لُوقا 23

المسيح قِدّام بِلَاطُس

١ وَ كُلَّ نَاسْ الْمَجْلَسْ قَمَّوْا وَ وَدَّوْا عِيسَى لِبِلَاطُسْ الْوَالِي الرَّوْمَانِي. ٢ وَ قَمَّوْا يُخُطُّوا فَوْقَهْ تُهْمَةْ. وَ قَالَوْا: «كَرَبْنَا النَّادُمْ دَا أَشَانْ هُو قَاعِدْ يِتَلِّفْ شَعَبْنَا وَ يَدْحَرْهُمْ مَا يِكَفُّوا الْمِيرِي لِسُلْطَانْ الرَّوْمَانِيِّينْ. وَ هُو سَوَّى نَفْسَهْ الْمَسِيحْ، الْمَلِكْ.» ٣ وَ بِلَاطُسْ سَأَلَهْ وَ قَالْ: «إِنْتَ مَلِكْ الْيَهُودْ وَلَّا؟» وَ عِيسَى رَدَّ لَيَّهْ وَ قَالْ: «مِثِلْ إِنْتَ قُلْتَهْ.»

٤ وَ بِلَاطُسْ حَجَّى لِكُبَارَاتْ رُجَالْ الدِّينْ وَ لِلنَّاسْ الْكَتِيرِينْ اللَّمَّوْا وَ قَالْ: «أَنَا مَا لِقِيتْ فِي النَّادُمْ دَا أَيِّ جَرِيمَةْ.» ٥ وَ لَاكِنْ هُمَّنْ قَمَّوْا يِحَجُّوا بِشِدَّةْ وَ قَالَوْا: «هُو يِحَرِّشْ النَّاسْ بِتَعْلِيمَهْ فِي دَارْ الْيَهُودِيَّةْ كُلَّهَا. هُو بَدَا فِي دَارْ الْجَلِيلْ وَ هَسَّعْ جَاءْ هِنِي فِي مَدِينَةْ الْقُدُسْ كُلَ.»

٦ وَ وَكِتْ بِلَاطُسْ سِمِعْ كَلَامْهُمْ دَا، هُو سَأَلَاهُمْ وَ قَالْ: «النَّادُمْ دَا مِنْ دَارْ الْجَلِيلْ وَلَّا؟» ٧ وَ وَكِتْ هُو عِرِفْ كَدَرْ عِيسَى مِنْ مُدِيرِيِّةْ التِّحِتْ حُكُمْ هِرُودُسْ، هُو رَسَّلَهْ لِهِرُودُسْ. وَ فِي الْوَكِتْ دَا، هِرُودُسْ جَاءْ زِيَارَةْ فِي مَدِينَةْ الْقُدُسْ.

المسيح قِدّام هِرُودُس

٨ وَ وَكِتْ هِرُودُسْ شَافْ عِيسَى، هُو فِرِحْ بِلْحَيْن أَشَانْ مِنْ وَكِتْ طَوِيلْ هُو سِمِعْ خَبَرَهْ وَ يِدَوْر يِشِيفْ عِيسَى يِسَوِّي لَيَّهْ عَجَبْ. ٩ وَ أَشَانْ دَا، سَأَلَهْ سُؤَالْ كَتِيرْ لَاكِنْ عِيسَى مَا رَدَّ لَيَّهْ كَلَامْ. ١٠ وَ كُبَارَاتْ رُجَالْ الدِّينْ وَ الْعُلَمَاءْ وَاقْفِينْ جَنْبَهْ وَ قَاعِدِينْ يَتْهَمَوْه بِشِدَّةْ. ١١ وَ هِرُودُسْ وَ عَسْكَرَهْ حَقَرَوْا عِيسَى وَ أَشَّمَّتَوْا لَيَّهْ. وَ فِي شَمَاتِتْهُمْ دِي، لَبَّسَوْه خَلَقْ سَمَحْ بِلْحَيْن مِنْ خُلْقَانْ الْمَلِكْ. وَ خَلَاصْ، قَبَّلَوْه لِبِلَاطُسْ. ١٢ وَ مِنْ الْيَوْم دَا بَسْ، هِرُودُسْ وَ بِلَاطُسْ بِقَوْا رُفْقَانْ. وَ أَوَّلْ هُمَّنْ مُخَاصِمِينْ.

