Yuunataan yahmi Dawuud
20
1 Wa Dawuud arrad min hillit Nayuut al‑gariibe le hillit al‑Raama wa ja ligaah le Yuunataan wa gaal leyah :
« Chunu al‑ana sawweetah le abuuk ?
Chunu al‑khata wa l‑zanib al‑ana sawweetah le abuuk achaan hu yidoor yaktulni ? »
2 Wa Yuunataan radda leyah wa gaal :
« Abadan ma yaktulak !
Abuuyi ma yisawwi cheyy wa la kabiir wa la sakhayyar kan ma khabbaraani.
Maala hu yilabbid leyi cheyy misil da ?
Da ma sahiih ! »
3 Wa Dawuud halaf le Yuunataan wa gaal :
« Abuuk yaʼarif adiil kadar inta radyaan beyi.
Wa gaal fi nafsah :
‹ Khalli Yuunataan ma yasmaʼ be l‑cheyy da achaan da ma yabga leyah gaasi !
› Wa laakin ana nahlif leek be Allah al‑Hayy wa be hayaatak inta,
ma faddal beeni wa been al‑moot illa chibir bas ! »
4 Wa Yuunataan gaal le Dawuud :
« Ana nisawwi leek al‑cheyy al‑inta tidoorah. »
5 Wa Dawuud radda leyah wa gaal :
« Ambaakir da iid hana awwal yoom fi l‑chahar.
Waajib ana nilʼachcha maʼa l‑malik.
Laakin khalliini namchi nillabbad fi l‑kadaade lahaddi l‑achiiye.
6 Wa kan abuuk fagadaani,
guul leyah :
‹ Dawuud chaal minni izin le yamchi hillitah Beet Laham achaan yahdar fi gaddimiin al‑dahiiye al‑sanawiiye maʼa ahalah. ›
7 Wa kan abuuk gaal :
‹ Sameh ›,
khalaas ana abdak nagood be salaam.
Laakin kan hu ziʼil kamaan,
inta taʼarif kadar hu chaal niiye le yiwaddirni.
8 Wa inta,
sawwi leyi al‑kheer achaan ana wa inta sawweena alaakha giddaam Allah.
Wa kan ana khitiit fi ayyi cheyy,
aktulni inta bas wa laakin ma tisallimni le abuuk ! »
9 Wa Yuunataan radda leyah wa gaal :
« Abadan da ma nisawwiih !
Kan ana irift abuuyi yidoor yiwaddirak,
akiid ana nikhabbirak tawwaali ! »
10 Wa Dawuud gaal le Yuunataan :
« Kikkeef tagdar tikhabbirni kan radd abuuk ma ajabaak ? »
11 Wa Yuunataan gaal le Dawuud :
« Taʼaal namchu fi l‑kadaade.
» Wa khalaas,
humman al‑itneen macho fi l‑kadaade.
12 Wa Yuunataan gaal le Dawuud :
« Allah Ilaah Bani Israaʼiil yachhad,
ambaakir aw ambukra fi nafs al‑wakit,
ana nasʼal abuuyi wa nichiif fikrah.
Kan hu ma indah leek cheyy fi galbah,
ana nirassil leek wa nufukk adaanak.
13 Wa laakin khalli Allah yiʼaakhibni ikhaab chadiid kan ana ma khabbartak kadar abuuyi yidoor yisawwi leek cheyy fasil wa ma khalleetak macheet be l‑salaama !
Khalli Allah yukuun maʼaak misil hu kaan maʼa abuuyi awwal.
14 Wa fi wakit al‑ana lissaaʼ gaaʼid hayy,
sawwi leyi al‑kheer hasab alaakhitna al‑sawweenaaha giddaam Allah.
Wa kan ana mutt kula,
15 sawwi al‑kheer le zurriiyti hatta wakit Allah yuguchch kulla udwaanak min wijh al‑ard. »
16 Wa Yuunataan sawwa alaakha maʼa Dawuud wa zurriiytah wa gaal :
« Khalli Allah yiʼaakhib udwaan Dawuud ! »
17 Wa Yuunataan hallaf Dawuud battaan be mahabbitah leyah achaan hu yihibbah misil nafsah.
18 Wa Yuunataan gaal leyah :
« Ambaakir iid hana awwal yoom fi l‑chahar.
Bakaanak fi l‑akil yukuun faadi wa nafguduuk.
19 Wa fi l‑yoom al‑taalit,
inta anzil wa amchi allabbad fi l‑bakaan al‑inta allabbadt foogah yoom al‑muchkila.
Wa agood jamb al‑hajar al‑usmah al‑Furga.
20 Wa ana nazrug talaata nuchchaab ale l‑jiihe al‑inta mullabbid foogha misil gaaʼid nusuub cheyy.
21 Wa ana nirassil wileed wa nuguul leyah :
‹ Amchi jiib leyi al‑nuchchaab !
› Wa kan gult leyah :
‹ Taʼaal,
al‑nuchchaab jaaye minnak ›,
khalaas inta tagdar taji be salaam achaan cheyy ma fiih.
