لُوقا 5

المسيح نادى سِمْعَان و رُفْقانه

١ وَ يَوْم وَاحِدْ، عِيسَى قَاعِدْ جَنْب بَحَرْ الْجَلِيلْ. وَ النَّاسْ الْيِدَوْرُوا يَسْمَعَوْا كَلَامْ اللّٰهْ بِقَوْا كَتِيرِينْ مَرَّةْ وَاحِدْ لَحَدِّي قَاعِدِينْ يَعَصُرُوهْ. ٢ وَ شَافْ مَرَاكِبْ إِتْنَيْن قَاعِدِينْ فِي خَشُمْ الْبَحَرْ. الْحَوَّاتِينْ نَزَلَوْا مِنْهُمْ لِيِغَسُّلُوا شُرُكَّاهُمْ. ٣ وَ عِيسَى رِكِبْ فِي مَرْكَبَةْ وَاحِدَةْ وَ هِي هَنَا سِمْعَانْ. وَ طَلَبْ مِنْ سِمْعَانْ يِلِزَّهَا شِيَّةْ مِنْ خَشُمْ الْبَحَرْ. وَ قَعَدْ تِحِتْ فِي الْمَرْكَبَةْ وَ بَدَا يِعَلِّمْ النَّاسْ الْقَاعِدِينْ فِي خَشُمْ الْبَحَرْ.

٤ وَ وَكِتْ عِيسَى كَمَّلْ كَلَامَهْ، هُو حَجَّى لِسِمْعَانْ وَ قَالْ: «وَدِّي الْمَرْكَبَةْ فِي أُسْط الْبَحَرْ وَ أَوْرِي نَاسَكْ يَزْقُلُوا الشَّرَكْ فِي الْأَلْمِي لِيَكُرْبُوا حُوتْ.» ٥ وَ سِمْعَانْ رَدَّ لَيَّهْ وَ قَالْ: «يَا سَيِّدْنَا، تِعِبْنَا طُولْ اللَّيْل وَ مَا كَرَبْنَا شَيّءْ. لَاكِنْ نَزْقُلْ الشَّرَكْ كَنْ إِنْتَ تِدَوْرَهْ.»

٦ وَ وَكِتْ زَقَلَوْا شَرَكْهُمْ، كَرَبَوْا حُوتْ كَتِيرْ بِلْحَيْن لَحَدِّي الشَّرَكْ يِدَوْر يِنْقَطِعْ مِنْ التَّقَلَةْ. ٧ وَ سَوَّوْا إِشَارَةْ لِرُفْقَانْهُمْ الْفِي الْمَرْكَبَةْ الْآخَرَةْ أَشَانْ يِعَاوُنُوهُمْ. وَ جَوْا مَلَوْا الْمَرَاكِبْ الْإِتْنَيْن لَحَدِّي الْمَرَاكِبْ يِدَوْرُوا يَغْطُسُوا.

٨ وَ وَكِتْ سِمْعَانْ بُطْرُسْ شَافْ الشَّيّءْ الْبِقِي دَا، هُو سَجَدْ قِدَّامْ رِجِلَيْن عِيسَى وَ قَالْ: «يَا رَبّ، كِسّ مِنِّي بَعِيدْ! أَشَانْ أَنَا نَادُمْ مُذْنِبْ.» ٩ وَ حَجَّى مِثِلْ دَا أَشَانْ هُو وَ كُلَّ جَمَاعْتَهْ فِي الْمَرْكَبَةْ أَلْعَجَّبَوْا بِلْحَيْن مِنْ الْحُوتْ الْكَتِيرْ الْكَرَبَوْه. ١٠ وَ رُفْقَانَهْ لِسِمْعَانْ، يَعْقُوبْ وَ يُوحَنَّا أَوْلَادْ زَبَدِي، كُلَ أَلْعَجَّبَوْا مَعَايَهْ.

