Al‑Filistiyiin annasaro fi Bani Israaʼiil
4
1 Wa Samuwiil ballakh kalaam Allah le kulla Bani Israaʼiil.
Wa achaan da,
Bani Israaʼiil marago le yihaarubu al‑Filistiyiin.
Wa lammo askarhum fi bakaan al‑usmah Aban Aazar (maʼanaatah hajar al‑Musaaʼada).
Wa l‑Filistiyiin kamaan lammo askarhum fi hillit Afiikh.
2 Wa l‑Filistiyiin rasso rujaalhum le l‑harib giddaam Bani Israaʼiil.
Wa l‑harib bada wa alwassaʼ wa Bani Israaʼiil anhazamo giddaam al‑Filistiyiin.
Wa l‑Filistiyiin katalo min Bani Israaʼiil gariib 4 000 raajil fi l‑duwaas da.
3 Wa wakit al‑naas al‑arrado min al‑harib wassalo fi l‑muʼaskar da,
chuyuukh Bani Israaʼiil gaalo :
« Maala Allah hazamna al‑yoom giddaam al‑Filistiyiin ?
Yalla !
Namchu nijiibu sanduug muʼaahadat Allah min hillit Chiilooh wa nichiiluuh maʼaana achaan yinajjiina min aduuna. »
4 Wa khalaas,
rassalo naas fi hillit Chiilooh wa jaabo sanduug muʼaahadat Allah al‑Gaadir,
hu al‑gaaʼid fi l‑archah ambeen al‑makhluugiin al‑samaawiyiin.
Wa awlaad Ali al‑itneen Hufni wa Fiinhaas,
humman kula macho maʼa sanduug muʼaahadat al‑Rabb.
5 Wa wakit sanduug muʼaahadat Allah wassal fi l‑muʼaskar da,
Bani Israaʼiil sarakho min al‑farha wa min siraakhhum,
al‑ard rajafat.
6 Wa l‑Filistiyiin simʼo al‑siraakh da wa gaalo :
« Chunu al‑haraka al‑chadiide al‑bigat fi muʼaskar al‑Ibraaniyiin ?
» Wa be da,
al‑Filistiyiin irfo kadar sanduug Allah wassal fi muʼaskar Bani Israaʼiil.
7 Wa khaafo khoof chadiid wa gaalo ambeenaathum :
« Al‑ilaah ja fi muʼaskar Bani Israaʼiil.
Ya khasaaritna !
Da cheyy al‑awwal ke ma bigi abadan !
8 Ya khasaaritna !
Yaatu yinajjiina min al‑ilaah al‑aziim da ?
Wa da bas al‑ilaah al‑darab al‑Masriyiin be kulla l‑waba fi l‑sahara !
9 Chiddu heelku,
ya l‑Filistiyiin,
wa abgo rujaal !
Kan ma ke da,
aniina nabgo abiid le l‑Ibraaniyiin misil awwal humman bigo leena abiid.
Abgo rujaal wa haarubuuhum be gudra ! »
10 Wa fi l‑bakaan da khalaas,
al‑Filistiyiin hajamoohum le Bani Israaʼiil wa annasaro fooghum.
Wa ayyi waahid min Bani Israaʼiil jara gabbal beetah.
Wa l‑khasaara bigat kabiire fi ust Bani Israaʼiil wa waddaro fiiha 30 000 raajil.
11 Wa kan le sanduug al‑Rabb,
al‑Filistiyiin chaalooh.
Wa awlaad Ali al‑itneen Hufni wa Fiinhaas kula maato.
Khabar cheeliin sanduug al‑Rabb
12 Wa fi nafs al‑yoom,
raajil waahid min gabiilat Banyaamiin arrad min bakaan al‑harib wa jara lahaddi wisil Chiilooh.
Wa l‑raajil da charrat khulgaanah wa sabba turaab fi raasah le yiwassif hiznah wa ja fi Chiilooh.
13 Wa wakit al‑raajil da wassal,
Ali gaaʼid fi kursiih jamb al‑derib gaaʼid yarja al‑khabar achaan galbah khaayif le sanduug al‑Rabb.
Wa l‑raajil da ja anta al‑khabar le naas al‑hille wa kulluhum gammo yikooruku.
14 Wakit Ali simiʼ korooraak hana naas al‑hille,
hu saʼal wa gaal :
« Chunu al‑haraka al‑gaaʼid nasmaʼha di ? »
Wa l‑raajil ja ajala khabbarah le Ali be l‑khabar da.
15 Wa Ali indah 98 sana wa uyuunah faathiin wa ma bichiifu.
16 Wa l‑raajil gaal le Ali :
« Ana jaayi min bakaan al‑harib wa arradt min hinaak wa di bas jayti !
» Wa Ali saʼalah wa gaal :
« Chunu al‑kaan hinaak,
ya wileedi ? »
17 Wa l‑raajil al‑jaab al‑khabar gaal :
« Bani Israaʼiil arrado min al‑Filistiyiin wa maato katiiriin be ziyaada !
Wa awlaadak Hufni wa Fiinhaas kula maato.
Wa sanduug al‑Rabb,
al‑Filistiyiin chaalooh ! »
18 Wa min simiʼ be khabar cheeliin sanduug al‑Rabb da,
tawwaali Ali wagaʼ be gafaayah min kursiih jamb khachum baab al‑hille wa anfahag wa maat.
Achaan hu bigi chaayib wa jismah kula tagiil.
Wa gabul da,
hu hakam 40 sana fi Bani Israaʼiil.
Waaluudit Ikabuud
19 Wa marit wileedah Fiinhaas khalbaane gariib talda.
Wa wakit simʼat khabar cheeliin sanduug al‑Rabb wa moot raajilha Fiinhaas wa abuuh,
tawwaali talaga chadiide karabatha wa hi gangasat wa wildat.
20 Wa hilkat gariib tumuut wa l‑awiin al‑muhawwigiinha gaalan leeha :
« Ma takhaafe,
wilidti wileed !
» Laakin da ma lammaaha wa ma raddat leehin cheyy.
21 Wa sammat al‑wileed da Ikabuud (maʼanaatah majd Allah bigi ma fiih).
Wa gaalat :
« Majd Allah rafaʼooh min Israaʼiil !
» Wa da be sabab cheeliin sanduug al‑Rabb wa moot raajilha wa abuuh.
22 Wa be misil da,
hi gaalat :
« Majd Allah rafaʼooh min Israaʼiil !
Achaan sanduug al‑Rabb chaalooh. »