قَرَار بِلَاطُس

١٣ وَ بِلَاطُسْ نَادَى كُبَارَاتْ رُجَالْ الدِّينْ وَ الشُّيُوخْ وَ نَاسْ الْمَدِينَةْ. ١٤ وَ قَالْ لَيْهُمْ: «إِنْتُو جِبْتُوا لَيِّ النَّادُمْ دَا وَ قُلْتُوا هُو قَاعِدْ يِتَلِّفْ الشَّعَبْ. وَ أَنَا سَأَلْتَهْ عَدِيلْ قِدَّامْكُو وَ مَا لِقِيتْ فَوْقَهْ أَيِّ جَرِيمَةْ. ١٥ وَ هِرُودُسْ كُلَ مَا لِقِي فَوْقَهْ شَيّءْ وَ أَشَانْ دَا، قَبَّلَهْ لَيْنَا. وَ نُقُولْ لَيْكُو هُو مَا سَوَّى شَيّءْ فَسِلْ الْوَاجِبْ لَيَّهْ الْمَوْت. ١٦ وَ خَلَاصْ، يَجْلُدُوهْ وَ بَعَدْ دَا، نَطِلْقَهْ.» ١٧ وَ فِي الْعِيدْ دَا، الْوَالِي وَاجِبْ يَطْلِقْ لَيْهُمْ نَادُمْ وَاحِدْ مِنْ الْمَكْرُوبِينْ.

١٨ وَ كُلَّ النَّاسْ عَاطَوْا بِحِسّ وَاحِدْ وَ قَالَوْا: «أَكْتُلْ عِيسَى دَا وَ أَطْلِقْ لَيْنَا بَرَابَاسْ!» ١٩ وَ بَرَابَاسْ هُو النَّادُمْ الْكَرَبَوْه فِي السِّجِنْ أَشَانْ سَوَّى فِتْنَةْ فِي الْمَدِينَةْ وَ كَتَلْ دِمَّةْ. ٢٠ وَ بِلَاطُسْ كَلَّمْ لَيْهُمْ بَتَّانْ أَشَانْ يِدَوْر يَطْلِقْ عِيسَى. ٢١ وَ لَاكِنْ كُلَّ النَّاسْ عَاطَوْا وَ قَالَوْا: «أَكْتُلَهْ فِي الصَّلِيبْ! أَكْتُلَهْ فِي الصَّلِيبْ!»

٢٢ وَ بَتَّانْ تَالِتْ مَرَّةْ، بِلَاطُسْ حَجَّى لَيْهُمْ وَ قَالْ: «مَالَا؟ شُنُو الْفَسِلْ السَّوَّاهْ؟ أَنَا مَا لِقِيتْ فَوْقَهْ أَيِّ جَرِيمَةْ الْوَاجِبْ لَيَّهْ الْمَوْت. أَشَانْ دَا، يَجْلُدُوهْ وَ خَلَاصْ نَطِلْقَهْ.» ٢٣ وَ لَاكِنْ شَدَّدَوْا فِي كَلَامْهُمْ وَ بِحِسّ فَوْق قَالَوْا: «أَكْتُلُوهْ فِي الصَّلِيبْ!» وَ خَلَاصْ، عَايِطْ النَّاسْ جَبَرَهْ. ٢٤ وَ بِلَاطُسْ قَرَّرْ يَنْطِيهُمْ الشَّيّءْ الطَّلَبَوْه مِنَّهْ. ٢٥ وَ خَلَاصْ، هُو طَلَقْ النَّادُمْ الْقَاعِدْ فِي السِّجِنْ أَشَانْ الْفِتْنَةْ وَ الدِّمَّةْ. وَ لَاكِنْ سَلَّمْ لَيْهُمْ عِيسَى مِثِلْ النَّاسْ دَوَّرَوْه.

في درِب هنا الجُمْجُمة

٢٦ وَ وَكِتْ الْعَسْكَرْ مَاشِينْ يِوَدُّوا عِيسَى، لِقَوْا نَادُمْ وَاحِدْ أُسْمَهْ سِمْعَانْ الْمِنْ حِلَّةْ قَيْرَوَانْ الْجَايِ مِنْ الْكَدَادَةْ. وَ شَيَّلَوْه الصَّلِيبْ وَ جَبَرَوْه لِيِتَابِعْ عِيسَى مِنْ وَرَاءْ. ٢٧ وَ نَاسْ كَتِيرِينْ مَاشِينْ وَرَاءْ عِيسَى. وَ فِي أُسُطْهُمْ، فِي عَوِينْ الْقَاعِدَاتْ يَبْكَنْ لَيَّهْ بِحِسّ عَالِي. ٢٨ وَ عِيسَى أَنْلَفَتْ لَيْهِنْ وَ قَالْ: «يَا عَوِينْ مَدِينَةْ الْقُدُسْ، مَا تَبْكَنْ لَيِّ أَنَا. أَبْكَنْ لِنُفُوسْكَنْ وَ لِعِيَالْكَنْ. ٢٩ أَبْكَنْ أَشَانْ وَكِتْ وَاحِدْ يَجِي وَ فِي الْوَكِتْ دَا، يُقُولُوا: ‹مَبْرُوكْ لِعَوِينْ الْعَاقِرَاتْ وَ الْمَا وِلْدَنْ عِيَالْ وَ أَبَداً مَا رَضَّعَنْ صَغِيرْ.› ٣٠ وَ فِي الْوَكِتْ دَاكْ، النَّاسْ يَصْرَخَوْا مِنْ خَوْف شَدِيدْ وَ يُقُولُوا: ‹خَلِّي الْجِبَالْ يَقَعَوْا فَوْقنَا وَ خَلِّي الْحُجَارْ يَدْفُنُونَا.› ٣١ فَكِّرَنْ فِي الشَّيّءْ الْيِسَوُّوهْ لَيِّ. كَنْ يِسَوُّوا مِثِلْ دَا لِلْحَطَبْ اللَّيِّنْ، شُنُو الْيَبْقَى لِلْحَطَبْ الْيَابِسْ؟»

