التلاميذ السبْعين و تِنَيْن
١٠
١ وَ بَعَدَيْن الرَّبّ عِيسَى عَزَلْ مِنْ تَلَامِيذَهْ سَبْعِينْ وَ تِنَيْن نَادُمْ وَ رَسَّلَاهُمْ إِتْنَيْن إِتْنَيْن قِدَّامَهْ فِي أَيِّ بَكَانْ الْهُو يِدَوْر يَمْشِي لَيَّهْ.
٢ وَ قَالْ لَيْهُمْ:
«النَّاسْ مِثِلْ زَرَعْ كَبِيرْ وَ غَلِّتَهْ نِجْضَتْ خَلَاصْ وَ لَاكِنْ الْيَخْدُمُوا فَوْقَهْ شِيَّةْ.
أَشَانْ دَا،
أَسْأَلَوْا سِيدْ الزَّرَعْ أَشَانْ يِرَسِّلْ خَدَّامِينَهْ يِلِمُّوا غَلِّتَهْ.
٣ وَ خَلَاصْ أَمْشُوا.
نِرَسِّلْكُو فِي أُسُطْهُمْ وَ تَبْقَوْا مِثِلْ سُخْلَانْ فِي أُسْط الْمَرَافْعِينْ.
٤ وَ فِي الدَّرِبْ،
مَا تِشِيلُوا جُزْلَانْ وَ لَا مُخْلَاةْ وَ لَا نَعَالْ.
مَا تَقِيفُوا لِتِسَلُّمُوا أَيِّ نَادُمْ فِي الدَّرِبْ.
٥ «وَ قُبَّالْ مَا تَدْخُلُوا فِي أَيِّ بَيْت،
قُولُوا:
‹خَلِّي السَّلَامْ يَجِي فِي الْبَيْت دَا.›
٦ وَ كَنْ نَادُمْ الْيِرِيدْ السَّلَامْ قَاعِدْ فَوْقَهْ،
سَلَامْكُو يَقْعُدْ فَوْقَهْ.
لَاكِنْ كَنْ مَا فِي نَادُمْ الْيِرِيدْ السَّلَامْ،
خَلُّوا سَلَامْكُو يِقَبِّلْ لَيْكُو.
٧ وَ أَقْعُدُوا فِي بَيْت وَاحِدْ وَ مَا تَمْشُوا بَيْت آخَرْ.
آكُلُوا وَ أَشَرْبَوْا أَيِّ شَيّءْ الْيِضَيُّفُوكُو بَيَّهْ أَشَانْ أُجْرَةْ النَّادُمْ الْيَخْدِمْ وَاجْبَةْ لَيَّهْ.
مَا تِحَوُّلُوا مِنْ بَيْت لِبَيْت فِي حِلَّةْ وَاحِدَةْ.
٨ «وَ كَنْ تَدْخُلُوا فِي أَيِّ حِلَّةْ وَ نَاسْهَا يَقْبَلَوْكُو،
آكُلُوا الْأَكِلْ الْيِضَيُّفُوكُو بَيَّهْ
٩ وَ أَشْفُوا الْمَرْضَانِينْ الْقَاعِدِينْ فَوْقهَا.
وَ قُولُوا لَيْهُمْ:
‹مَمْلَكَةْ اللّٰهْ قَرَّبَتْ لَيْكُو.›
١٠ وَ لَاكِنْ كَنْ تَدْخُلُوا فِي حِلَّةْ وَ نَاسْهَا مَا يَقْبَلَوْكُو،
أَمْشُوا فِي شَوَارِعْهَا وَ قُولُوا:
١١ ‹عَجَاجْ حِلِّتْكُو الْمُلَصَّقْ فِي رِجْلَيْنَا كُلَ،
نِحِتُّوهْ مِنِّنَا وَ دِي شَهَادِتْنَا فَوْقكُو.
لَاكِنْ أَعَرْفُوا عَدِيلْ كَدَرْ مَمْلَكَةْ اللّٰهْ قَرَّبَتْ.›
١٢ نُقُولْ لَيْكُو الْعَذَابْ الْيَجِي فَوْق نَاسْ الْحِلَّةْ دِي فِي يَوْم الْحِسَابْ يَبْقَى زِيَادَةْ مِنْ الْعَذَابْ الْيَجِي فَوْق نَاسْ حِلَّةْ سَدُومْ.»*
الحِلّال الما تابوا
١٣ «الْعَذَابْ يَرْجَاكِ،
يَا حِلَّةْ كُورَزِينْ.
