2 كُرُنْتُس 11

حال الرسول الصحيح

١ شِيلُوا صَبُرْ أَشَانْ هَسَّعْ نِدَوْر نِحَجِّي لَيْكُو شِيَّةْ مِثِلْ نَادُمْ مَا عِنْدَهْ فِكِرْ. شِيلُوا صَبُرْ بَسْ. ٢ أَنَا عِنْدِي مَحَبَّةْ شَدِيدَةْ لَيْكُو وَ مَحَبِّتِي دِي جَايَةْ مِنْ اللّٰهْ. أَنَا مِثِلْ أَبُو الْبِنَيَّةْ اللِّسَّاعْهَا مَا شَافَتْ رَاجِلْ وَ إِنْتُو بَسْ الْبِنَيَّةْ. وَ أَنَا سَوَّيْت مَوْعِدْ أَشَانْ الْبِنَيَّةْ دِي تَاخُدْ رَاجِلْ وَاحِدْ وَ هُو الْمَسِيحْ. وَ نِدَوْر نِقَدِّمْكُو لَيَّهْ مِثِلْ بِنَيَّةْ الْمَا عِنْدَهَا عَيْب.

٣ لَاكِنْ نَعَرْفُوا كَدَرْ الدَّابِي غَشَّ حَوَّاء بِنَجَاضْتَهْ وَ هَسَّعْ أَنَا خَايِفْ لَيْكُو. أَكُونْ نَادُمْ يِتَلِّفْ فِكِرْكُو أَشَانْ مَا تِتَابُعُوا الْمَسِيحْ بِمَحَبَّةْ صَادْقَةْ وَ مُخْلِصَةْ. ٤ أَنَا خَايِفْ أَشَانْ كَنْ نَادُمْ يَمْشِي لَيْكُو وَ يِبَلِّغْ لَيْكُو بِعِيسَى آخَرْ شِقْ مِنْ عِيسَى الْأَنِحْنَ بَلَّغْنَاكُو بَيَّهْ، إِنْتُو تَقْبَلَوْه. أَشَانْ إِنْتُو جَاهِزِينْ لِتَقْبَلَوْا رُوحْ شِقْ مِنْ الرُّوحْ الْقُدُّوسْ الْأَوَّلْ قِبِلْتُوهْ. وَ كَنْ نَادُمْ يِبَلِّغْ لَيْكُو بِشَارَةْ شِقْ مِنْ الْبِشَارَةْ الْأَوَّلْ قِبِلْتُوهَا، أَنَا خَايِفْ إِنْتُو تِتَابُعُوهْ عَجَلَةْ. وَ تَصْبُرُوا لِلنَّادُمْ الْمِثِلْ دَا.

٥ وَ الرُّسُلْ الْإِنْتُو تُقُولُوا هُمَّنْ كُبَارْ دَوْل، أَنَا نُقُولْ أَنَا مَا صَغَيَّرْ مِنْهُمْ بِشَيّءْ. ٦ صَحِيحْ، أَنَا مَا نِكَلِّمْ كَلَامْ صَعَبْ مِثِلْ كَلَامْ الْعُلَمَاءْ لَاكِنْ عِلْمِي شَدِيدْ بِلْحَيْن. وَ دَا وَضَّحْنَاهْ لَيْكُو كُلُّكُو فِي كُلَّ شَيّءْ.

٧ وَ تَعَرْفُوا كَدَرْ أَنَا مَا طَلَبْت مِنْكُو قُرُسْ وَكِتْ بَلَّغْت لَيْكُو بِشَارَةْ اللّٰهْ. وَ بِمِثِلْ دَا، أَنَا سَوَّيْت نَفْسِي صَغَيَّرْ أَشَانْ إِنْتُو تَبْقَوْا كُبَارْ. وَ هَسَّعْ تُقُولُوا دَا خَطَا مِنِّي أَنَا وَلَّا؟ ٨ أَنْقَرْعُوا! أَنَا شِلْت مُسَاعَدَةْ مِنْ جَمَاعَاتْ الْمُؤمِنِينْ الْآخَرِينْ أَشَانْ نَخْدِمْ لَيْكُو. وَ دَا مِثِلْ أَنَا سِرِقْت مِنْهُمْ فِي شَانْكُو. ٩ وَ وَكِتْ أَنَا مَعَاكُو وَ بِقِيتْ حَوْجَانْ، أَنَا مَا كَلَّفْت أَيِّ نَادُمْ مِنْكُو. الْأَخْوَانْ الْجَوْا مِنْ مَقِدُونِيَةْ بَسْ سَاعَدَوْنِي بِالشَّيّءْ الْقَصَّرْ لَيِّ. وَ أَنَا أَبَيْت مَا كَلَّفْتُكُو بِأَيِّ شَيّءْ وَ أَبَداً مَا نِكَلِّفْكُو. ١٠ نُقُولْ لَيْكُو الْحَقّ بِأُسُمْ الْمَسِيحْ الْقَاعِدْ فَوْقِي، نُقُولْ لَيْكُو نَادُمْ وَاحِدْ مَا يَدْحَرْنِي مِنْ الْفَشَارْ دَا فِي أَيِّ بَكَانْ فِي أَخَايَةْ.

