaʼiil fi l‑zunuub.
Wa be da,
khaddabo Allah Ilaah Bani Israaʼiil be ibaadat al‑asnaam.
14 Wa l‑baagi min amal Iila wa kulla cheyy al‑sawwaah maktuubiin fi kitaab taariikh muluuk Bani Israaʼiil.
Zimri bigi malik fi Israaʼiil
15 Wa fi sanit 27 hana hukum Aasa malik mamlakat Yahuuza,
Zimri bigi malik wa hakam sabʼa yoom fi hillit Tirsa.
Wa fi l‑wakit da,
askar mamlakat Israaʼiil gaʼado mugaabil hillit Gibbatuun al‑fi iid al‑Filistiyiin.
16 Wa l‑askar ligo khabar kadar Zimri atmarrad didd al‑malik wa katalah.
Wa fi l‑yoom da,
tawwaali humman darrajooh le Umri khaayid al‑deech malik fi Bani Israaʼiil.
17 Wa khalaas,
Umri wa kulla askar Bani Israaʼiil gammo min hillit Gibbatuun wa jo haasaro hillit Tirsa.
18 Wa wakit Zimri irif kadar al‑hille di chaalooha,
khalaas dakhal fi gasir hana l‑malik.
Wa tachcha gasir al‑malik wa nafsah kula wa maat.
19 Wa da bigi achaan zunuubah wakit sawwa al‑fasaala giddaam Allah.
Wa hu taabaʼ kulla l‑fasaala al‑sawwaaha Yarubaʼaam al‑lazza naas mamlakat Israaʼiil fi l‑zunuub.
20 Wa l‑baagi min amal Zimri wa muʼaamaratah maktuubiin fi kitaab taariikh muluuk Bani Israaʼiil.
21 Wa baʼad moot Zimri,
chaʼab mamlakat Israaʼiil angasamo bakaanteen.
Waahidiin taabaʼo Tibni wileed Giinat le yidarrujuuh malik.
Wa waahidiin taabaʼo Umri.
22 Wa l‑naas al‑taabaʼo Umri khilbo naas Tibni wileed Giinat.
Wa Tibni maat wa Umri bigi malik.
Umri bigi malik fi Israaʼiil
23 Wa fi sanit 31 hana hukum Aasa malik mamlakat Yahuuza,
Umri bigi malik fi mamlakat Israaʼiil wa hakam 12 sana.
Wa gabul da,
hu hakam 6 sana fi hillit Tirsa.
24 Wa hu chara min Saamar jabal be 70 kiilo fudda.
Wa bana madiina fi raas al‑jabal da wa gawwaaha wa sammaaha madiinat al‑Saamira.
Wa da l‑usum al‑awwal hana Saamar siid al‑jabal.
25 Wa Umri sawwa al‑fasaala giddaam Allah ziyaada min kulla l‑muluuk al‑hakamo gablah.
26 Hu taabaʼ kulla duruub Yarubaʼaam wileed Nabaat al‑lazza naas mamlakat Israaʼiil fi l‑zunuub.
Wa be da,
khaddabo Allah Ilaah Bani Israaʼiil be ibaadat al‑asnaam.
27 Wa l‑baagi min amal Umri wa kulla cheyy al‑sawwaah wa faraasiiytah maktuubiin fi kitaab taariikh muluuk Bani Israaʼiil.
28 Wa Umri maat wa lihig abbahaatah wa dafanooh fi madiinat al‑Saamira.
Wa wileedah Akhaab hakam fi badalah.
Akhaab bigi malik fi Israaʼiil
29 Wa fi sanit 38 hana hukum Aasa malik mamlakat Yahuuza,
Akhaab wileed Umri bigi malik fi mamlakat Israaʼiil.
Wa Akhaab wileed Umri hakam 22 sana fi mamlakat Israaʼiil fi madiinat al‑Saamira.
30 Wa Akhaab wileed Umri sawwa al‑fasaala giddaam Allah ziyaada min kulla l‑muluuk al‑hakamo gablah.
31 Wa hu taabaʼ al‑zunuub al‑sawwaahum Yarubaʼaam wileed Nabaat.
Wa da kula,
hu chaafah chiyya wa sawwa ziyaada minnah !
Akhaab macha akhadaaha le Izabiil bineeyit Atbaʼal malik balad Seeda wa sajad le ilaah al‑usmah Baʼal wa abadah.
32 Wa fi l‑Saamira,
bana madbah wa beet le yaʼabudu foogah ilaah Baʼal.
33 Wa Akhaab khazza iidaan le ibaadat Achiira le yikhaddib Allah Ilaah Bani Israaʼiil ziyaada min kulla muluuk Israaʼiil al‑hakamo gablah.
34 Wa fi waktah,
Hiyiil al‑min hillit Beet Iil gamma yabni hillit Ariiha battaan.
Wa wakit bada yukhutt asaasha,
wileedah al‑bikir Abiraam maat.
Wa battaan wakit gaaʼid yidiss biibaan al‑durdur,
wileedah al‑taani al‑usmah Saguub kula maat.
Wa da hasab kalaam Allah al‑gaalah zamaan be waasitat al‑nabi Yachuuʼ wileed Nuun.*