وَ عِيسَى قَالْ لِسِمْعَانْ: «مَا تَخَافْ. أَوَّلْ إِنْتَ قَاعِدْ تَكْرُبْ الْحُوتْ وَ لَاكِنْ مِنْ الْيَوْم تَكْرُبْ النَّاسْ لِتِجِيبْهُمْ لَيِّ.» ١١ وَ مِنْ قَبَّلَوْا مَرَاكِبْهُمْ فِي خَشُمْ الْبَحَرْ، هُمَّنْ خَلَّوْا كُلَّ شَيّءْ وَ قَمَّوْا تَابَعَوْا عِيسَى.

المسيح شفى نادم عِنْده جِدام

١٢ وَ يَوْم وَاحِدْ، عِيسَى قَاعِدْ فِي حِلَّةْ وَاحِدَةْ وَ رَاجِلْ وَاحِدْ عِنْدَهْ جِدَامْ جَاءْ لَيَّهْ. وَ الرَّاجِلْ دَا عِنْدَهْ جِدَامْ شَيْن. وَ وَكِتْ شَافْ عِيسَى، هُو سَجَدْ قِدَّامَهْ وَ قَالْ: «يَا سَيِّدْنَا، كَنْ تِدَوْر تَشْفِينِي أَكِيدْ إِنْتَ تَقْدَرْ وَ أَنَا نَبْقَى طَاهِرْ.» ١٣ وَ عِيسَى مَدَّ إِيدَهْ وَ لِمِسْ الرَّاجِلْ الْعِنْدَهْ جِدَامْ وَ قَالْ: «نِدَوْر نَشْفِيكْ. أَبْقَى طَاهِرْ.» وَ طَوَّالِي بِقِي طَاهِرْ مِنْ الْجِدَامْ. ١٤ وَ عِيسَى أَمَرَهْ وَ قَالْ لَيَّهْ: «مَا تِأَوْرِي نَادُمْ. أَمْشِي وَصِّفْ نَفْسَكْ لِرَاجِلْ الدِّينْ وَ قَدِّمْ ضَحِيَّةْ لِلّٰهْ مِثِلْ النَّبِي مُوسَى أَمَرَانَا بَيْهَا. وَ مِثِلْ دَا، النَّاسْ يَعَرْفُوا كَدَرْ إِنْتَ لِقِيتْ الْعَافَيْ وَ بِقِيتْ طَاهِرْ.»

١٥ لَاكِنْ بَيْدَا، خَبَرَهْ شَتَّتْ بِزِيَادَةْ فِي النَّاسْ. وَ نَاسْ كَتِيرِينْ مَرَّةْ وَاحِدْ لَامِّينْ فَوْقَهْ أَشَانْ يِدَوْرُوا يَسْمَعَوْا كَلَامَهْ وَ هُو يَشْفِي أَمْرَاضْهُمْ. ١٦ لَاكِنْ عِيسَى قَمَّ وِحَيْدَهْ مِثِلْ فِي عَادْتَهْ وَ مَشَى فِي الْخَلَاءْ أَشَانْ يِصَلِّي.

المسيح غفر للمُكرْسح

١٧ وَ يَوْم آخَرْ، عِيسَى قَاعِدْ يِعَلِّمْ النَّاسْ. وَ فِي الْبَكَانْ دَا، فِي نَاسْ كَتِيرِينْ قَاعِدِينْ مَعَايَهْ مِنْ طَرِيقَةْ الْفَرِيزِيَّةْ وَ مِنْ الْمُعَلِّمِينْ فِي التَّوْرَاةْ. وَ هُمَّنْ جَوْا مِنْ أَيِّ حِلَّةْ الْفِي دَارْ الْجَلِيلْ وَ الْيَهُودِيَّةْ وَ مِنْ مَدِينَةْ الْقُدُسْ. وَ قُدْرَةْ اللّٰهْ قَاعِدَةْ فَوْقَهْ أَشَانْ يَشْفِي الْمَرْضَانِينْ.