الْعَذَابْ يَرْجَاكِ،
يَا حِلَّةْ بَيْت صَيْدَا.
كَنْ أَوَّلْ نَادُمْ سَوَّى الْعَجَايِبْ دَوْل فِي مُدُنْ الْكُفَّارْ صُورْ وَ صَيْدَا،
نَاسْهُمْ يُتُوبُوا مِنْ ذُنُوبْهُمْ مِنْ زَمَانْ وَ يَلْبَسَوْا خُلْقَانْ الْحِزِنْ وَ يَقْعُدُوا فِي رُمَادْ وَ يُتُوبُوا.
١٤ أَيْوَى،
الْعَذَابْ الْيَجِي فَوْق نَاسْكُو فِي يَوْم الْحِسَابْ يَبْقَى زِيَادَةْ مِنْ الْعَذَابْ الْيَجِي فَوْق نَاسْ صُورْ وَ صَيْدَا.
١٥ وَ إِنْتِ حِلَّةْ كَفَرْ نَاحُومْ،
فِي فِكِرْكِ تَرْفَعَيْ رَاسْكِ لَحَدِّي السَّمَاءْ وَلَّا؟
بِالْعَكْس،
تِنْرَمِي فِي الْهَاوِيَةْ!»
١٦ وَ عِيسَى قَالْ لِلتَّلَامِيذ:
«أَيِّ نَادُمْ السِّمِعْ كَلَامْكُو،
سِمِعْ كَلَامِي.
وَ الْأَبَاكُو،
أَبَانِي.
وَ الْأَبَانِي،
أَبَى اللّٰهْ الرَّسَّلَانِي.»
فرح التلاميذ السبْعين و تِنَيْن
١٧ وَ التَّلَامِيذ السَّبْعِينْ وَ تِنَيْن الْعِيسَى رَسَّلَاهُمْ قَبَّلَوْا لَيَّهْ فَرْحَانِينْ بِلْحَيْن.
وَ قَالَوْا:
«يَا سَيِّدْنَا!
الشَّوَاطِينْ ذَاتْهُمْ يَسْمَعَوْا كَلَامْنَا كَنْ أَمَرْنَاهُمْ بِأُسْمَكْ إِنْتَ.»
١٨ وَ عِيسَى قَالْ لَيْهُمْ:
«أَيْوَى،
وَكِتْ إِنْتُو قَاعِدِينْ فِي الْخِدْمَةْ دِي،
أَنَا شِفْت إِبْلِيسْ وَقَعْ عَجَلَةْ مِثِلْ سَوْط يَقَعْ مِنْ السَّمَاءْ.
١٩ أَنَا أَنْطَيْتكُو قُدْرَةْ أَشَانْ تِفَجُّقُوا الدَّبِيبْ وَ الْعَقَارِبْ.
وَ أَنْطَيْتكُو قُدْرَةْ لَحَدِّي تِنَّصُرُوا فِي كُلَّ قُدْرَةْ إِبْلِيسْ الْعَدُو.
مَا فِي شَيّءْ الْيِتَعِّبْكُو.
٢٠ صَحِيحْ،
الشَّوَاطِينْ سِمْعَوْا كَلَامْكُو لَاكِنْ مَا تَفْرَحَوْا بِالْكَلَامْ دَا.
أَخَيْر تَفْرَحَوْا كَدَرْ اللّٰهْ سَجَّلْ أَسَامَيْكُو فِي كِتَابَهْ فِي السَّمَاءْ.»
فرح المسيح
٢١ وَ فِي الْوَكِتْ دَا،
عِيسَى مَلَانْ بِالرُّوحْ الْقُدُّوسْ وَ فَرْحَانْ بِلْحَيْن وَ قَالْ:
«شُكْراً،
يَا أَبُويِ رَبّ السَّمَاوَاتْ وَ الْأَرْض،
أَشَانْ إِنْتَ لَبَّدْت كَلَامَكْ دَا مِنْ الْحَكِيمِينْ وَ مِنْ الْعُلَمَاءْ وَ وَصَّفْتَهْ لِلنَّاسْ الْجُهَّالْ مَرَّةْ وَاحِدْ.
