Faanuus al‑bakaan al‑mukhaddas
24
1 Wa Allah hajja le Muusa wa gaal :
2 Aamur Bani Israaʼiil yijiibu leek dihin hana zaytuun maʼsuur wa musaffa le l‑faanuus achaan deyyah yukuun muwalliʼ daayman.
3 Wa giddaam al‑sitaar al‑yidaarig al‑sanduug al‑foogah liihaan al‑muʼaahada fi kheemat al‑ijtimaaʼ,
Haaruun yukhutt al‑faanuus giddaam Allah muwalliʼ daayman min makhrib lahaddi fajur.
Wa da yabga chart daayim min zurriiye le zurriiye.
4 Wa hu yigabbid niiraan al‑faanuus hana l‑dahab al‑saafi achaan yukuun muwalliʼ daayman giddaam Allah.
5 Wa chiil dagiig wa sawwi beyah 12 khubza wa l‑dagiig hana ayyi khubza yukuun koorteen.
6 Wa khuttuhum roogeen fi l‑tarabeeza hana l‑dahab al‑saafi giddaam Allah wa ayyi roog indah 6 khubza.
7 Wa ayyi roog tukhutt foogah lubaan saafi wa tiharrigah fi badal al‑khubza misil zikra le Allah.
Wa di hadiiye muharraga.
8 Wa fi kulli yoom sabt,
yukhuttu al‑khubza di giddaam Allah.
Wa Bani Israaʼiil yisawwuuh misil da daayman achaan hi muʼaahada daayme.
9 Wa l‑khubza di tabga hint Haaruun wa awlaadah wa yaakuluuha fi l‑bakaan al‑mukhaddas achaan al‑cheyy al‑mukhaddas marra waahid al‑chaalooh min al‑hadaaya al‑muharragiin giddaam Allah yukuun leehum humman.
Wa da yukuun hagg daayim.
Al‑yahgir usum Allah yumuut
10 Yoom waahid,
fiyah naadum ammah Israaʼiiliiye wa abuuh Masri ja fi usut Bani Israaʼiil wa fi ust al‑fariig gamma yidaawis maʼa naadum waahid Israaʼiili.
11 Wa l‑naadum al‑ammah Israaʼiiliiye da gamma hagar usum Allah wa laʼanah.
Wa l‑naadum da waddooh le Muusa wa usum ammah Chaluumit bineeyit Dibri min gabiilat Daan.
12 Wa l‑naadum da sajanooh lahaddi Allah yuguul kalaam fi chaanah.
13 Wa Allah hajja le Muusa wa gaal :
14 Amrug al‑naadum al‑laʼanni min al‑fariig wa kulla l‑naas al‑simʼooh yukhuttu iideehum fi raasah wa kulla l‑mujtamaʼ yarjumuuh.
15 Wa hajji le Bani Israaʼiil wa guul leehum :
« Ayyi naadum al‑yalʼan Ilaahah yilhammal zanbah.
16 Wa l‑yahgir usum Allah,
waajib yumuut.
Kulla l‑mujtamaʼ yarjumuuh kan hu ajnabi aw muwaatin min Bani Israaʼiil kula achaan hu hagar usum Allah.
Gaanuun al‑katil
17 « Al‑naadum al‑yaktul naadum kan yabga yaatu kula,
waajib yumuut.
18 Wa kan naadum katal bahiime,
yikaffiiha be bahiime aakhara.
19 Wa kan naadum jarah naadum muwaatin,
yisawwu foogah misil hu sawwaah.
20 Al‑kasir be l‑kasir wa l‑een be l‑een wa l‑sinn be l‑sinn wa yisawwu foogah misil hu sawwa fi l‑naadum al‑aakhar.
21 « Al‑naadum al‑katal bahiime yikaffiiha.
Wa l‑katal naadum waajib yumuut.
22 Induku nafs al‑huguug le l‑ajnabi wa l‑muwaatin achaan ana bas Allah Ilaahku. »
23 Wa da bas kalaam Muusa le Bani Israaʼiil.
Khalaas,
humman marago al‑naadum al‑laʼan da min al‑fariig wa rajamooh.
Wa Bani Israaʼiil sawwo kulla cheyy misil Allah amar beyah Muusa.