Al‑waba hana moot al‑bahaayim
9
1 Wa baʼad da,
Allah gaal le Muusa :
« Amchi le l‑malik wa guul leyah :
‹ Daahu Allah Rabb al‑Ibraaniyiin gaal :
“Khalli chaʼabi yamurgu wa yamchu le yaʼabuduuni.
2 Wa kan inta abeet ma tikhalliihum yamurgu,
3 ana Allah ninazzil waba chadiid fi bahaaymak al‑gaaʼidiin fi l‑khala wa humman al‑kheel wa l‑hamiir wa l‑jumaal wa l‑bagar wa l‑khanam.
4 Wa fi l‑yoom da,
ana Allah nifannid ambeen bahaayim Bani Israaʼiil wa bahaayim al‑Masriyiin.
Wa bahiime waahide kula min bahaayim Bani Israaʼiil ma tumuut.”
› »
5 Wa Allah gataʼ al‑wakit wa gaal :
« Ambaakir,
ana nisawwi al‑cheyy da fi balad Masir. »
6 Wa ambaakir,
Allah naffaz al‑cheyy da.
Wa kulla bahaayim al‑Masriyiin maato wa laakin min bahaayim Bani Israaʼiil,
bahiime waahide kula ma maatat.
7 Wa l‑malik rassal naas achaan yiʼakkudu min al‑cheyy al‑bigi da.
Wa be misil da,
hu irif kadar min bahaayim Bani Israaʼiil,
bahiime waahide kula ma maatat.
Laakin al‑malik sawwa raas gawi wa aba ma khalla Bani Israaʼiil yamurgu min baladah.
Al‑waba hana l‑hubuun
8 Wa baʼad da,
Allah gaal le Muusa wa Haaruun :
« Chiilu rumaad min al‑furun fi iideeku wa khalli Muusa yichattitah fi l‑hawa giddaam al‑malik.
9 Wa l‑rumaad da yabga ajaaj wa yikhatti kulla balad Masir.
Wa yisabbib hubuun al‑yabgo awaawiir amtchulmo fi l‑naas wa l‑bahaayim fi kulla balad Masir. »
10 Wa khalaas,
humman chaalo rumaad min al‑furun wa macho giddaam al‑malik.
Wa Muusa chattatah fi l‑hawa.
Wa l‑rumaad sabbab hubuun al‑bigo awaawiir amtchulmo fi l‑naas wa l‑bahaayim.
11 Wa sahhaariin balad Masir ma gidro gaabalo Muusa achaan humman zaathum malaaniin be l‑hubuun misil kulla l‑Masriyiin.
12 Wa Allah gawwa raas al‑malik wa l‑malik aba ma simiʼ kalaam Muusa wa Haaruun misil Allah gaalah le Muusa.
Al‑waba hana l‑barad
13 Wa battaan Allah gaal le Muusa :
« Gumm be fajur badri wa amchi gaabil al‑malik wa guul leyah :
‹ Daahu Allah Rabb al‑Ibraaniyiin gaal :
“Khalli chaʼabi yamurgu wa yamchu le yaʼabuduuni.
14 Wa fi l‑marra di,
kan inta abeet ana ninazzil kulla nafar hana waba foogak inta wa fi khaddaamiinak wa fi chaʼabak.
Wa be da,
inta taʼarif kadar ma fi ilaah misli ana fi kulla l‑ard.
15 Wa awwal ana nagdar nimidd iidi wa nadurbak be l‑waba,
inta wa chaʼabak wa nuguchchuku min al‑ard.
16 Wa laakin ana khalleetak achaan niwassifak gudurti wa yihajju be usmi fi kulla l‑ard.
17 Wa daayman,
inta gaaʼid tadhar chaʼabi wa ma tikhalliihum yamurgu min baladak.
18 Fi chaan da ambaakir fi nafs al‑wakit,
ana ninazzil barad chadiid.
Wa barad misil da,
yoom waahid ma nazal fi Masir min yoom assasooha lahaddi l‑yoom.
19 Wa hassaʼ da,
gabbil bahaaymak wa kulla maalak al‑gaaʼidiin fi l‑khala.
Kan naas walla bahaayim kula gaʼado fi l‑khala wa ma dakhalo fi l‑buyuut,
al‑barad yanzil fooghum wa yaktulhum.”
› »
20 Wa waahidiin min khaddaamiin al‑malik khaafo min kalaam Allah.
Wa gabbalo abiidhum wa bahaayimhum wa dassoohum fi buyuuthum.
21 Wa waahidiin kamaan ma hammo be kalaam Allah da wa khallo abiidhum wa bahaayimhum fi l‑khala.
22 Wa Allah gaal le Muusa :
« Arfaʼ iidak ale l‑sama.
Khalli al‑barad yanzil fi kulla balad Masir fi l‑naas wa fi l‑bahaayim wa fi kulla nabaataat al‑ziraaʼa al‑fi l‑balad. »
23 Wa khalaas,
Muusa rafaʼ asaatah ale l‑sama wa Allah rassal dagdaag wa barad wa raʼad nazal fi l‑ard.
Wa Allah nazzal al‑barad da fi kulla balad Masir.
24 Wa barad wa raʼad chadiid marra waahid misil da,
yoom waahid ma nazalo fi Masir min yoom assasooha lahaddi l‑yoom.
25 Wa fi kulla balad Masir,
al‑barad darab kulla cheyy al‑gaaʼid barra fi l‑khala min al‑naas wa l‑bahaayim.
Wa battaan dammar kulla nabaataat al‑ziraaʼa wa kassar kulla chadar al‑khaaba.
26 Wa illa turaab Goochan bakaan Bani Israaʼiil gaaʼidiin foogah bas,
al‑barad ma nazal foogah.
27 Wa baʼad da,
al‑malik naada Muusa wa Haaruun wa gaal leehum :
« Hassaʼ da,
ana bas muznib.
Ana wa chaʼabi kullina ke aasiyiin wa Allah hu bas indah al‑hagg.
28 Asʼalo leyi Allah achaan al‑dagdaag wa l‑barad yagiifu.
Wa ana nikhalliiku tamurgu wa battaan ma nadharku. »
29 Wa khalaas,
Muusa gaal leyah :
« Kan ana maragt min al‑hille,
narfaʼ iideeni le Allah nasʼalah wa l‑dagdaag wa l‑barad yagiifu.
Wa be da,
inta taʼarif kadar al‑ard hint Allah.
30 Wa laakin ana naʼarif kadar inta wa khaddaamiinak lissaaʼku ma khaayfiin min Allah Ilaahna. »
31 Wa fi l‑wakit da,
al‑kattaan wa l‑gameh al‑abyad addammaro achaan al‑kattaan nawwar wa l‑gameh al‑abyad sawwa iyaal.
32 Wa laakin al‑gameh al‑ahmar wa gameh al‑kadaade ma addammaro achaan al‑wakit al‑baldo foogah lissaaʼ ma ja.
33 Wa wakit Muusa marag min bakaan al‑malik,
marag barra min al‑hille wa rafaʼ iideenah le Allah.
Wa khalaas,
al‑dagdaag wa l‑barad wa l‑matara wagafo.
34 Wakit al‑malik chaaf al‑matara wa l‑barad wa l‑dagdaag wagafo,
hu maʼa khaddaamiinah sawwo battaan nafs al‑zanib misil awwal wa gawwo ruuseehum ziyaada.
35 Wa l‑malik sawwa raas gawi wa aba ma khalla Bani Israaʼiil yamurgu min baladah,
misil Allah gaalah be waasitat Muusa.