رَوْمَا 5

السلام و الفرْحة بالمسيح

١ وَ خَلَاصْ، بِقِينَا صَالِحِينْ بِسَبَبْ الْإِيمَانْ وَ أَشَانْ دَا بِرَبِّنَا عِيسَى الْمَسِيحْ، أَنِحْنَ قَاعِدِينْ بِالسَّلَامْ مَعَ اللّٰهْ. ٢ وَ بِالْمَسِيحْ بَسْ، قِدِرْنَا دَخَلْنَا فِي النِّعْمَةْ دِي بِالْإِيمَانْ الْأَنِحْنَ ثَابْتِينْ فَوْقهَا. وَ نَفْرَحَوْا بِالْعَشَمْ الْعِنْدِنَا أَشَانْ نَلْقَوْا مَجْد اللّٰهْ.

٣ وَ زِيَادَةْ مِنْ دَا، نَفْرَحَوْا كُلَ فِي التَّعَبْ الْيَجِي فَوْقنَا أَشَانْ نَعَرْفُوا التَّعَبْ يَنْطِينَا الصَّبُرْ. ٤ وَ الصَّبُرْ يِشَجِّعْ قُلُوبْنَا. وَ كَنْ قُلُوبْنَا لِقَوْا شَجَاعَةْ، عِنْدِنَا عَشَمْ. ٥ وَ الْعَشَمْ دَا أَبَداً مَا يِجِيبْ لَيْنَا الْعَيْب أَشَانْ اللّٰهْ نَزَّلْ مَحَبِّتَهْ فِي قُلُوبْنَا بِالرُّوحْ الْقُدُّوسْ الْهُو أَنْطَاهْ لَيْنَا.

الصُلُح بالمسيح

٦ أَيْوَى، أَشَانْ فِي الْيَوْم الْاللّٰهْ قَطَعَهْ وَكِتْ أَنِحْنَ مَا عِنْدِنَا قُدْرَةْ نِنَجُّوا نُفُوسْنَا، الْمَسِيحْ مَاتْ فِي شَانْ الْخَاطِيِّينْ. ٧ قَاسِي لِلنَّادُمْ يُمُوتْ فِي شَانْ نَادُمْ آخَرْ حَتَّى كَانْ النَّادُمْ دَا صَالِحْ كُلَ. أَكُونْ نَادُمْ يِقَصِّدْ يُمُوتْ فِي شَانْ نَادُمْ قَلْبَهْ أَبْيَضْ بِلْحَيْن. ٨ لَاكِنْ دَاهُو كِكَّيْف اللّٰهْ وَصَّفْ لَيْنَا مَحَبِّتَهْ الْكَبِيرَةْ. وَكِتْ أَنِحْنَ لِسَّاعْنَا مُذْنِبِينْ، الْمَسِيحْ مَاتْ فِي شَانَّا. ٩ وَ كَنْ الْمَسِيحْ سَوَّانَا صَالِحِينْ بِدَفِّقِينْ دَمَّهْ، أَكِيدْ هُو يِنَجِّينَا مِنْ غَضَبْ اللّٰهْ كُلَ. ١٠ وَ وَكِتْ أَنِحْنَ لِسَّاعْنَا عُدْوَانْ اللّٰهْ، مَوْت إِبْنَهْ صَالَحَانَا مَعَايَهْ. وَ بِمِثِلْ دَا، كَنْ عِنْدِنَا صُلُحْ مَعَايَهْ بِمَوْت إِبْنَهْ، أَكِيدْ نَنْجَوْا بِحَيَاةْ إِبْنَهْ. ١١ وَ زِيَادَةْ مِنْ دَا، هَسَّعْ أَنِحْنَ قَاعِدِينْ نَفْرَحَوْا بِالْعَلَاقَةْ الْعِنْدِنَا مَعَ اللّٰهْ بِرَبِّنَا عِيسَى الْمَسِيحْ. أَشَانْ بِالْمَسِيحْ بَسْ، أَنِحْنَ لِقِينَا الصُّلُحْ.

المَوْت جاء من آدَم

١٢ وَ خَلَاصْ بِسَبَبْ نَادُمْ وَاحِدْ، الذَّنِبْ دَخَلْ فِي الدُّنْيَا. وَ بِسَبَبْ الذَّنِبْ، الْمَوْت كُلَ جَاءْ. وَ مِثِلْ دَا، الْمَوْت لِحِقْ كُلَّ النَّاسْ أَشَانْ كُلُّهُمْ أَذْنَبَوْا. ١٣ أَيْوَى، الذَّنِبْ قَاعِدْ فِي الدُّنْيَا قُبَّالْ اللّٰهْ مَا يَنْطِي التَّوْرَاةْ لِمُوسَى. لَاكِنْ الذَّنِبْ مَا يِنْحَسِبْ فِي الْبَكَانْ الْفَوْقَهْ مَا فِي شُرُوطْ التَّوْرَاةْ. ١٤ وَ لَاكِنْ الْمَوْت قَاعِدْ يَمْلُكْ فِي النَّاسْ مِنْ زَمَنْ آدَمْ لَحَدِّي زَمَنْ مُوسَى. وَ الْمَوْت قَاعِدْ يَمْلُكْ فِي النَّاسْ كَنْ ذُنُوبْهُمْ مَا مِثِلْ خَطَا آدَمْ الْخَالَفْ أَمُرْ اللّٰهْ كُلَ. وَ آدَمْ هُو مَثَلْ هَنَا النَّادُمْ الْيَجِي وَرَايَهْ.

