مَتَّى 23

كلام المسيح في العُلماء

١ وَ عِيسَى قَاعِدْ يِحَجِّي لِلنَّاسْ وَ لِتَلَامِيذَهْ ٢ وَ قَالْ: «الْعُلَمَاءْ وَ الْفَرِيزِيِّينْ قَاعِدِينْ يِفَسُّرُوا لَيْكُو تَوْرَاةْ مُوسَى. ٣ أَشَانْ دَا، أَسْمَعَوْا كُلَّ كَلَامْ الْكِتَابْ الْيِأَوْرُوكُو بَيَّهْ وَ تَابُعُوهْ. لَاكِنْ مَا تِسَوُّوا مِثِلْ هُمَّنْ يِسَوُّوا أَشَانْ يُقُولُوا شَيّءْ وَاحِدْ وَ يِسَوُّوا شَيّءْ آخَرْ. ٤ وَ يِعَلُّمُوا الدِّينْ لِلنَّاسْ وَ يِسَوُّوا لَيْهُمْ الدِّينْ تَقِيلْ يُفُوتْ رَاسْهُمْ وَ مَا عِنْدُهُمْ نِيَّةْ يِعَاوُنُوهُمْ، حَتَّى بِشَيّءْ صَغَيَّرْ كُلَ.

٥ «وَ كُلَّ شَيّءْ الْيِسَوُّوهْ، هُمَّنْ يِسَوُّوهْ أَشَانْ يِدَوْرُوا النَّاسْ يِشِيفُوهُمْ. يَلْبَسَوْا لُبَاسْ خَاصّ لِلدِّينْ زِيَادَةْ مِنْ النَّاسْ الْآخَرِينْ. ٦ وَ فِي الْعَازُومَةْ يِرِيدُوا يَقْعُدُوا مَعَ الْكُبَارَاتْ وَ فِي بُيُوتْ الصَّلَاةْ يِرِيدُوا الصَّفّ الْأَوَّلْ. ٧ وَ هُمَّنْ فَرْحَانِينْ وَكِتْ النَّاسْ يِسَلُّمُوهُمْ فِي الشَّوَارِعْ وَ فِي السُّوقْ وَ يِنَادُوهُمْ: ‹يَا سَيِّدْنَا الْمُعَلِّمْ!›

٨ «وَ لَاكِنْ إِنْتُو مَا تِخَلُّوا نَادُمْ يِنَادِيكُو ‹يَا سَيِّدْنَا الْمُعَلِّمْ›، أَشَانْ عِنْدُكُو مُعَلِّمْ وَاحِدْ بَسْ وَ إِنْتُو كُلُّكُو أَخْوَانْ. ٩ وَ مَا تِنَادُوا نَادُمْ وَاحِدْ فِي الْأَرْض أَبُوكُو أَشَانْ عِنْدُكُو أَبُو وَاحِدْ وَ هُو أَبُوكُو اللّٰهْ فِي السَّمَاءْ. ١٠ وَ مَا تِخَلُّوا نَادُمْ يِنَادِيكُو ‹سَيِّدْنَا›، أَشَانْ عِنْدُكُو سَيِّدْ وَاحِدْ وَ هُو الْمَسِيحْ. ١١ وَ خَلِّي الْكَبِيرْ مِنْكُو يَخْدِمْ لَيْكُو مِثِلْ خَدَّامْكُو. ١٢ أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.

عِيسَى هرج العُلماء

١٣ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ تِسِدُّوا بَابْ مَمْلَكَةْ اللّٰهْ مِنْ النَّاسْ. وَ إِنْتُو ذَاتْكُو مَا تِنْدَسَّوْا وَ النَّاسْ الْيِدَوْرُوا يِنْدَسَّوْا إِنْتُو تَدْحَرَوْهُمْ مِنَّهْ.

١٤ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ إِنْتُو قَاعِدِينْ تَاكُلُوا بُيُوتْ الْأَرَامِلْ وَ تُقُمُّوا تِصَلُّوا صَلَاةْ طَوِيلَةْ أَشَانْ النَّاسْ يِشِيفُوكُو. أَشَانْ دَا، الْعَذَابْ الْيَنْزِلْ فَوْقكُو يَبْقَى شَدِيدْ زِيَادَةْ.

١٥ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ إِنْتُو تِسَافُرُوا بَعِيدْ بِدَرِبْ طَوِيلْ وَ تَقْطَعَوْا الْبَحَرْ أَشَانْ نَادُمْ وَاحِدْ يَدْخُلْ فِي دِينْكُو وَ وَكِتْ هُو دَخَلْ فِي دِينْكُو خَلَاصْ، تِسَوُّوهْ نَادُمْ فَسِلْ زِيَادَةْ مِنْكُو.

