3
1 Wa l‑harba ambeen aayilat Dawuud wa aayilat Chaawuul tawwalat.
Wa gudrat Dawuud gaaʼide tiziid wa aayilat Chaawuul kamaan darajathum gaaʼide tangus.
Awlaad Dawuud
2 Wa daahu awlaad Dawuud al‑wildoohum leyah fi Hibruun.
Al‑bikir usmah Amnuun wa ammah usumha Akhinuuʼam min hillit Yazraʼiil.
3 Wa l‑taani Kilaab wa ammah usumha Abigaayil al‑awwal marit Naabaal min hillit Karmal.
Wa l‑taalit Abchaluum wa ammah usumha Maʼaaka bineeyit Talmaay malik balad Gachuur.
4 Wa l‑raabiʼ Aduniiya wa ammah usumha Haggiit.
Wa l‑khaamis Chafatya wa ammah usumha Abitaal.
5 Wa l‑saadis Yitraʼaam wa ammah usumha Agla marit Dawuud.
Wa dool awlaad Dawuud al‑wildoohum leyah fi Hibruun.
Abniir tahamooh
6 Wa wakit al‑harib gaaʼid ambeen aayilat Chaawuul wa aayilat Dawuud,
Abniir gaaʼid yilmakkan fi lubb aayilat Chaawuul.
7 Wa Chaawuul indah sirriiye waahide usumha Risfa wa abuuha usmah Ayya.
Wa yoom waahid,
Ichbuuchat taham Abniir wa gaal :
« Maala dakhalt fi sirriiyit abuuyi ? »
8 Wa wakit Abniir simiʼ al‑kalaam da,
ziʼil zaʼal chadiid wa gaal :
« Ana jaasuus hana Bani Yahuuza walla ?
Ya hassaʼ kula,
ana gaaʼid fi amaani le aayilat Chaawuul abuuk wa akhwaanah wa rufgaanah.
Wa inta zaatak,
ana ma sallamtak le Dawuud !
Wa laakin al‑yoom,
inta tahamtini be l‑mara di.
9 Khalli al‑Rabb yiʼaakhibni ikhaab chadiid kan ana ma haggagt al‑cheyy al‑halaf beyah Allah le Dawuud.
10 Achaan Allah gaal yichiil al‑muluk min aayilat Chaawuul wa yantiih le Dawuud.
Wa hu yahkim fi Bani Israaʼiil wa Bani Yahuuza min Daan fi l‑munchaakh lahaddi Biir Sabʼa fi l‑wati. »
11 Wa Ichbuuchat ma yagdar yuguul kilme waahide kula le Abniir achaan hu khaayif minnah.
Abniir andamma le Dawuud
12 Wa khalaas,
Abniir rassal naas le Dawuud wa gaal leehum :
« Amchu guulu le Dawuud :
‹ Yaatu yahkim al‑balad di ?
› Wa guulu leyah battaan :
‹ Khalli yisawwi maʼaayi muʼaahada wa ana nisaaʼidah wa kulla Bani Israaʼiil yindammo leyah.
› »
13 Wa Dawuud gaal :
« Sameh !
Nisawwi maʼaak muʼaahada.
Wa laakin natlub minnak cheyy waahid.
Gubbaal ma taji tigaabilni,
jiib leyi marti Mikaal bineeyit Chaawuul.
Wa baʼad da,
taʼaal gaabilni. »
14 Wa Dawuud rassal naas le Ichbuuchat wileed Chaawuul wa gaal :
« Gabbil leyi marti Mikaal al‑ana akhadtaha be miya khulaf hana l‑Filistiyiin* al‑ana kataltuhum. »
15 Wa khalaas,
Ichbuuchat rassal maragooha le Mikaal min beet raajilha Faltiyiil wileed Layich.
16 Wa raajilha taabaʼha be baki lahaddi hillit Bahuriim.
Wa laakin Abniir gaal leyah :
« Yalla gabbil amchi beetak !
» Wa khalaas,
hu gabbal macha beetah.
17 Wa Abniir lamma chuyuukh Bani Israaʼiil wa hajja leehum wa gaal :
« Min zamaan,
intu dawwartu Dawuud yabga malikku.
18 Wa hassaʼ da,
darrujuuh !
Achaan fi sabab Dawuud,
Allah gaal :
‹ Be waasitat abdi Dawuud,
ana ninajji chaʼabi Bani Israaʼiil min iid al‑Filistiyiin wa min kulla udwaanhum.
› »
19 Wa Abniir hajja be nafs al‑kalaam da le kubaaraat gabiilat Banyaamiin.
Wa baʼad da,
gamma wa macha le Dawuud fi Hibruun kallam leyah be niiyit Bani Israaʼiil wa kulla gabiilat Banyaamiin.
20 Wa wakit Abniir macha bakaan Dawuud fi Hibruun,
chaal maʼaayah 20 raajil.
Wa Dawuud sawwa leehum aazuuma.