أَيْوَى،
يَا أَبُويِ،
أَشَانْ دَا بَسْ الشَّيّءْ الْإِنْتَ رَاضِي بَيَّهْ.
٢٢ أَبُويِ اللّٰهْ وَكَّلَانِي بِكُلَّ شَيّءْ.
مَا فِي نَادُمْ الْيَعَرِفْ إِبْن اللّٰهْ.
إِلَّا أَبُوهْ يَعَرْفَهْ.
وَ مَا فِي نَادُمْ الْيَعَرِفْ اللّٰهْ إِلَّا إِبْن اللّٰهْ وَ النَّادُمْ الْإِبْن اللّٰهْ يِدَوْر يِوَصِّفْ لَيَّهْ أَبُوهْ.»
٢٣ وَ أَنْلَفَتْ لِتَلَامِيذَهْ وَ حَجَّى لَيْهُمْ وِحَيْدهُمْ وَ قَالْ:
«مَبْرُوكْ لَيْكُو فِي شَانْ الشَّيّءْ الْإِنْتُو تِشِيفُوهْ.
٢٤ أَشَانْ نُقُولْ لَيْكُو نَاسْ كَتِيرِينْ مِنْ الْأَنْبِيَاء وَ الْمُلُوكْ دَوَّرَوْا بِلْحَيْن يِشِيفُوا الشَّيّءْ الْإِنْتُو قَاعِدِينْ تِشِيفُوهْ،
لَاكِنْ مَا شَافَوْه.
وَ دَوَّرَوْا يَسْمَعَوْا الْكَلَامْ الْإِنْتُو قَاعِدِينْ تَسْمَعَوْه وَ مَا سِمْعَوْه.»
مَثَل السَامِرِي الزَيْن
٢٥ وَ نَادُمْ وَاحِدْ عَالِمْ فِي التَّوْرَاةْ قَمَّ أَشَانْ يِجَرِّبْ عِيسَى وَ قَالْ:
«يَا الْمُعَلِّمْ،
شُنُو الشَّيّءْ الْوَاجِبْ نِسَوِّيهْ لِنَوْرِثْ الْحَيَاةْ الْأَبَدِيَّةْ؟»
٢٦ وَ عِيسَى قَالْ لَيَّهْ:
«شُنُو الْمَكْتُوبْ فِي التَّوْرَاةْ؟
قَرَيْت فَوْقَهْ شُنُو؟»
٢٧ وَ الْعَالِمْ رَدَّ لَيَّهْ وَ قَالْ:
«الْكِتَابْ يُقُولْ:
﴿وَاجِبْ تِحِبّ اللّٰهْ رَبَّكْ بِكُلَّ قَلْبَكْ وَ بِكُلَّ نَفْسَكْ وَ بِكُلَّ قُدُرْتَكْ وَ بِكُلَّ فِكْرَكْ﴾* وَ بَتَّانْ:
﴿حِبّ أَخُوكْ مِثِلْ تِحِبّ نَفْسَكْ.﴾
»*
٢٨ وَ عِيسَى قَالْ:
«كَلَامَكْ صَحِيحْ.
سَوِّي مِثِلْ قُلْتَهْ وَ تَلْقَى الْحَيَاةْ.»
٢٩ وَ لَاكِنْ الْعَالِمْ دَوَّرْ يِوَصِّفْ كَدَرْ هُو عِنْدَهْ حَقّ وَ قَالْ لَيَّهْ:
«يَاتُو مِنْ النَّاسْ أَخُويِ؟»
٣٠ وَ عِيسَى رَدَّ لَيَّهْ وَ قَالْ:
«يَوْم مِنْ الْأَيَّامْ،
فِي نَادُمْ وَاحِدْ مَاشِي مِنْ مَدِينَةْ الْقُدُسْ لِحِلَّةْ أَرِيحَا.
وَ طَوَّالِي،
رَبَّاطِينْ الدُّرُوبْ قَمَّوْا هَجَمَوْه.
دَقَّوْه وَ سَلَّبَوْه وَ فَاتَوْا.