المسيح في الصليب

٣٢ وَ فِي نَاسَيْن الْوَدَّوْهُمْ مِنْ الْمَدِينَةْ أَشَانْ يَكْتُلُوهُمْ فِي نَفْس الْبَكَانْ مَعَ عِيسَى. وَ هُمَّنْ مُجْرِمِينْ. ٣٣ وَ وَكِتْ لِحْقَوْا الْبَكَانْ الْأُسْمَهْ الْجُمْجُمَةْ، طَقَّوْا عِيسَى فِي الصَّلِيبْ وَ رَفَعَوْه فَوْق. وَ سَوَّوْا نَفْس الشَّيّءْ لِلْمُجْرِمِينْ، الْوَاحِدْ طَقَّوْه فِي صَلِيبْ جَنْب عِيسَى بِنُصَّهْ الزَّيْنَايْ وَ التَّانِي فِي صَلِيبْ آخَرْ بِنُصَّهْ الْإِسْرَايْ. ٣٤ وَ عِيسَى قَالْ: «يَا أَبُويِ، سَامِحْهُمْ أَشَانْ مَا فِهْمَوْا الشَّيّءْ الْهُمَّنْ قَاعِدِينْ يِسَوُّوهْ.» وَ الْعَسْكَرْ سَوَّوْا أَمْ عِيَيْدَاتْ أَشَانْ يِقَسُّمُوا أَمْبَيْنَاتْهُمْ خُلْقَانَهْ.

٣٥ وَ النَّاسْ وَقَفَوْا قَاعِدِينْ يِشِيفُوا. وَ الْكُبَارَاتْ قَاعِدِينْ يِشَّمَّتَوْا لَيَّهْ وَ يُقُولُوا: «هُو نَجَّى نَاسْ آخَرِينْ وَ خَلِّي يِنَجِّي نَفْسَهْ كَنْ صَحِيحْ هُو الْمَسِيحْ وَ النَّادُمْ الْاللّٰهْ عَزَلَهْ!» ٣٦ وَ الْعَسْكَرْ كُلَ أَشَّمَّتَوْا لَيَّهْ. جَوْا وَ قَدَّمَوْا لَيَّهْ شَرَابْ حَامُضْ ٣٧ وَ قَالَوْا: «كَنْ إِنْتَ مَلِكْ الْيَهُودْ، نَجِّي نَفْسَكْ!» ٣٨ وَ فَوْق مِنْ رَاسَهْ فِي كَلَامْ مَكْتُوبْ الْيُقُولْ: «دَا مَلِكْ الْيَهُودْ.»

٣٩ وَ وَاحِدْ مِنْ الْمُجْرِمِينْ الْمُعَلَّقِينْ جَنْبَهْ عَيَّرَهْ بِحِسّ عَالِي وَ قَالْ: «هَايْ! إِنْتَ مَا الْمَسِيحْ وَلَّا؟ نَجِّي نَفْسَكْ وَ نَجِّينَا أَنِحْنَ كُلَ مَعَاكْ!» ٤٠ لَاكِنْ الْمُجْرِمْ التَّانِي هَرَجَهْ وَ قَالْ: «هَايْ! إِنْتَ مَا خَايِفْ مِنْ اللّٰهْ وَلَّا؟ إِنْتَ لِقِيتْ نَفْس الْعَذَابْ مِثْلَهْ. ٤١ وَ أَنِحْنَ، حَكَمَوْنَا بِالْحَقّ أَشَانْ الْعَذَابْ الْيِسَوُّوهْ فَوْقنَا وَاجِبْ لَيْنَا بِسَبَبْ عَمَلْنَا. لَاكِنْ النَّادُمْ دَا مَا سَوَّى شَيّءْ فَسِلْ.» ٤٢ وَ حَجَّى بَتَّانْ وَ قَالْ: «يَا عِيسَى، فَكِّرْ فَوْقِي وَكِتْ تَبْقَى مَلِكْ.» ٤٣ وَ عِيسَى حَجَّى لَيَّهْ وَ قَالْ: «نُقُولْ لَيْك الْحَقّ، الْيَوْم تَدْخُلْ مَعَايِ فِي الْجَنَّةْ.»

