Dawuud bigi malik fi kulla Israaʼiil
5
1 Wa kulla gabaayil Bani Israaʼiil jo le Dawuud fi Hibruun wa gaalo leyah :
« Chiif !
Aniina min dammak wa lahamak.
2 Wa zamaan wakit Chaawuul malikna,
inta gaaʼid tuguud deech Bani Israaʼiil.
Wa fi l‑wakit daak bas,
Allah gaal leek :
‹ Inta tabga raaʼi le chaʼabi Bani Israaʼiil wa tahkim fooghum.
› »
3 Wa kulla chuyuukh Bani Israaʼiil jo le Dawuud fi Hibruun wa hu sawwa maʼaahum muʼaahada giddaam Allah.
Wa humman masahooh wa darrajooh malik fi Bani Israaʼiil.
4 Wa Dawuud indah 30 sana wakit bigi malik wa hakam 40 sana.
5 Wa hu hakam fi Bani Yahuuza 7 sana wa nuss fi Hibruun.
Wa baʼad da,
hakam fi kulla Bani Israaʼiil wa Bani Yahuuza 33 sana fi Uruchaliim.
Dawuud chaal hillit Uruchaliim
6 Wa yoom waahid,
Dawuud wa naasah gammo min Hibruun wa macho Uruchaliim le yihaarubu al‑Yabuusiyiin al‑saakniin fiiha.
Wa l‑Yabuusiyiin gaalo le Dawuud :
« Inta ma tagdar tadkhul fi l‑hille di !
Hatta al‑amyaaniin wa l‑mukarsahiin kula yagdaro yadharook.
» Wa be l‑kalaam da,
humman yahsubu Dawuud ma yagdar yichiil al‑hille.
7 Wa be da kula,
Dawuud chaal bakaanhum al‑gawi al‑usmah Sahyuun.
Wa l‑bakaan da,
sammooh madiinat Dawuud.
8 Wa fi l‑yoom da,
Dawuud gaal le naasah :
« Kan ayyi naadum yidoor yahjim al‑Yabuusiyiin,
khalli yadkhul leehum be l‑majra al‑yadkhul beyah al‑almi al‑fi tihit al‑ard wa yalhaghum.
Wa kan le l‑mukarsahiin wa l‑amyaaniin dool,
ana nakrahhum.
» Wa fi chaan da,
al‑masal buguul :
« Al‑amyaaniin wa l‑mukarsahiin ma yadkhulu beet Allah. »
9 Wa Dawuud sakan fi l‑bakaan al‑gawi da wa sammaah madiinat Dawuud.
Wa baʼad da,
bana durdur al‑difaaʼ al‑sammooh Millu al‑gaaʼid ambeen al‑ziraaʼa wa maskanah.
10 Wa gudrat Dawuud gaaʼide tiziid be ziyaada achaan Allah al‑Ilaah al‑Gaadir gaaʼid maʼaayah.
11 Wa Hiiraam malik balad Suur rassal naas le Dawuud wa waddo leyah hatab al‑arz.
Wa rassal najjaariin al‑hatab wa naas al‑yagtaʼo al‑hajar le yabnu beet le Dawuud.
12 Wa be da,
Dawuud irif kadar Allah sabbatah malik fi Bani Israaʼiil.
Wa Allah zaad darajat mulkah fi chaan chaʼabah Bani Israaʼiil.
Asaame awlaad Dawuud
13 Wa wakit Dawuud gamma min Hibruun wa ja fi Uruchaliim,
akhad awiin aakharaat wa chaal sirriiyaat.
Wa hinna wildan leyah awlaad wa banaat.
14 Wa daahu asaame awlaad Dawuud al‑wildoohum leyah fi Uruchaliim.
Humman Chammuuʼ wa Chuubaab wa Naataan wa Suleymaan
15 wa Yibhaar wa Alichuuʼ wa Nafag wa Yafiiʼa
16 wa Alichamaʼ wa Aliyaadaʼ wa Alifaalat.
Dawuud annasar fi l‑Filistiyiin
17 Wa wakit al‑Filistiyiin simʼo kadar Dawuud masahooh wa darrajooh malik fi Bani Israaʼiil,
kulluhum gammo macho le yifattuchuuh.
Wa laakin Dawuud simiʼ beehum wa macha gaʼad fi bakaanah al‑gawi.
18 Wa l‑Filistiyiin jo le l‑harib wa rasso fi waadi Rafaayiin.
19 Wa Dawuud saʼal Allah wa gaal :
« Namchi nihaarib al‑Filistiyiin walla ?
Inta tisallimhum fi iidi walla ?
» Wa Allah radda le Dawuud wa gaal :
« Amchi haaribhum wa akiid ana nisallimhum leek fi iidak. »
20 Wa Dawuud macha hillit Baʼal Faraasiim wa haarabaahum le l‑Filistiyiin hinaak wa annasar fooghum.
Wa gaal :
« Allah fatah leyi derib wa darabt udwaani misil al‑seel.
» Wa be sabab da bas,
al‑bakaan da sammooh Baʼal Faraasiim (maʼanaatah al‑Rabb al‑darab).
21 Wa l‑Filistiyiin khallo asnaamhum fi l‑bakaan da wa Dawuud wa naasah chaaloohum.
22 Wa battaan al‑Filistiyiin jo le l‑harib wa rasso fi waadi Rafaayiin.
23 Wa Dawuud saʼal Allah.
Wa Allah gaal leyah :
« Ma tamchi tahjimhum be giddaam laakin hawwig leehum be wara min jiihat al‑chadar wa garrib leehum.
24 Wa wakit simiʼt haraka misil khatwaat al‑rijil fi raas al‑chadar,
tawwaali amchi ahjimhum !
Achaan Allah macha giddaamak le yadrub askar al‑Filistiyiin. »
25 Wa Dawuud sawwa kulla cheyy misil Allah amarah beyah.
Wa khalaas,
haarab al‑Filistiyiin wa taradaahum min hillit Gabaʼ lahaddi madkhal hillit Gaazar.