Haaruun wa awlaadah bado al‑khidme
9
1 Wa fi l‑yoom al‑taamin,
Muusa naada Haaruun wa awlaadah wa chuyuukh Bani Israaʼiil.
2 Wa gaal le Haaruun :
« Chiil ijil le l‑dahiiye hana kaffaarat al‑zanib wa kabich le l‑dahiiye al‑muharraga wa humman al‑itneen yukuunu ma induhum ayyi eeb.
Wa gaddimhum giddaam Allah.
3 Wa baʼad da,
guul al‑kalaam da le Bani Israaʼiil :
‹ Chiilu tees le l‑dahiiye hana kaffaarat al‑zanib wa ijil wa kharuuf awlaad sana wa humman al‑itneen yukuunu ma induhum ayyi eeb.
Wa gaddumuuhum dahiiye muharraga.
4 Wa chiilu toor wa kabich le dahiiyat al‑salaama wa gaddumuuhum giddaam Allah wa hadiiye hana dagiig mukhalbat be dihin achaan al‑yoom Allah yibiin leeku.
› »
5 Wa khalaas,
humman jaabo giddaam kheemat al‑ijtimaaʼ al‑cheyy al‑Muusa amaraahum beyah wa kulla mujtamaʼ Bani Israaʼiil garrabo wa wagafo giddaam Allah.
6 Wa Muusa gaal :
« Da bas al‑cheyy al‑amaraaku beyah Allah.
Sawwuuh wa majd Allah yibiin leeku. »
7 Wa baʼad da,
Muusa gaal le Haaruun :
« Garrib le l‑madbah wa gaddim dahiiytak hana kaffaarat al‑zanib wa dahiiytak al‑muharraga wa sawwi kaffaara leek inta wa le l‑chaʼab.
Wa baʼad da,
gaddim dahiiyat al‑chaʼab le tisawwi leehum kaffaara misil Allah amar beyah. »
8 Wa khalaas,
Haaruun garrab le l‑madbah wa dabah al‑ijil dahiiye le kaffaarat zanbah.
9 Wa awlaad Haaruun gaddamo leyah al‑damm wa hu dassa usbaʼah fi l‑damm wa masah guruun al‑madbah.
Wa l‑faddal min al‑damm,
sabbaah fi gaʼar al‑madbah.
10 Wa harrag fi l‑madbah al‑chaham wa l‑kalaawe wa nuss al‑kibde hana l‑bahiime al‑gaddamaaha dahiiye le kaffaarat al‑zanib misil Allah amar beyah Muusa.
11 Wa laakin al‑laham wa l‑farwa,
harragaahum fi l‑naar barra min al‑fariig.
12 Wa Haaruun dabah al‑bahiime hana l‑dahiiye al‑muharraga.
Wa awlaadah antooh al‑damm wa hu rachcha beyah nawaayit al‑madbah.
13 Wa battaan antooh al‑raas wa l‑laham al‑mugattaʼ hana l‑dahiiye al‑muharraga wa hu harragaahum fi naar al‑madbah.
14 Wa hu khassal al‑butuun wa l‑dalaafe wa harragaahum fi l‑madbah min foog le l‑dahiiye al‑muharraga.
15 Wa baʼad da,
Haaruun gaddam dahiiyat al‑chaʼab.
Hu chaal tees le dahiiyat kaffaarat al‑zanib le l‑chaʼab wa dabahah wa gaddamah dahiiye misil al‑bahiime al‑awwal.
16 Wa hu gaddam al‑dahiiye al‑muharraga wa sawwa hasab al‑churuut.
17 Wa gaddam hadiiye hana dagiig.
Chaal malyit iid hana dagiig wa harragah fi l‑madbah.
Wa da ziyaada fi l‑dahiiye al‑muharraga hana ayyi fajur.
18 Wa hu dabah al‑toor wa l‑kabich wa gaddamaahum dahiiyat al‑salaama le l‑chaʼab.
Wa awlaad Haaruun antooh al‑damm wa hu rachcha beyah nawaayit al‑madbah.
19 Wa antooh chaham al‑toor wa chaham al‑kabich wa da l‑danab wa l‑chaham al‑mukhatti al‑butuun wa l‑kalaawe wa nuss al‑kibde.
20 Wa awlaad Haaruun khatto al‑chaham fi l‑zoor hana l‑toor wa l‑zoor hana l‑kabich wa Haaruun harragaahum fi l‑madbah.
21 Wa Haaruun rafaʼ al‑zoor wa l‑gaayme al‑zeene al‑warraaniiye hana l‑toor wa l‑kabich wa gaddamaahum giddaam Allah misil Muusa amarah beyah.
22 Wa wakit Haaruun kammal min gaddimiin al‑dahiiye le kaffaarat al‑zanib wa l‑dahiiye al‑muharraga wa l‑dahiiye hana l‑salaama,
khalaas hu rafaʼ iideenah ale l‑chaʼab wa baarakaahum.
Wa baʼad da,
nazal min al‑madbah.
23 Wa Muusa wa Haaruun dakhalo fi kheemat al‑ijtimaaʼ wa baʼad marago,
baarako al‑chaʼab battaan.
Wa majd Allah baan le kulla l‑chaʼab.
24 Wa maragat naar min giddaam Allah wa akalat al‑dahiiye al‑muharraga wa l‑chaham.
Wa kulla l‑chaʼab chaafo al‑cheyy da wa koorako min al‑farha wa wagaʼo be wujuuhhum fi l‑ard wa sajado.