Al‑harib didd gabiilat Banyaamiin
20
1 Wa kulla Bani Israaʼiil marago min Daan fi l‑munchaakh lahaddi Biir Sabʼa fi l‑wati wa lahaddi turaab Gilʼaad wa lammo be galib waahid giddaam Allah fi hillit Misfa.
2 Wa kubaaraat al‑chaʼab hana kulla gabaayil Bani Israaʼiil hidro fi malammat chaʼab al‑Rabb.
Wa adadhum 400 000 askar al‑yaʼarfu harb al‑suyuuf.
3 Wa naas gabiilat Banyaamiin simʼo kadar Bani Israaʼiil jo fi Misfa.
Wa Bani Israaʼiil gaalo :
« Ooruuna kikkeef al‑fasaala di bigat. »
4 Wa l‑Laawi raajil al‑mara al‑katalooha gaal :
« Ana wa sirriiyti wassalna fi Gibeeʼa fi turaab Banyaamiin le nunuumu foogha.
5 Wa sukkaan Gibeeʼa gammo diddi wa be l‑leel,
hawwago al‑beet al‑ana dalleet foogah wa dawwaro yaktuluuni.
Wa chaalo sirriiyti wa ragado maʼaaha be gu lahaddi maatat.
6 Wa ana chilt janaazit sirriiyti wa gattaʼtaha wa rassaltaha fi kulla ard warasa hana Bani Israaʼiil achaan al‑naas dool sawwo fasaala wa fiʼil cheen fi Bani Israaʼiil.
7 Daahu intu kulluku,
ya Bani Israaʼiil,
hajju wa achchaawaro ambeenaatku hini bas wa antuuna raayku. »
8 Wa kulla l‑chaʼab gammo be galib waahid wa gaalo :
« Naadum minnina waahid kula ma yigabbil le kheemtah wa la le beetah.
9 Wa hassaʼ daahu al‑cheyy al‑nisawwuuh le Gibeeʼa.
Nisawwu amʼiyeedaat wa nugummu diddaha.
10 Wa nichiilu rujaal min kulla gabaayil Bani Israaʼiil.
Min al‑miya,
nichiilu 10 wa min al‑alif,
nichiilu 100 wa min al‑achara alif nichiilu 1 000.
Wa l‑naas dool yijiibu akil le l‑rujaal al‑yamchu yahjumu Gibeeʼa hana Banyaamiin le yisawwu fooghum hasab fiʼilhum al‑cheen al‑sawwooh fi Bani Israaʼiil. »
11 Wa khalaas,
kulla rujaal Bani Israaʼiil gammo be galib waahid didd al‑hille di.
12 Wa gabaayil Bani Israaʼiil rassalo rujaal le gabiilat Banyaamiin le yasʼaloohum wa yuguulu leehum :
« Chunu al‑fasaala al‑bigat fi bakaanku di ?
13 Wa hassaʼ da,
sallumuuna al‑naas al‑ma naafʼiin hana Gibeeʼa le naktuluuhum wa namurgu al‑fasaala min Israaʼiil ! »
Wa laakin naas gabiilat Banyaamiin abo ma yasmaʼo kalaam akhwaanhum Bani Israaʼiil.
14 Wa naas gabiilat Banyaamiin jo min hillaalhum wa lammo fi Gibeeʼa achaan yihaarubu Bani Israaʼiil.
15 Wa fi l‑yoom da,
naas gabiilat Banyaamiin al‑jo min al‑hillaal,
hasaboohum wa adadhum bigi 26 000 askar al‑yaʼarfu harb al‑suyuuf.
Wa da,
bala sukkaan Gibeeʼa al‑adadhum 700 raajil min ahsan al‑muhaaribiin.
16 Wa min kulla l‑rujaal dool fiyah 700 rujaal israayiin min ahsan al‑muhaaribiin.
Al‑waahid minhum be hajar miglaaʼah yagdar yagtaʼ al‑kheet.
17 Wa Bani Israaʼiil kula hasabo nufuushum bala naas gabiilat Banyaamiin wa adadhum bigi 400 000 askar al‑yaʼarfu harb al‑suyuuf wa kulluhum muhaaribiin.
18 Wa Bani Israaʼiil macho Beet Iil wa saʼalo al‑Rabb wa gaalo :
« Yaatu minnina yamchi awwal le muhaarabat naas gabiilat Banyaamiin ?
» Wa Allah gaal leehum :
« Naas gabiilat Yahuuza bas yamchu awwal. »
19 Wa khalaas,
Bani Israaʼiil gammo be fajur badri wa macho nazalo jamb Gibeeʼa.
20 Wa gammo le yihaarubu Banyaamiin wa rasso le l‑harib mugaabiliin Gibeeʼa.
21 Wa naas gabiilat Banyaamiin marago min Gibeeʼa le yihaarubuuhum.
Wa fi l‑yoom da,
katalo 22 000 raajil min Bani Israaʼiil.
22 Wa rujaal Israaʼiil chaddo heelhum wa battaan rasso le l‑harib fi bakaanhum al‑awwal yoom rasso foogah.
23 Wa Bani Israaʼiil macho bako giddaam Allah lahaddi l‑achiiye wa saʼalooh wa gaalo :
« Battaan namchu nihaarubu didd akhwaanna naas gabiilat Banyaamiin walla ?
» Wa Allah radda leehum wa gaal :
« Gummu didduhum. »
24 Wa fi l‑yoom al‑taani,
Bani Israaʼiil garrabo le naas gabiilat Banyaamiin
25 wa naas gabiilat Banyaamiin marago min Gibeeʼa le yigaabuluuhum.
