رَوْمَا 15

١ لَاكِنْ أَنِحْنَ الْقَوِيِّينْ فِي الْإِيمَانْ، وَاجِبْ نَحْمَلَوْا أَخْوَانَّا الْمَا قَوِيِّينْ فِي الْإِيمَانْ. وَ مَا وَاجِبْ نِسَوُّوا الشَّيّءْ الْيَعَجِبْنَا أَنِحْنَ بَسْ. ٢ خَلِّي أَيِّ نَادُمْ مِنِّنَا يِسَوِّي الشَّيّءْ الْيَعَجِبْ أَخُوهْ وَ دَا، لِخَيْرَهْ وَ لِيِقَوِّيهْ فِي الْإِيمَانْ. ٣ أَشَانْ الْمَسِيحْ ذَاتَهْ مَا شَالْ الدَّرِبْ الْيَعَجِبْ نَفْسَهْ، لَاكِنْ مَكْتُوبْ فِي الْكِتَابْ: ﴿الْيِعَيُّرُوكْ، مُعْيَارْهُمْ وَقَعْ فَوْقِي أَنَا كُلَ.﴾ ٤ كُلَّ شَيّءْ الْكَتَبَوْه فِي الزَّمَنْ الْفَاتْ أَنْكَتَبْ لِيِعَلِّمْنَا. أَشَانْ بِالصَّبُرْ وَ الشَّجَاعَةْ الْعَلَّمْنَاهُمْ مِنْ الْكُتُبْ، نَمْشُوا قِدَّامْ بِعَشَمْ.

٥ اللّٰهْ يَنْطِي الصَّبُرْ وَ الشَّجَاعَةْ وَ خَلِّي يَنْطِيكُو كُلُّكُو فِكِرْ وَاحِدْ لِتِتَابُعُوا دَرِبْ الْمَسِيحْ عِيسَى ٦ لَحَدِّي كُلُّكُو تِمَجُّدُوا اللّٰهْ أَبُو رَبِّنَا عِيسَى الْمَسِيحْ بِنِيَّةْ وَاحِدَةْ وَ بِحِسّ وَاحِدْ.

بِشارة المسيح لكل الناس

٧ خَلَاصْ، أَقْبَلَوْا كُلَّ مُؤمِنْ بِالْمَسِيحْ مِثِلْ الْمَسِيحْ قِبِلَاكُو. وَ بِمِثِلْ دَا، تِمَجُّدُوا اللّٰهْ. ٨ وَ فِي شَانْ دَا، نُقُولْ لَيْكُو كَدَرْ الْمَسِيحْ بِقِي خَدَّامْ لِلْيَهُودْ أَشَانْ يِوَصِّفْ كَدَرْ اللّٰهْ صَادِقْ وَ يِتِمّ الشَّيّءْ الْوَاعَدْ بَيَّهْ جُدُودْهُمْ. ٩ وَ جَاءْ أَشَانْ النَّاسْ الْمَا يَهُودْ كُلَ يَشْكُرُوا اللّٰهْ فِي شَانْ رَحْمَتَهْ. مَكْتُوبْ فِي الْكِتَابْ: ﴿بِسَبَبْ دَا، يَا اللّٰهْ، فِي أُسْط الْأُمَمْ نَشْكُرَكْ وَ بِغِنَيْ، نَمْدَحْ أُسْمَكْ.﴾ ١٠ وَ بَتَّانْ بُقُولْ: ﴿يَا الْأُمَمْ، أَفْرَحَوْا مَعَ شَعَبْ اللّٰهْ.﴾ ١١ وَ بَتَّانْ بُقُولْ: ﴿يَا كُلَّ الْأُمَمْ، أَحْمُدُوا اللّٰهْ! يَا كُلَّ الشُّعُوبْ، مَجُّدُوهْ!﴾ ١٢ وَ النَّبِي إِشَعْيَا قَالْ: ﴿مِنْ ذُرِّيَّةْ يَسَّى يَجِي نَادُمْ وَ يَبْقَى مَلِكْ فِي كُلَّ الْأُمَمْ. وَ الشُّعُوبْ الْآخَرِينْ يُخُطُّوا عَشَمْهُمْ فَوْقَهْ.﴾

١٣ وَ اللّٰهْ الْأَنْطَاكُو عَشَمْ يَنْطِيكُو الْفَرْحَةْ وَ السَّلَامْ فِي الْإِيمَانْ أَشَانْ عَشَمْكُو فَوْقَهْ يِزِيدْ بِقُدْرَةْ الرُّوحْ الْقُدُّوسْ.

