لُوقا 8

العوين التابعن المسيح

١ وَ بَعَدْ دَا، عِيسَى قَمَّ يُرُوغْ فِي الْمُدُنْ وَ الْحِلَّالْ. وَ قَاعِدْ يِبَلِّغْ لِلنَّاسْ بِبِشَارَةْ مَمْلَكَةْ اللّٰهْ. وَ الرُّسُلْ الْأَتْنَا عَشَرْ مَاشِينْ مَعَايَهْ. ٢ وَ مَعَايَهْ فِي عَوِينْ الْعِيسَى شَفَاهِنْ. وَاحِدَاتْ أَوَّلْ مَرْضَانَاتْ وَ وَاحِدَاتْ أَوَّلْ مُشَوْطِنَاتْ مِثِلْ مَرْيَمْ الْمَقْدَلِيَّةْ الطَّرَدْ مِنْهَا سَبْعَةْ شَوَاطِينْ ٣ وَ جَانَا مَرِةْ خُوزَا وَكِيلْ هَنَا هِرُودُسْ الْمُحَافِظْ وَ سُوزَانَةْ وَ عَوِينْ آخَرَاتْ كَتِيرَاتْ. وَ الْعَوِينْ دَيْل قَاعِدَاتْ يِسَاعِدَنْ جَمَاعَةْ عِيسَى بِمَالْهِنْ حَلَالْهِنْ.

مَثَل الحرّاتي اليتَيْرِب

٤ وَ نَاسْ كَتِيرِينْ مَرَّةْ وَاحِدْ جَايِينْ لَيَّهْ مِنْ أَيِّ حِلَّةْ وَ عِيسَى حَجَّى لَيْهُمْ بِمَثَلْ وَ قَالْ: ٥ «يَوْم مِنْ الْأَيَّامْ، فِي حَرَّاتِي وَاحِدْ مَرَقْ مَشَى فِي الزَّرَعْ أَشَانْ يِتَيْرِبْ. وَ وَكِتْ هُو قَاعِدْ يِشَتِّتْ تَيْرَابَهْ، تَيْرَابْ وَاحِدْ وَقَعْ فِي الدَّرِبْ. وَ النَّاسْ فَجَّقَوْه وَ طُيُورْ السَّمَاءْ جَوْا أَكَلَوْه. ٦ وَ تَيْرَابْ آخَرْ وَقَعْ فِي بَكَانْ حَجَرْ وَ الْبِذْرَةْ يِبْسَتْ أَشَانْ مَا لِقَتْ أَلْمِي. ٧ وَ تَيْرَابْ آخَرْ وَقَعْ فِي أُسْط الشَّوْك وَ الْبِذْرَةْ قَمَّتْ سَوَا مَعَ الشَّوْك وَ الشَّوْك خَنَقَاهَا. ٨ وَ تَيْرَابْ آخَرْ وَقَعْ فِي تُرَابْ عَدِيلْ وَ الْبِذْرَةْ قَمَّتْ وَ وِلْدَتْ عِيَالْ كَتِيرْ. وَ كُلِّ قَنْدُولْ عِنْدَهْ 100 حَبَّةْ.» وَ وَكِتْ قَالْ الْكَلَامْ دَا خَلَاصْ، هُو نَادَى الْجَمَاعَةْ وَ قَالْ: «أَيِّ نَادُمْ الْعِنْدَهْ أَدَانْ لِلسَّمَعْ، خَلِّي يَسْمَعْ!»

٩ وَ تَلَامِيذَهْ سَأَلَوْه مِنْ مَعَنَى هَنَا الْمَثَلْ دَا. ١٠ وَ عِيسَى قَالْ: «اللّٰهْ أَنْطَاكُو مَعْرَفَةْ سِرّ مَمْلَكَةْ اللّٰهْ لَاكِنْ نِحَجِّي لِلنَّاسْ الْآخَرِينْ بِأَمْثَالْ. وَ بِمِثِلْ دَا، عِنْدُهُمْ عُيُونْ وَ لَاكِنْ مَا يِشِيفُوا وَ يَسْمَعَوْا الْكَلَامْ وَ لَاكِنْ مَا يَفْهَمَوْه.