Wa fi l‑yoom da,
katalo 18 000 raajil min Bani Israaʼiil,
kulluhum askar al‑yaʼarfu harb al‑suyuuf.
26 Wa khalaas,
kulla chaʼab Bani Israaʼiil macho Beet Iil wa gaʼado tihit wa bako le Allah.
Wa l‑yoom da,
saamo lahaddi l‑achiiye wa gaddamo dahaaya muharragiin wa dahaaya salaama le Allah.
27 Bani Israaʼiil saʼalo Allah achaan fi l‑wakit daak,
sanduug muʼaahadat al‑Rabb gaaʼid fi Beet Iil.
28 Wa fi l‑wakit daak,
Fiinhaas wileed Aliʼaazar wileed Haaruun gaaʼid giddaam al‑sanduug da.
Wa hu gaal :
« Battaan namchu nihaarubu didd akhwaanna naas gabiilat Banyaamiin walla la ?
» Wa Allah radda leehum wa gaal :
« Amchu,
achaan ambaakir ana nisallimhum leeku. »
29 Wa khalaas,
Bani Israaʼiil hawwago Gibeeʼa wa rabato kamiin.
30 Wa fi l‑yoom al‑taalit,
Bani Israaʼiil gammo didd Banyaamiin wa rasso mugaabiliin Gibeeʼa misil fi l‑marraat al‑faato.
31 Wa iyaal Banyaamiin marago le yigaabulu rujaalhum wa macho baʼiid min al‑hille.
Wa gammo yaktulu rujaalhum misil fi l‑marraat al‑faato.
Wa katalo min Bani Israaʼiil hawaale 30 raajil fi l‑derib al‑maachi le Beet Iil wa fi l‑derib hana l‑kadaade al‑maachi le Gibeeʼa.
32 Wa iyaal Banyaamiin gaalo :
« Daahu battaan hazamnaahum misil awwal !
» Wa laakin Bani Israaʼiil gaalo :
« Khalli niʼarrudu minhum wa namurguuhum baʼiid min al‑hille fi l‑duruub. »
33 Wa kulluhum arrado lahaddi wislo Baʼal Taamaar wa hinaak,
laffo wa rasso battaan le l‑harib.
Wa laakin rujaal Bani Israaʼiil fi l‑kamiin marago be surʼa min bakaanhum gariib le hillit Gabaʼ.
34 Wa 10 000 raajil min ahsan al‑muhaaribiin hana Bani Israaʼiil jo gaabalo Gibeeʼa wa l‑harib da bigi chadiid.
Wa laakin iyaal Banyaamiin ma irfo kadar al‑masiibe taji fooghum.
35 Wa Allah hazam iyaal Banyaamiin giddaam Bani Israaʼiil.
Fi l‑yoom da,
Bani Israaʼiil katalo 25 100 raajil,
kulluhum askar al‑yaʼarfu harb al‑suyuuf.
36 Wa baʼad da,
iyaal Banyaamiin irfo kadar humman anhazamo.
Wa rujaal Bani Israaʼiil arrado giddaam naas Banyaamiin achaan humman antakalo ale l‑kamiin al‑humman rabatooh hawaale Gibeeʼa.
37 Wa be surʼa,
naas al‑kamiin gammo hajamo Gibeeʼa wa katalo kulla naas al‑hille be l‑seef.
38 Wa rujaal Bani Israaʼiil astafago maʼa naas al‑kamiin achaan humman yisawwu alaama hana dukhkhaan fi l‑hille.
39 Wa be da,
Bani Israaʼiil gabbalo battaan le l‑harib wa iyaal Banyaamiin bado yaktulu minhum hawaale 30 raajil.
Wa gaalo :
« Daahu battaan hazamnaahum misil awwal ! »
40 Wa tawwaali,
al‑alaama hint al‑dukhkhaan badat tatlaʼ min al‑hille.
Wa wakit iyaal Banyaamiin anlafato,
chaafo al‑hille kullaha ke gammat naar wa dukhkhaanha talaʼ fi l‑sama.
41 Wa rujaal Bani Israaʼiil gabbalo le l‑harib.
Wa rujaal Banyaamiin anbahato achaan humman irfo kadar al‑masiibe khalaas jaat fooghum.
42 Wa humman arrado giddaam Bani Israaʼiil wa jaro ale l‑sahara.
Wa laakin dakhalo ambeen al‑rujaal al‑gaaʼidiin yitaaruduuhum wa l‑rujaal al‑marago min al‑hille.
Wa humman kataloohum marra waahid.
43 Wa Bani Israaʼiil hajamoohum le iyaal Banyaamiin min kulli jiihe.
Wa taaradoohum lahaddi sabaah min Gibeeʼa wa ma khalloohum yinjammo wa kataloohum hinaak.
44 Wa min iyaal Banyaamiin,
18 000 rujaal fahaliin maato.
45 Wa aakhariin arrado ale l‑sahara le hajar Rimmuun.
Wa Bani Israaʼiil katalo minhum 5 000 raajil fi l‑duruub wa taaradoohum lahaddi Gidʼuum wa katalo battaan minhum 2 000 raajil.
46 Wa be l‑jumla,
adad iyaal Banyaamiin al‑maato fi l‑yoom da 25 000 askar al‑yaʼarfu harb al‑suyuuf.
47 Wa 600 rujaal kamaan arrado ale l‑sahara le hajar Rimmuun wa gaʼado fi l‑hajar da arbaʼa chahar.
48 Wa Bani Israaʼiil gabbalo didd iyaal Banyaamiin wa katalo kulla sukkaan hillaalhum be l‑seef lahaddi bahaayimhum wa dammaro kulla cheyy al‑ligooh.
Wa ziyaada min da,
tachcho kulla l‑hillaal al‑fi deribhum.