الحياة جات بالمسيح

١٥ لَاكِنْ الْعَطِيَّةْ الْاللّٰهْ أَنْطَاهَا بَلَا تَمَنْ دِي، مَا مِثِلْ خَطَا هَنَا آدَمْ. بِسَبَبْ خَطَا هَنَا النَّادُمْ الْوَاحِدْ دَا، نَاسْ كَتِيرِينْ مَاتَوْا. وَ رَحْمَةْ اللّٰهْ هِي أَكْبَرْ مِنْ الْخَطَا. وَ هِي الرَّحْمَةْ الْجَاتْ بِالنَّادُمْ الْوَاحِدْ عِيسَى الْمَسِيحْ وَ هِي سَوَّتْ خَيْر كَتِيرْ بِلْحَيْن لِنَاسْ كَتِيرِينْ. ١٦ وَ عَطِيَّةْ اللّٰهْ شِقْ مِنْ نَتِيجَةْ الذَّنِبْ الْآدَمْ سَوَّاهْ. الْحِسَابْ جَاءْ بَعَدْ الذَّنِبْ الْوَاحِدْ وَ وَدَّى كُلَّ النَّاسْ فِي الْهَلَاكْ. لَاكِنْ الْعَطِيَّةْ الْبَلَا تَمَنْ دِي جَاتْ بَعَدْ النَّاسْ سَوَّوْا خَطَا كَتِيرْ وَ هِي سَوَّتْ النَّاسْ صَالِحِينْ. ١٧ أَكِيدْ الْمَوْت جَاءْ بِسَبَبْ خَطَا هَنَا النَّادُمْ الْوَاحِدْ دَا. وَ بِسَبَبْ النَّادُمْ الْوَاحِدْ دَا بَسْ، الْمَوْت مَلَكْ فِي النَّاسْ. وَ لَاكِنْ النَّاسْ اللِّقَوْا نِعْمَةْ اللّٰهْ الْكَبِيرَةْ بِلْحَيْن وَ بِقَوْا صَالِحِينْ بِالْعَطِيَّةْ الْبَلَا تَمَنْ، هُمَّنْ يَمُلْكُوا فِي الْحَيَاةْ الْأَبَدِيَّةْ بِالنَّادُمْ الْوَاحِدْ عِيسَى الْمَسِيحْ.

١٨ وَ بِسَبَبْ خَطَا هَنَا نَادُمْ وَاحِدْ، كُلَّ النَّاسْ يَهْلَكَوْا. وَ لَاكِنْ بِسَبَبْ الْعَمَلْ الصَّالِحْ النَّادُمْ آخَرْ سَوَّاهْ، كُلَّ النَّاسْ يَقْدَرَوْا يَبْقَوْا صَالِحِينْ وَ يَلْقَوْا الْحَيَاةْ الْأَبَدِيَّةْ. ١٩ وَ نَادُمْ وَاحِدْ عِصِي اللّٰهْ وَ سَوَّى نَاسْ كَتِيرِينْ مُذْنِبِينْ. وَ مِثِلْ دَا بَتَّانْ، نَادُمْ وَاحِدْ طَاعْ اللّٰهْ وَ سَوَّى نَاسْ كَتِيرِينْ صَالِحِينْ.

٢٠ وَ شُرُوطْ التَّوْرَاةْ جَوْا أَشَانْ قُدْرَةْ الْخَطَا أَنْشَافَتْ بِزِيَادَةْ. لَاكِنْ فِي الْبَكَانْ الْكِتِرْ فَوْقَهْ الذَّنِبْ، رَحْمَةْ اللّٰهْ كُلَ كِتْرَتْ بِزِيَادَةْ. ٢١ وَ بَيْدَا، مِثِلْ الْمَوْت مَلَكْ فِي النَّاسْ بِسَبَبْ الذَّنِبْ، مِثِلْ دَا رَحْمَةْ اللّٰهْ كُلَ تَمْلُكْ فِي النَّاسْ وَ تِسَوِّيهُمْ صَالِحِينْ وَ تِوَدِّيهُمْ فِي الْحَيَاةْ الْأَبَدِيَّةْ بِعِيسَى الْمَسِيحْ رَبِّنَا.