Suleymaan bana gasrah
7
1 Wa Suleymaan bana gasrah wa kammalah fi muddit 13 sana.
2 Wa hu bana beet al‑sammooh Khaabat Lubnaan wa tuulah 100 duraaʼ wa urdah 50 duraaʼ wa tuulah foog kamaan 30 duraaʼ.
Wa fi lubbah,
hu sawwa arbaʼa roog hana amad min hatab al‑arz wa fi raashum,
khatta maraadiis kula min hatab al‑arz.
3 Wa l‑maraadiis dool adadhum 45 wa gaaʼidiin fi talaata roog wa ayyi roog indah 15 maraadiis al‑gaaʼidiin fi raas al‑amad.
Wa hu sadda al‑maraadiis dool be khachab al‑arz.
4 Wa fi ayyi jiihe hana l‑beet,
sawwo talaata roog hana chabaabiik be hatabhum.
Wa rakkabo al‑chabaabiik dool mulgaabiliin al‑waahid le l‑aakhar.
5 Wa kulla l‑biibaan wa l‑chabaabiik wa hatabhum al‑yirakkubuuhum foogah,
chakilhum murabbaʼ.
Wa l‑chabaabiik dool mulgaabiliin ambeenaathum ale talaata roog.
6 Wa Suleymaan sawwa baranda al‑tuulha 50 duraaʼ wa urdaha 30 duraaʼ wa banaaha be amad.
Wa bana khurfit al‑madkhal wa sabbatha be amad wa sawwa baabha be giddaam.
7 Wa battaan bana baranda aakhara al‑yukhuttu foogha kursi al‑muluk wa da l‑bakaan al‑yisawwi foogah al‑chariiʼa.
Wa l‑bakaan da,
hu saddaah be khachab al‑arz min tihit lahaddi foog.
8 Wa l‑beet al‑yaskun foogah,
banooh fi fadaay aakhara wa hu bichaabih beet Khaabat Lubnaan.
Wa le martah bineeyit Firʼoon malik Masir,
Suleymaan bana beet al‑hu kula bichaabih beet Khaabat Lubnaan.
9 Wa kulla l‑buyuut dool wa l‑daraadir wa l‑fadaay al‑kabiire min al‑asaas lahaddi l‑maraadiis,
banoohum be hujaar samhiin wa magtuuʼiin.
Wa humman gataʼoohum be munchaar be giddaam wa be wara.
10 Wa le l‑asaas,
astaʼmalo hujaar kubaar wa samhiin al‑tuulhum ma sawa.
Waahidiin 10 duraaʼ wa waahidiin 8 duraaʼ.
11 Wa fi raas al‑asaas da,
khatto hujaar samhiin magtuuʼiin hasab al‑magaas al‑waajib wa hatab al‑arz.
12 Wa l‑fadaay al‑kabiire,
hawwagooha be durdur al‑indah talaata roog hana hujaar magtuuʼiin wa fi raashum,
indah roog waahid hana hatab al‑arz.
Wa da misil al‑fadaay al‑dakhlaaniiye wa khurfit al‑madkhal hana beet Allah.
Huuraam sanaʼ khumaam beet Allah
13 Wa l‑malik Suleymaan rassal jaabah le Huuraam min balad Suur.
14 Wa Huuraam da,
hu wileed hana mara armala wa hi min gabiilat Naftaali wa abuuh min balad Suur.
Wa hu indah khibra wa fihim wa maʼrafa fi khidmit al‑nahaas.
Hu ja bakaan al‑malik Suleymaan wa sawwa leyah kulla khidimtah.
Huuraam sanaʼ amad tineen
15 Wa Huuraam sanaʼ amad itneen hana nahaas wa tuul hana ayyi waahid 18 duraaʼ wa l‑daayira hana ayyi waahid indaha 12 duraaʼ.
16 Wa sanaʼ ruuse hana nahaas al‑yukhuttuuhum foog fi l‑amad dool wa ayyi waahid min al‑ruuse dool tuulah 5 duraaʼ.
17 Wa jammal al‑amad dool be salaasil hana nahaas madfuuriin wa khattaahum foog fi raas al‑amad dool.
Wa ayyi amuud indah sabʼa salaasil.
18 Wa battaan sanaʼ be nahaas roogeen hana rummaan wa allaghum fi l‑salaasil wa sadda beehum raas al‑amuud al‑waahid.
Wa sawwa nafs al‑cheyy be l‑amuud al‑taani.
19 Wa le l‑amad hana l‑madkhal dool,
sanaʼ leehum ruuse aakhariin wa ayyi raas tuulah 4 duraaʼ.
