Yuusuf wileed Yaakhuub
37
1 Yaakhuub gaaʼid fi balad Kanʼaan,
al‑abuuh Ishaakh ja sakan foogha.
2 Wa daahu taariikh Yaakhuub.
Wa wileedah Yuusuf sabi wa umrah sabaʼtaachar sana wa gaaʼid yasrah be l‑khanam maʼa akhwaanah iyaal abuuh.
Humman iyaal Bilha wa Zilfa awiin Yaakhuub.
Wa Yuusuf gaaʼid yikhabbir abuuhum be amalhum al‑cheen.
3 Wa Yaakhuub al‑sammooh Israaʼiil habba Yuusuf ziyaada min kulla akhwaanah achaan hu wildaah wakit hu chaayib.
Wa antaah khalag khaali.
4 Wa wakit akhwaanah chaafo kadar abuuhum yiriid Yuusuf ziyaada minhum,
humman kirhooh wa ma dawwaro kalaamah.
5 Wa yoom waahid,
Yuusuf riʼi wa khabbar akhwaanah be l‑ruʼya wa gaal leehum :
6 « Asmaʼo ya akhwaani,
ana hilimt.
7 Aniina gaaʼidiin fi l‑zereʼ wa nagtaʼo gameh.
Wa ayyi waahid minnina rabat rubta waahide hana gameh.
Wa baʼadeen,
rubtiti gammat wagafat be tuulha wa rubatku jo hawwagooha wa sajado leeha. »
8 Wa min simʼo kalaamah da,
humman gaalo leyah :
« Inta tidoor tabga foogna sultaan wa tahkimna walla ?
» Wa humman kirhooh be ziyaada achaan ruʼyitah di wa achaan kalaamah da.
9 Wa Yuusuf riʼi battaan wa kallam le akhwaanah wa gaal leehum :
« Ana battaan hilimt.
Al‑harraay wa l‑gamar wa ihdaachar nujuum sajado leyi. »
10 Wa hajja beyah le abuuh kula.
Wa abuuh kachchar leyah wa gaal :
« Da kalaam chunu ?
Hu da hilim hana chunu ?
Tahsib ana wa ammak wa akhwaanak kullina nasjudu leek walla ? »
11 Wa akhwaanah anhasado wa laakin abuuhum kamaan karab al‑kalaam da fi galbah.
Akhwaan Yuusuf baaʼooh
12 Yoom waahid,
akhwaan Yuusuf macho fi l‑kadaade yasraho be khanam abuuhum,
gariib le hillit Chakiim.
13 Wa Yaakhuub al‑sammooh Israaʼiil gaal le Yuusuf :
« Asmaʼ,
akhwaanak gaaʼidiin yasraho be l‑khanam gariib le Chakiim.
Amchi alhaghum.
» Wa Yuusuf gaal :
« Tamaam,
namchi. »
14 Wa Israaʼiil gaal leyah :
« Amchi algaahum wa chiif kikkeef mugʼadhum maʼa l‑khanam.
Wa jiib leyi khabar aafiyithum. »
Wa khalaas,
Israaʼiil rassal Yuusuf min waadi Hibruun wa Yuusuf macha ale hillit Chakiim.
15 Wakit raayikh fi l‑kadaade,
lamma maʼa raajil waahid.
Wa l‑raajil da saʼalah wa gaal leyah :
« Inta gaaʼid tifattich chunu ? »
16 Wa Yuusuf radda leyah wa gaal :
« Ana gaaʼid nifattich akhwaani.
Wassifni al‑bakaan al‑macho yasraho foogah. »
17 Wa l‑raajil gaal :
« Humman faato minni hini wa ana simiʼtuhum gaaʼidiin yihajju wa fi l‑akhiir,
gaalo :
‹ Namchu Dutaan.
› »
Wa khalaas,
Yuusuf chaal derib hana akhwaanah wa macha ligaahum fi Dutaan.
