Suleymaan marag min derib Allah
11
1 Wa l‑malik Suleymaan habba awiin katiiraat ajnabiiyaat bala bineeyit Firʼoon.
Hu habba awiin min balad Muwaab wa Ammuun wa Adoom wa Seeda wa min balad al‑Hittiyiin.
2 Wa l‑awiin deel min al‑umam al‑Allah gaal le Bani Israaʼiil :
« Angarʼu ma taakhudu min al‑umam dool wa humman kula ma yaakhudu minku achaan yamurguuku min al‑derib wa taʼabudu ilaahaathum.
» Wa laakin al‑malik Suleymaan habba awiin min al‑umam dool wa anrabat maʼaahum.
3 Wa hu akhad 700 awiin mayaarim wa chaal 300 sirriiyaat kula.
Wa l‑awiin deel maragannah min al‑derib.
4 Wa wakit Suleymaan chayyab marra waahid,
al‑awiin deel maragannah min al‑derib wa hu abad ilaahaat aakhariin.
Wa be sabab da,
hu ma abad Allah Ilaahah be galib mukhlis misil abuuh Dawuud.
5 Wa l‑malik Suleymaan abad Achtaruut ilaahat naas balad Seeda wa Milkuum al‑sanam al‑muharram hana Bani Ammuun.
6 Wa Suleymaan sawwa al‑fasaala giddaam Allah wa hu ma taabaʼ Allah misil abuuh Dawuud.
7 Wa fi l‑wakit da,
Suleymaan addal bakaan aali fi raas al‑jabal al‑mugaabil Madiinat al‑Khudus le Kamuuch al‑sanam al‑muharram hana naas Muwaab wa le Muulak al‑sanam al‑muharram hana Bani Ammuun.
8 Wa hu sawwa misil da le ilaahaat hana kulla awiinah al‑ajnabiiyaat.
Wa hinna yiharrigan bakhuur wa yigaddiman dahaaya muharragiin le ilaahaathin.
Natiijat al‑khata hana Suleymaan
9 Wa Allah khidib didd Suleymaan achaan hu aba ma taabaʼ al‑derib hana Allah Ilaah Bani Israaʼiil al‑baan leyah marrateen.
10 Wa amarah ma yitaabiʼ ilaahaat aakhariin.
Wa laakin Suleymaan ma tabbag amur Allah.
11 Wa fi chaan da,
Allah gaal le Suleymaan :
« Inta ma hafadt muʼaahadati wa churuuti al‑ana amartak beehum.
Khalaas,
ana naglaʼ minnak mulkak wa nanti le waahid min khaddaamiinak.
12 Wa ana ma naglaʼah fi hayaatak fi chaan abuuk Dawuud.
Laakin naglaʼ al‑muluk da min iid wileedak.
13 Wa ana ma naglaʼ kulla l‑mamlaka di min wileedak.
Laakin nikhalliih yahkim fi gabiila waahide bas.
Wa da fi chaan Dawuud abdi wa fi chaan Madiinat al‑Khudus al‑madiina al‑ana azaltaha. »
Udwaan Suleymaan
14 Wa khalaas,
Allah gawwam adu le Suleymaan.
Wa hu Haddaad al‑Adoomi min zurriiyit malik al‑Adoomiyiin.
15 Zamaan,
Dawuud haarab mamlakat Adoom.
Wa wakit Yuwaab khaayid deechah macha dafan kulla janaazaat al‑naas al‑maato fi l‑harib,
hu katal kulla naas balad Adoom al‑dukuura.
16 Wa Yuwaab wa kulla Bani Israaʼiil gaʼado hinaak sitte chahar lahaddi kammalo kulla l‑dukuura min balad Adoom.
17 Wa fi l‑wakit da,
Haddaad lissaaʼ sabi.
Wa hu arrad macha Masir maʼa waahidiin min naas balad Adoom min khaddaamiin abuuh.
18 Wa humman gammo min Midyaan wa macho Faaraan wa chaalo maʼaahum naas min Faaraan.
Wa baʼad da,
macho Masir bakaan Firʼoon malik Masir.
Wa hu antaah le Haddaad beet wa maʼaach wa ard.
19 Wa Haddaad ligi rida min Firʼoon wa jawwazah hamaatah akhut martah Tahfaniis al‑meeram.
20 Wa akhut Tahfaniis wildat wa jaabat wileed le Haddaad wa sammaah Ganuubat.
Wa Tahfaniis faradatah wa chaalatah fi beet Firʼoon wa Ganuubat kibir hinaak maʼa awlaad Firʼoon.
21 Wa wakit Haddaad fi Masir simiʼ kadar Dawuud maat wa lihig abbahaatah wa Yuwaab khaayid al‑deech kula maat,
khalaas Haddaad gaal le Firʼoon :
« Khalliini namchi baladi. »
22 Wa Firʼoon gaal leyah :
« Min inta gaaʼid maʼaayi da,
chunu gassar leek ?
Maala tidoor tamchi baladak ?
» Wa Haddaad radda leyah wa gaal :
« Cheyy ma gassar leyi laakin khalliini namchi bas. »
23 Wa l‑Rabb gawwam adu aakhar le Suleymaan,
usmah Rizuun wileed Aliyaadaʼ al‑arrad min beet siidah Hadadʼaazar malik Suuba.
