Al‑nindili hana l‑akhwaat al‑itneen
30
1 Wa wakit Raahiil chaafat kadar hi ma wildat le Yaakhuub,
gammat nandalat fi akhutha wa gaalat le Yaakhuub :
« Antiini iyaal !
Kan ma ke da,
ana numuut ! »
2 Wa Yaakhuub gamma ziʼil foogha wa gaal leeha :
« Ana wa la Allah,
nadharki al‑waaluuda. »
3 Wa Raahiil gaalat leyah :
« Di hi khaddaamti Bilha.
Adkhul beeha wa hi talda wa ana nirabbiihum.
Wa beeha hi bas,
ana kula nalga iyaal. »
4 Wa hi dafaʼat le Yaakhuub khaddaamitha Bilha wa hu dakhal beeha wa hi bigat martah.
5 Wa bigat khalbaane wa jaabat wileed le Yaakhuub.
6 Wa Raahiil gaalat :
« Al‑Rabb hakam leyi !
Khibil suʼaali wa antaani wileed.
» Achaan da,
hi sammatah Daan (maʼanaatah hu hakam leyi).
7 Wa Bilha khaddaamit Raahiil jaabat battaan wileed le Yaakhuub.
8 Wa Raahiil gaalat :
« Ana haarabt akhti wa annasart.
» Wa sammatah Naftaali (maʼanaatah al‑harib).
9 Wa wakit Leeya chaafat kadar hi wagafat min al‑waaluuda,
hi kula chaalat khaddaamitha Zilfa wa dafaʼatha le Yaakhuub achaan tabga leyah mara.
10 Wa Zilfa khaddaamit Leeya jaabat wileed le Yaakhuub.
11 Wa Leeya gaalat :
« Al‑saʼaada jaatni !
» Wa l‑wileed sammatah Gaad (maʼanaatah al‑saʼaada).
12 Wa Zilfa khaddaamit Leeya jaabat battaan wileed le Yaakhuub.
13 Wa Leeya gaalat :
« Aywa !
Ana farhaane !
Wa l‑banaat yinaadanni al‑Farhaane.
» Wa hi sammatah Achiir (maʼanaatah al‑farah).
14 Wa fi wakt al‑gatiʼ hana l‑gameh,
Raʼuubiin macha fi l‑zereʼ wa ligi chadarat al‑waaluuda wa jaabaaha le ammah Leeya.
Wa Raahiil gaalat le Leeya :
« Min fadulki,
antiini min chadarat al‑waaluuda al‑wileedki jaabaaha leeki di. »
15 Wa laakin Leeya raddat leeha wa gaalat :
« Inti chilti raajli,
da kula ma tammaaki ?
Wa battaan tidoori tichiili chadarat al‑waaluuda al‑wileedi jaabaaha leyi !
» Khalaas Raahiil gaalat leeha :
« Yo,
sameh !
Kan ke da,
khalli al‑yoom Yaakhuub yamchi yargud fi bakaanki,
fi badal chadarat al‑waaluuda hana wileedki. »
16 Wa be achiiye,
wakit Yaakhuub jaayi min al‑zereʼ,
Leeya maragat laagatah wa gaalat leyah :
« Al‑yoom taji fi bakaani achaan ana ajjartak be chadarat al‑waaluuda hana wileedi.
» Wa l‑leele di,
hu macha ragad fi bakaanha.
17 Wa l‑Rabb simiʼ kalaam Leeya.
Wa hi bigat khalbaane wa wildat wileedha al‑khaamis le Yaakhuub.
18 Wa gaalat :
« Al‑Rabb antaani ajur,
ana al‑anteet khaddaamti le raajli.
» Wa hi sammatah Yassaakar (maʼanaatah ajur).
19 Wa Leeya bigat battaan khalbaane wa wildat wileedha al‑saadis le Yaakhuub.
20 Wa gaalat :
« Al‑Rabb antaani hadiiye samha !
Wa fi l‑marra di raajli yaskun maʼaayi achaan ana jibt leyah sitte awlaad.
» Wa hi sammatah Zabuluun (maʼanaatah yaskun).
21 Wa fi l‑akhiir,
jaabat bineeye wa sammatha Diina.
22 Wa baʼad da,
al‑Rabb fakkar le Raahiil wa khibil suʼaalha wa razakhaaha be l‑waaluuda.
