مَتَّى 27

المسيح سلّموه لبِلَاطُس

١ وَ وَكِتْ الْوَطَاةْ أَصْبَحَتْ كُبَارَاتْ رُجَالْ الدِّينْ وَ الشُّيُوخْ لَمَّوْا بَتَّانْ وَ أَشَّاوَرَوْا فِي عِيسَى لِيَحْكُمُوا لَيَّهْ بِالْمَوْت. ٢ وَ رَبَطَوْه وَ سَاقَوْه وَ سَلَّمَوْه لِبِلَاطُسْ الْوَالِي الرَّوْمَانِي.

مَوْت يَهُوذَا

٣ وَ وَكِتْ يَهُوذَا الْخَانْ عِيسَى عِرِفْ حَكَمَوْا عِيسَى خَلَاصْ، نِدِمْ فِي الشَّيّءْ السَّوَّاهْ. وَ مَشَى قَبَّلْ التَّلَاتِينْ حَجَرْ فُضَّةْ لِكُبَارَاتْ رُجَالْ الدِّينْ وَ الشُّيُوخْ. ٤ وَ قَالْ: «أَنَا خَاطِي أَشَانْ أَنَا سَلَّمْت لَيْكُو نَادُمْ بَرِي وَ قَرِيبْ يَكْتُلُوهْ.» وَ رَدَّوْا لَيَّهْ وَ قَالَوْا: «أَنِحْنَ مَا لَمَّانَا، إِنْتَ بَسْ سَوَّيْتَهْ.» ٥ وَ يَهُوذَا رَمَى الْفُضَّةْ فِي بَيْت اللّٰهْ وَ مَرَقْ وَ مَشَى شَنَقْ نَفْسَهْ.

٦ وَ كُبَارَاتْ رُجَالْ الدِّينْ لَقَّطَوْا الْفُضَّةْ وَ قَالَوْا: «الْقُرُسْ دَا نِجِسْ أَشَانْ دَا أُجْرَةْ هَنَا كَتِلْ نَادُمْ. مَا حَلَالْ لَيْنَا نِدِسُّوهْ فِي صَنْدُوقْ بَيْت اللّٰهْ.» ٧ وَ بَعَدْ أَشَّاوَرَوْا، شَالَوْا الْفُضَّةْ وَ شَرَوْا بَيْهَا زَرَعْ مِنْ حَدَّادِي وَاحِدْ أَشَانْ يَبْقَى بَكَانْ يَدْفُنُوا فَوْقَهْ الْأَجَانِبْ. ٨ أَشَانْ دَا، أُسُمْ الزَّرَعْ يِنَادُوهْ زَرَعْ الدَّمّ لَحَدِّي الْيَوْم. ٩ وَ بِمِثِلْ دَا، الْكَلَامْ الْاللّٰهْ قَالَهْ بِخَشُمْ النَّبِي إِرْمِيَا تَمَّ. هُو قَالْ:

﴿شَالَوْا تَلَاتِينْ حَجَرْ فُضَّةْ.

دَا بَسْ تَمَنَهْ الْبَنِي إِسْرَائِيلْ أَسْتَفَقَوْا فَوْقَهْ.

١٠ وَ بِالْقُرُسْ دَا، شَرَوْا الزَّرَعْ هَنَا الْحَدَّادِي

مِثِلْ اللّٰهْ أَمَرَانِي بَيَّهْ.﴾

المسيح قِدّام بِلَاطُس

١١ وَ عِيسَى وَقَفْ قِدَّامْ الْوَالِي بِلَاطُسْ وَ الْوَالِي سَأَلَهْ وَ قَالْ: «إِنْتَ مَلِكْ الْيَهُودْ وَلَّا؟» وَ عِيسَى رَدَّ لَيَّهْ وَ قَالْ: «مِثِلْ إِنْتَ قُلْتَهْ.» ١٢ وَ كُبَارَاتْ رُجَالْ الدِّينْ وَ الشُّيُوخْ خَطَّوْا تُهَمْ فِي عِيسَى لَاكِنْ عِيسَى قَعَدْ سَاكِتْ وَ مَا رَدَّ لَيْهُمْ. ١٣ وَ بِلَاطُسْ سَأَلَهْ وَ قَالْ: «إِنْتَ مَا سِمِعْت الْكَلَامْ الْيُقُولُوهْ فَوْقَكْ وَلَّا؟» ١٤ لَاكِنْ عِيسَى مَا رَدَّ لِلْوَالِي كِلْمَةْ وَاحِدَةْ كُلَ وَ الْوَالِي أَلْعَجَّبْ بِلْحَيْن.

