Gawaaniin akil laham al‑dahaaya
22
1 Wa Allah hajja le Muusa wa gaal :
2 Hajji le Haaruun wa awlaadah mata yamnaʼo nufuushum min al‑achya al‑mukhaddasiin al‑yikhassusuuhum leyi Bani Israaʼiil achaan yihtarumu usmi al‑mukhaddas.
Wa ana bas Allah.
3 Wa guul leehum :
« Min zurriiye le zurriiye kan ayyi raajil nijis min kulla zurriiyit rujaal al‑diin limis al‑achya al‑mukhaddasiin al‑khassasoohum Bani Israaʼiil le Allah,
al‑naadum da waajib yafsuluuh wa ma yaji giddaami.
Wa ana bas Allah.
4 « Wa ayyi raajil min zurriiyit Haaruun kan indah marad al‑jisim aw bajal,
ma yaakul min al‑achya al‑mukhaddasiin lahaddi yittahhar.
Wa kan limis naadum al‑bigi nijis be sabab limis jiife aw yamrug minnah mani
5 aw limis ayyi haywaan zaahif al‑yinajjis aw naadum al‑yinajjis aw ayyi najaasa,
6 khalaas al‑limishum yabga nijis lahaddi l‑achiiye wa hu ma yaakul min al‑achya al‑mukhaddasiin wa laakin yikhassil jismah be almi.
7 Wa baʼad waguuʼ al‑harraay hu yabga taahir wa baʼad da,
hu yaakul min al‑achya al‑mukhaddasiin achaan da akil hana kulla rujaal al‑diin.
8 Wa hu ma yaakul rimme wa la jiife wa la yinnajjas beehum.
Wa ana bas Allah.
9 « Wa be da,
yahfado wasiiyaati wa ma yisawwu zanib hana gillit ihtiraam al‑yijiib leehum al‑moot.
Wa ana Allah bas nikhassishum.
10 « Wa ayyi raajil ma min gabiilat Laawi,
ma waajib yaakul cheyy mukhaddas.
Wa l‑deef wa l‑khaddaam hana raajil al‑diin kula,
ma waajib yaakulu min ayyi cheyy al‑mukhaddas.
11 Wa laakin al‑abid al‑charaah raajil al‑diin be gursah yagdar yaakul wa l‑wildooh fi beetah kula.
Humman yagdaro yaakulu min aklah.
12 Wa bitt raajil al‑diin al‑mutazawwije maʼa raajil ma min gabiilat Laawi ma tagdar taakul min al‑hadaaya al‑mukhaddasiin.
13 Wa laakin kan bitt raajil al‑diin armala aw mutallaga wa kan ma indaha iyaal wa gabbalat beet abuuha misil awwal hi sabiiye,
hi tagdar taakul min akil abuuha.
Wa ayyi raajil ma min gabiilat Laawi ma yaakulah.
14 Wa kan naadum akal min al‑cheyy al‑mukhaddas gabul ma yaʼarfah,
hu yanti tamanah le raajil al‑diin wa yiziid foogah khumsah.
15 « Wa rujaal al‑diin yihtarumu al‑achya al‑mukhaddasiin hana Bani Israaʼiil al‑yarfaʼoohum le Allah.
16 Wa laakin kan akalo al‑achya al‑mukhaddasiin dool,
yilhammalo masʼuuliiyit khataahum achaan ana Allah bas nikhassishum. »
Gawaaniin azalaan al‑dahiiye
17 Wa Allah hajja le Muusa wa gaal :
18 Hajji le Haaruun wa awlaadah wa le kulla Bani Israaʼiil wa guul leehum :
« Akuun naadum min Bani Israaʼiil aw min al‑ajaanib al‑gaaʼidiin fi balad Israaʼiil yigaddim dahiiye muharraga le Allah misil le l‑nazir aw le kulla hadaaya al‑yigaddimhum be niiytah.
19 Wa kan yidoor Allah yarda beeha,
waajib yichiil waahid dakar al‑ma indah ayyi eeb min lubb al‑bagar aw al‑khanam aw al‑inze.
20 Ma tigaddumu ayyi bahiime mukhalgana achaan Allah ma yarda beeha.
21 « Wa kan naadum yigaddim dahiiyat salaama le Allah le yihaggig nazrah aw le kulla l‑hadaaya al‑yigaddimhum be niiytah,
khalli yichiil min bagarah aw khanamah bahiime al‑ma indaha ayyi eeb wa ma mukhalgana le Allah yarda beeha.
22 Wa ma tigaddumu bahiime amyaane wa la maksuura wa la maʼduura wa la indaha tawaaliil wa la jarab wa la guub.
Al‑bahiime al‑misil di,
ma tigaddumuuha fi l‑madbah dahiiye muharraga le Allah.
23 Wa tagdaro tigaddumu toor aw kharuuf aw tees maʼduur al‑rijlah tawiile aw gisayre dahiiye be niiytak.
Wa laakin kan tigaddumuuh le l‑nazir,
Allah ma yarda beyah.
24 Wa ma tigaddumu dahiiye le Allah bahiime al‑galagaatha mukarchamiin aw mukassariin aw mamruugiin aw magtuuʼiin.
Wa cheyy misil da,
ma tisawwuuh fi baladku.
25 Wa ma takhbalo al‑bahaayim al‑misil dool min al‑ajnabi le tigaddumuuhum misil akil le Ilaahku achaan al‑bahaayim dool yukuunu khasiyiin aw mukhalganiin.
Wa be da,
Allah ma yarda beehum. »
26 Wa battaan Allah hajja le Muusa wa gaal :
27 Wa baʼad al‑waaluuda,
al‑ijil aw al‑hamal aw al‑sakhal yagood tihit ammah sabʼa yoom.
Wa min al‑yoom al‑taamin wa giddaam,
hu yabga makhbuul le l‑dahiiye al‑muharraga le Allah.
28 Wa laakin ma tadbaho fi nafs al‑yoom al‑bagara aw al‑khanamaay aw al‑anzaay wa taabaʼha.
29 Wa kan tadbaho dahiiyat chukur le Allah,
adbahooha be tariiga al‑yarda beeha.
30 Wa taakuluuha fi nafs al‑yoom,
ma tikhallu minha cheyy le ambaakir.
Wa ana bas Allah.