28
1 Wa fi l‑wakit da,
al‑Filistiyiin lammo askarhum le yihaarubu Bani Israaʼiil.
Wa Akiich gaal le Dawuud :
« Waajib taʼarif kadar inta wa naasak tamchu maʼaayi le l‑harib. »
2 Wa Dawuud gaal le Akiich :
« Sameh.
Inta zaatak tichiif al‑cheyy al‑abdak yisawwiih !
» Wa l‑malik gaal le Dawuud :
« Tamaam.
Min hini le giddaam,
inta tabga masʼuul harasi. »
Chaawuul macha le yichawwufu leyah
3 Wa Samuwiil maat wa dafanooh fi hillitah al‑Raama wa kulla Bani Israaʼiil hizno leyah.
Wa baʼad da,
Chaawuul gamma tarad kulla l‑naas al‑yikallumu maʼa l‑maytiin wa l‑naas al‑yihajju maʼa l‑junuun min balad Israaʼiil.
4 Wa l‑Filistiyiin lammo naashum wa jo khatto muʼaskarhum fi hillit Chuunam.
Wa Chaawuul kula lamma kulla Bani Israaʼiil wa khatto muʼaskarhum fi jabal Gilbuuʼa.
5 Wa laakin wakit Chaawuul chaaf muʼaskar al‑Filistiyiin,
khaaf khoof chadiid wa bada yarjif.
6 Wa Chaawuul saʼal Allah laakin Allah ma radda leyah wa la be ruʼya wa la be Uriim wa la be l‑anbiya.
7 Wa Chaawuul gaal le khaddaamiinah :
« Fattuchu leyi mara al‑tagdar tikallim maʼa l‑maytiin wa ana namchi le tichiif leyi.
» Wa khaddaamiinah gaalo leyah :
« Daahu mara waahide al‑gaaʼide fi hillit Een Duur tikallim maʼa l‑maytiin. »
8 Wa Chaawuul baddal khulgaanah hana l‑muluk wa libis khulgaan aakhariin wa macha bakaan al‑mara maʼa itneen min khaddaamiinah.
Wa humman wassalo be l‑leel wa Chaawuul gaal leeha :
« Chiifi leyi wa naadi al‑mayyit al‑niʼooriiki beyah. »
9 Wa l‑mara gaalat leyah :
« Inta taʼarif adiil kadar Chaawuul tarad min al‑balad kulla l‑naas al‑bikallumu maʼa l‑maytiin wa l‑junuun.
Wa maala inta tukujj leyi charak wa tidoor taktulni ? »
10 Wa Chaawuul halaf leeha be Allah wa gaal :
« Nahlif be Allah al‑Hayy,
akiid al‑ikhaab ma yaji leeki be l‑sabab da ! »
11 Wa l‑mara gaalat :
« Tidoor ninaadi leek yaatu ?
» Wa hu gaal :
« Naadi leyi Samuwiil. »
12 Wa wakit al‑mara chaafat Samuwiil,
sarakhat wa gaalat le Chaawuul :
« Maala khachcheetni ?
Inta Chaawuul ! »
13 Wa l‑malik Chaawuul gaal leeha :
« Ma takhaafe !
Laakin chifti chunu ?
» Wa l‑mara gaalat leyah :
« Ana chift naadum bikhawwif taaliʼ min tihit al‑ard. »
14 Wa Chaawuul gaal :
« Chabahah kikkeef ?
» Wa hi gaalat :
« Raajil chaayib taaliʼ min tihit al‑ard wa mukhatti be khalag al‑anbiya.
» Wa Chaawuul irif kadar da Samuwiil.
Wa khalaas,
Chaawuul dangar fi l‑ard wa sajad.
Samuwiil hajja le Chaawuul
15 Wa Samuwiil gaal le Chaawuul :
« Maala tibarjil margadi wa tigawwimni ?
» Wa Chaawuul gaal :
« Ana addaayagt marra waahid.
Al‑Filistiyiin jo le yihaarubuuni wa l‑Rabb abaani wa ma radda leyi wa la be l‑anbiya wa la be ruʼya.
Achaan da bas,
ana naadeetak le tiʼarrifni al‑cheyy al‑waajib nisawwiih. »
16 Wa Samuwiil gaal leyah :
« Kan Allah abaak wa bigi leek misil adu,
maala tinaadiini ?
17 Achaan Allah tamma al‑kalaam al‑gaalah leek be waasitati ana.
Chaal minnak al‑muluk wa antaah le naadum aakhar gariibak wa hu Dawuud.
18 Wa da achaan inta ma simiʼt kalaam Allah wa ma aakhabt al‑Amaalikh hasab khadab Allah.
Wa be da,
al‑yoom Allah gabbal leek al‑cheyy da fi raasak.
19 Wa yisallimak inta wa Bani Israaʼiil fi iid al‑Filistiyiin.
Wa ambaakir,
inta wa iyaalak kulluku tumuutu wa tukuunu maʼaayi hini.
Wa Allah yisallim muʼaskar Bani Israaʼiil kula fi iid al‑Filistiyiin. »
20 Wa wakit Chaawuul simiʼ kalaam Samuwiil,
tawwaali anbahat wa wagaʼ tihit wa almattat.
Wa hu ma indah gudra achaan ma akal cheyy tuul al‑leel wa l‑nahaar.
21 Wa l‑mara garrabat le Chaawuul wa chaafat hu anbahat be ziyaada wa gaalat leyah :
« Chiif,
ana khaadmak simiʼt kalaamak wa dasseet nafsi fi l‑khutuura wa sawweet kulla cheyy al‑inta talabtah minni.
22 Hassaʼ da,
min fadlak asmaʼ kalaam khaadmak.
Khalliini nijiib leek khubza chiyya.
Aakul achaan talga gudra wa tamchi. »
23 Wa Chaawuul aba wa gaal :
« Ana ma naakul. »
Wa laakin khaddaamiinah wa l‑mara assarooh wa hu simiʼ kalaamhum.
Wa gamma min al‑turaab wa gaʼad fi l‑sariir.
24 Wa tawwaali,
al‑mara machat chaalat ijilha al‑samiin wa dabahatah wa chaalat dagiig ajjanatah wa sawwatah khubza bala tawwaara.
25 Wa hi gaddamatah le Chaawuul wa khaddaamiinah wa humman akalo.
Wa baʼad da,
gammo faato fi nafs al‑leele di.