Al‑mudun hana l‑Laawiyiin
35
1 Wa fi kadaadit Muwaab fi khachum bahar al‑Urdun mugaabil Ariiha,
Allah kallam le Muusa wa gaal :
2 « Aamur Bani Israaʼiil yantu min warasathum hillaal le l‑Laawiyiin yaskunu fooghum wa yantuuhum ard hana sarha le bahaayimhum hawaale al‑hillaal dool.
3 Wa l‑hillaal dool yabgo hineehum halaalhum le yaskunu fooghum wa ard al‑sarha al‑hawaaleehum le bahaayimhum wa khumaamhum wa kulla haywaanaathum.
4 Wa ard al‑sarha al‑tantuuha le l‑Laawiyiin tabga nuss kiilomitir barra min al‑durdur hana l‑hille fi kulli jiihe.
5 Wa l‑ard di tukuun murabbaʼa.
Tuulha ale jiihat al‑sabaah kiilomitir waahid wa ale jiihat al‑wati kiilomitir waahid wa ale jiihat al‑kharib kiilomitir waahid wa ale jiihat al‑munchaakh kiilomitir waahid wa l‑hille kamaan,
tabga usut.
Wa di tabga ard hana sarha hawaale ayyi hille al‑tantuuha leehum.
6 « Wa tantu le l‑Laawiyiin sitte mudun hana luju achaan kan naadum katal naadum bala raayah yagdar yajri yagood fooghum.
Wa tiziidu fi l‑mudun al‑sitte dool 42 hillaal aakhariin.
7 Wa l‑hillaal al‑tantuuhum le l‑Laawiyiin adadhum yabga 48 hille wa ayyi waahide indaha ard hana sarha hawaaleeha.
8 Wa l‑hillaal al‑tichiiluuhum min Bani Israaʼiil,
chiiluuhum hasab al‑warasa hana ayyi gabiila.
Min al‑gabiila al‑ligat katiir,
tichiilu katiir.
Wa min al‑gabiila al‑ligat chiyya,
tichiilu chiyya.
Ayyi gabiila hasab warasatha tanti hillaal le l‑Laawiyiin. »
Mudun al‑luju
9 Wa Allah hajja le Muusa wa gaal :
10 « Guul le Bani Israaʼiil :
‹ Kan gataʼtu bahar al‑Urdun le tadkhulu fi balad Kanʼaan,
11 aʼazulu leeku mudun hana luju achaan kan naadum katal naadum bala raayah yagdar yajri yagood fooghum.
12 Wa l‑mudun dool yabgo leeku mudun hana luju wa yinajju al‑kaatil min siid al‑taar.
Achaan al‑kaatil ma waajib yaktuluuh gubbaal ma yagiif giddaam mujtamaʼ Bani Israaʼiil le yihaakumuuh.
13 Wa l‑mudun al‑sitte dool yabgo leeku mudun hana luju.
14 Wa mudun al‑luju dool,
talaata minhum yukuunu sabaah le bahar al‑Urdun wa talaata fi balad Kanʼaan.
15 Wa l‑mudun al‑sitte dool yabgo bakaan hana luju le Bani Israaʼiil wa le l‑ajnabi al‑gaaʼid maʼaahum wa le l‑deef al‑khaatir.
Ayyi waahid kan katal naadum bala raayah yagdar yajri yagood fi madiina waahide minhum.
16 « ‹ Wa laakin kan naadum darab naadum be silaah hana hadiid wa katalah,
al‑naadum da bigi kaatil dimme wa fi chaan da,
waajib yaktuluuh.
17 Wa kan naadum darab naadum be hajar al‑yagdar yaktul wa katalah,
al‑naadum da bigi kaatil dimme wa fi chaan da,
waajib yaktuluuh.
18 Aw kan naadum darab naadum be uud al‑yagdar yaktul wa katalah,
al‑naadum da bigi kaatil dimme wa fi chaan da,
waajib yaktuluuh.
19 Wa siid al‑taar hu yaktul kaatil al‑dimme wa yichiil foogah al‑taar kan laagaah.
20 Wa kan naadum lazza naadum achaan hu indah maʼaayah muchkila aw zaragah be niiytah bas wa katalah
21 aw darabah be iidah fi duwaas wa katalah,
al‑naadum al‑darab da yaktuluuh achaan hu bigi kaatil dimme.
Wa siid al‑taar hu yaktul kaatil al‑dimme wa yichiil foogah al‑taar kan laagaah.
22 « ‹ Wa laakin akuun naadum katal naadum bala raayah.
Lazzaah wa ma indah maʼaayah ayyi muchkila aw zaragah be ayyi cheyy bala niiytah
23 aw ma chaafah wa darabah be hajar al‑yagdar yaktul wa katalah.
Wa wakit zarag al‑hajar da,
hu ma indah maʼaayah adaawa wa la yidoor yisawwi leyah cheyy fasil.
24 Khalaas,
mujtamaʼ Bani Israaʼiil yahkumu been kaatil al‑dimme wa siid al‑taar hasab al‑churuut dool.
25 Wa be da,
mujtamaʼ Bani Israaʼiil yinajju kaatil al‑dimme min siid al‑taar wa yigabbuluuh fi madiinat al‑luju al‑hu jara gaʼad foogha.
Wa hu yagood hinaak lahaddi moot kabiir rujaal al‑diin al‑masahooh be l‑dihin al‑mukhaddas wa darrajooh.
26 Wa laakin kan al‑kaatil marag barra min huduud madiinat al‑luju al‑hu jara wa gaʼad foogha
27 wa siid al‑taar ligiih barra min madiinat al‑luju wa katalah,
siid al‑taar da,
ma yajʼalooh kaatil dimme.
28 Waajib le l‑kaatil yagood fi madiinat al‑luju lahaddi moot kabiir rujaal al‑diin.
Wa baʼad moot kabiir rujaal al‑diin da,
al‑kaatil yagdar yigabbil fi ard warasatah.
29 « ‹ Wa da yabga leeku gaanuun hana chariiʼa le kulla zurriiyaatku fi ayyi bakaan al‑taskunu foogah.
30 « ‹ Fi kulla wakit,
kaatil al‑dimme be raayah ma yaktuluuh illa be chahaada hana naas waahidiin achaan be chahaada hana naadum waahid ma yagdaro yahkumu le naadum be l‑moot.
31 Ma tardo le yafdo ruuh kaatil al‑dimme be gurus al‑waajib leyah al‑moot.
Hu waajib yumuut.
32 Wa ma tardo le yikaffu gurus achaan yikhallu kaatil al‑dimme yamrug yufuut min madiinat al‑luju wa yigabbil fi ardah gubbaal moot raajil al‑diin.
33 Ma tinajjusu arduku al‑saakniin foogha achaan damm al‑maktuul yinajjis al‑ard wa ma tittahhar illa be damm hana kaatil al‑dimme.
34 Ma tinajjusu al‑ard al‑intu saakniin foogha wa ana zaati gaaʼid fi usutha.
Achaan ana Allah saakin fi usut Bani Israaʼiil.
› »