١٥ وَ فِي أَيِّ عِيدْ الْفِصْحَ، الْوَالِي فِي عَادْتَهْ يَمْرُقْ مِنْ السِّجِنْ مَسْجُونْ وَاحِدْ النَّاسْ يِدَوْرُوهْ. ١٦ وَ فِي الْوَكِتْ دَا، مَسْجُونْ وَاحِدْ مَعْرُوفْ قَاعِدْ فِي السِّجِنْ وَ أُسْمَهْ بَرَابَاسْ. ١٧ وَ وَكِتْ النَّاسْ لَمَّوْا، بِلَاطُسْ سَأَلَاهُمْ وَ قَالْ: «تِدَوْرُوا نَطْلِقْ لَيْكُو يَاتُو؟ نَطْلِقْ بَرَابَاسْ وَلَّا عِيسَى الْيُقُولُوا لَيَّهْ الْمَسِيحْ؟» ١٨ وَ بِلَاطُسْ قَالْ الْكَلَامْ دَا أَشَانْ هُو عِرِفْ الْكُبَارَاتْ سَلَّمَوْا لَيَّهْ عِيسَى بِسَبَبْ حُسُدْهُمْ.

١٩ وَ وَكِتْ هُو قَاعِدْ فِي كُرْسِي الْحُكُمْ، مَرْتَهْ رَسَّلَتْ لَيَّهْ كَلَامْ وَ قَالَتْ: «أَنْقَرِعْ، مَا تِسَوِّي شَيّءْ فَسِلْ لِلنَّادُمْ الْبَرِي دَا. أَشَانْ الْيَوْم أَنَا حِلِمْت بَيَّهْ وَ تِعِبْت بِلْحَيْن فِي شَانَهْ.»

٢٠ وَ لَاكِنْ كُبَارَاتْ رُجَالْ الدِّينْ وَ الشُّيُوخْ حَرَّشَوْا النَّاسْ اللَّمَّوْا أَشَانْ يَسْأَلَوْا بِلَاطُسْ يَمْرُقْ بَرَابَاسْ وَ يَكْتُلْ عِيسَى. ٢١ وَ بِلَاطُسْ سَأَلَاهُمْ وَ قَالْ: «تِدَوْرُوا يَاتُو مِنْ الْإِتْنَيْن دَوْل نَمُرْقَهْ لَيْكُو؟» وَ رَدَّوْا لَيَّهْ وَ قَالَوْا: «أَطْلِقْ لَيْنَا بَرَابَاسْ!»

٢٢ وَ بَتَّانْ سَأَلَاهُمْ وَ قَالْ: «وَ عِيسَى الْيُقُولُوا لَيَّهْ الْمَسِيحْ نِسَوِّي لَيَّهْ شُنُو؟» وَ كُلُّهُمْ رَدَّوْا لَيَّهْ وَ قَالَوْا: «أَكْتُلَهْ فِي الصَّلِيبْ!» ٢٣ وَ الْوَالِي سَأَلَاهُمْ وَ قَالْ: «مَالَا؟ شُنُو الْفَسِلْ السَّوَّاهْ؟» وَ عَاطَوْا بِزِيَادَةْ وَ قَالَوْا: «أَكْتُلُوهْ فِي الصَّلِيبْ!»

٢٤ وَ وَكِتْ بِلَاطُسْ شَافْ كَلَامَهْ مَا عِنْدَهْ فَايْدَةْ وَ النَّاسْ يِدَوْرُوا يِسَوُّوا فِتْنَةْ، هُو شَالْ أَلْمِي وَ غَسَّلْ إِيدَيْنَهْ قِدَّامْهُمْ وَ قَالْ: «أَنَا بَرِي مِنْ دِمَّةْ النَّادُمْ الصَّالِحْ دَا. دَا فِي رَاسْكُو إِنْتُو.» ٢٥ وَ النَّاسْ كُلُّهُمْ رَدَّوْا لَيَّهْ وَ قَالَوْا: «خَلِّي دِمِّتَهْ تَقَعْ فِي رَاسْنَا وَ فِي رَاسْ عِيَالْنَا!»

