Asaat Haaruun khaddarat
17
1 *Wa Allah hajja le Muusa wa gaal :
2 « Guul le Bani Israaʼiil ayyi cheekh gabiila yijiib asa wa da fi adad gabaayilhum al‑atnaachar.
Wa aktib usum ayyi cheekh fi asaatah.
3 Wa fi asaat gabiilat Laawi aktib usum Haaruun achaan ayyi cheekh gabiila indah asa waahide.
4 Wa khutt al‑isay dool fi lubb kheemat al‑ijtimaaʼ giddaam al‑sanduug al‑foogah liihaan al‑muʼaahada fi l‑bakaan al‑ana nigaabilku foogah.
5 Wa l‑naadum al‑asaatah tikhaddir wa tisawwi nuwwaar,
hu da bas al‑ana azaltah.
Wa be da,
ana niwaggif al‑luwaama al‑gaaymiin beeha Bani Israaʼiil didduku. »
6 Wa khalaas,
Muusa kallam le Bani Israaʼiil wa kulla chuyuukhhum ayyi waahid jaab asaatah.
Wa l‑chuyuukh al‑atnaachar ayyi cheekh gabiila jaab asaatah.
Wa asaat Haaruun kula gaaʼide fi ust al‑isay dool.
7 Wa Muusa khatta al‑isay dool giddaam Allah fi lubb al‑kheema al‑foogha al‑sanduug al‑indah liihaan al‑muʼaahada.
8 Wa ambaakir fajur,
Muusa dakhal fi l‑kheemat di wa chaaf asaat Haaruun al‑min gabiilat Laawi khaddarat wa sawwat nuwwaar wa indaha iyaal naajdiin.
9 Wa Muusa marag kulla l‑isay min giddaam Allah wa khattaahum giddaam Bani Israaʼiil wa ayyi cheekh chaaf asaatah wa chaalha.
10 Wa Allah gaal le Muusa :
« Gabbil asaat Haaruun wa khuttaha giddaam al‑sanduug da wa ahfadha misil alaama le l‑muʼaaridiin.
Wa tiwaggif kalaamhum diddi wa be da,
ma yumuutu. »
11 Wa Muusa tabbag kalaam Allah sawa sawa misil hu amarah beyah.