مَوْت المسيح

٤٤ وَ بِقِي نُصّ النَّهَارْ. لَاكِنْ الْوَطَاةْ بِقَتْ ضَلْمَةْ فِي كُلَّ الْبَلَدْ لَحَدِّي الْعَصُرْ. ٤٥ الْحَرَّايْ مَا قَاعِدَةْ تِضَوِّي. وَ السِّتَارْ الْفِي بَيْت اللّٰهْ أَنْشَقَّ مِنْ أُسُطْ. ٤٦ وَ عِيسَى عَاطْ بِحِسّ شَدِيدْ وَ قَالْ: «يَا أَبُويِ، رُوحِي نَنْطِيهَا لَيْك فِي إِيدَكْ.» وَ بَعَدْ قَالْ الْكَلَامْ دَا، خَلَاصْ مَاتْ. ٤٧ وَ كَبِيرْ الْعَسْكَرْ شَافْ الشَّيّءْ الْبِقِي وَ مَجَّدْ اللّٰهْ وَ قَالْ: «أَكِيدْ، الرَّاجِلْ دَا صَالِحْ!»

٤٨ وَ كُلَّ النَّاسْ الْكَتِيرِينْ اللَّمَّوْا لِيِشِيفُوا، شَافَوْا الشَّيّءْ الْبِقِي وَ بِقَوْا حَزْنَانِينْ. وَ وَكِتْ مُقَبِّلِينْ فِي بُيُوتْهُمْ، قَاعِدِينْ يُدُقُّوا صَدُرْهُمْ مِنْ النَّدَامَةْ. ٤٩ وَ كُلَّ النَّاسْ الْيَعَرْفُوا عِيسَى وَ الْعَوِينْ الْمَشَنْ وَرَايَهْ مِنْ دَارْ الْجَلِيلْ وَاقْفِينْ بَعِيدْ مِنَّهْ شِيَّةْ وَ قَاعِدِينْ يِشِيفُوا كُلَّ شَيّءْ الْقَاعِدْ يَبْقَى.

المسيح دفنوه

٥٠ وَ فِيَّهْ رَاجِلْ وَاحِدْ أُسْمَهْ يُوسُفْ. وَ هُو مِنْ الْمَجْلَسْ الْكَبِيرْ وَ هُو نَادُمْ زَيْن وَ صَالِحْ. ٥١ هُو مَا قَصَّدْ بِقَرَارْ الْمَجْلَسْ وَ لَا بِالْفِعِلْ الْكُبَارَاتْ سَوَّوْه. وَ هُو مِنْ حِلَّةْ وَاحِدَةْ هَنَا الْيَهُودْ الْأُسُمْهَا الرَّامَةْ وَ مُؤمِنْ بِمَمْلَكَةْ اللّٰهْ الْجَايَةْ. ٥٢ وَ يُوسُفْ دَا، هُو مَشَى لِبِلَاطُسْ وَ سَأَلَهْ جَنَازَةْ عِيسَى. ٥٣ وَ دَلَّى الْجَنَازَةْ مِنْ الصَّلِيبْ وَ كَفَّنَاهَا بِكَفَنْ غَالِي. وَ وَدَّاهَا فِي قَبُرْ وَاحِدْ النَّكَتَوْه فِي حَجَرْ مِثِلْ كَرْكُورْ وَ لِسَّاعْ مَا دَسَّوْا فَوْقَهْ أَيِّ جَنَازَةْ. وَ رَقَّدْ فَوْقَهْ جَنَازَةْ عِيسَى.

٥٤ وَ دَا بِقِي فِي الْيَوْم الْيَهُودْ يِجَهُّزُوا فَوْقَهْ لِيَوْم السَّبْت وَ السَّبْت يِدَوْر يَبْدَا. ٥٥ وَ الْعَوِينْ الْمَشَنْ وَرَاءْ عِيسَى مِنْ دَارْ الْجَلِيلْ مَشَنْ مَعَ يُوسُفْ وَ شَافَنْ الْقَبُرْ وَ كِكَّيْف خَطَّوْا فَوْقَهْ جَنَازَةْ عِيسَى. ٥٦ وَ قَبَّلَنْ فِي بُيُوتْهِنْ وَ جَهَّزَنْ دَوَاءْ وَ رِيحَةْ لِلْجَنَازَةْ. وَ يَوْم السَّبْت، هِنَّ أَنْجَمَّنْ مَرَّةْ وَاحِدْ حَسَبْ وَصِيَّةْ اللّٰهْ.