وَ خَلَّوْه مَجْرُوحْ أَمْبَيْن الْحَيَاةْ وَ الْمَوْت.
٣١ «وَ بَعَدَيْن فِي نَادُمْ وَاحِدْ مَاشِي فِي الدَّرِبْ دَا وَ هُو رَاجِلْ دِينْ.
وَ وَكِتْ هُو شَافْ النَّادُمْ التَّعْبَانْ،
هُو بَارَاهْ وَ فَاتْ قِدَّامْ.
٣٢ وَ نَادُمْ آخَرْ جَاءْ وَ هُو مِنْ اللَّاوِيِّينْ الْيَخْدُمُوا فِي بَيْت اللّٰهْ.
هُو جَاءْ فِي الْبَكَانْ دَا وَ شَافْ التَّعْبَانْ وَ هُو كُلَ بَارَاهْ وَ فَاتْ قِدَّامْ.
٣٣ «لَاكِنْ مُسَافِرْ وَاحِدْ جَاءْ فِي الْبَكَانْ النَّادُمْ قَاعِدْ فَوْقَهْ دَا وَ هُو مِنْ السَّامِرِيِّينْ.
وَ الْأَجْنَبِي دَا شَافَهْ وَ حَنَّ فَوْقَهْ.
٣٤ وَ مَشَى لَيَّهْ وَ صَبَّ دِهِنْ وَ خَمَرْ فِي عَوَاوِيرَهْ وَ رَبَطَاهُمْ وَ رَكَّبَهْ فِي حُمَارَهْ.
وَ وَدَّاهْ فِي بَيْت هَنَا ضِيفَانْ وَ رَيَّسَهْ.
٣٥ وَ أَمْبَاكِرْ،
هُو مَرَقْ قُرُسْ مِنْ جُزْلَانَهْ وَ أَنْطَاهْ لِسِيدْ الْبَيْت وَ قَالْ لَيَّهْ:
‹رَيِّسَهْ وَ كَنْ خِسِرْت زِيَادَةْ،
نَنْطِيكْ وَكِتْ نِقَبِّلْ لَيْك.›»
٣٦ وَ عِيسَى سَأَلْ الْعَالِمْ وَ قَالْ:
«مِنْ النَّاسْ التَّلَاتَةْ دَوْل،
يَاتُو السَّوَّى نَفْسَهْ أَخُو لِلنَّادُمْ الْهَجَمَوْه رَبَّاطِينْ الدُّرُوبْ؟»
٣٧ وَ الْعَالِمْ رَدَّ لَيَّهْ وَ قَالْ:
«النَّادُمْ السَّوَّى لَيَّهْ الرَّحْمَةْ.»
وَ خَلَاصْ عِيسَى قَالْ لَيَّهْ:
«قُمّ سَوِّي نَفْس الشَّيّءْ مِثْلَهْ.»
مَرْثَة و مَرْيَم
٣٨ وَ عِيسَى وَ جَمَاعْتَهْ مَاشِينْ قِدَّامْ وَ دَخَلَوْا فِي حِلَّةْ وَاحِدَةْ.
وَ فِي مَرَةْ أُسُمْهَا مَرْثَةْ وَ هِي فَضَّلَتْهُمْ فِي بَيْتهَا.
٣٩ وَ عِنْدَهَا أَخُتْ أُسُمْهَا مَرْيَمْ.
وَ مَرْيَمْ قَعَدَتْ قَرِيبْ لِلرَّبّ عِيسَى أَشَانْ تَسْمَعْ تَعْلِيمَهْ.
٤٠ لَاكِنْ مَرْثَةْ قَاعِدَةْ تَخْدِمْ لَيْهُمْ وَ هِي مَشْغُولَةْ بِلْحَيْن وَ مَا تَقْدَرْ تَسْمَعْ كَلَامَهْ.
وَ مَشَتْ لِعِيسَى وَ قَالَتْ:
«يَا سَيِّدْنَا،
أَخْتِي دِي خَلَّتْنِي نِسَوِّي كُلَّ الْخِدْمَةْ دِي وِحَيْدِي.
دَا عَدِيلْ وَلَّا؟
خَلَاصْ،
قُولْ لَيْهَا خَلِّي تِعَاوِنِّي!»