Yaakhuub khaaf min akhuuh Isuu
32
1 *Wa Yaakhuub taabaʼ safarah wa malaaʼikat Allah baano leyah.
2 Wa wakit Yaakhuub chaafaahum gaal :
« Da bakaan al‑gaaʼidiin foogah askar al‑Rabb.
» Wa samma al‑bakaan da Mahanaayim (maʼanaatah muʼaskaraat itneen).
3 Wa Yaakhuub rassal naas giddaamah achaan yamchu le akhuuh Isuu fi turaab Saʼiir fi balad Adoom.
4 Wa wassaahum wa gaal leehum :
« Guulu le siidi Isuu :
‹ Daahu kalaam abdak Yaakhuub :
“Ana sakant fi bakaan Laabaan wa gaʼadt maʼaayah lahaddi l‑yoom.
5 Wa hassaʼ indi bagar wa hamiir wa khanam wa abiid wa khaddaamaat.
Wa ana rassalt naas leek le yikhabburuuk inta siidi Isuu le tarda leyi.”
› »
6 Wa baʼad da,
wakit al‑naas al‑Yaakhuub rassalaahum gabbalo,
humman gaalo leyah :
« Aniina lammeena maʼa akhuuk Isuu wa hu zaatah jaayi le yigaabilak.
Wa laakin indah maʼaayah 400 raajil ! »
7 Wa Yaakhuub khaaf khoof chadiid wa gamma gassam al‑naas al‑gaaʼidiin maʼaayah wa l‑khanam wa l‑bagar wa l‑jumaal ale majmuuʼteen.
8 Wa gaal fi galbah :
« Kan Isuu lamma maʼa l‑majmuuʼa al‑waahide wa darabaaha kula,
al‑majmuuʼa al‑aakhara tanja. »
9 Wa gaal :
« Ya Allah Rabb jiddi Ibraahiim wa abuuyi Ishaakh !
Ya Allah !
Inta al‑gult leyi :
‹ Gabbil baladak fi bakaan ahalak wa nisawwi leek al‑kheer. ›
10 Wa ana sakhayyar giddaam al‑rahma wa l‑amaan al‑inta anteetah leyi ana abdak.
Achaan wakit ana chaggeet bahar al‑Urdun ma indi cheyy illa asaati.
Wa hassaʼ daahu indi furgaan itneen.
11 Nachhadak tinajjiini min akhuuyi Isuu achaan ana khaayif hu yaji yaktulna ana wa l‑awiin wa l‑iyaal.
12 Wa awwal inta gult leyi :
‹ Nisawwi leek al‑kheer wa nisawwi zurriiytak katiire misil ramla hana khachum al‑bahar al‑naadum ma yagdar yahsibha min al‑katara.
› »
13 Wa fi l‑leele di,
Yaakhuub gaʼad fi l‑bakaan da.
Wa chaal min al‑maal al‑ja beyah le yigaddimah hadiiye le akhuuh Isuu.
14 Wa l‑maal da 200 anzaay wa 20 tees wa 200 naʼaje wa 20 kabich
15 wa 30 naaga be iyaalhum wa 40 bagara wa 10 toor wa 20 humaara wa 10 humaar.
16 Wa amman al‑bahaayim dool le khaddaamiinah wa gassamaahum ambeenaathum.
Wa ayyi waahid kallafah be door hana bahaayim wa gaal leehum :
« Gaddumu giddaami wa khallu faraga ambeenaatku. »
17 Wa anta amur le khaddaamah al‑maachi awwal wa gaal leyah :
« Kan akhuuyi Isuu laagaak wa saʼalak gaal leek :
‹ Inta yaatu wa maachi ween wa l‑bahaayim al‑maachi beehum dool hana yaatu ? ›
18 Guul leyah :
‹ Al‑bahaayim dool hana abdak Yaakhuub wa hu rassalaahum hadiiye le siidah Isuu.
Wa hu zaatah jaayi waraana.
› »
19 Wa anta nafs al‑amur le khaddaamah al‑taani wa l‑taalit wa le kulla l‑naas al‑maachiin maʼa l‑bahaayim wa gaal leehum :
« Kan lammeetu maʼa Isuu,
guulu leyah al‑kalaam da.
20 Wa battaan guulu leyah :
‹ Daahu abdak Yaakhuub zaatah jaayi waraana.
› »
Achaan hu fakkar wa gaal :
« Khalli nidalli galbah be l‑hadiiye al‑machat giddaami di.
Wa baʼad da,
kan gaabalna maʼaayah wijih be wijih kula,
akuun yigaabilni be farah. »
21 Wa l‑hadiiye machat giddaamah.
Wa Yaakhuub kamaan,
gaʼad fi fariigah.
Allah khayyar usum Yaakhuub
22 Wa be l‑leel,
Yaakhuub gamma chaal awiinah al‑itneen wa khaddaamaatah al‑itneen wa awlaadah al‑ihdaachar wa gattaʼaahum waadi Yabbuukh.
23 Wa baʼad chaalaahum wa gattaʼaahum al‑bahar wa gattaʼ kulla cheyy al‑indah,
24 hu faddal hinaak wiheedah.
Wa raajil waahid ja saaraʼah lahaddi gariib sabaah.
25 Wa wakit al‑raajil irif kadar hu ma yagdar yakhalbah fi l‑siraaʼ da,
gamma darab Yaakhuub fi wirkah wa wirkah marag.
26 Wa l‑raajil gaal le Yaakhuub :
« Khalliini namchi achaan al‑wata gariib tasbih.
» Wa Yaakhuub gaal leyah :
« Ana ma nikhalliik tamchi kan ma baaraktini ! »
27 Wa l‑raajil saʼal Yaakhuub wa gaal leyah :
« Usmak yaatu ?
» Wa hu gaal :
« Usmi Yaakhuub. »
28 Wa l‑raajil gaal :
« Baʼad al‑yoom,
ma yinaaduuk Yaakhuub,
khalli yinaaduuk Israaʼiil (maʼanaatah saaraʼ maʼa l‑Rabb).
Achaan inta saaraʼt maʼa l‑Rabb wa maʼa l‑naas wa inta annasart. »
29 Wa Yaakhuub saʼal al‑raajil wa gaal leyah :
« Min fadlak,
ooriini usmak.
» Wa l‑raajil gaal :
« Maala tasʼalni min usmi ?
» Wa fi l‑bakaan da,
hu baarak Yaakhuub.
30 Wa Yaakhuub samma al‑bakaan da Faniyiil (maʼanaatah wijih al‑Rabb) achaan hu gaal :
« Ana chift al‑Rabb wijih be wijih wa laakin ana nijiit min al‑moot ! »