١٨ وَ رُجَالْ وَاحِدِينْ جَوْا وَ هُمَّنْ شَايْلِينْ نَادُمْ مُكَرْسَحْ فِي فُرَاشَهْ. وَ دَوَّرَوْا يَدْخُلُوا بَيَّهْ دَاخَلْ وَ يُخُطُّوهْ قِدَّامْ عِيسَى. ١٩ لَاكِنْ مَا عِرْفَوْا كِكَّيْف يِدَخُّلُوا النَّادُمْ دَا لِعِيسَى، بِسَبَبْ النَّاسْ الْكَتِيرِينْ السَّدَّوْا لَيْهُمْ الدَّرِبْ. وَ أَشَانْ دَا، رِكْبَوْا فِي رَاسْ الْبَيْت وَ قَدَّوْه بِفَوْق. وَ دَلَّوْا الْمُكَرْسَحْ بِفُرَاشَهْ فِي أُسْط النَّاسْ وَ خَطَّوْه قِدَّامْ عِيسَى. ٢٠ وَكِتْ عِيسَى شَافْ إِيمَانْهُمْ، حَجَّى لِلرَّاجِلْ الْمُكَرْسَحْ وَ قَالْ: «يَا أَخُويِ، ذُنُوبَكْ أَنْغَفَرَوْا.»

٢١ وَ الْعُلَمَاءْ وَ الْفَرِيزِيِّينْ بَدَوْا يِحَجُّوا فِي قُلُوبْهُمْ وَ يُقُولُوا: «هَايْ! دَا يَاتُو الْقَاعِدْ يِحَجِّي بِكَلَامْ كُفُرْ دَا؟ الْإِنْسَانْ مَا يَقْدَرْ يَغْفِرْ ذُنُوبْ الْإِنْسَانْ، إِلَّا اللّٰهْ!» ٢٢ وَ عِيسَى عِرِفْ الْكَلَامْ الْفِي قُلُوبْهُمْ. وَ رَدَّ لَيْهُمْ وَ قَالْ: «مَالَا تِفَكُّرُوا فِي قُلُوبْكُو؟ ٢٣ وَيْنُو الْهَيِّنْ نُقُولَهْ؟ نُقُولْ: ‹ذُنُوبَكْ أَنْغَفَرَوْا›، وَلَّا نُقُولْ: ‹قُمّ وَ رُوغْ›؟ ٢٤ وَ لَاكِنْ نِدَوْر إِنْتُو تَعَرْفُوا كَدَرْ أَنَا، إِبْن الْإِنْسَانْ، عِنْدِي سُلْطَةْ فِي الْأَرْض أَشَانْ نَغْفِرْ لِلنَّاسْ ذُنُوبْهُمْ.»

وَ قَالْ لِلْمُكَرْسَحْ: «نُقُولْ لَيْك، قُمّ! شِيلْ فُرَاشَكْ وَ أَمْشِي بَيْتَكْ!» ٢٥ وَ طَوَّالِي الْمُكَرْسَحْ قَمَّ قِدَّامْهُمْ وَ شَالْ فُرَاشَهْ الرَّاقِدْ فَوْقَهْ وَ مَشَى بَيْتَهْ. وَ فِي الدَّرِبْ، هُو قَاعِدْ يَشْكُرْ اللّٰهْ. ٢٦ وَ كُلُّهُمْ أَلْعَجَّبَوْا مَرَّةْ وَاحِدْ وَ قَمَّوْا يَشْكُرُوا اللّٰهْ. وَ الْخَوْف كَرَبَاهُمْ وَ قَالَوْا: «الْيَوْم شِفْنَا شَيّءْ عَجِيبْ!»

المسيح نادى لَاوِي

٢٧ وَ بَعَدْ دَا، عِيسَى مَرَقْ. وَ شَافْ نَادُمْ وَاحِدْ أُسْمَهْ لَاوِي الْيِلِمّ الضَّرَايِبْ. وَ قَاعِدْ يَخْدِمْ فِي مَكْتَبْ الضَّرَايِبْ. وَ عِيسَى قَالْ لَيَّهْ: «تَعَالْ تَابِعْنِي.» ٢٨ وَ خَلَاصْ لَاوِي خَلَّى كُلَّ شَيّءْ وَ قَمَّ تَابَعَهْ.