٢٦ وَ بِلَاطُسْ مَرَقْ لَيْهُمْ بَرَابَاسْ وَ عِيسَى جَلَدَوْه. وَ خَلَاصْ سَلَّمَهْ لِلْعَسْكَرْ أَشَانْ يَكْتُلُوهْ فِي الصَّلِيبْ.

العسْكر أشّمّتوا للمسيح

٢٧ وَ عَسْكَرْ الْوَالِي سَاقَوْا عِيسَى وَ وَدَّوْه فِي قَصِرْ الْوَالِي وَ لَمَّوْا فَوْقَهْ كُلَّ الْعَسْكَرْ. ٢٨ وَ سَلَّوْا خُلْقَانَهْ وَ لَبَّسَوْه خَلَقْ أَحْمَرْ تُشْو مِثِلْ خَلَقْ الْمَلِكْ. ٢٩ وَ سَوَّوْا لَيَّهْ تَاجْ هَنَا شَوْك مَضْفُورْ وَ خَطَّوْه فِي رَاسَهْ. وَ مَسَّكَوْه عَصَاةْ فِي إِيدَهْ الزَّيْنَةْ وَ رَكَعَوْا قِدَّامَهْ وَ أَشَّمَّتَوْا لَيَّهْ وَ قَالَوْا: «السَّلَامْ عَلَيْك، يَا مَلِكْ الْيَهُودْ!»

٣٠ وَ قَاعِدِينْ يِبَزُّقُوا فَوْقَهْ وَ يُدُقُّوهْ فِي رَاسَهْ بِالْعَصَاةْ الشَّالَوْه مِنَّهْ. ٣١ وَ وَكِتْ كَمَّلَوْا شَمَاتِتْهُمْ، شَالَوْا مِنَّهْ الْخَلَقْ وَ لَبَّسَوْه خُلْقَانَهْ وَ قَمَّوْا يُسُوقُوهْ عَلَيْ الْبَكَانْ الْيَصْلُبُوهْ فَوْقَهْ.

المسيح صلبوه

٣٢ وَ وَكِتْ الْعَسْكَرْ مَاشِينْ، لِقَوْا رَاجِلْ وَاحِدْ مِنْ حِلَّةْ الْقَيْرَوَانْ، أُسْمَهْ سِمْعَانْ. وَ عَصَّرَوْه لِيِشِيلْ الصَّلِيبْ الْيِدَوْرُوا يَكْتُلُوا فَوْقَهْ عِيسَى. ٣٣ وَ لِحْقَوْا الْبَكَانْ الْأُسْمَهْ جُلْجُثَةْ، مَعَنَاتَهْ بَكَانْ الْجُمْجُمَةْ. ٣٤ وَ قَدَّمَوْا لِعِيسَى شَرَابْ هَنَا خَمَرْ مُخَلْبَطْ بِمَرَارَةْ أَشَانْ يِبَرِّدْ لَيَّهْ الْوَجَعْ وَ لَاكِنْ وَكِتْ هُو دَاقَهْ، أَبَاهْ مَا شِرِبَهْ.

٣٥ وَ بَعَدْ الْعَسْكَرْ طَقَّوْه فِي الصَّلِيبْ وَ رَفَعَوْه فَوْق، هُمَّنْ قَسَّمَوْا خُلْقَانَهْ بِأَمْ عِيَيْدَاتْ. ٣٦ وَ قَعَدَوْا تِحِتْ أَشَانْ يَحَرْسُوهْ.

٣٧ وَ خَطَّوْا مَكْتُوبْ التُّهْمَةْ مِنْ فَوْق لِرَاسَهْ وَ كَتَبَوْا فَوْقَهْ: «دَا عِيسَى، مَلِكْ الْيَهُودْ.» ٣٨ وَ فِي نَفْس الْوَكِتْ، صَلَبَوْا مُجْرِمِينْ إِتْنَيْن. الْوَاحِدْ طَقَّوْه فِي صَلِيبْ جَنْب عِيسَى بِنُصَّهْ الزَّيْنَايْ وَ التَّانِي فِي صَلِيبْ آخَرْ بِنُصَّهْ الْإِسْرَايْ.

المسيح في الصليب

٣٩ وَ النَّاسْ الْمَاشِينْ فِي الدَّرِبْ دَا قَاعِدِينْ يِعَيُّرُوهْ وَ يِهِزُّوا رُوسَيْهُمْ ٤٠ وَ يُقُولُوا: «هَايْ! إِنْتَ الْقُلْت تِكَسِّرْ بَيْت اللّٰهْ وَ تَبْنِيهْ بَتَّانْ فِي تَلَاتَةْ يَوْم، نَجِّي نَفْسَكْ! وَ كَنْ إِنْتَ إِبْن اللّٰهْ، دَلِّي تِحِتْ مِنْ الصَّلِيبْ!»

