Waaluudit Ismaaʼiil
16
1 Wa Saaraay marit Abraam ma wildat leyah.
Wa indaha khaadim Masriiye usumha Haajar.
2 Wa Saaraay gaalat le Abraam raajilha :
« Daahu Allah daharaani al‑waaluuda.
Chiil khaadmi di.
Akuun Allah yantiini minha iyaal.
» Wa Abraam khassad be kalaam martah.
3 Wa da baʼad humman sakano achara sana fi balad Kanʼaan.
Wa khalaas,
Saaraay marit Abraam dafaʼat khaadimha Haajar al‑Masriiye le Abraam raajilha achaan tabga leyah mara.
4 Wa Abraam dakhal foogha wa hi bigat khalbaane.
Wakit irfat nafisha hi khalbaane,
badat tahgir sittaha.
5 Wa Saaraay gaalat le Abraam :
« Al‑hugra al‑Haajar gaaʼide tisawwiiha leyi di,
minnak inta !
Achaan ana bas anteetak khaadmi wa hassaʼ min hi irfat kadar hi khalbaane,
gammat tahgirni !
Wa ana khalleetak maʼa Allah ! »
6 Wa Abraam gaal leeha :
« Di hi khaadimki.
Hi gaaʼide tihitki.
Sawwi foogha ayyi cheyy al‑tidooriih.
» Wa khalaas,
Saaraay badat titaʼʼibha.
Wa Haajar gammat arradat minha.
7 Wa baʼad da,
malak Allah ligaaha le Haajar gariib le een almi al‑fi l‑sahara fi l‑derib al‑maachi ale balad Chuur.
8 Wa gaal leeha :
« Ya Haajar khaadim Saaraay !
Jaaye min ween wa maache ween ?
» Wa hi gaalat :
« Ana muʼarride baʼiid min sitti Saaraay ! »
9 Wa malak Allah gaal leeha :
« Gabbili le sittiki wa karrimiiha. »
10 Wa gaal leeha battaan :
« Allah yantiiki zurriiye min al‑katara ma tinhasib.
11 Daahu inti khalbaane wa talde wileed wa tisammiih Ismaaʼiil (maʼanaatah Allah yasmaʼ) achaan Allah simiʼ be taʼabki.
12 Wa wileedki yiʼiich wiheedah misil humaar al‑kadaade al‑naadum ma yagdar yidallilah.
Wa yabga didd kulla l‑naas wa kulla l‑naas yabgo diddah.
Wa yabga didd akhwaanah kulluhum. »
13 Wa Haajar gaalat fi nafisha :
« Ajab !
Sahiih ke !
Ana chift Allah al‑gaaʼid yichiifni wa lissaaʼni gaaʼide hayye walla ?
» Wa hi sammat Allah al‑hajja leeha be l‑usum Inta al‑Ilaah al‑gaaʼid Tichiifni.
14 Achaan da bas,
al‑biir al‑gaaʼide ambeen hillit Khaadich wa hillit Baarad di,
sammooha Biir Allah al‑Hayy al‑gaaʼid Yichiifni.