يُوحَنَّا 2

الألْمي بِقي خمر

١ وَ فِي الْيَوْم التَّالِتْ، نَاسْ وَاحِدِينْ فِي حِلَّةْ كَانَةْ فِي دَارْ الْجَلِيلْ سَوَّوْا عَازُومَةْ هَنَا عِرِسْ وَ أَمّ عِيسَى حِضْرَتْ. ٢ وَ عَزَمَوْا عِيسَى كُلَ وَ تَلَامِيذَهْ. ٣ وَ فِي الْعَازُومَةْ، الْخَمَرْ كَمَّلْ وَ أَمّ عِيسَى حَجَّتْ لَيَّهْ وَ قَالَتْ: «خَمَرْهُمْ كَمَّلْ.» ٤ وَ عِيسَى رَدَّ لَيْهَا وَ قَالْ: «يَا مَرَةْ زَيْنَةْ، تِدَوْرِي مِنِّي شُنُو؟ وَكْتِي لِسَّاعْ مَا تَمَّ». ٥ وَ أَمَّهْ حَجَّتْ لِلْخَدَّامِينْ وَ قَالَتْ: «سَوُّوا أَيِّ شَيّءْ الْهُو يُقُولَهْ لَيْكُو.»

٦ وَ فِي سِتَّةْ دَوَايِنْ كُبَارْ قَاعِدِينْ فِي الْبَكَانْ دَا. وَ دَوْل دَوَايِنْ هَنَا حَجَرْ وَ يُصُبُّوا فَوْقهُمْ أَلْمِي هَنَا وَضُوءْ الْيَهُودْ وَ أَيِّ وَاحِدَةْ مِنْهُمْ تِشِيلْ حَوَالَيْ 100 لِيتِرْ. ٧ وَ عِيسَى حَجَّى لِلْخَدَّامِينْ وَ قَالْ: «أَمْلَوْا الدَّوَايِنْ أَلْمِي.» وَ خَلَاصْ مَلَوْهُمْ تَكْ. ٨ وَ عِيسَى قَالْ لَيْهُمْ: «هَسَّعْ شِيلُوا أَلْمِي شِيَّةْ وَ وَدُّوهْ لِسِيدْ الْعَازُومَةْ.» وَ خَلَاصْ وَدَّوْه لَيَّهْ.

٩ وَ سِيدْ الْعَازُومَةْ دَاقْ الْأَلْمِي وَ لِقِيهْ بِقِي خَمَرْ. وَ هُو مَا عِرِفْ الْخَمَرْ جَاءْ مِنْ وَيْن وَ لَاكِنْ الْخَدَّامِينْ الْغَرَفَوْا الْأَلْمِي عِرْفَوْه. وَ سِيدْ الْعَازُومَةْ نَادَى الْعَرِيسْ ١٠ وَ قَالْ لَيَّهْ: «نَاسْ آخَرِينْ يَنْطُوا ضِيفَانْهُمْ الْخَمَرْ الْحَلُو أَوَّلْ. وَ بَعَدْ الضِّيفَانْ شِرْبَوْا كَتِيرْ، يَنْطُوهُمْ الْخَمَرْ الْمَا حَلُو. وَ لَاكِنْ إِنْتَ أَخَّرْت الْخَمَرْ الْحَلُو وَ هَسَّعْ بَسْ أَنْطَيْتَهْ لَيْنَا.»

١١ وَ الْعَجَبْ الْعِيسَى سَوَّاهْ فِي حِلَّةْ كَانَةْ فِي دَارْ الْجَلِيلْ، دِي أَوَّلْ عَلَامَةْ الْعِيسَى وَصَّفَاهَا. وَ بِمِثِلْ دَا، هُو وَصَّفْ قُدُرْتَهْ الْمَجِيدَةْ لِتَلَامِيذَهْ وَ هُمَّنْ آمَنَوْا بَيَّهْ. ١٢ وَ بَعَدْ دَا، هُو مَشَى مَعَ أَمَّهْ وَ أَخْوَانَهْ وَ تَلَامِيذَهْ فِي حِلَّةْ كَفَرْ نَاحُومْ وَ قَعَدَوْا أَيَّامْ.

