Al‑insaan isi amur Allah
3
1 Wa l‑daabi hu najiid min kulla haywaanaat al‑kadaade al‑khalagaahum Allah al‑Rabb.
Wa l‑daabi saʼalaaha le l‑mara wa gaal :
« Sahiih ke al‑Rabb gaal leeku ma taakulu iyaal min kulla l‑chadar al‑fi l‑jineene walla ? »
2 Wa l‑mara raddat le l‑daabi wa gaalat :
« Nagdaro naakulu min iyaal kulla l‑chadar al‑fi l‑jineene.
3 Laakin min iyaal al‑chadara al‑fi ust al‑jineene di,
al‑Rabb gaal leena ma naakuluuhum wa la nilammusuuhum.
Achaan kan yoom akalnaahum da,
numuutu. »
4 Wa l‑daabi radda leeha wa gaal :
« La !
Ma tumuutu !
5 Al‑Rabb yaʼarif kan yoom akaltuuhum,
uyuunku yinfathu wa tabgo mislah.
Wa taʼarfu al‑kheer wa l‑charr. »
6 Wa khalaas,
al‑mara chaafat al‑chadara di taʼajib al‑een wa samha le l‑akil wa adiile tanti al‑ilim.
Wa be da,
gataʼat min iyaalha,
akalatah wa raajilha gaaʼid jambaha wa hi antatah wa hu kula akal.
7 Wa tawwaali ke,
uyuunhum anfataho wa irfo nufuushum kadar humman aryaaniin.
Khalaas,
chaalo warchaal kubaar min chadara al‑tiin,
khayyatooh wa saddo beyah ireehum.
8 Wa be achiiye wakit al‑riih gaaʼide tusuug,
al‑raajil wa martah simʼo hiss Allah al‑Rabb fi l‑jineene.
Wa humman allabbado min wijih Allah al‑Rabb fi usut chadar al‑jineene.
9 Wa Allah al‑Rabb naada al‑raajil wa gaal leyah :
« Inta ween ? »
10 Wa l‑raajil radda wa gaal :
« Ana simiʼt harakatak fi l‑jineene wa khuft minnak achaan ana aryaan.
Fi chaan da bas,
ana allabbadt minnak. »
11 Wa Allah al‑Rabb gaal leyah :
« Yaatu al‑ooraak kadar inta aryaan ?
Hal inta akalt min al‑chadara al‑ana dahartak minha walla ? »
12 Wa l‑raajil gaal :
« Al‑mara al‑inta khatteetha maʼaayi di,
hi bas antatni min iyaal al‑chadara wa ana akaltah. »
13 Wa Allah al‑Rabb gaal le l‑mara :
« Chunu al‑sawweetiih da ?
» Wa hi gaalat :
« Al‑daabi bas khachchaani wa ana akalt. »
Natiijat al‑zanib
14 Wa khalaas,
Allah al‑Rabb gaal le l‑daabi :
« Fi chaan al‑inta sawweetah da bas,
inta tabga malʼuun
min kulla l‑bahaayim
wa haywaanaat al‑kadaade.
Tinkarra be batnak wa taakul ajaaj
fi kulla muddit hayaatak.
15 Inta wa l‑mara tabgo udwaan
wa zurriiytak wa zurriiyitha yabgo udwaan.
Wa waahid minhum yikassir raasak
wa inta tiʼaddiih fi kaʼabah. »
16 Wa Allah gaal le l‑mara :
« Khalabatki tabga leeki gaasiye
wa inti tatʼabe fi l‑waaluuda.
Wa indiki chahwa le raajilki
wa laakin hu yamlukki. »
17 Wa Allah gaal le Adam :
« Inta simiʼt kalaam martak
wa akalt min iyaal hana l‑chadara
al‑ana dahartak minha.
Fi chaanak inta,
al‑turaab yabga malʼuun.
Wa talga maʼaachak be taʼab
fi kulla muddit hayaatak.
18 Chook wa haskaniit yugummu leek
min al‑turaab
wa taakul min nabaataat al‑kadaade.
19 Wa be duraaʼak bas taakul
lahaddi tigabbil fi l‑turaab
al‑khalagook minnah.
Achaan inta min al‑turaab
wa tigabbil fi l‑turaab. »
20 Wa l‑raajil samma martah Hawwa (maʼanaatah al‑haya) achaan hi amm hana kulli insaan hayy.
21 Wa Allah al‑Rabb sawwa le Adam wa martah khulgaan hana farwa wa labbasaahum leehum.
22 Wa Allah al‑Rabb gaal :
« Daahu al‑insaan bigi misilna wa yaʼarif al‑kheer wa l‑charr.
Hassaʼ da,
khalli nadharooh ma yimidd iidah le yichiil iyaal chadarat al‑Haya le yaakulha wa yiʼiich daayman. »
23 Wa khalaas,
Allah al‑Rabb taradah min jineenit Adin wa yamchi yahrit al‑turaab al‑khalagooh minnah.
24 Wa min tarad al‑insaan,
Allah al‑Rabb khatta makhluugiin samaawiyiin be l‑nuss al‑sabhaani le jineenit Adin.
Wa be seef al‑indah naar yuduur,
humman yaharsu derib chadarat al‑Haya.