Huuchaay battal wasaaya Akhituufal
17
1 Wa baʼad da,
Akhituufal gaal le Abchaluum :
« Min fadlak,
khalliini naʼazil 12 000 raajil wa namchi wara Dawuud fi l‑leele di bas.
2 Ana nikhaffilah wakit hu ayyaan wa ma indah gudra.
Wa ana nibarjilah wa kulla l‑chaʼab al‑maʼaayah yiʼarrudu.
Wa khalaas,
ana naktulah hu wiheedah.
3 Wa be misil da,
nilimm kulla chaʼabah leek misil awwal al‑chaʼab lammo wara l‑naadum al‑inta gaaʼid tifattichah.
Wa be da,
kulla l‑chaʼab yukuunu fi l‑salaama. »
4 Wa Abchaluum wa kulla chuyuukh Bani Israaʼiil muwaafgiin fi l‑kalaam da.
5 Wa Abchaluum gaal :
« Naaduuh le Huuchaay al‑min hillit Arki achaan hu kula yantiina fikrah. »
6 Wa Huuchaay ja le Abchaluum.
Wa Abchaluum hajja leyah be l‑kalaam al‑Akhituufal gaalah leyah.
Wa saʼalah wa gaal :
« Hal nitabbugu kalaamah walla ?
Kan la kamaan,
antiina fikrak. »
7 Wa Huuchaay gaal le Abchaluum :
« Fi l‑marra di,
wasiiyat Akhituufal ma adiile. »
8 Wa Huuchaay gaal battaan :
« Inta taʼarif abuuk wa rujaalah,
humman furraas wa khatiiriin misil mart al‑duud al‑waddarat iyaalha fi l‑khala.
Wa abuuk raajil muhaarib,
ma yunuum maʼa l‑chaʼab.
9 Wa akiid,
hassaʼ hu gaaʼid mullabbid fi karkuur aw bakaan aakhar.
Wa kan al‑harib bada wa katalo minnina,
naas aakhariin yasmaʼooh wa yuguulu :
‹ Al‑naas al‑gaaʼidiin maʼa Abchaluum anhazamo. ›
10 Wa be da,
naadum fahal al‑galbah misil galib al‑duud kula yabga kaslaan.
Achaan kulla Bani Israaʼiil yaʼarfu kadar abuuk faaris wa indah maʼaayah rujaal fahaliin.
11 Wa di hi wasiiyti ana.
Limm kulla Bani Israaʼiil maʼaak min Daan fi l‑munchaakh lahaddi Biir Sabʼa fi l‑wati.
Wa humman yilimmu katiiriin misil ramla hana khachum al‑bahar.
Wa be da,
inta zaatak tamchi maʼaahum fi l‑harib.
12 Wa aniina nalhagooh le Dawuud fi ayyi bakaan al‑hu mullabbid foogah.
Wa nanzulu foogah misil al‑matar al‑yanzil fi l‑ard.
Wa be da,
naadum waahid kula minhum ma yifaddil wa la hu wa la rujaalah al‑maʼaayah.
13 Wa kan hu arrad wa dakhal fi hille waahide,
kulla Bani Israaʼiil yichiilu hubaal yarbutu daraadirha wa yukurruuha wa yarmuuha fi l‑waadi lahaddi ma yifaddil minha cheyy. »
14 Wa khalaas,
Abchaluum wa kulla Bani Israaʼiil gaalo :
« Wasiiyat Huuchaay al‑min hillit Arki akheer min wasiiyat Akhituufal.
» Wa be da,
Allah fachchal al‑wasiiye al‑adiile hint Akhituufal achaan Allah yidoor yinazzil masiibe fi raas Abchaluum.
Dawuud gataʼ bahar al‑Urdun
15 Wa khalaas,
Huuchaay macha le Saduukh wa Abiyaatar rujaal al‑diin wa gaal leehum :
« Akhituufal anta wasiiye le Abchaluum wa le chuyuukh Bani Israaʼiil.
