Malik Masir anta bakaan le Yaakhuub
47
1 Wa khalaas,
Yuusuf macha khabbar al‑malik Firʼoon wa gaal :
« Akhwaani wa abuuyi jo khalaas min balad Kanʼaan maʼa bagarhum wa khanamhum wa kulla khumaamhum.
Wa hassaʼ gaaʼidiin fi turaab Goochan. »
2 Wa Yuusuf chaal khamsa min akhwaanah wa gaddamaahum le l‑malik.
3 Wa l‑malik saʼalaahum wa gaal :
« Awwal khidmitku chunu ?
» Wa humman raddo leyah wa gaalo :
« Ya sayyidna,
aniina siyaad al‑khanam,
misil juduudna. »
4 Wa gaalo battaan :
« Al‑juuʼ bigi chadiid fi balad Kanʼaan.
Ma fi marʼa le khanamna wa aniina jiina hini misil awraata.
Achaan da,
ya sayyidna,
antiina bakaan al‑nagoodu foogah fi turaab Goochan. »
5 Wa l‑malik gaal le Yuusuf :
« Abuuk wa akhwaanak jo lihgook hini.
6 Kulla balad Masir fi iideenak.
Khutt abuuk wa akhwaanak fi l‑bakaan al‑sameh al‑fi l‑balad di.
Khalliihum yaskunu fi turaab Goochan.
Wa kan chift ambeenhum naas waahidiin gaadriin,
antiihum masʼuuliiye hana bahaaymi. »
7 Wa Yuusuf gaddam abuuh Yaakhuub le l‑malik wa Yaakhuub gaal leyah :
« Allah yibaarikak. »
8 Wa l‑malik saʼal Yaakhuub wa gaal :
« Indak kam sana ? »
9 Wa Yaakhuub radda leyah :
« Indi 130 sana.
Wa ayyaami faato ajala wa icht fi taʼab hana hayaat al‑ruhhal.
Wa siniini ma lihgo adad siniin juduudi al‑humman kula aacho misil ruhhal. »
10 Wa battaan Yaakhuub gaal le Firʼoon :
« Allah yibaarikak.
» Wa marag.
11 Wa Yuusuf anta le abuuh wa le akhwaanah al‑bakaan al‑sameh bilheen fi balad Masir,
fi nuss hana turaab Raʼamsiis al‑binaaduuh Goochan,
misil al‑malik Firʼoon amarah beyah.
12 Wa Yuusuf anta maʼaach le abuuh wa le akhwaanah wa le kulla aayilat abuuh ale hasab adadhum.
Siyaasit Yuusuf fi wakit al‑juuʼ
13 Wa l‑juuʼ bigi chadiid bilheen wa ma fi maʼaach fi kulla l‑buldaan.
Wa naas al‑fi balad Masir wa fi balad Kanʼaan taʼbaaniin min al‑juuʼ.
14 Wa Yuusuf lamma kulla l‑gurus hana naas Masir wa Kanʼaan al‑charo beyah gameh.
Wa khatta al‑gurus da fi gasir al‑malik Firʼoon.
15 Wa wakit kulla l‑gurus hana balad naas Masir wa balad Kanʼaan kammal,
kulla l‑Masriyiin jo wa gaalo le Yuusuf :
« Antiina maʼaach !
Aniina ma indina gurus !
Walla tidoor numuutu be l‑juuʼ giddaamak ? »
16 Wa Yuusuf gaal leehum :
« Kan ma induku gurus da,
antuuni bahaayimku wa nantiiku maʼaach. »
17 Wa khalaas,
humman jaabo bahaayimhum le Yuusuf wa Yuusuf antaahum maʼaach fi badal kheelhum wa bagarhum wa hamiirhum wa khanamhum.
Wa fi kulla l‑sana di hu gaaʼid yantiihum maʼaach fi badal bahaayimhum.
18 Wa khalaas,
al‑sana di faatat wa fi l‑sana al‑taaniye al‑Masriyiin gabbalo jo wa gaalo le Yuusuf :
« Ya l‑sayyid al‑haakim,
aniina ma nagdaro nilabbudu minnak cheyy,
ma indina gurus.
Wa bahaayimna kulla bigo hineeyak inta.
Wa khalaas,
ma indina cheyy illa faddalna aniina wa turaabna bas.
19 Tidoor numuutu be l‑juuʼ giddaamak wa nikhallu turaabna walla ?
Achriina aniina wa turaabna,
be maʼaach.
Wa aniina wa kulla turaabna nabgo hana l‑malik.
Wa antiina teeraab le nahartu achaan ma numuutu wa turaabna ma yabga sahara. »
20 Wa Yuusuf chara kulla turaab Masir le l‑malik achaan al‑juuʼ bigi chadiid wa ayyi Masri baaʼ zerʼah.
Wa be misil da bas,
al‑balad kullaha bigat hana l‑malik Firʼoon.
21 Wa Yuusuf nagalaahum le kulla l‑chaʼab fi l‑mudun hana Masir.
22 Illa rujaal al‑diin bas ma baaʼo turaabhum achaan humman gaaʼidiin yiʼiichu be huguughum al‑gaaʼid yantiihum leehum al‑malik.
Achaan da,
Yuusuf ma chara turaabhum.
23 Wa Yuusuf gaal le l‑chaʼab :
« Hassaʼ da,
ana chareetku intu wa turaabku fi hisaab hana l‑malik.
Daahu nantiiku teeraab le tahartu al‑ziraaʼa.
24 Laakin fi wakt al‑gatiʼ,
antu al‑khumus min al‑intaaj le l‑malik.
Wa l‑baagi kamaan,
hanaaku intu achaan titeerubu ziraaʼitku wa tiʼiichu maʼa iyaalku wa kulla naas beetku. »
25 Wa kulla l‑chaʼab gaalo le Yuusuf :
« Ya l‑sayyid al‑haakim,
inta najjeetna wa wassaft leena ridaak.
Be da,
aniina khassadna nabgo abiid le l‑malik Firʼoon. »
26 Wa be misil da,
Yuusuf marag gaanuun jadiid al‑gaaʼid lahaddi al‑yoom fi Masir.
Wa l‑gaanuun buguul fi kulla turaab Masir,
khumus al‑intaaj le l‑malik.
Illa turaab hana rujaal al‑diin bas ma yabga hana l‑malik.
Wasiiyat Yaakhuub le Yuusuf
27 Wa Bani Israaʼiil sakano fi Masir fi turaab Goochan.
Wa charo bakaan wa wildo wa bigo katiiriin.
28 Wa Yaakhuub aach 17 sana fi Masir.
Wa umrah 147 sana.
29 Wa wakit Yaakhuub irif kadar gariib yumuut khalaas,
naada wileedah Yuusuf wa gaal leyah :
« Kan inta radyaan be kalaami,
wassif leyi kheerak wa amaanak.
Ma tadfinni fi Masir.
Khutt iidak fi wirki wa ahlif leyi.
30 Kan ana mutt wa lihigt abbahaati,
amrug janaazti min Masir wa amchi adfinha fi khubuur juduudi.
» Wa Yuusuf radda leyah :
« Tamaam,
ya abuuyi,
nisawwi misil inta gultah leyi. »
31 Wa Yaakhuub gaal leyah :
« Ahlif leyi !
» Wa khalaas,
Yuusuf halaf.
Wa fi l‑bakaan da,
Yaakhuub antaka fi sariirah.