١١ «وَ نِفَسِّرْ لَيْكُو الْمَثَلْ. التَّيْرَابْ يِمَثِّلْ كَلَامْ اللّٰهْ. ١٢ وَ التَّيْرَابْ الْوَقَعْ فِي الدَّرِبْ يِمَثِّلْ النَّاسْ الْيَسْمَعَوْا كَلَامْ اللّٰهْ لَاكِنْ إِبْلِيسْ يَجِي يِشِيلَهْ مِنْ قُلُوبْهُمْ أَشَانْ مَا يِآمُنُوا وَ يَنْجَوْا. ١٣ وَ التَّيْرَابْ الْوَقَعْ فِي بَكَانْ حَجَرْ يِمَثِّلْ النَّاسْ الْيَسْمَعَوْا الْكَلَامْ وَ يَقْبَلَوْه بِفَرْحَةْ لَاكِنْ يِآمُنُوا لِوَكِتْ شِيَّةْ بَسْ. وَ هُمَّنْ مِثِلْ بِذْرَةْ الْقَمَحْ الْمَا عِنْدَهَا عُرُوقْ. وَ فِي وَكِتْ التَّجْرِبَةْ، يِخَلُّوا دَرِبْ اللّٰهْ. ١٤ وَ التَّيْرَابْ الْوَقَعْ فِي أُسْط الشَّوْك يِمَثِّلْ النَّاسْ الْيَسْمَعَوْا كَلَامْ اللّٰهْ وَ لَاكِنْ مَشَاكِلْ الدُّنْيَا وَ رَيْدِتْهُمْ لِلْمَالْ وَ شَهْوَاتْ الْحَيَاةْ يَكْتُلُوا كَلَامْ اللّٰهْ الْفِي قُلُوبْهُمْ. وَ بَيْدَا، كَلَامْ اللّٰهْ مَا يِجِيبْ نَتِيجَةْ. ١٥ وَ التَّيْرَابْ الْوَقَعْ فِي التُّرَابْ الْعَدِيلْ يِمَثِّلْ النَّاسْ الْيَسْمَعَوْا كَلَامْ اللّٰهْ وَ يَكُرْبُوهْ بِحَقّ وَ قَلِبْ عَدِيلْ. وَ يَصْبُرُوا وَ يِجِيبُوا نَتِيجَةْ عَدِيلَةْ.

١٦ «وَ مَا فِي نَادُمْ يِأَوْقِدْ فَانُوسْ وَ يِغَطِّيهْ بِمَاعُونْ وَ لَا يُخُطَّهْ تِحِتْ السَّرِيرْ. وَ لَاكِنْ يُخُطَّهْ فِي بَكَانْ فَوْق أَشَانْ النَّاسْ الْيَدْخُلُوا فِي الْبَيْت يِشِيفُوا الضَّيّ. ١٧ أَشَانْ مَا فِي شَيّءْ مُلَبَّدْ الْبَعَدَيْن مَا يِنْشَافْ. وَ مَا فِي أَيِّ سِرّ الْمَا يِنْعَرِفْ وَ بَعَدَيْن يِنْكَشِفْ. ١٨ أَشَانْ دَا، خُطُّوا بَالْكُو وَ أَسْمَعَوْا عَدِيلْ. أَشَانْ يَنْطُوا النَّادُمْ الْعِنْدَهْ. وَ لَاكِنْ النَّادُمْ الْمَا عِنْدَهْ، الشِّيَّةْ الْهُو عِنْدَهْ كُلَ، يِشِيلُوهْ مِنَّهْ.»

أمّ المسيح و أخْوانه

١٩ وَ أَمّ عِيسَى وَ أَخْوَانَهْ جَوْا لَيَّهْ. دَوَّرَوْا يِشِيفُوهْ لَاكِنْ مَا قِدْرَوْا يِقَرُّبُوا لَيَّهْ أَشَانْ كَتَرَةْ النَّاسْ سَدَّتْ لَيْهُمْ الدَّرِبْ. ٢٠ وَ النَّاسْ أَوْرَوْه وَ قَالَوْا: «أَمَّكْ وَ أَخْوَانَكْ قَاعِدِينْ بَرَّا وَ يِدَوْرُوا يِشِيفُوكْ.» ٢١ وَ هُو رَدَّ لَيْهُمْ وَ قَالْ: «النَّاسْ الْيَسْمَعَوْا كَلَامْ اللّٰهْ وَ يِطَبُّقُوهْ، هُمَّنْ بَسْ أَمِّي وَ أَخْوَانِي.»