Wa l‑ruuse dool bichaabuhu nuwwaar al‑sitteeb.
20 Wa foog min ruuse al‑amad,
fiyah bakaan takhiin ziyaada.
Wa l‑bakaan da faayit al‑salaasil al‑muʼallagiin fooghum 200 rummaan al‑muhawwigiin ruuse al‑amad.
21 Wa Huuraam khatta al‑amad dool giddaam khurfit al‑madkhal hana beet Allah.
Al‑amuud al‑waahid,
khattaah be l‑zeene wa sammaah Yaakiin (maʼanaatah Allah yisabbit).
Wa l‑amuud al‑taani,
khattaah be l‑isra wa sammaah Buʼaaz (maʼanaatah al‑gudra min Allah).
22 Wa l‑ruuse hana l‑amad dool bichaabuhu nuwwaar al‑sitteeb.
Wa be misil da,
Huuraam kammal khidmit al‑amad.
Huuraam sanaʼ hoot kabiir
23 Wa Huuraam sanaʼ hoot kabiir mudawwar hana nahaas.
Wa khachmah yisaawi 10 duraaʼ min tarafah le tarafah.
Wa tuulah foog yisaawi 5 duraaʼ wa daayirah kamaan 30 duraaʼ.
24 Wa jammal al‑hoot be bukhas al‑sanaʼaahum be nahaas.
Fi ayyi duraaʼ,
sawwa 10 bukhas wa da,
fi kulla daayira al‑hoot.
Wa l‑bukhas dool sanaʼaahum ale roogeen.
Wa humman wa l‑hoot kulluhum ke sunʼa waahide bas.
25 Wa l‑hoot da khattooh fi 12 tiiraan hana nahaas.
Wa l‑tiiraan dool muwajjihiin ale l‑arbaʼa jiihaat.
Talaata muwajjihiin ale jiihat al‑munchaakh wa talaata ale jiihat al‑kharib wa talaata ale jiihat al‑wati wa talaata ale jiihat al‑sabaah.
Wa duhuurhum daakhal tihit al‑hoot.
26 Wa khachum al‑hoot da tukhnah yisaawi arbaʼa usbaʼ wa khachmah misil nuwwaar al‑sitteeb.
Wa l‑hoot da yichiil 200 birmiil hana almi.
Huuraam sanaʼ achara hiitaan
27 Wa Huuraam sanaʼ achara hiitaan mutaharrikiin min nahaas wa ayyi waahid tuulah 4 duraaʼ wa urdah 4 duraaʼ wa tuulah foog kamaan 3 duraaʼ.
28 Wa daahu kikkeef sanaʼ al‑hiitaan al‑mutaharrikiin dool.
Sanaʼaahum be safaayih hana nahaas al‑bigi misil asaas wa khatta leehum hawaadir.
29 Wa sanaʼ fi l‑safaayih ambeen al‑hawaadir dool suwar hana diidaan wa tiiraan wa makhluugiin samaawiyiin.
Wa be foog wa be tihit le l‑diidaan wa l‑tiiraan,
jammalaahum be zuhuur muddoodaliin.
30 Wa ayyi asaas indah arbaʼa ajalaat hana nahaas murakkabiin fi arbaʼa hawaadir hana nahaas al‑musabbatiin fi l‑arbaʼa arkaan hana l‑asaas.
Wa l‑hawaadir maʼa l‑asaas,
kulluhum ke sunʼa waahide bas wa l‑ajalaat ma lihgo al‑bakaan al‑mujammal be zuhuur.
31 Wa fi raas ayyi asaas,
fiyah fatha mudawwara tuulha foog duraaʼ wa urdaha duraaʼ wa nuss wa da l‑bakaan al‑yukhuttu foogah al‑hoot.
Wa khachum al‑fatha al‑mudawwara da,
nagacho foogah suwar.
Wa laakin safaayih al‑asaas da murabbaʼiin ma mudawwariin.
32 Wa l‑arbaʼa ajalaat dool gaaʼidiin be tihit marbuutiin fi safaayih al‑asaas wa l‑hawaadir al‑murabbatiin fooghum al‑ajalaat maargiin jaay wa jaay le l‑asaas wa tuul al‑ajalaat foog duraaʼ wa nuss.
33 Wa l‑ajalaat dool misil ajalaat hana arabaat al‑harib.
Al‑hawaadir wa kulla cheyy al‑fooghum,
sanaʼaahum min nahaas.