خِدْمة بُولُس في أُسْط الأُمم

١٤ يَا أَخْوَانِي، أَنَا بِنَفْسِي مُؤَكِّدْ كَدَرْ إِنْتُو مَلَانِينْ بِالْخَيْر وَ بِالْعِلِمْ وَ قَادْرِينْ تِلْوَاصَوْا أَمْبَيْنَاتْكُو. ١٥ لَاكِنْ فِي أَشْيَاءْ وَاحِدِينْ كَتَبْت لَيْكُو بِكَلَامْ قَوِي شِيَّةْ أَشَانْ دَوَّرْت نِذَكِّرْكُو بَيْهُمْ. وَ قِدِرْت كَتَبْت مِثِلْ دَا بِسَبَبْ النِّعْمَةْ الْاللّٰهْ أَنْطَاهَا لَيِّ ١٦ لِنَبْقَى خَدَّامْ لِلْمَسِيحْ عِيسَى. وَ خِدِمْتِي هِي بَلِّغِينْ بِشَارَةْ اللّٰهْ لِلْأُمَمْ الْمَا يَهُودْ. أَنَا نَبْقَى مِثِلْ رَاجِلْ دِينْ وَكِتْ نِبَلِّغْ بِشَارَةْ اللّٰهْ لِلْأُمَمْ الْمَا يَهُودْ لِيَبْقَوْا مِثِلْ ضَحِيَّةْ الْاللّٰهْ يَرْضَى بَيْهَا. وَ الضَّحِيَّةْ دِي تَبْقَى خَاصَّة لِلّٰهْ بِقُدْرَةْ الرُّوحْ الْقُدُّوسْ. ١٧ وَ أَشَانْ دَا، نِلْفَشَّرْ بِكُلَّ الْخِدْمَةْ السَّوَّيْتهَا لِلّٰهْ بِالْمَسِيحْ عِيسَى. ١٨ وَ أَبَداً مَا نِدَوْر نِحَجِّي بِأَيِّ خِدْمَةْ إِلَّا الْخِدْمَةْ الْعِيسَى الْمَسِيحْ سَوَّاهَا بَيِّ أَشَانْ الْأُمَمْ يِطِيعُوا اللّٰهْ. هُو خَدَمْ بِكَلَامْ وَ بِفِعِلْ ١٩ وَ بِقُدْرَةْ الْعَجَايِبْ وَ الْعَلَامَاتْ وَ بِقُدْرَةْ الرُّوحْ الْقُدُّوسْ. وَ مِثِلْ دَا، أَنَا بَلَّغْت بِشَارَةْ الْمَسِيحْ لِلنَّاسْ فِي كُلِّ بَكَانْ مِنْ مَدِينَةْ الْقُدُسْ لَحَدِّي بَلَدْ إِلِّرْكُونْ.

٢٠ وَ عِنْدِي نِيَّةْ دَايْماً أَشَانْ نِبَلِّغْ الْبِشَارَةْ فِي أَيِّ بَكَانْ اللِّسَّاعْ مَا بَلَّغَوْا فَوْقَهْ أُسُمْ الْمَسِيحْ. مَا نِدَوْر نَبْنِي فِي أَسَاسْ الْخَطَّاهْ نَادُمْ آخَرْ. ٢١ نِدَوْر نِتَابِعْ الْكَلَامْ الْمَكْتُوبْ الْبُقُولْ: ﴿النَّاسْ الْمَا حَجَّوْهُمْ بَيَّهْ يِشِيفُوهْ. وَ الْمَا سِمْعَوْا بَيَّهْ يَفْهَمَوْه.﴾