٤١ وَ كُبَارَاتْ رُجَالْ الدِّينْ وَ الْعُلَمَاءْ وَ الشُّيُوخْ أَشَّمَّتَوْا لَيَّهْ وَ قَالَوْا: ٤٢ «هُو نَجَّى نَاسْ آخَرِينْ وَ لَاكِنْ مَا يَقْدَرْ يِنَجِّي نَفْسَهْ! هُو مَا مَلِكْ إِسْرَائِيلْ وَلَّا؟ خَلِّي يِدَلِّي هَسَّعْ مِنْ الصَّلِيبْ وَ خَلَاصْ نِآمُنُوا بَيَّهْ! ٤٣ هُو أَتْوَكَّلْ عَلَيْ اللّٰهْ. خَلِّي اللّٰهْ يَفْزَعَهْ، كَنْ صَحِيحْ اللّٰهْ يِدَوْرَهْ! أَشَانْ هُو قَالْ: ‹أَنَا إِبْن اللّٰهْ.›» ٤٤ وَ الْمُجْرِمِينْ الصَّلَبَوْهُمْ مَعَايَهْ كُلَ أَشَّمَّتَوْا لَيَّهْ بِكَلَامْ مِثِلْ دَا.

مَوْت المسيح

٤٥ وَ مِنْ نُصّ النَّهَارْ لَحَدِّي الْعَصُرْ، الْوَطَاةْ بِقَتْ ضَلْمَةْ فِي كُلَّ الْبَلَدْ. ٤٦ وَ قَرِيبْ السَّاعَةْ تَلَاتَةْ، عِيسَى عَاطْ بِحِسّ عَالِي بِكَلَامْ عِبْرَانِي وَ قَالْ: «إِيلِي إِيلِي لَمَا شَبَقْتَنِي» وَ مَعَنَاتَهْ ﴿إِلٰـهِي، إِلٰـهِي مَالَا خَلَّيْتنِي؟﴾ ٤٧ وَ وَاحِدِينْ مِنْ النَّاسْ الْوَاقْفِينْ هِنَاكْ سِمْعَوْا كَلَامَهْ وَ قَالَوْا: «هُو قَاعِدْ يِنَادِي النَّبِي إِلِيَاسْ!» ٤٨ وَ طَوَّالِي وَاحِدْ مِنْهُمْ جَرَى وَ شَالْ قِطْعَةْ وَ بَلَّاهَا فِي شَرَابْ حَامُضْ وَ شَعَقْهَا فِي رَاسْ عَقَيْقَايْ وَ قَدَّمَهْ لِعِيسَى أَشَانْ يَشْرَبْ مِنَّهْ. ٤٩ وَ لَاكِنْ الْآخَرِينْ قَالَوْا: «أَقِيفْ، خَلِّيهْ! نَرْجَوْا نِشِيفُوا كَنْ إِلِيَاسْ يَجِي أَشَانْ يِنَجِّيهْ.»

٥٠ وَ عِيسَى صَرَخْ بَتَّانْ بِحِسّ شَدِيدْ وَ أَنْطَى الرُّوحْ. ٥١ وَ طَوَّالِي السِّتَارْ الْفِي بَيْت اللّٰهْ أَنْشَقَّ مِنْ فَوْق لَحَدِّي تِحِتْ وَ الْأَرْض أَنْهَزَّتْ وَ الْحُجَارْ أَشَّقَّقَوْا. ٥٢ وَ الْقُبُورْ أَنْفَتَحَوْا وَ مِنْ الصَّالِحِينْ الْمَيْتِينْ، كَتِيرِينْ بَعَثَوْا. ٥٣ وَ بَعَدْ عِيسَى بَعَثْ، هُمَّنْ مَرَقَوْا مِنْ قُبُورْهُمْ وَ مَشَوْا فِي مَدِينَةْ الْقُدُسْ وَ نَاسْ كَتِيرِينْ شَافَوْهُمْ.

٥٤ وَ الْعَسْكَرْ الْقَاعِدِينْ يَحَرْسُوا عِيسَى مَعَ كَبِيرْهُمْ شَافَوْا الْأَرْض أَنْهَزَّتْ وَ كُلَّ شَيّءْ الْبِقِي وَ خَافَوْا بِلْحَيْن وَ قَالَوْا: «بِالصَّحِيحْ، النَّادُمْ دَا إِبْن اللّٰهْ!»