24 Wa Rizuun lamma majmuuʼa hana rujaal haraamiyiin wa bigi kabiirhum.
Wa wakit Dawuud gamma katal naas Hadadʼaazar,
Rizuun wa naasah macho madiinat Dimachkh wa gaʼado hinaak wa hakamo foogha.
25 Wa Rizuun bigi adu le Bani Israaʼiil fi kulla muddit hayaat Suleymaan.
Wa hu kirih Bani Israaʼiil ziyaada min al‑fasaala al‑sawwaah Haddaad.
Wa Rizuun hakam fi balad Araam.
Yarubaʼaam atmarrad didd Suleymaan
26 Wa fiyah raajil waahid usmah Yarubaʼaam wileed Nabaat min gabiilat Afraayim wa hu min hillit Sariida.
Wa ammah usumha Saruuʼa wa hi armala.
Wa Yarubaʼaam da hu awwal waahid min khaddaamiin Suleymaan wa baʼadeen,
gamma atmarrad diddah.
27 Wa daahu al‑sabab al‑gawwam Yarubaʼaam le yitmarrad.
Da fi wakit al‑Suleymaan gaaʼid yabni durdur al‑difaaʼ al‑sammooh Millu wa yikaddik al‑khurma al‑fi durdur madiinat Dawuud abuuh.
28 Wa Yarubaʼaam da hu raajil faaris.
Wa Suleymaan chaaf al‑sabi da wakit gaaʼid yakhdim wa hu kallafah le yiraakhib al‑khidme al‑ijbaariiye hana zurriiyit Yuusuf.
29 Wa yoom waahid,
Yarubaʼaam marag min Madiinat al‑Khudus wa fi l‑derib lamma maʼa l‑nabi Akhiiya hana hillit Chiilooh.
Wa Akhiiya da laabis jard jadiid wa humman lammo itneen bas fi l‑kadaade.
30 Wa Akhiiya chaal al‑jard al‑jadiid al‑laabsah da wa charratah atnaachar gitʼe.
31 Wa gaal le Yarubaʼaam :
« Chiil al‑achara gitʼe dool le nafsak achaan daahu Allah Ilaah Bani Israaʼiil gaal :
‹ Ana naglaʼ al‑muluk min iid Suleymaan wa nantiik inta al‑achara gabaayil dool.
32 Wa gabiila waahide bas tifaddil leyah wa da fi chaan abdi Dawuud wa fi chaan Madiinat al‑Khudus al‑ana azaltaha min kulla gabaayil Bani Israaʼiil.
33 Wa nisawwi misil da achaan humman abooni wa sajado le Achtaruut ilaahat naas balad Seeda wa le Kamuuch sanam naas balad Muwaab wa le Milkuum sanam Bani Ammuun.
Wa humman ma taabaʼo derbi wa la sawwo al‑adiil giddaami wa la tabbago churuuti wa gawaaniini misil Dawuud abu Suleymaan.
34 Wa abdi Dawuud al‑ana azaltah,
hu hafad wasiiyaati wa churuuti.
Wa be sabab da,
ana ma naglaʼ al‑muluk min iid Suleymaan.
Nikhalli yamluk fi kulla muddit hayaatah.
35 Laakin ana naglaʼ al‑muluk min iid wileed Suleymaan wa l‑achara gabaayil dool nantiihum leek inta.
36 Wa ana nikhalli gabiila waahide le wileed Suleymaan fi chaan abdi Dawuud.
Waajib daayman yukuun naadum waahid min zurriiytah fi l‑muluk fi Madiinat al‑Khudus al‑ana azaltaha le nukhutt foogha usmi.
37 « ‹ Wa kan leek inta kamaan,
ana bas azaltak wa tagdar tamluk misil galbak yidoorah.
Wa tabga malik fi Bani Israaʼiil.
38 Wa kan inta tasmaʼ kulla cheyy al‑amartak wa titaabiʼ derbi adiil wa tisawwi al‑adiil giddaami wa titabbig churuuti wa wasiiyaati misil Dawuud abdi tabbagaahum,
ana nukuun maʼaak wa nisabbit mulkak misil sabbatt muluk Dawuud.
Wa nantiik al‑achara gabaayil hana Bani Israaʼiil.
39 Wa be misil da,
ana nijiib al‑ihaana fi zurriiyit Dawuud wa laakin al‑ihaana di ma tagood fooghum daayman.
› »
40 Wa baʼad da,
Suleymaan fattachah le Yarubaʼaam achaan yaktulah.
Wa laakin Yarubaʼaam arrad macha bakaan Chiichakh malik Masir wa hu gaʼad hinaak lahaddi Suleymaan maat.
Moot Suleymaan
41 Wa l‑baagi min amal Suleymaan wa kulla cheyy al‑sawwaah wa hikmatah maktuubiin fi kitaab aʼmaal Suleymaan.
42 Wa Suleymaan hakam fi Madiinat al‑Khudus wa fi kulla balad Israaʼiil muddit 40 sana.
43 Wa baʼad da,
Suleymaan maat wa lihig abbahaatah wa dafanooh fi madiinat Dawuud abuuh.
Wa wileedah Rahabʼaam hakam fi badalah.