المسيح وقّف الريح الشديدة

٢٢ وَ يَوْم وَاحِدْ، عِيسَى حَجَّى لِتَلَامِيذَهْ وَ قَالْ: «تَعَالُوا نَقْطَعَوْا الْبَحَرْ.» وَ رِكِبْ فِي مَرْكَبَةْ مَعَ تَلَامِيذَهْ وَ مَشَوْا. ٢٣ وَ وَكِتْ مَاشِينْ، عِيسَى نَامْ فِي الْمَرْكَبَةْ. وَ بِغَفْلَةْ، رِيحْ شَدِيدَةْ مَرَّةْ وَاحِدْ سَاقَتْ فِي الْبَحَرْ وَ قَوَّمَتْ الشَّلَّالْ. وَ الْمَرْكَبَةْ قَاعِدَةْ تِنْمَلِي أَلْمِي وَ هُمَّنْ فِي خَطَرْ.

٢٤ وَ التَّلَامِيذ مَشَوْا لِعِيسَى وَ قَوَّمَوْه مِنْ النَّوْم وَ قَالَوْا: «يَا سَيِّدْنَا! يَا سَيِّدْنَا! أَنِحْنَ مُتْنَا!» وَ عِيسَى قَمَّ وَ كَشَّ لِلرِّيحْ وَ الشَّلَّالْ الشَّدِيدْ. وَ خَلَاصْ، الرِّيحْ وَ الشَّلَّالْ وَقَفَوْا. وَ الْوَطَاةْ بِقَتْ هَادِيَةْ. ٢٥ وَ حَجَّى لَيْهُمْ وَ قَالْ: «وَيْن إِيمَانْكُو؟» وَ هُمَّنْ خَافَوْا خَوْف شَدِيدْ وَ أَلْعَجَّبَوْا مَرَّةْ وَاحِدْ وَ قَالَوْا أَمْبَيْنَاتْهُمْ: «النَّادُمْ دَا يَاتُو؟ هُو أَمَرْ الرِّيحْ وَ الْأَلْمِي وَ هُمَّنْ سِمْعَوْا كَلَامَهْ!»

عِيسَى و المُشَوْطِن

٢٦ وَ خَلَاصْ، قَطَعَوْا الْبَحَرْ وَ وَصَّلَوْا فِي بَلَدْ الْقَرَاسِيِّينْ الْقَاعِدَةْ مُقَابِلَةْ دَارْ الْجَلِيلْ. ٢٧ وَ وَكِتْ عِيسَى نَزَلْ مِنْ الْمَرْكَبَةْ، نَادُمْ وَاحِدْ مُشَوْطِنْ مِنْ الْحِلَّةْ جَاءْ لَاقَاهْ. وَ مِنْ مُدَّةْ طَوِيلَةْ هُو مَا لَابِسْ خَلَقْ وَ لَا سَاكِنْ فِي بَيْت. هُو سَاكِنْ فِي الْقُبُورْ. ٢٨ وَ هُو شَافْ عِيسَى وَ عَاطْ وَ سَجَدْ قِدَّامَهْ. وَ بِحِسّ عَالِي هُو قَالْ: «يَا عِيسَى إِبْن اللّٰهْ الْعَالِي! إِنْتَ تِدَوْر مِنِّي شُنُو؟ نَشْحَدَكْ مَا تِعَذِّبْنِي.» ٢٩ وَ قَالْ الْكَلَامْ دَا أَشَانْ أَوَّلْ عِيسَى أَمَرْ الشَّيْطَانْ الْقَاعِدْ فَوْقَهْ لِيَمْرُقْ مِنَّهْ. وَ النَّادُمْ دَا، مَرَّةْ كَتِيرْ الشَّيْطَانْ يُقُمّ لَيَّهْ. وَ أَوَّلْ رَبَطَوْه وَ جَنْزَرَوْه لَاكِنْ هُو قَطَعْ أَيِّ رُبَاطْ. وَ الشَّيْطَانْ سَاقَهْ فِي الْخَلَاءْ.

٣٠ وَ عِيسَى سَأَلَهْ وَ قَالْ: «أُسْمَكْ يَاتُو؟» وَ هُو قَالْ: «أَنَا أُسْمِي دَيْش». وَ هُو قَالْ دَيْش أَشَانْ شَوَاطِينْ كَتِيرِينْ دَخَلَوْا فَوْقَهْ. ٣١ وَ الشَّوَاطِينْ شَحَدَوْا عِيسَى أَشَانْ مَا يِرَسِّلْهُمْ فِي بَكَانْ الْعَذَابْ. ٣٢ وَ فِي طَرَفْ الْحَجَرْ، خَنَازِيرْ كَتِيرِينْ قَاعِدِينْ يَسْرَحَوْا. وَ الشَّوَاطِينْ شَحَدَوْا عِيسَى أَشَانْ يِخَلِّيهُمْ يَدْخُلُوا فِي الْخَنَازِيرْ دَوْل. وَ هُو أَنْطَاهُمْ إِذِنْ. ٣٣ وَ الشَّوَاطِينْ مَرَقَوْا مِنْ النَّادُمْ دَا وَ دَخَلَوْا فِي الْخَنَازِيرْ. وَ الْخَنَازِيرْ كُلُّهُمْ جَرَوْا مِنْ طَرَفْ الْحَجَرْ وَ وَقَعَوْا فِي الْبَحَرْ وَ خَلَاصْ، أَلْمِي أَكَلَاهُمْ.