المسيح في بيت اللّه

١٣ وَ وَكِتْ عِيدْ الْفِصْحَ هَنَا الْيَهُودْ قَرَّبْ، عِيسَى مَشَى فِي مَدِينَةْ الْقُدُسْ. ١٤ وَ مَشَى فِي فَضَايَةْ بَيْت اللّٰهْ وَ شَافْ النَّاسْ الْقَاعِدِينْ يِبِيعُوا بَقَرْ وَ غَنَمْ وَ حَمَامْ وَ النَّاسْ الْقَاعِدِينْ يِبَدُّلُوا قُرُسْ. ١٥ وَ شَالْ حُبَالْ وَاحِدِينْ وَ سَوَّى بَيْهُمْ سَوْط. وَ طَرَدْ بَيَّهْ كُلَّ النَّاسْ مِنْ فَضَايَةْ بَيْت اللّٰهْ مَعَ الْبَقَرْ وَ الْغَنَمْ. وَ رَمَى طَرَابِيزْ هَنَا النَّاسْ الْقَاعِدِينْ يِبَدُّلُوا قُرُسْ وَ شَتَّتْ قُرُسْهُمْ. ١٦ وَ حَجَّى بِحِسّ شَدِيدْ لِلنَّاسْ الْقَاعِدِينْ يِبِيعُوا حَمَامْ وَ قَالْ: «أَمُرْقُوا خُمَامْكُو مِنْ هِنِي! خَلُّوا مِنْكُو التِّجَارَةْ فِي بَيْت أَبُويِ!» ١٧ وَ تَلَامِيذَهْ فَكَّرَوْا فِي الْكَلَامْ الْمَكْتُوبْ الْبُقُولْ: ﴿حُبِّي لِبَيْتَكْ بِقِي لَيِّ مِثِلْ نَارْ حَرَقَتْنِي.﴾

١٨ وَ كُبَارَاتْ الْيَهُودْ سَأَلَوْه وَ قَالَوْا: «أَنْطِينَا دَلِيلْ الْيِوَصِّفْ الْعَمَلْ الْقَاعِدْ تِسَوِّي!» ١٩ وَ عِيسَى رَدَّ لَيْهُمْ وَ قَالْ: «دَمُّرُوا الْبَيْت دَا وَ أَنَا نِقَوِّمَهْ فِي تَلَاتَةْ يَوْم.» ٢٠ وَ كُبَارَاتْ الْيَهُودْ رَدَّوْا لَيَّهْ وَ قَالَوْا: «الْبَيْت دَا قَاعِدِينْ يَبْنُوهْ مِنْ 46 سَنَةْ وَ إِنْتَ تِدَوْر تَبْنِيهْ مَرَّةْ تَانِيَةْ فِي تَلَاتَةْ يَوْم؟»

٢١ وَ لَاكِنْ وَكِتْ عِيسَى قَالْ الْبَيْت دَا، هُو مَا حَجَّى بِالْبَيْت الْبَنَوْه النَّاسْ. هُو حَجَّى بِجِسْمَهْ. ٢٢ وَ وَكِتْ اللّٰهْ بَعَثْ عِيسَى مِنْ أُسْط الْمَيْتِينْ خَلَاصْ، تَلَامِيذَهْ فَكَّرَوْا فِي الْكَلَامْ الْقَالَهْ دَا وَ آمَنَوْا بِالْكُتُبْ وَ بِكَلَامْ عِيسَى.

٢٣ وَ وَكِتْ عِيسَى قَاعِدْ فِي مَدِينَةْ الْقُدُسْ فِي عِيدْ الْفِصْحَ، نَاسْ كَتِيرِينْ آمَنَوْا بَيَّهْ أَشَانْ شَافَوْا الْعَجَايِبْ الْعِيسَى قَاعِدْ يِسَوِّيهُمْ. ٢٤ وَ لَاكِنْ عِيسَى مَا آمَنَاهُمْ أَشَانْ هُو يَعَرِفْهُمْ عَدِيلْ. ٢٥ وَ مَا دَوَّرْ يِعَرُّفُوا لَيَّهْ النَّاسْ أَشَانْ هُو عِرِفْ كُلَّ شَيّءْ الْقَاعِدْ فِي قُلُوبْهُمْ.