34 Wa fi arbaʼa amad masnuuʼiin fi l‑arbaʼa arkaan wa kulluhum ke sunʼa waahide maʼa l‑asaas.
35 Wa l‑bakaan al‑foog hana ayyi asaas mujammal be taaj mudawwar tuulah nuss duraaʼ.
Wa l‑bakaan da,
indah massaaka wa safaayih hana nahaas wa humman kulluhum ke sunʼa waahide maʼa l‑asaas.
36 Wa ayyi bakaan faadi fi l‑massaaka wa l‑safaayih,
hu jammalaahum be suwar hana makhluugiin samaawiyiin wa diidaan wa chadar nakhal wa zuhuur fi kulla daayir al‑asaas.
37 Wa be misil da,
hu sawwa al‑asaas dool be nahaas wa kulluhum induhum nafs al‑sunʼa wa nafs al‑tuul wa nafs al‑hajim.
38 Wa sawwa achara hiitaan hana nahaas.
Wa ayyi hoot tuulah foog yisaawi 4 duraaʼ wa yichiil 4 birmiil almi.
Wa ayyi hoot yukhuttuuh fi raas asaas waahid.
39 Wa l‑hiitaan al‑mutaharrikiin al‑khamsa khattaahum be nuss al‑zeene hana l‑beet al‑mukhaddas wa l‑hiitaan al‑khamsa al‑aakhariin kamaan khattaahum be nuss al‑isra.
Wa laakin al‑hoot al‑kabiir kamaan khattaah be nuss al‑zeene hana l‑beet fi ruknah mugaabil wati sabaah.
Huuraam sanaʼ muʼiddaat min nahaas
40 Wa Huuraam sanaʼ hiitaan wa feelaat wa kiisaan.
Wa hu kammal kulla l‑khidme hana beet Allah al‑kallafah beeha al‑malik Suleymaan.
41 Wa hu sanaʼ
al‑amad al‑itneen
wa ruuseehum al‑khattaahum fi raas al‑amad
wa l‑silsilateen hana nahaas al‑madfuuriin al‑khattaahum fi ruuse al‑amad dool
42 wa l‑urbuʼmiya rummaan al‑muʼallagiin roogeen fi l‑silsilateen hana nahaas al‑madfuuriin al‑khattaahum fi ruuse al‑amad dool
43 wa l‑achara asaas
wa l‑achara hiitaan al‑khattaahum fooghum
44 wa l‑hoot al‑kabiir al‑wahiid
wa l‑atnaachar tiiraan al‑tihtah
45 wa l‑hiitaan wa l‑feelaat wa l‑kiisaan.
Kulla l‑muʼiddaat dool,
Huuraam sanaʼaahum min nahaas nagi le beet Allah be amur al‑malik Suleymaan.
46 Wa l‑malik amar yasnaʼo kulla l‑muʼiddaat dool fi gawaalib hana tiine fi turaab bahar al‑Urdun ambeen Sukkuut wa Sartaan.
47 Wa Suleymaan sawwa muʼiddaat katiiriin marra waahid lahaddi naadum ma yagdar yaʼarif wazin al‑nahaas al‑sawwoohum beyah.
Al‑muʼiddaat hana dahab
48 Wa battaan kula Suleymaan sawwa muʼiddaat aakhariin le beet Allah.
Wa humman
mukhbar al‑bakhuur hana l‑dahab
wa l‑tarabeeza hana l‑dahab al‑yigaddumu foogha al‑khubza le Allah
49 wa l‑achara faanuus min dahab saafi al‑khattaahum giddaam al‑bakaan al‑mukhaddas marra waahid,
al‑khamsa be nuss al‑zeene wa l‑khamsa al‑aakhariin be nuss al‑isra
wa l‑zuhuur wa l‑tiyeesaat le l‑naar wa l‑kalaaliib kulluhum ke min dahab
50 wa l‑mawaaʼiin wa l‑sakaakiin wa l‑kiisaan wa l‑sufar wa khammaamaat al‑naar kulluhum ke min dahab saafi
wa l‑hadiid al‑musabbit al‑biibaan hana l‑bakaan al‑mukhaddas marra waahid wa l‑hadiid al‑musabbit al‑biibaan hana beet Allah kulluhum ke min dahab.
51 Wa wakit kulla l‑khidme hana beet Allah kammalat khalaas,
al‑malik Suleymaan jaab kulla cheyy al‑abuuh Dawuud khassasah misil al‑fudda wa l‑dahab wa l‑mawaaʼiin wa khattaahum fi l‑makhaazin hana beet Allah.