Sukkaan Gibʼuun khachcho Yachuuʼ
9
1 Wa kulla muluuk al‑balad simʼo be nasur Bani Israaʼiil wa humman saakniin kharib le bahar al‑Urdun fi l‑jibaal wa fi l‑sahale wa fi khachum al‑bahar al‑Abyad lahaddi Lubnaan.
Wa humman muluuk al‑Hittiyiin wa l‑Amuuriyiin wa l‑Kanʼaaniyiin wa l‑Firizziyiin wa l‑Hiwwiyiin wa l‑Yabuusiyiin.
2 Wa kulla l‑muluuk dool astafago achaan yihaarubu sawa didd Yachuuʼ wa Bani Israaʼiil.
3 Wa sukkaan Gibʼuun min Hiwwiyiin simʼo be l‑cheyy al‑sawwaah Yachuuʼ fi hillaal Ariiha wa hillit Aay.
4 Wa humman kula gammo annaajado.
Chaddo fi hamiirhum chuwaalaat gadiimiin wa girab hana khamar mucharratiin wa mukhayyatiin.
5 Wa libso niʼle gadiimiin wa mukhayyatiin wa libso khulgaan mucharratiin wa chaalo khubza yaabse wa mukassara.
6 Wa macho ligo Yachuuʼ fi l‑fariig fi Gilgaal wa gaalo leyah wa le Bani Israaʼiil :
« Aniina jiina min baʼiid.
Wa hassaʼ,
sawwu maʼaana alaakha. »
7 Wa rujaal Bani Israaʼiil gaalo le l‑Hiwwiyiin dool :
« Mumkin intu saakniin fi usutna !
Wa be da,
ma nagdaro nisawwu maʼaaku alaakha. »
8 Wa laakin humman gaalo le Yachuuʼ :
« Aniina abiidak. »
Wa Yachuuʼ saʼalaahum wa gaal leehum :
« Intu yaatumman wa jaayiin min ween ? »
9 Wa humman gaalo leyah :
« Aniina abiidak jaayiin min balad baʼiide marra waahid fi chaan usum Allah Ilaahak achaan simiʼna be usmah wa be kulla cheyy al‑sawwaah fi Masir.
10 Wa simiʼna battaan be kulla cheyy al‑sawwaah fi l‑muluuk al‑itneen hana l‑Amuuriyiin al‑gaaʼidiin khaadi le bahar al‑Urdun wa humman Siihuun malik Hachbuun wa Oog malik Baachaan al‑saakin fi Achtaruut.
11 Wa kubaaraatna wa kulla sukkaan baladna gaalo leena :
‹ Chiilu maʼaaku zaad le l‑derib wa amchu gaabuluuhum wa guulu leehum :
“Aniina abiidku wa hassaʼ sawwu maʼaana alaakha.” ›
12 Wa chiifu al‑khubza hint zaadna !
Wakit maragna le naju leeku,
chilnaaha haamiye wa laakin hassaʼ,
di hi yaabse wa mukassara.
13 Wa l‑girab dool kula,
wakit maleenaahum khamar humman judaad.
Wa laakin hassaʼ chiifu kikkeef humman achcharrato.
Wa khulgaanna wa niʼleena kula gidmo achaan saafarna wa jiina leeku min baʼiid. »
14 Wa Bani Israaʼiil khassado be alaakhithum wa akalo min zaadhum wa laakin ma saʼalo Allah le yaʼarfu al‑hu yidoorah.
15 Wa khalaas,
Yachuuʼ sawwa maʼaahum salaam wa alaakha al‑tadman leehum hayaathum.
Wa chuyuukh al‑mujtamaʼ kula halafo leehum.
16 Wa laakin talaata yoom baʼad sawwo maʼaahum al‑alaakha,
Bani Israaʼiil simʼo kadar al‑naas dool jiiraanhum wa saakniin fi usuthum.
17 Wa Bani Israaʼiil gammo saafaro.
Wa fi l‑yoom al‑taalit,
wassalo fi hillaalhum wa humman hillaal Gibʼuun wa Kafiira wa Biiruut wa Kharyat Yaʼariim.
18 Wa Bani Israaʼiil ma daraboohum achaan chuyuukh al‑mujtamaʼ halafo leehum be Allah Ilaah Bani Israaʼiil.
Wa laakin kulla l‑mujtamaʼ gaaʼidiin yihajju tihit tihit didd al‑chuyuukh.
19 Wa kulla l‑chuyuukh gaalo le kulla l‑mujtamaʼ :
« Aniina halafna leehum be usum Allah Ilaah Bani Israaʼiil.
Battaan ma nagdaro nisawwu leehum cheyy fasil.
20 Wa daahu al‑cheyy al‑nisawwuuh leehum.
Nikhalluuhum hayyiin achaan khadab Allah ma yanzil foogna be sabab al‑haliife al‑halafnaaha leehum. »
21 Wa l‑chuyuukh gaalo battaan le chaʼabhum :
« Nikhalluuhum hayyiin achaan yichaggugu al‑hatab wa yawurdu almi le kulla l‑mujtamaʼ.
» Wa da bas kalaam al‑chuyuukh.
22 Wa Yachuuʼ naadaahum le sukkaan Gibʼuun wa gaal leehum :
« Maala khachcheetuuna wa gultu intu jaayiin min baʼiid wa taari intu saakniin fi usutna ?
23 Wa be da,
intu khalaas malʼuuniin wa tabgo daayman abiid.
Wa tichaggugu al‑hatab wa tawurdu almi le beet Allah. »
24 Wa humman raddo leyah wa gaalo :
« Aniina abiidak.
Simiʼna kadar Allah Ilaahku amar abdah Muusa yantiiku al‑balad di wa yaktul sukkaanha giddaamku.
Wa aniina khufna ziyaada minku wa achaan da bas,
sawweena al‑cheyy da.
25 Wa hassaʼ,
daahu aniina fi iidak.
Sawwi foogna ayyi cheyy al‑tidoorah. »