٣٤ وَ وَكِتْ رُعْيَانْ الْخَنَازِيرْ شَافَوْا الشَّيّءْ الْبِقِي دَا، قَمَّوْا عَرَّدَوْا وَ مَشَوْا خَبَّرَوْا بَيَّهْ كُلَّ النَّاسْ الْفِي الْحِلَّةْ وَ فِي الْفُرْقَانْ. ٣٥ وَ بِالْخَبَرْ دَا، النَّاسْ مَرَقَوْا مِنْ الْحِلَّةْ أَشَانْ يِشِيفُوا الشَّيّءْ الْبِقِي. وَ جَوْا لِعِيسَى وَ شَافَوْا النَّادُمْ الْمَرَقَوْا مِنَّهْ الشَّوَاطِينْ. وَ هُو قَاعِدْ تِحِتْ يَسْمَعْ كَلَامْ عِيسَى، لَابِسْ خُلْقَانْ وَ عَقْلَهْ فَوْقَهْ. وَ خَافَوْا مَرَّةْ وَاحِدْ. ٣٦ وَ النَّاسْ الشَّافَوْا الشَّيّءْ دَا خَبَّرَوْا النَّاسْ الْآخَرِينْ بِكِكَّيْف النَّادُمْ الْأَوَّلْ مُشَوْطِنْ لِقِي الْعَافَيْ. ٣٧ وَ كُلَّ النَّاسْ هَنَا بَلَدْ الْقَرَاسِيِّينْ شَحَدَوْا عِيسَى لِيِبَعِّدْ مِنْهُمْ أَشَانْ هُمَّنْ خَايْفِينْ خَوْف شَدِيدْ.

وَ خَلَاصْ، هُو رِكِبْ فِي الْمَرْكَبَةْ لِيِقَبِّلْ دَارْ الْجَلِيلْ. ٣٨ وَ قُبَّالْ عِيسَى مَا يَمْشِي، النَّادُمْ الْمَرَقَوْا مِنَّهْ الشَّوَاطِينْ شَحَدْ عِيسَى أَشَانْ يَمْشِي مَعَايَهْ. لَاكِنْ عِيسَى رَسَّلَهْ فِي حِلِّتَهْ وَ قَالْ: ٣٩ «قَبِّلْ بَيْتَكْ وَ أَوْرِي نَاسَكْ بِكُلَّ شَيّءْ الْاللّٰهْ سَوَّاهْ لَيْك.» وَ خَلَاصْ، قَمَّ مَشَى وَ بَلَّغْ كُلَّ نَاسْ حِلِّتَهْ بِكُلَّ شَيّءْ الْعِيسَى سَوَّاهْ لَيَّهْ.

بِنيّة جَايْرُس و المرة

٤٠ وَ عِيسَى قَبَّلْ فِي دَارْ الْجَلِيلْ وَ كُلَّ النَّاسْ قَاعِدِينْ يَرْجَوْه وَ لَاقَوْه بِفَرَحْ. ٤١ وَ نَادُمْ وَاحِدْ أُسْمَهْ جَايْرُسْ جَاءْ وَ هُو مَسْؤُولْ فِي بَيْت الصَّلَاةْ. وَ هُو سَجَدْ قِدَّامْ عِيسَى وَ شَحَدَهْ لِيَجِي فِي بَيْتَهْ ٤٢ أَشَانْ عِنْدَهْ بِنَيَّةْ وَاحِدَةْ بَسْ وَ عُمُرْهَا مِثِلْ 12 سَنَةْ وَ هِي قَرِيبْ تُمُوتْ. وَ عِيسَى قَمَّ وَ مَشَى مَعَايَهْ.

