Fasaalit naas Saduum
19
1 Wakit al‑malaaʼika al‑itneen wassalo fi Saduum be achiiye,
Luut gaaʼid fi khachum baab al‑madiina.
Wa wakit chaafaahum,
gamma laagaahum wa sajad giddaamhum.
2 Wa gaal :
« Marhab beeku !
Alfaddalo fi beet abduku achaan tikhassulu rijleeku wa tunuumu wa ambaakir fajur,
tamchu.
» Wa humman gaalo :
« La.
Nunuumu barra hini fi l‑nagaʼa di. »
3 Wa laakin Luut ma khallaahum wa asaraahum lahaddi waddaahum beetah wa sawwa leehum akil wa khubza bala tawwaara wa humman akalo.
4 Wa lissaaʼ ma naamo ke bas,
kulla l‑rujaal hana madiinat Saduum min subyaanhum lahaddi chiyyaabhum jo wa hawwago al‑beet.
5 Wa naado Luut wa gaalo leyah :
« Ween al‑rujaal al‑dakhalo fi beetak ?
Amrughum leena ajala achaan narugdu maʼaahum ! »
6 Wa Luut marag leehum wa sadda al‑baab waraayah
7 wa gaal leehum :
« Ya akhwaani,
ana nachhadku ma tisawwu leehum cheyy fasil.
8 Daahu indi banaat itneen lissaaʼhin ma chaafan rujaal.
Namrughin leeku barra wa sawwu fooghin ayyi cheyy al‑tidooruuh.
Laakin al‑rujaal al‑itneen dool,
ma tisawwu leehum cheyy fasil achaan humman diifaani wa waajib ana nahmiihum. »
9 Wa laakin humman raddo le Luut wa gaalo :
« Kiss min hini !
Inta waahid wa ajnabi wa tidoor tahkimna walla ?
Agiif !
Nisawwu leek cheyy fasil ziyaada min hanaahum ! »
Wa khalaas,
lazzo Luut be gudra wa dawwaro yikassuru al‑baab.
10 Wa laakin al‑malaaʼika al‑itneen jabado Luut daakhal wa saddo al‑baab fooghum.
11 Wa tawwaali al‑malaaʼika darabo kulla l‑naas al‑gaaʼidiin fi khachum al‑baab be l‑ama min kubaarhum lahaddi dugaaghum.
Wa be da,
humman ma gidro ligo al‑baab.
Allah najja Luut wa aayiltah
12 Wa l‑malaaʼika gaalo le Luut :
« Indak yaatu fi l‑hille di ?
Kan indak nusbaan wa awlaad wa banaat wa naas aakhariin al‑gariibiin leek kula,
amrughum min hini !
13 Aniina nidammuru al‑bakaan da achaan Allah simiʼ al‑chakwa didd naas al‑madiina di be sabab fiʼilhum al‑cheen.
Wa Allah rassalaana le nidammuruuha. »
14 Wa Luut macha ligi nusbaanah al‑yidooru yaakhudu banaatah wa gaal leehum :
« Yalla !
Gummu amurgu min hini !
Achaan Allah yidoor yidammir al‑madiina di.
» Laakin humman chaafo kalaamah misil liʼib saakit.
15 Wa be fajur badri,
al‑malaaʼika asaro Luut wa gaalo leyah :
« Gumm !
Amrug ajala !
Chiil martak wa banaatak al‑itneen al‑gaaʼidiin hini achaan ma tumuutu be sabab ikhaab al‑madiina di ! »
16 Wa laakin Luut alʼakhkhar fi l‑marigiin wa l‑malaaʼika karaboohum min iideehum,
hu wa martah wa banaatah wa maragoohum barra min al‑madiina achaan Allah dawwar yinajjiihum.
17 Wakit maragoohum barra min al‑madiina di,
waahid min al‑malaaʼika gaal le Luut :
« Kan tidoor tinajji nafsak,
ajri !
Ma tinlafit waraak wa ma tagiif fi l‑waadi.
Amchi fi l‑hajar achaan ma tumuut. »
18 Wa Luut gaal :
« La,
ya Rabb,
da ma mumkin !
19 Ya Rabb,
ligiit minnak al‑rida wa l‑rahma al‑kabiire achaan najjeet hayaati.
Laakin ma nagdar najri lahaddi l‑hajar daak.
Kan al‑damaar da lihigni fi l‑derib,
ana numuut !
20 Chiif !
Al‑hille di gariib leyi wa nagdar nawsalha ajala wa hi hille sakhayre bas.
Wa khalliini namchi foogha.
Hi hille sakhayre wa ninajji nafsi. »
21 Wa l‑malak gaal leyah :
« Ana simiʼt kalaamak,
ma nidammir al‑hille al‑inta hajjeet beeha.
22 Ajri ajala !
Amchi fi l‑hille di.
Ana ma nagdar nisawwi cheyy gubbaal inta ma tawsal foogha.
» Fi chaan da bas,
sammo al‑hille di Suukhar (maʼanaatah sakhayre).
Allah dammar Saduum wa Amuura
23 Wakit Luut wassal fi Suukhar,
al‑harraay dahaabha gaaʼide tatlaʼ.
24 Wa fi l‑wakit da,
Allah nazzal min al‑sama kibriit wa matara hana naar chadiide fi Saduum wa Amuura.
25 Wa Allah dammar al‑mudun dool wa kulla l‑mantaga wa l‑hillaal wa sukkaanhum wa kulla nabaataat al‑ard.
26 Wa marit Luut anlafatat le tichiif waraaha wa tawwaali yibsat bigat mileh wa waagfe be tuulha misil al‑duuliye.
27 Wa ambaakir be fajur,
Ibraahiim macha fi l‑bakaan al‑awwal wagaf foogah giddaam Allah.
28 Wa wajjah ale Saduum wa Amuura wa ale kulla l‑hillaal al‑gaaʼidiin jambuhum wa chaaf dukhkhaan azrag kurum taaliʼ min al‑ard misil dukhkhaan hana hariige.
29 Wa be misil da,
al‑Rabb dammar mudun al‑mantaga al‑Luut sakan fooghum.
Wa laakin hu fakkar le Ibraahiim wa marag Luut min al‑damaar.
Amal banaat Luut
30 Wa baʼad kulla l‑cheyy da,
Luut khaaf ma yaskun fi Suukhar wa macha maʼa banaatah al‑itneen fi l‑hajar wa sakan fi karkuur.
31 Wa yoom waahid,
bineeytah al‑kabiire gaalat le akhutha al‑sakhayre :
« Abuuna bigi chaayib wa ma fi rujaal fi l‑balad di al‑yaju yaakhuduuna misil fi aadit kulla naas al‑ard.
32 Taʼaali,
nisakkuru abuuna be khamar wa narugdu maʼaayah achaan nijiibu leyah zurriiye. »
33 Wa fi l‑leele di,
sakkaran abuuhin be khamar wa l‑kabiire machat ragadat maʼaayah wa laakin abuuha ma irif wakit hi ragadat maʼaayah wa wakit hi gammat.
34 Wa ambaakir,
al‑kabiire gaalat le akhutha :
« Albaareh ana ragadt maʼa abuuna.
Wa l‑leele kula,
khalli nisakkuruuh wa amchi arugdi maʼaayah achaan nijiibu leyah zurriiye. »
35 Wa fi l‑leele di,
sakkaran abuuhin wa l‑sakhayre machat ragadat maʼaayah wa laakin abuuha ma irif wakit hi ragadat maʼaayah wa wakit hi gammat.
36 Wa banaat Luut al‑itneen himlan.