١٦ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ تُقُودُوا النَّاسْ فِي الدَّرِبْ وَ إِنْتُو ذَاتْكُو عَمْيَانِينْ. تُقُولُوا كَنْ نَادُمْ حَلَفْ بِبَيْت اللّٰهْ، حَلِيفْتَهْ بَاطْلَةْ وَ لَاكِنْ كَنْ نَادُمْ حَلَفْ بِدَهَبْ هَنَا بَيْت اللّٰهْ، حَلِيفْتَهْ صَحِيحَةْ. ١٧ يَا الْجُهَّالْ الْعَمْيَانِينْ! مِنْ الْإِتْنَيْن دَوْل، وَيْنُو الْكَبِيرْ؟ الدَّهَبْ وَلَّا بَيْت اللّٰهْ؟ وَ الدَّهَبْ مَا مُقَدَّسْ إِلَّا كَنْ قَاعِدْ فِي بَيْت اللّٰهْ. ١٨ وَ تُقُولُوا كَنْ نَادُمْ حَلَفْ بِمَدْبَحْ هَنَا بَيْت اللّٰهْ، حَلِيفْتَهْ بَاطْلَةْ وَ لَاكِنْ كَنْ نَادُمْ حَلَفْ بِالضَّحِيَّةْ الْقَاعِدَةْ فَوْق الْمَدْبَحْ، حَلِيفْتَهْ صَحِيحَةْ. ١٩ يَا الْعَمْيَانِينْ، مِنْ الْإِتْنَيْن دَوْل، وَيْنُو الْكَبِيرْ؟ الضَّحِيَّةْ وَلَّا الْمَدْبَحْ الْيِخَصِّصْ الضَّحِيَّةْ؟ ٢٠ خَلَاصْ، كَنْ نَادُمْ حَلَفْ بِمَدْبَحْ هَنَا بَيْت اللّٰهْ، هُو حَلَفْ بِكُلَّ شَيّءْ الْقَاعِدْ فَوْقَهْ. ٢١ وَ كَنْ نَادُمْ حَلَفْ بِبَيْت اللّٰهْ، هُو حَلَفْ بِسِيدَهْ. ٢٢ وَ كَنْ نَادُمْ حَلَفْ بِالسَّمَاءْ، هُو حَلَفْ بِكُرْسِي اللّٰهْ وَ بِالْقَاعِدْ فَوْقَهْ.

٢٣ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ إِنْتُو مُنْكَرِبِينْ فِي الْعُشُرْ لَحَدِّي تَنْطُوا لِلّٰهْ مِنْ النَّعْنَاعْ وَ الشَّمَارْ وَ الْكَمُّونْ. وَ لَاكِنْ إِنْتُو نِسِيتُوا مَا طَبَّقْتُوا الشُّرُوطْ الْكُبَارْ فِي التَّوْرَاةْ مِثِلْ الْعَدَالَةْ وَ الرَّحْمَةْ وَ الْأَمَانْ. أَوَّلْ شَيّءْ وَاجِبْ تِسَوُّوا الْأَشْيَاءْ الْكُبَارْ دَوْل وَ بَتَّانْ مَا تَنْسَوْا كَلَامْ الْعُشُورْ. ٢٤ يَا إِنْتُو التُّقُودُوا النَّاسْ وَ إِنْتُو ذَاتْكُو عَمْيَانِينْ. إِنْتُو تِصَفُّوا الْأَلْمِي مِنْ الْبَاعُوضَةْ وَ لَاكِنْ تَزُرْطُوا الْجَمَلْ.

٢٥ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ وَكِتْ تِلْوَضَّوْا، دَا يَبْقَى مِثِلْ تِغَسُّلُوا الْكَاسْ وَ الْكَوْرَوْ مِنْ بَرَّا لَاكِنْ فِي دَاخَلْ هُمَّنْ مَلَانِينْ تَكْ مِنْ خُمَامْ السِّرْقَةْ وَ مِنْ الطَّمَعْ. ٢٦ يَا الْفَرِيزِي الْعَمْيَانْ! أَوَّلْ غَسِّلْ الْكَاسْ مِنْ دَاخَلْ أَشَانْ يَبْقَى طَاهِرْ مِنْ بَرَّا كُلَ.