23 Wa hi bigat khalbaane wa jaabat wileed wa gaalat :
« Al‑Rabb sallaani min al‑ihaana. »
24 Wa hi sammatah Yuusuf (maʼanaatah yiziid).
Wa gaalat :
« Allah yiziidni wileed aakhar. »
Yaakhuub bigi khanni
25 Wa baʼad Raahiil wildat Yuusuf,
Yaakhuub gaal le Laabaan :
« Khalliini nigabbil baladi.
26 Hassaʼ da,
antiini awiini wa iyaali al‑fi chaanhum ana khadamt leek.
Nichiilhum wa namchi.
Wa inta zaatak taʼarif adiil kulla l‑khidme al‑ana sawweetha leek. »
27 Wa Laabaan gaal leyah :
« Ya wileedi,
kan inta radyaan leyi,
ana chawwaft wa irift kadar Allah baarakaani be sababak inta.
28 Ooriini maahiiytak wa nikaffiik. »
29 Wa Yaakhuub gaal leyah :
« Inta zaatak taʼarif kikkeef ana khadamt leek wa chift kikkeef maalak bigi beyi ana.
30 Achaan al‑maal al‑chiyya al‑awwal indak gubbaali,
hassaʼ zaad wa bigi katiir.
Wa Allah baarakak min ana jiit fi beetak.
Wa hassaʼ da,
nakhdim le nafsi mata ? »
31 Wa Laabaan gaal :
« Waajib nantiik chunu ?
» Wa Yaakhuub radda leyah wa gaal :
« Ma tantiini cheyy.
Laakin kan tikhassid be l‑kalaam al‑nuguulah leek da,
ana nasrah leek battaan be khanamak wa nahfadhum.
32 Al‑yoom namchi fi lubb maalak wa niʼazzil kulla l‑khanam al‑rugut wa l‑duroʼ wa kulla l‑dawaayin al‑zurug min khanamak.
Wa niʼazzil min inzeek kulla l‑rugut wa l‑duroʼ.
Wa dool bas yabgo maahiiyti.
33 Wa ambaakir,
kan inta macheet chift khanami wa ligiit fooghum loon aakhar,
da illa ana saragtah.
Wa be da,
taʼarif kan ana saalih walla la. »
34 Wa Laabaan gaal :
« Sameh.
Ana khassadt be kalaamak da. »
35 Wa laakin fi nafs al‑yoom,
Laabaan gamma azzal al‑tuyuus al‑rugut wa l‑induhum siihaan wa l‑inze al‑duroʼ wa l‑rugut wa kulla l‑khanam al‑induhum bayaad wa l‑dawaayin al‑zurug.
Wa antaahum le iyaalah.
36 Wa Laabaan baʼʼad min Yaakhuub be talaata yoom hana ruwaakha.
Wa Yaakhuub gaaʼid yasrah be l‑khanam al‑faddalo.
37 Wa Yaakhuub chaal mataarig khudur min talaata chadar chig chig wa le l‑mataarig dool,
nagga girifhum wa sawwa fooghum siihaan.
Wa bakaan waahid yikhalliihum be girifhum achaan yabgo rugut.
38 Wa wakit al‑anaati yihiilan wa l‑dukuur yihiiju wa yaju yacharbo almi,
hu yukhutt al‑mataarig al‑rugut fi l‑hiitaan,
bakaan al‑khanam yaju yacharbo foogah.
39 Wa khalaas,
al‑khanam yiʼachchuru jamb al‑mataarig al‑rugut wa yijiibu iyaal rugut wa duroʼ wa induhum siihaan.
40 Wa kan le l‑dawaayin,
Yaakhuub yukhuttuhum taraf wa yiwajjihhum ale l‑kubchaan al‑rugut wa ale kulla l‑kubchaan al‑zurug hana Laabaan.
Wa be misil da,
Yaakhuub sawwa leyah maal wa ma khallaahum khalbato maʼa khanam Laabaan.
41 Wa ayyi wakit al‑khanam al‑kubaar kan haalo,
Yaakhuub yukhutt al‑mataarig giddaamhum fi l‑hiitaan achaan yiʼachchuru giddaam al‑mataarig.
42 Laakin kan le l‑khanam al‑daʼiifiin,
hu ma yukhutt giddaamhum abadan al‑mataarig.
Be misil da,
al‑khanam al‑daʼiifiin bigo hana Laabaan wa l‑chudaad hana Yaakhuub.
43 Wa be misil da,
Yaakhuub ligi maal ziyaada.
Indah bahaayim katiiriin wa khaddaamiin wa khaddaamaat wa indah jumaal wa hamiir.