18 Wa wakit humman chaafooh jaayi min baʼiid gubbaal ma yalhaghum ke bas,
humman gammo achchaawaro foogah le yaktuluuh
19 wa gaalo ambeenaathum :
« Daahu siid al‑hilim jaayi !
20 Taʼaalu naktuluuh wa nazguluuh fi biir.
Wa nuguulu haywaan fasil bas akalah.
Wa baʼadeen,
nichiifu hilmah da,
yisawwi leyah chunu ? »
21 Wa laakin wakit Raʼuubiin simiʼ kalaamhum da,
dawwar yinajjiih minhum wa gaal :
« Ma naktuluuh !
22 Azguluuh fi l‑biir al‑fi l‑khala di achaan ma tichiilu leeku dimme.
Wa iideeku kula ma tukhuttuuhum foogah.
» Wa hu kallam leehum misil da achaan dawwar yinajjiih wa yiwaddiih le abuuh.
23 Wa khalaas min Yuusuf wassal bakaan akhwaanah,
humman gammo karabooh wa sallo minnah khalagah al‑khaali
24 wa zagalooh fi l‑biir.
Wa l‑biir di yaabse,
ma indaha almi.
25 Wa khalaas,
macho gaʼado tihit le yaakulu.
Wakit gaaʼidiin yaakulu,
rafaʼo ruuseehum wa chaafo tujjaar Ismaaʼiiliyiin jaayiin be jumaalhum min turaab Gilʼaad maachiin ale Masir.
Wa jumaalhum chaayliin samukh hana kitir wa talha wa dukhkhaan.
26 Wa fi l‑bakaan da,
khalaas Yahuuza gaal le akhwaanah :
« Chunu al‑faayde al‑nalgooha kan katalna akhuuna wa labbadnaah ?
27 Khalli ma naktuluuh wa laakin nibiiʼuuh le l‑tujjaar dool achaan hu akhuuna min dammina wa lahamna.
» Wa khalaas khassado.
28 Wa baʼad chiyya ke,
tujjaar Midyaaniyiin jaayiin faaytiin.
Wa akhwaanah le Yuusuf gammo sallooh min al‑biir wa baaʼooh le l‑Ismaaʼiiliyiin be taman al‑yibiiʼu beyah al‑abiid.
Wa waddooh Masir.
29 Wa baʼadeen,
Raʼuubiin ja taawag Yuusuf fi l‑biir wa ma ligaah.
Wa min al‑hizin gamma charrat khalagah.
30 Wa gabbal le akhwaanah wa gaal leehum :
« Al‑wileed ma fiih !
Hassaʼ da,
nisawwi chunu ? »
31 Wa khalaas,
humman dabaho tees wa chaalo al‑khalag al‑khaali hana Yuusuf wa dassooh fi l‑damm.
32 Wa rassalo al‑khalag al‑khaali da le abuuhum wa wassooh le l‑mursaal yuguul le abuuhum :
« Chiifah !
Aniina ligiina al‑khalag da.
Ma hana wileedak walla ? »
33 Wa Yaakhuub,
min chaaf al‑khalag da,
hu irif kadar da hana wileedah.
Wa gamma sarakh wa gaal :
« Sahiih al‑khalag da hana wileedi !
Haywaan waahid katalah wa gattaʼah wa akalah ! »
34 Wa Yaakhuub charrat khalagah wa libis khalag hana hizin.
Wa mudda tawiile hu gaaʼid yabki le wileedah.
35 Awlaadah wa banaatah kulluhum yaju yihannusuuh laakin hu aba ma yilhannas leehum wa gaal :
« Ana nagood haznaan lahaddi namchi nilimmu maʼaayah fi l‑khabur.
» Wa gaaʼid yabki le wileedah bas.
36 Wa l‑tujjaar waddo Yuusuf fi Masir wa baaʼooh le Fuutifaar.
Wa Fuutifaar da,
hu kabiir hurraas al‑malik.