١١ وَ مَالَا مَا نِكَلِّفْكُو؟ أَشَانْ مَا نِحِبُّكُو وَلَّا؟ اللّٰهْ يَعَرِفْ كَدَرْ أَنَا نِحِبُّكُو بِلْحَيْن. ١٢ وَ أَنَا نَخْدِمْ دَايْماً مِثِلْ أَنَا خَدَمْت مِنْ أَوَّلْ. وَ مِثِلْ دَا، النَّاسْ الْيِفَاشُرُوا بِخِدْمِتْهُمْ مَا يَلْقَوْا فُرْصَةْ يُقُولُوا هُمَّنْ رُسُلْ سَوَا سَوَا مَعَايِ. ١٣ الْفَشَّارِينْ دَوْل، هُمَّنْ مَا رُسُلْ بِالصَّحِيحْ. هُمَّنْ خَدَّامِينْ غَشَّاشِينْ وَ يِسَوُّوا نُفُوسْهُمْ يِشَابُهُوا رُسُلْ الْمَسِيحْ. ١٤ وَ مَا وَاجِبْ تِعَجُّبُوا مِنْ الْكَلَامْ دَا، أَشَانْ إِبْلِيسْ ذَاتَهْ يِسَوِّي نَفْسَهْ يِشَابِهْ مَلَكْ النُّورْ. ١٥ وَ كَنْ خَدَّامِينْ إِبْلِيسْ كُلَ يِسَوُّوا نُفُوسْهُمْ يِشَابُهُوا خَدَّامِينْ اللّٰهْ الصَّالِحِينْ، مَا نِعَجُّبُوا مِنْهُمْ. وَ فِي الأَخِيرْ، يَلْقَوْا الْوَاجِبْ لَيْهُمْ حَسَبْ خِدْمِتْهُمْ.

تعب الرسول الصحيح

١٦ وَ نُقُولْ بَتَّانْ مَا تَحْسُبُونِي أَنَا نَادُمْ مَا عِنْدَهْ فِكِرْ. لَاكِنْ كَنْ تَحْسُبُونِي مَا عِنْدِي فِكِرْ كُلَ، أَقْبَلَوْنِي. وَ بَيْدَا، أَنَا نَقْدَرْ نِلْفَشَّرْ شِيَّةْ. ١٧ وَ الْكَلَامْ النُّقُولَهْ بِفَشَارْ دَا مَا مِثِلْ رَبِّنَا يِدَوْرَهْ لَاكِنْ مِثِلْ كَلَامْ هَنَا نَادُمْ الْمَا عِنْدَهْ فِكِرْ. ١٨ أَكِيدْ نَاسْ كَتِيرِينْ يِلْفَشَّرَوْا بِالشَّيّءْ الْبُخُصّ الْإِنْسَانْ وَ أَنَا كُلَ نِلْفَشَّرْ مِثِلْهُمْ. ١٩ أَشَانْ أَنَا شِفْت كَدَرْ إِنْتُو التُّقُولُوا فِكِرْكُو قَوِي تَحْمَلَوْا النَّاسْ الْمَا عِنْدُهُمْ فِكِرْ بِفَرَحْ. ٢٠ وَ إِنْتُو تَحْمَلَوْا النَّادُمْ الْيِسَوِّيكُو عَبِيدَهْ وَلَّا يَاكُلْ مَالْكُو وَلَّا يَسْرِقْ مِنْكُو بِغَشّ وَلَّا يِسْتَكْبَرْ قِدَّامْكُو وَلَّا يُدُقُّكُو أَمْ كَفّ. ٢١ وَ دَا عَيْب لَيْنَا أَشَانْ أَنِحْنَ مَا كُبَارْ وَ مَا سَوَّيْنَا الشَّيّءْ الْيِسَوُّوهْ الرُّسُلْ الْكُبَارْ دَوْل!

وَ لَاكِنْ أَنَا نِحَجِّي مِثِلْ مَا عِنْدِي فِكِرْ. كَنْ نَادُمْ يِدَوْر يِلْفَشَّرْ بِأَيِّ شَيّءْ، أَنَا كُلَ نَقْدَرْ نِلْفَشَّرْ مِثْلَهْ. ٢٢ يُقُولُوا هُمَّنْ يَهُودْ وَلَّا؟ أَنَا كُلَ يَهُودِي. هُمَّنْ مِنْ بَنِي إِسْرَائِيلْ وَلَّا؟ أَنَا كُلَ مِنْ بَنِي إِسْرَائِيلْ. هُمَّنْ مِنْ ذُرِّيَّةْ إِبْرَاهِيمْ وَلَّا؟ أَنَا كُلَ مِنْ ذُرِّيَّةْ إِبْرَاهِيمْ. ٢٣ هُمَّنْ خَدَّامِينْ الْمَسِيحْ وَلَّا؟ شِيفُوا! هَسَّعْ نِحَجِّي مِثِلْ رَاسِي لَفَّ مَرَّةْ وَاحِدْ!