بُولُس يدَوْر يخْشى رَوْمَا

٢٢ وَ عِدَّةْ مَرَّاتْ، حَاوَلْت نَجِيكُو وَ مَا قِدِرْت أَشَانْ خِدِمْتِي دِي دَحَرَتْنِي. ٢٣ لَاكِنْ هَسَّعْ مَا فَضَّلْ لَيِّ بَكَانْ فِي الْمَنَاطِقْ دَوْل النِّبَشِّرْ فَوْقَهْ. وَ مِنْ سِنِينْ كَتِيرِينْ، نِدَوْر نَجِيكُو. ٢٤ وَ خَلَاصْ، نَقْدَرْ نَخْشَاكُو وَكِتْ نَمْشِي إِسْبَانِيَا. إِنْ شَاءْ اللّٰهْ، نَجِيكُو وَ نَقْعُدْ مَعَاكُو أَيَّامْ وَ دَا يَبْقَى لَيِّ حَلُو. وَ بَعَدْ دَا، تِسَاعُدُونِي أَشَانْ نِسَافِرْ قِدَّامْ.

٢٥ لَاكِنْ هَسَّعْ دَا، أَنَا مَاشِي مَدِينَةْ الْقُدُسْ أَشَانْ نِسَاعِدْ الصَّالِحِينْ. ٢٦ أَشَانْ الْمُؤمِنِينْ الْفِي مَقِدُونِيَةْ وَ الْيُونَانْ شَالَوْا نِيَّةْ أَمْبَيْنَاتْهُمْ أَشَانْ يِرَسُّلُوا مُسَاعَدَةْ لِلْمَسَاكِينْ الْقَاعِدِينْ أَمْبَيْن الصَّالِحِينْ فِي مَدِينَةْ الْقُدُسْ. ٢٧ وَ شَالَوْا النِّيَّةْ دِي بِفَرَحْ. وَ دَا مِثِلْ دَيْن فَوْقهُمْ أَشَانْ أَوَّلْ الْيَهُودْ قَسَّمَوْا بَرَكَاتْهُمْ اللِّقَوْهُمْ مِنْ اللّٰهْ مَعَ الْمَا يَهُودْ. وَ هَسَّعْ الْمَا يَهُودْ وَاجِبْ لَيْهُمْ يِسَاعُدُوا الْيَهُودْ بِالْبَرَكَاتْ الْأَرْضِيَّةْ اللِّقَوْهُمْ. ٢٨ وَ وَكِتْ الْخِدْمَةْ دِي تِكَمِّلْ وَ أَنَا أَنْطَيْتهُمْ كُلَّ شَيّءْ اللَّمَّوْه لَيْهُمْ، نِشِيلْ دَرِبْ هَنَا إِسْبَانِيَا وَ نَخْشَاكُو فِي رَوْمَا. ٢٩ وَ نَعَرِفْ كَدَرْ وَكِتْ نَلْحَقْ بَكَانْكُو دَا، نَجِيكُو مَلَانْ بِبَرَكَةْ الْمَسِيحْ الْخَاصَّة لَيْكُو.

٣٠ وَ هَسَّعْ يَا أَخْوَانِي، نَطْلُبْ مِنْكُو بِأُسُمْ رَبِّنَا عِيسَى الْمَسِيحْ وَ بِمَحَبَّةْ الرُّوحْ الْقُدُّوسْ أَشَانْ إِنْتُو تَسْأَلَوْا اللّٰهْ مَعَايِ بِشِدَّةْ. ٣١ أَسْأَلَوْا لَيِّ اللّٰهْ أَشَانْ يَفْزَعْنِي مِنْ الْيَهُودْ الْمَا مَسِيحِيِّينْ فِي دَارْ الْيَهُودِيَّةْ. وَ أَسْأَلَوْا أَشَانْ الصَّالِحِينْ الْفِي مَدِينَةْ الْقُدُسْ يَرْضَوْا بِالْمُسَاعَدَةْ النِّجِيبْهَا لَيْهُمْ. ٣٢ وَ مِثِلْ دَا، إِنْ شَاءْ اللّٰهْ نَجِيكُو بِفَرَحْ وَ نِنْجَمَّ مَعَاكُو شِيَّةْ. ٣٣ اللّٰهْ رَبّ السَّلَامْ يُكُونْ مَعَاكُو كُلُّكُو. آمِينْ.