Dabuura khannat be l‑nasur
5
1 Wa fi l‑yoom da,
Dabuura wa Baaraakh wileed Abinuuʼam khanno wa gaalo :
2 « Fi Israaʼiil,
ayyi raajil jaahiz le l‑harib
wa l‑chaʼab yamchu le l‑harib be niiye waahide.
Baarak Allah !
3 « Asmaʼo,
ya l‑muluuk,
wa aftaho adaanku,
ya l‑salaatiin.
Ana nikhanni le Allah
wa le Allah Ilaah Bani Israaʼiil ana nahmudah.
4 Ya Allah,
wakit inta maragt min Saʼiir
wa wakit inta jiit min balad Adoom,
al‑ard rajafat
wa min al‑sama,
almi sabba chadiid
wa l‑sahaab nazzal matar.
5 Al‑jibaal maaʼo misil al‑almi
giddaam Allah
aywa,
jabal Siinaaʼ maaʼ
giddaam Allah Ilaah Bani Israaʼiil.
6 « Fi ayyaam Chamgar wileed Anaat
wa fi ayyaam Yaaʼil,
naas katiir khallo al‑duruub
wa l‑musaafiriin yamchu be dabaali uwuj.
7 Sukkaan al‑hillaal khallo hillaalhum
aywa,
khallo hillaalhum
lahaddi ana Dabuura jiit
wa bigiit misil amm le Bani Israaʼiil.
8 Humman chaalo leehum ilaahaat aakhariin,
wakit al‑harib garrab le madaakhil al‑hillaal.
Fi l‑wakit da,
bigi leena gaasi
le nalgo daraga aw harba
le deech Israaʼiil
al‑adadhum 40 000 raajil.
9 Wa galbi maʼa khuyyaad Israaʼiil
wa maʼa l‑chaʼab
al‑yihaarubu be niiye waahide.
Baarak Allah !
10 « Intu al‑raakbiin fi hamiir buyud
wa intu al‑jaalsiin fi busaataat
wa intu al‑maachiin fi l‑duruub,
fakkuru adiil !
11 Wa l‑yusubbu almi fi l‑hiitaan
khanno be amal adaalit Allah.
Wa da l‑nasur al‑antaah Allah
le khuyyaad Israaʼiil
wakit chaʼab Allah nazalo
fi biibaan al‑madiina.
12 « Yalla gummi !
Yalla gummi,
ya Dabuura.
Yalla gummi !
Yalla gummi wa khanni.
Yalla gumm,
ya Baaraakh wileed Abinuuʼam !
Wa jiib masaajiinak.
13 « Khalaas al‑faddalo hayyiin
nazalo ale l‑kubaaraat
wa chaʼab Allah gammo fi chaani
misil al‑furraas.
14 Al‑dammaro al‑Amaalikh
marago min gabiilat Afraayim
wa maʼaahum gabiilat Banyaamiin maʼa askarhum.
Wa min khachum beet Makiir
marago al‑khuyyaad
wa min gabiilat Zabuluun
marago kubaaraat al‑askar.
15 Wa kubaaraat gabiilat Yassaakar
andammo le Dabuura
wa rujaal Yassaakar taabaʼo Baaraakh
wa macho waraayah fi l‑waadi.
Wa laakin ambeenaat khuchuum buyuut Raʼuubiin
gammo machaakil bala hadd.
16 Wa maala intu gaʼadtu jamb al‑zaraayib
le tasmaʼo baki al‑bahaayim
wa tasmaʼ baki al‑maal ?
Wa ambeenaat khuchuum buyuut Raʼuubiin
gammo machaakil bala hadd.
17 Wa naas Gilʼaad
gaʼado fi arduhum sabaah le bahar al‑Urdun.
Wa maala gabiilat Daan
gaʼadat jamb sufunha ?
Wa gabiilat Achiir
gaʼadat fi khachum al‑bahar
wa ma gammat min bakaanha foogah.
18 Wa laakin gabiilat Zabuluun
dasso nufuushum fi l‑khutuura
wa gabiilat Naftaali
khaataro be hayaathum fi bakaan al‑harib.
19 « Wa jo muluuk wa haarabo.
Khalaas,
muluuk Kanʼaan kula haarabo.
Fi Taʼnak gariib le almi Magiddu,
ma ligo khaniime hana fudda.
20 Wa min al‑sama,
al‑nujuum chaarako fi l‑harib
wa min bakaanhum al‑baʼiid,
haarabo Siisra.
21 Wa waadi Khiichuun chaalaahum,
hu al‑waadi al‑gadiim,
waadi Khiichuun.
Amchi,
ya nafsi,
be gudra !
22 « Harakat rijle al‑kheel ansamaʼat
wakit gaaʼidiin yajru,
yajru misil kheel al‑sabag.
23 Wa malak Allah gaal :
‹ Alʼano hillit Miruuz
wa alʼano sukkaanha laʼana chadiide.
Achaan humman ma jo haarabo le Allah
wa ma jo fazaʼo al‑furraas. ›
24 « Ya Yaaʼil,
marit Haabar al‑Khiini,
Allah yibaarikki min kulla l‑awiin.
Aywa,
khalli Allah yibaarikki,
min kulla l‑awiin al‑saaknaat fi l‑khiyam.
25 Wakit Siisra saʼalha almi,
hi antatah laban
wa antatah zibde fi kaas al‑furraas.
26 Wa hi chaalat witid al‑kheema
be iidha al‑isra
wa be iidha al‑zeene,
chaalat mitragat al‑khaddaam.
Wa hi darabat Siisra
wa rihkat raasah
wa taʼanatah fi raasah.
27 Giddaamha,
hu barak
wa wagaʼ giddaamha wa ragad.
Wa l‑bakaan al‑wagaʼ foogah,
da bas maat foogah.
28 « Min al‑chubbaak,
amm Siisra gaaʼide tichiif
wa min al‑chubbaak,
hi tuguul :
‹ Maala arabaatah hana l‑harib ma jo ?
Maala arabat wileedi hana l‑harib akhkharat ? ›
29 Wa l‑indihin hikma min awiin al‑kubaaraat
yikalliman leeha
wa hi tiraddid fi nafisha kalaamhin
wa tuguul :
30 ‹ Akiid ligo khaniime
wa gaaʼidiin yigassumuuha.
Bitt waahide aw banaat itneen
le kulli muhaarib.
Toob mulawwan wa mukallaf le Siisra
wa kadmuul mukallaf al‑yarbutuuh fi ragabat al‑munnasir. ›
31 « Ya Allah,
khalli kulla udwaanak
yiddammaro misil Siisra
wa l‑yihibbuuk
yabgo misil deyy al‑harraay wakit tatlaʼ. »
Wa baʼad da,
al‑balad gaaʼide fi raaha le muddit 40 sana.