أَنَا خَدَّامْ أَخَيْر مِنْهُمْ. خَدَمْت بِشِدَّةْ زِيَادَةْ مِنْهُمْ. كَرَبَوْنِي فِي السِّجِنْ زِيَادَةْ مِنْهُمْ. فَرَشَوْنِي زِيَادَةْ مِنْهُمْ. وَ قَعَدْت فِي أُسْط الْمَوْت كَتِيرْ. ٢٤ الْيَهُودْ جَلَدَوْنِي خَمْسَةْ مَرَّاتْ وَ فِي أَيِّ جَلْدَةْ 39 ضَرْبَةْ. ٢٥ الرَّوْمَانِيِّينْ فَرَشَوْنِي تَلَاتَةْ مَرَّاتْ بِعَصَاةْ. وَ النَّاسْ رَجَمَوْنِي مَرَّةْ وَاحِدَةْ. تَلَاتَةْ مَرَّاتْ أَنَا مُسَافِرْ بِسَفِينَةْ وَ السَّفِينَةْ أَنْكَسَرَتْ بَيِّ فِي أُسْط الْبَحَرْ. يَوْم وَاحِدْ أَنَا قَعَدْت فِي أُسْط الْبَحَرْ يَوْم كَامِلْ لَيْل وَ نَهَارْ. ٢٦ أَنَا سَافَرْت كَتِيرْ بِلْحَيْن وَ وَاجَهْت خُطُورَةْ كَتِيرَةْ. خُطُورَةْ وَكِتْ أَنَا قَاتِعْ الْبُحُورْ وَ خُطُورَةْ مِنْ رَبَّاطِينْ الدُّرُوبْ. وَ خُطُورَةْ فِي أُسُطْ نَاسِي الْيَهُودْ وَ خُطُورَةْ فِي أُسْط النَّاسْ الْمَا يَهُودْ. وَ خُطُورَةْ فِي الْحِلَّالْ وَ خُطُورَةْ فِي الْكَدَادَةْ وَ خُطُورَةْ فِي أُسْط الْبَحَرْ الْمَالِحْ. وَ خُطُورَةْ فِي أُسْط الْمُؤمِنِينْ الْخَايْنِينْ. ٢٧ أَنَا خَدَمْت بِدُرَاعِي وَ تِعِبْت وَ فَقَدْت دَايْماً النَّوْم وَ الْأَكِلْ وَ الشَّرَابْ. وَ كَتِيرْ كَيْ الْبَرِدْ لِحِقَانِي وَ خُلْقَانْ قَصَّرَوْا لَيِّ.

٢٨ وَ بَتَّانْ، فِي شَيّءْ آخَرْ. كُلَّ يَوْم، الْهَمّ الشَّدِيدْ يَكْرُبْنِي فِي شَانْ أُمَّةْ الْمَسِيحْ فِي أَيِّ بَكَانْ. ٢٩ كَنْ أَخُو وَاحِدْ يَضْعَفْ أَنَا كُلَ نَضْعَفْ مَعَايَهْ. كَنْ نَادُمْ يَمُرْقُوهْ مِنْ دَرِبْ الْإِيمَانْ، أَنَا نِحِسّ بِنَارْ فِي قَلْبِي.

٣٠ كَنْ وَاجِبْ نِلْفَشَّرْ، نِلْفَشَّرْ بِالشَّيّءْ الْيِوَصِّفْ كَدَرْ أَنَا مَا عِنْدِي قُدْرَةْ. ٣١ وَ اللّٰهْ أَبُو رَبِّنَا عِيسَى، هُو الْوَاجِبْ لَيَّهْ الشُّكُرْ إِلَى الْأَبَدْ، يَعَرِفْ كَدَرْ كَلَامِي مَا كِدِبْ. ٣٢ وَكِتْ أَنَا قَاعِدْ فِي مَدِينَةْ دِمَشْق، دَوَّرَوْا يَكُرْبُونِي. وَ فِي الْوَكِتْ دَاكْ، حَاكِمْ الْمَدِينَةْ الْكَلَّفَهْ الْمَلِكْ الْأُسْمَهْ الْحَارِسْ رَسَّلْ عَسْكَرَهْ أَشَانْ يَحَرْسُوا كُلَّ بِيبَانْ الْمَدِينَةْ أَشَانْ مَا نَمْرُقْ. ٣٣ وَ أَنَا دَا، الْأَخْوَانْ دَلَّوْنِي بِشَبَكَةْ مِنْ شُبَّاكْ وَاحِدْ الْقَاعِدْ فِي دُرْدُرْ الْمَدِينَةْ وَ مِثِلْ دَا بَسْ نِجِيتْ مِنَّهْ.