٢٧ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ أَيِّ نَادُمْ مِنْكُو هُو مِثِلْ قَبُرْ مَطْلُوسْ أَبْيَضْ وَ مِنْ بَرَّا جَمِيلْ. وَ لَاكِنْ دَاخَلْ مَلَانْ بِعُضَامْ الْمَيْتِينْ وَ بِالْعَفَانَةْ. ٢٨ بِمِثِلْ دَا، كُلَّ النَّاسْ يِشِيفُوكُو وَ يَحْسُبُوكُو صَالِحِينْ وَ لَاكِنْ فِي قُلُوبْكُو إِنْتُو مَلَانِينْ بِالنِّفَاقْ وَ بِالْفَسَالَةْ.

٢٩ «يَا الْعُلَمَاءْ وَ الْفَرِيزِيِّينْ، إِنْتُو مُنَافِقِينْ! الْعَذَابْ يَرْجَاكُو أَشَانْ إِنْتُو قَاعِدِينْ تَبْنُوا قُبُورْ الْأَنْبِيَاء الْمَاتَوْا زَمَانْ وَ تِجَمُّلُوا قُبُورْ الصَّالِحِينْ. ٣٠ وَ تُقُولُوا: ‹كَنْ أَوَّلْ أَنِحْنَ عِشْنَا فِي زَمَنْ جُدُودْنَا، مَا نِشَارُكُوا مَعَاهُمْ وَ نِشِيلُوا دِمَّةْ الْأَنْبِيَاء.› ٣١ وَ مِثِلْ دَا، تَشْهَدَوْا فَوْق نُفُوسْكُو وَ تُقُولُوا إِنْتُو أَوْلَادْ كَتَّالِينْ الْأَنْبِيَاء! ٣٢ خَلَاصْ، كَمُّلُوا الْخِدْمَةْ الْجُدُودْكُو بَدَوْهَا وَ تَمُّمُوهَا مَرَّةْ وَاحِدْ! ٣٣ يَا الدَّبِيبْ! يَا عِيَالْ أَمْ شِدَيْقَاتْ! كِكَّيْف تَنْجَوْا مِنْ عَذَابْ جَهَنَّمْ؟

٣٤ «وَ خَلَاصْ نِرَسِّلْ لَيْكُو أَنْبِيَاء وَ عُلَمَاءْ حَكِيمِينْ وَ مُعَلِّمِينْ. وَ وَاحِدِينْ مِنْهُمْ تَكْتُلُوهُمْ فِي صَلِيبْ وَ آخَرِينْ تَفُرْشُوهُمْ فِي بُيُوتْ الصَّلَاةْ وَ تَطُرْدُوهُمْ مِنْ حِلَّةْ وَاحِدَةْ لِحِلَّةْ آخَرَةْ. ٣٥ وَ كُلَّ النَّاسْ الصَّالِحِينْ الْكَتَلَوْهُمْ فِي الْأَرْض، دِمِّتْهُمْ تَجِي فِي رَاسْكُو، مِنْ دِمَّةْ هَابِيلْ الصَّالِحْ وِلَيْد آدَمْ لَحَدِّي دِمَّةْ زَكَرِيَّا وِلَيْد بَرَخِيَّا الْكَتَلْتُوهْ بَيْن بَيْت اللّٰهْ وَ الْمَدْبَحْ. ٣٦ نُقُولْ لَيْكُو الْحَقّ، غَضَبْ اللّٰهْ هَنَا كُلَّ الْكَتِلْ دَا يَنْزِلْ فِي النَّاسْ هَنَا وَكِتْنَا دَوْل.

٣٧ «يَا مَدِينَةْ الْقُدُسْ! يَا مَدِينَةْ الْقُدُسْ! يَا كَتَّالِينْ الْأَنْبِيَاء! إِنْتُو التَّرْجُمُوا النَّاسْ الْاللّٰهْ يِرَسِّلْهُمْ لَيْكُو. كَمْ مَرَّةْ دَوَّرْت نِلِمّ عِيَالْكُو مِثِلْ جِدَادَةْ تِلِمّ عِيَالْهَا تِحِتْ جَنَاحَيْهَا. لَاكِنْ إِنْتُو أَبَيْتُوا. ٣٨ شِيفُوا، بَيْتكُو يِخَلُّوهْ فَاضِي مَرَّةْ وَاحِدْ. ٣٩ وَ خَلَاصْ نُقُولْ لَيْكُو مَا تِشِيفُونِي بَتَّانْ لَحَدِّي تُقُولُوا: ﴿مَبْرُوكْ لِلنَّادُمْ الْجَايِ بِأُسُمْ اللّٰهْ.﴾»