٢٩ وَ لَاوِي سَوَّى لَيَّهْ عَازُومَةْ كَبِيرَةْ فِي بَيْتَهْ. وَ فِي نَاسْ كَتِيرِينْ الْيِلِمُّوا الضَّرَايِبْ وَ نَاسْ آخَرِينْ جَوْا وَ قَاعِدِينْ يَاكُلُوا مَعَايَهْ. ٣٠ وَ الْفَرِيزِيِّينْ وَ عُلَمَاهُمْ هَرَجَوْا تَلَامِيذ عِيسَى وَ قَالَوْا: «مَالَا تَاكُلُوا وَ تَشَرْبَوْا مَعَ نَاسْ الضَّرَايِبْ وَ الْمُذْنِبِينْ؟» ٣١ وَ عِيسَى رَدَّ لَيْهُمْ وَ قَالْ: «النَّاسْ الطَّيْبِينْ مَا حَوْجَانِينْ دَكْتَوْر، إِلَّا الْمَرْضَانِينْ بَسْ. ٣٢ أَنَا مَا جِيتْ أَشَانْ نِنَادِي الصَّالِحِينْ، لَاكِنْ جِيتْ لِنِنَادِي الْمُذْنِبِينْ لِلتَّوْبَةْ.»

المسيح سألوه في الصيام

٣٣ وَ قَالَوْا لَيَّهْ: «تَلَامِيذ يَحْيَى وَ تَلَامِيذ الْفَرِيزِيِّينْ يُصُومُوا وَ يِصَلُّوا كَتِيرْ. لَاكِنْ تَلَامِيذَكْ إِنْتَ قَاعِدِينْ يَاكُلُوا وَ يَشَرْبَوْا.» ٣٤ وَ عِيسَى رَدَّ لَيْهُمْ وَ قَالْ: «كَنْ نَاسْ قَاعِدِينْ فِي عِرِسْ وَ الْعَرِيسْ مَعَاهُمْ، تِدَوْرُوا هُمَّنْ يُصُومُوا وَلَّا؟ ٣٥ وَ لَاكِنْ يَوْم وَاحِدْ يَجِي، الْعَرِيسْ يِشِيلُوهْ مِنْهُمْ وَ خَلَاصْ فِي الْوَكِتْ دَاكْ، يُصُومُوا.»

٣٦ وَ بَتَّانْ هُو حَجَّى لَيْهُمْ بِمَثَلْ وَ قَالْ: «مَا فِي نَادُمْ الْيَشْرُطْ قِطْعَةْ مِنْ خَلَقْ جَدِيدْ أَشَانْ يَرْقَعْ بَيْهَا خَلَقْ قَدِيمْ. أَشَانْ كَنْ يِسَوِّي مِثِلْ دَا، هُو يِتَلِّفْ الْخَلَقْ الْجَدِيدْ وَ الْقِطْعَةْ الشَّالَاهَا مِنْ الْجَدِيدْ مَا تِوَافِقْ مَعَ الْقَدِيمْ.

٣٧ «وَ مَا فِي نَادُمْ يُصُبّ خَمَرْ جَدِيدْ فِي قِرْبَةْ قَدِيمَةْ. كَنْ يِسَوِّي مِثِلْ دَا، الْخَمَرْ الْجَدِيدْ يُشُقّ الْقِرْبَةْ وَ الْخَمَرْ يِدَفِّقْ وَ الْقِرْبَةْ تَتْلَفْ. ٣٨ لَاكِنْ وَاجِبْ يُصُبُّوا خَمَرْ جَدِيدْ فِي قِرْبَةْ جَدِيدَةْ. ٣٩ وَ بَعَدْ نَادُمْ شِرِبْ الْخَمَرْ الْقَدِيمْ هُو مَا يِدَوْر يَشْرَبْ الْجَدِيدْ، أَشَانْ هُو يُقُولْ الْخَمَرْ الْقَدِيمْ بَسْ عَدِيلْ.»