21 Wa Abniir gaal le Dawuud :
« Khalli namchi nilimm kulla Bani Israaʼiil le yindammo leek inta,
ya siidi al‑malik.
Wa humman yisawwu maʼaak muʼaahada wa inta tahkim fi ayyi bakaan al‑galbak yidoorah.
» Wa khalaas,
Dawuud khallaah macha.
Wa Abniir faat be l‑salaama.
Yuwaab katal Abniir
22 Wa baʼad chiyya,
Yuwaab wa naas Dawuud gabbalo min al‑harib wa jaabo maʼaahum khaniime katiire.
Wa fi l‑wakit da,
Abniir khalaas ma fiih fi Hibruun achaan Dawuud khallaah macha be l‑salaama.
23 Wa wakit Yuwaab wa kulla l‑askar al‑maʼaayah wassalo,
khabbaroohum kadar Abniir wileed Niir ja bakaan al‑malik wa hu khallaah macha be l‑salaama.
24 Wa Yuwaab gaabal al‑malik wa gaal :
« Da chunu al‑sawweetah da ?
Maala Abniir ja leek hini wa inta khalleetah macha ? »
25 Wa Yuwaab gaal battaan :
« Abniir wileed Niir da,
inta taʼarfah tamaam kadar hu ja leek le yukhuchchak wa yaʼarif marigiinak wa jaytak wa yichiif kulla cheyy al‑inta gaaʼid tisawwiih. »
26 Wa tawwaali,
Yuwaab marag min bakaan Dawuud wa rassal naas wara Abniir wa humman gabbalooh min Biir Siira.
Wa laakin Dawuud ma indah khabar.
27 Wa wakit Abniir gabbal ja fi Hibruun,
Yuwaab laagaah fi khachum baab al‑hille wa tarrafah misil yidoor yihajji leyah be achiir.
Wa tawwaali,
taʼanah fi batnah wa katalah.
Wa be da,
hu alkaffa al‑taar hana akhuuh Asaahiil.
28 Wa wakit Dawuud simiʼ be cheyy al‑kaan da,
gaal :
« Ana wa mamlakati bariyiin giddaam Allah min dimmit Abniir wileed Niir ila l‑abad.
29 Wa khalli al‑dimme di tagaʼ fi raas Yuwaab wa zurriiytah.
Wa khalli daayman waahidiin minhum yakrubhum marad al‑bajal aw marad al‑jismi aw yisawwu khidmit al‑awiin aw yumuutu fi l‑harib aw yatʼabo min al‑juuʼ. »
30 Wa be misil da,
Yuwaab wa akhuuh Abichaay katalo Abniir achaan hu katal akhuuhum Asaahiil fi l‑harib al‑kaan fi hillit Gibʼuun.
31 Wa fi l‑bakaan da,
Dawuud gaal le Yuwaab wa le kulla l‑naas al‑maʼaayah :
« Charrutu khulgaanku wa albaso khulgaan hana chuwaalaat le tiwassufu hizinku le Abniir.
» Wa Dawuud macha wara l‑janaaza.
32 Wa dafano janaazit Abniir fi Hibruun.
Wa Dawuud baka chadiid fi l‑khabur wa kulla l‑naas al‑maʼaayah bako.
33 Wa Dawuud wassaf hiznah le Abniir be khine wa gaal :
« Ya Abniir,
maalak tumuut misil al‑mukhaffal ?
34 Iideenak ma marbuutiin
wa rijileenak kula ma mujanzariin.
Wa mootak misil al‑naadum
al‑katalooh mujrimiin. »
Wa kulla l‑naas al‑haadiriin gaaʼidiin yabku fi chaan Abniir.
35 Wa baʼad da,
naasah le Dawuud jo le yantuuh akil wa da gubbaal al‑harraay ma tagaʼ.
Wa laakin Dawuud halaf wa gaal :
« Khalli al‑Rabb yiʼaakhibni ikhaab chadiid kan ana akalt khubza walla cheyy aakhar gubbaal al‑harraay ma tagaʼ. »
36 Wa kulla l‑naas chaafo siyaamah wa rido beyah.
Wa be misil da,
kulla l‑naas radyaaniin be kulla cheyy al‑malik gaaʼid yisawwiih.
37 Wa fi l‑yoom da,
kulla naas Bani Yahuuza wa kulla Bani Israaʼiil irfo kadar katil Abniir wileed Niir da,
ma be amur min al‑malik.
38 Wa l‑malik gaal le masaaʼiilah :
« Aʼarfu kadar al‑yoom khaayid kabiir maat fi Israaʼiil.
39 Wa l‑yoom kan masahooni wa darrajooni malik kula,
ana naʼarif kadar ma indi gudra.
Laakin Yuwaab wa Abichaay awlaadha le Saruuya,
humman dool gawiyiin.
Wa khalli Allah yiʼaakhibhum fi l‑fasaala al‑sawwooha. »