وَ فِي نَاسْ كَتِيرِينْ فِي الدَّرِبْ لَحَدِّي قَاعِدِينْ يَعَصُرُوهْ. ٤٣ وَ فِي أُسْط النَّاسْ فِي مَرَةْ تَعْبَانَةْ. وَ مِنْ 12 سَنَةْ، دَمَّهَا قَاعِدْ يِدَفِّقْ مِنْهَا. وَ دَفَعَتْ كُلَّ مَالْهَا لِلدَّكَاتِيرْ وَ لَاكِنْ مَا فِي نَادُمْ قِدِرْ يِدَاوِيهَا. ٤٤ وَ هِي قَرَّبَتْ لِعِيسَى مِنْ وَرَاءْ وَ مَدَّتْ إِيدْهَا وَ لِمْسَتْ طَرَفْ خَلَقَهْ. وَ طَوَّالِي دَمَّهَا وَقَفْ. ٤٥ وَ عِيسَى قَالْ: «يَاتُو لِمِسْنِي؟» وَ كُلَّ النَّاسْ نَكَرَوْا. وَ بُطْرُسْ قَالْ: «سَيِّدْنَا، فِي نَاسْ كَتِيرِينْ مُحَوِّقِينَكْ وَ قَاعِدِينْ يَعَصُرُوكْ.» ٤٦ وَ عِيسَى قَالْ: «نَادُمْ وَاحِدْ لِمِسْنِي. حَسَّيْت فِي قُدْرَةْ مَرَقَتْ مِنِّي.»

٤٧ وَ خَلَاصْ، الْمَرَةْ عِرْفَتْ كَدَرْ هِي مَا تَقْدَرْ تِلَبِّدْ نَفِسْهَا وَ جَاتْ لِعِيسَى وَ قَاعِدَةْ تَرْجِفْ مِنْ الْخَوْف. وَ سَجَدَتْ قِدَّامَهْ وَ أَوْرَتْ عِيسَى قِدَّامْ كُلَّ النَّاسْ بِسَبَبْ لَمِّسِينْهَا. وَ أَوْرَتَهْ بِكِكَّيْف هِي لِقَتْ الْعَافَيْ طَوَّالِي. ٤٨ وَ عِيسَى قَالْ لَيْهَا: «يَا بِنَيِّتِي، إِيمَانْكِ بَيِّ نَجَّاكِ. أَمْشِي بِسَلَامْ.»

٤٩ وَ وَكِتْ هُو قَاعِدْ يِحَجِّي لَيْهَا، نَادُمْ وَاحِدْ جَاءْ مِنْ بَيْت الْمَسْؤُولْ هَنَا بَيْت الصَّلَاةْ وَ قَالْ: «بِنَيِّتَكْ مَاتَتْ خَلَاصْ. خَلِّي الْمُعَلِّمْ يِنْجَمَّ.» ٥٠ وَ لَاكِنْ وَكِتْ عِيسَى سِمِعْ الْكَلَامْ دَا، حَجَّى لِلْمَسْؤُولْ وَ قَالْ: «مَا تَخَافْ. آمِنْ بَيِّ بَسْ وَ هِي تَنْجَى.»

٥١ وَ وَكِتْ عِيسَى وِصِلْ فِي بَيْت الْمَسْؤُولْ، هُو مَا خَلَّى أَيِّ نَادُمْ يَدْخُلْ مَعَايَهْ دَاخَلْ إِلَّا بُطْرُسْ وَ يُوحَنَّا وَ يَعْقُوبْ وَ أَبُو الْبِنَيَّةْ وَ أَمَّهَا. ٥٢ وَ فِي الْبَيْت، كُلَّ النَّاسْ قَاعِدِينْ يَبْكُوا حَزْنَانِينْ لَيْهَا. وَ عِيسَى قَالْ لَيْهُمْ: «مَا تَبْكُوا! هِي مَا مَاتَتْ. هِي نَايْمَةْ بَسْ.»

٥٣ وَ ضِحْكَوْا لَيَّهْ بِشَمَاتَةْ أَشَانْ عِرْفَوْا هِي مَيْتَةْ. ٥٤ لَاكِنْ هُو كَرَبْ إِيدْهَا وَ حَجَّى لَيْهَا بِحِسّ عَالِي وَ قَالْ: «يَا بِنْتِي، قُمِّي!» ٥٥ وَ رُوحْهَا قَبَّلَتْ لَيْهَا وَ عَجَلَةْ كَيْ هِي قَمَّتْ. وَ عِيسَى أَمَرَاهُمْ أَشَانْ يَنْطُوهَا أَكِلْ. ٥٦ وَ وَالْدَيْنهَا أَلْعَجَّبَوْا. وَ عِيسَى أَمَرَاهُمْ أَشَانْ مَا يِأَوْرُوا نَادُمْ بِالشَّيّءْ الْبِقِي.