٥٥ وَ فِيَّهْ عَوِينْ كَتِيرَاتْ قَاعِدَاتْ يِشِيفَنْ مِنْ بَعِيدْ. هِنَّ دَيْل أَوَّلْ تَابَعَنْ عِيسَى مِنْ دَارْ الْجَلِيلْ أَشَانْ يَخْدِمَنْ لَيَّهْ. ٥٦ مَرْيَمْ الْمَقْدَلِيَّةْ وَ مَرْيَمْ أَمّ يَعْقُوبْ وَ يُوسُفْ وَ أَمّ أَوْلَادْ زَبَدِي كُلَ مَعَاهِنْ.

جنازة المسيح في الكرْكور

٥٧ وَكِتْ بِقِي عَشِيَّةْ، رَاجِلْ وَاحِدْ جَاءْ وَ هُو سِيدْ الْمَالْ مِنْ حِلَّةْ الرَّامَةْ وَ أُسْمَهْ يُوسُفْ. وَ هُو كُلَ تِلْمِيذْ عِيسَى. ٥٨ وَ مَشَى لِبِلَاطُسْ وَ سَأَلَهْ جَنَازَةْ عِيسَى وَ بِلَاطُسْ أَوْرَى عَسْكَرَهْ يَنْطُوهَا لَيَّهْ. ٥٩ وَ يُوسُفْ شَالْ الْجَنَازَةْ وَ كَفَّنَاهَا بِكَفَنْ غَالِي. ٦٠ وَ يُوسُفْ عِنْدَهْ قَبُرْ جَدِيدْ الدَّهَابَهْ نَكَتَوْه مِثِلْ كَرْكُورْ فِي الْحَجَرْ. وَ فَوْقَهْ خَطَّ جَنَازَةْ عِيسَى. وَ دَرْدَقْ حَجَرْ كَبِيرْ وَ سَدَّ بَيَّهْ خَشُمْ الْقَبُرْ. وَ خَلَاصْ فَاتْ. ٦١ وَ مَرْيَمْ الْمَقْدَلِيَّةْ وَ مَرْيَمْ الْآخَرَةْ قَاعِدَاتْ فِي الْبَكَانْ دَا مُقَابِلَاتْ الْقَبُرْ.

القبُر حرسوه

٦٢ الْيَوْم الْيِجَهُّزُوا فَوْقَهْ لِيَوْم السَّبْت كَمَّلْ وَ خَلَاصْ جَاءْ يَوْم السَّبْت. وَ كُبَارَاتْ رُجَالْ الدِّينْ وَ الْفَرِيزِيِّينْ لَمَّوْا وَ مَشَوْا سَوَا لِبِلَاطُسْ ٦٣ وَ قَالَوْا: «يَا سَيِّدْنَا، فَكَّرْنَا فِي الْكَلَامْ الْقَالَهْ الْغَشَّاشْ دَا قُبَّالْ مَا يُمُوتْ. هُو قَالْ: ‹فِي تَلَاتَةْ يَوْم نَبْعَثْ.› ٦٤ وَ خَلَاصْ، رَسِّلْ عَسْكَرَكْ يَحَرْسُوا الْقَبُرْ عَدِيلْ لَحَدِّي الْيَوْم التَّالِتْ أَشَانْ تَلَامِيذَهْ مَا يَسُرْقُوا جَنَازْتَهْ وَ مَا يُقُولُوا لِلنَّاسْ هُو بَعَثْ مِنْ أُسْط الْمَيْتِينْ. كَنْ سَوَّوْا مِثِلْ دَا، الْكِدِبْ التَّانِي يَبْقَى قَاسِي مِنْ الْكِدِبْ الْأَوَّلْ.»

٦٥ وَ بِلَاطُسْ رَدَّ لَيْهُمْ وَ قَالْ: «دَاهُو عَسْكَرْ. شِيلُوهُمْ وَ خَلِّي يَحَرْسُوا الْقَبُرْ عَدِيلْ.» ٦٦ وَ مَشَوْا وَ سَدَّوْا الْقَبُرْ عَدِيلْ وَ خَطَّوْا فَوْقَهْ خِتِمْ الْوَالِي وَ خَطَّوْا حَرَاسَةْ قِدَّامَهْ.