Wa ana kula anteet wasiiyti misil di misil di.
16 Wa hassaʼ da,
rassulu ajala le Dawuud khabburuuh wa guulu leyah khalli ma yargud fi waadi al‑Urdun.
Waajib yagtaʼ al‑bahar achaan ma yaktuluuh,
hu wa kulla naasah al‑maʼaayah. »
17 Wa fi l‑wakit da,
Akhimaaʼas wa Yuunataan gaʼado fi hillit Een Ruugil.
Wa waajib khaddaama waahide tamchi tikhabbirhum wa humman kamaan yamchu yikallumuuh le Dawuud achaan humman ma yagdaro yadkhulu fi Uruchaliim le yichiifuuhum.
18 Wa laakin sabi waahid chaafaahum wa macha khabbar Abchaluum.
Wa Akhimaaʼas wa Yuunataan macho ajala ajala wa wassalo bakaan raajil waahid fi hillit Bahuriim.
Wa fi l‑hooch da,
fiyah biir wa humman dakhalo allabbado foogha.
19 Wa sitt al‑beet chaalat birich wa saddat khachum al‑biir wa sabbat foog al‑birich da khalla achaan ma yichiifu cheyy.
20 Wa khaddaamiin Abchaluum macho bakaan al‑mara di wa saʼalooha wa gaalo :
« Ween Akhimaaʼas wa Yuunataan ?
» Wa l‑mara gaalat leehum :
« Humman gataʼo al‑rijil.
» Wa khalaas,
khaddaamiin Abchaluum fattachoohum ke wa ma ligoohum.
Wa baʼad da,
gabbalo fi Uruchaliim.
21 Wa baʼad humman faato,
Akhimaaʼas wa Yuunataan marago min al‑biir wa macho khabbarooh le Dawuud be wasiiyat Akhituufal.
Wa humman gaalo leyah :
« Ajala agtaʼo al‑bahar. »
22 Wa tawwaali,
Dawuud wa kulla l‑naas al‑maʼaayah gammo wa gataʼo bahar al‑Urdun.
Wa be fajur badri,
kulluhum gataʼo al‑bahar wa naadum waahid kula minhum ma faddal.
23 Wa wakit Akhituufal irif kadar Abchaluum ma tabbag wasiiytah,
gamma chadda humaarah wa gabbal hillitah wa macha beetah.
Wa wassa aayiltah wa chanag nafsah wa maat.
Wa dafanooh fi khabur abuuh.
Dawuud wassal hillit Mahanaayim
24 Wa Dawuud wassal hillit Mahanaayim wakit Abchaluum gaaʼid yagtaʼ bahar al‑Urdun maʼa kulla askar Bani Israaʼiil.
25 Wa Abchaluum khatta Amaasa khaayid al‑deech fi badal Yuwaab.
Wa Amaasa da,
abuuh Yatar al‑min Bani Israaʼiil wa ammah Abigaayil bineeyit Nahaach akhutha le Saruuya amm Yuwaab.
26 Wa Abchaluum wa askar Bani Israaʼiil khatto muʼaskarhum fi balad Gilʼaad.
27 Wa wakit Dawuud wassal Mahanaayim,
laagooh Chuubi wileed Nahaach al‑min madiinat Rabba aasimat balad Bani Ammuun wa Makiir wileed Amiyiil al‑min hillit Luudabaar wa Barzillaay al‑min hillit Rugliim fi turaab Gilʼaad.
28 Wa l‑naas dool jaabo le Dawuud wa naasah furaach wa mawaaʼiin wa buraam hana tiine wa akil misil gameh ahmar wa gameh abyad wa dagiig wa fariiki wa lubya wa adas
29 wa asal wa zibde hana khanam wa jibna min laban al‑bagar.
Wa humman jaabo kulla l‑achya dool le Dawuud achaan al‑naas al‑maʼaayah yaakulu.
Wa gaalo :
« Al‑naas dool yukuunu maytiin min al‑aya wa l‑juuʼ wa l‑atach hana l‑sahara. »