Wa da,
ana nahlif leek be Allah al‑Hayy.
22 Wa laakin kan ana gult le l‑wileed :
‹ Daahu al‑nuchchaab khaadi minnak ›,
khalaas amchi achaan Allah yidoor inta tufuut.
23 Wa Allah yachhad fi l‑alaakha al‑beeni wa beenak ila l‑abad. »
24 Wa Dawuud macha allabbad fi l‑kadaade.
Wa awwal yoom hana l‑chahar ja wa l‑malik gaʼad le l‑akil.
25 Wa misil fi aadtah,
al‑malik gaʼad fi bakaanah jamb al‑durdur wa Abniir gaʼad jambah.
Wa Yuunataan kamaan gaabalah wa gaʼad.
Wa laakin bakaan Dawuud gaaʼid faadi.
26 Wa Chaawuul ma gaal cheyy fi l‑yoom da achaan hu gaal fi nafsah :
« Akuun hasal leyah cheyy wa hu bigi ma taahir. »
27 Wa ambaakir fi l‑yoom al‑taani hana l‑chahar,
Chaawuul fagadah le Dawuud.
Wa hu saʼalah le wileedah Yuunataan wa gaal :
« Maala wileed Yassa ma ja wa la amis wa la l‑yoom ? »
28 Wa Yuunataan gaal le abuuh :
« Dawuud chahadaani dawwar yamchi fi hillit Beet Laham
29 wa gaal leyi :
‹ Min iznak,
khalliini namchi achaan ahali induhum dahiiye fi hillitna.
Wa akhuuyi gaal leyi nahdar.
Wa hassaʼ kan inta ridiit leyi,
khalliini namchi nichiif akhwaani.
› Wa be sabab da,
hu ma gidir yahdar maʼa l‑malik fi l‑akil. »
30 Wa fi l‑bakaan da,
Chaawuul ziʼil zaʼal chadiid didd Yuunataan wa gaal leyah :
« Wald al‑azaba !
Al‑mukhaalif !
Inta tahsib ana ma naʼarfah kadar inta indak rafag maʼa wileed Yassa walla ?
Wa be da,
inta tijiib al‑eeb fi raasak inta wa fi raas ammak al‑charmuuta !
31 Asmaʼ,
wileed Yassa kan gaaʼid hayy,
inta ma indak amin wa mamlakatak kula ma tabga gawiiye.
Hassaʼ da,
amchi jiibah leyi !
Hu da,
waajib leyah al‑moot ! »
32 Wa Yuunataan gaal le abuuh Chaawuul :
« Maala yaktuluuh ?
Hu sawwa chunu ? »
33 Wa Chaawuul chaal haribtah wa zarag beeha Yuunataan wa yidoor yatʼanah.
Wa khalaas fi l‑bakaan da,
Yuunataan irif kadar abuuh chaal niiye le yaktul Dawuud.
34 Wa Yuunataan ziʼil zaʼal chadiid wa gamma.
Wa min al‑zaʼal fi l‑yoom al‑taani hana l‑chahar da,
hu ma gidir akal achaan abuuh ayyar Dawuud.
35 Wa ambaakir be fajur,
Yuunataan gamma macha fi l‑kadaade fi l‑waʼad al‑sawwaah maʼa Dawuud.
Wa chaal maʼaayah wileed sakhayyar.
36 Wa Yuunataan gaal le l‑wileed :
« Ajri amchi jiib al‑nuchchaab al‑ana nazurgah.
» Wa l‑wileed jara giddaam wa Yuunataan zarag al‑nuchchaab baʼiid minnah.
37 Wa wakit al‑wileed wassal fi l‑bakaan al‑Yuunataan zarag foogah al‑nuchchaab,
Yuunataan gaal leyah :
« Al‑nuchchaab lissaaʼ khaadi minnak ! »
38 Wa Yuunataan gaal leyah battaan :
« Ajala be surʼa !
Ma tagiif !
» Wa l‑wileed chaal al‑nuchchaab wa jaabah le sayyidah.
39 Wa l‑wileed ma irif cheyy wa laakin Yuunataan wa Dawuud bas yaʼarfuuh.
40 Wa Yuunataan anta kulla silaahah le l‑wileed wa gaal leyah :
« Waddiih al‑beet. »
41 Wa baʼad al‑wileed faat,
Dawuud marag min al‑bakaan al‑mullabbid foogah fi nuss al‑wati hana l‑hajar wa wagaʼ fi l‑ard wa sajad giddaam Yuunataan talaata marraat.
Wa l‑rufgaan al‑itneen alhaadano wa bako wa laakin Dawuud baka ziyaada.
42 *Wa khalaas,
Yuunataan gaal le Dawuud :
« Amchi be l‑salaama !
Achaan aniina al‑itneen halafna be usum Allah wa gulna Allah yachhad beeni wa beenak wa been zurriiyti wa zurriiytak ila l‑abad.
» Wa khalaas,
Dawuud gamma faat wa Yuunataan kamaan gabbal al‑madiina.