مَتَّى 20

مَثَل سيد الجِنَيْنة

١ «وَ مَمْلَكَةْ اللّٰهْ هِي مِثِلْ كَيْ. نَادُمْ وَاحِدْ سِيدْ مَالْ وَ عِنْدَهْ جِنَيْنَةْ عِنَبْ. وَ مَرَقْ فَجُرْ بَدْرِي وَ أَجَّرْ خَدَّامِينْ أَشَانْ يَخْدُمُوا فِي جِنَيْنِتَهْ. ٢ وَ قَالْ لَيْهُمْ يِكَفِّيهُمْ دِينَارْ وَاحِدْ فِي الْيَوْم وَ وَافَقَوْا. وَ رَسَّلَاهُمْ فِي جِنَيْنِتَهْ. ٣ وَ بَعَدَيْن مَرَقْ قَرِيبْ لِلسَّاعَةْ تِسْعَةْ وَ مَشَى فِي الْمَوْقَفْ وَ لِقِي خَدَّامِينْ مَا عِنْدُهُمْ خِدْمَةْ. ٤ وَ قَالْ لَيْهُمْ: ‹أَمْشُوا أَخْدُمُوا فِي جِنَيْنِتِي وَ نِكَفِّيكُو الْقُرُسْ الْوَاجِبْ لَيْكُو.› وَ مَشَوْا.

٥ «وَ مَرَقْ بَتَّانْ قَرِيبْ لِلسَّاعَةْ أَتْنَا عَشَرْ وَ بَعَدَيْن مَرَقْ قَرِيبْ لِلسَّاعَةْ تَلَاتَةْ بَعَدْ الضُّهُرْ وَ رَسَّلْ خَدَّامِينْ زِيَادَةْ فِي جِنَيْنِتَهْ. ٦ وَ قَرِيبْ لِلسَّاعَةْ خَمْسَةْ فِي الْعَصُرْ مَرَقْ بَتَّانْ وَ لِقِي خَدَّامِينْ آخَرِينْ مَا عِنْدُهُمْ خِدْمَةْ وَ سَأَلَاهُمْ وَ قَالْ: ‹مَالَا إِنْتُو قَاعِدِينْ هِنِي مِنْ الْفَجُرْ وَ مَا تَخْدُمُوا؟› ٧ وَ رَدَّوْا لَيَّهْ وَ قَالَوْا: ‹مَا فِي نَادُمْ خَدَّمَانَا.› وَ قَالْ لَيْهُمْ: ‹إِنْتُو كُلَ أَمْشُوا أَخْدُمُوا فِي جِنَيْنِتِي.›

٨ «وَ وَكِتْ بِقِي مَغْرِبْ سِيدْ الْجِنَيْنَةْ حَجَّى لِوَكِيلَهْ وَ قَالْ: ‹نَادِي الْخَدَّامِينْ وَ أَنْطِيهُمْ قُرُسْهُمْ. أَبْدَا مِنْ النَّاسْ الْجَوْا وَرَاءْ لَحَدِّي تِكَمِّلْ بِالنَّاسْ الْجَوْا أَوَّلْ.› ٩ وَ النَّاسْ الْخَدَمَوْا مِنْ السَّاعَةْ خَمْسَةْ بَسْ جَوْا. وَ أَنْطَوْهُمْ دِينَارْ دِينَارْ. ١٠ وَ النَّاسْ الْخَدَمَوْا أَوَّلْ جَوْا. وَ فِي فِكِرْهُمْ يَنْطُوهُمْ زِيَادَةْ مِنْ النَّاسْ الْجَوْا وَرَاهُمْ. وَ لَاكِنْ هُمَّنْ كُلَ أَنْطَوْهُمْ دِينَارْ دِينَارْ.

١١ «وَ وَكِتْ لِقَوْا دِينَارْهُمْ، هَرَجَوْا مَعَ سِيدْ الْجِنَيْنَةْ. ١٢ وَ قَالَوْا: ‹النَّاسْ الْجَوْا وَرَانَا دَوْل خَدَمَوْا مُدَّةْ سَاعَةْ وَاحِدَةْ بَسْ! وَ إِنْتَ كَفَّيْتهُمْ سَوَا سَوَا مَعَانَا وَ أَنِحْنَ خَدَمْنَا فِي الْحَرَّايْ مِنْ الْفَجُرْ لَحَدِّي الْمَغْرِبْ!›

١٣ «وَ رَدَّ لِوَاحِدْ مِنْهُمْ وَ قَالْ: ‹يَا أَخُويِ، أَنَا مَا سَوَّيْت لَيْك شَيّءْ فَسِلْ. أَنَا وَافَقْت مَعَاكْ نَنْطِيكْ دِينَارْ وَاحِدْ. وَلَّا مَا كَيْ؟ ١٤ شِيلْ قُرْسَكْ وَ شِيلْ دَرْبَكْ. نِدَوْر نَنْطِي الْقُرُسْ مِثِلْ الْأَنْطَيْتَكْ لِلنَّاسْ الْجَوْا وَرَاءْ. ١٥ تُقُولْ أَنَا مَا نَقْدَرْ نِسَوِّي مِثِلْ نِدَوْرَهْ فِي مَالِي وَلَّا؟ وَلَّا عِنْدَكْ حُسُدْ أَشَانْ إِيدِي تَنْطِي؟›»

١٦ وَ عِيسَى قَالْ: «خَلَاصْ مِثِلْ كَيْ، الْوَرَاءْ يَبْقَى قِدَّامْ وَ الْقِدَّامْ يَبْقَى وَرَاءْ.»

تالِت مرّة المسيح حجّى بمَوْته

١٧ وَ وَكِتْ عِيسَى مَاشِي لِمَدِينَةْ الْقُدُسْ، هُو طَرَّفْ التَّلَامِيذ الْأَتْنَا عَشَرْ وَ حَجَّى لَيْهُمْ وِحَيْدهُمْ فِي الدَّرِبْ وَ قَالْ: ١٨ «أَسْمَعَوْا، أَنِحْنَ مَاشِينْ لِمَدِينَةْ الْقُدُسْ وَ هِنَاكْ يِسَلُّمُوا إِبْن الْإِنْسَانْ لِكُبَارَاتْ رُجَالْ الدِّينْ وَ الْعُلَمَاءْ وَ هُمَّنْ يَحْكُمُوا لَيَّهْ بِالْمَوْت. ١٩ وَ يِسَلُّمُوا إِبْن الْإِنْسَانْ لِلْمَا مُؤمِنِينْ وَ هُمَّنْ يِشَّمَّتَوْا لَيَّهْ وَ يَجْلُدُوهْ وَ يَكْتُلُوهْ فِي الصَّلِيبْ. وَ لَاكِنْ بَعَدْ تَلَاتَةْ يَوْم، هُو يَبْعَثْ.»

طلب أمّ أوْلاد زبدي

٢٠ وَ أَمُّهُمْ لِأَوْلَادْ زَبَدِي جَاتْ لِعِيسَى مَعَ أَوْلَادْهَا الْإِتْنَيْن وَ سَجَدَتْ قِدَّامَهْ أَشَانْ تِدَوْر تَسْأَلْ مِنَّهْ شَيّءْ. ٢١ وَ عِيسَى قَالْ لَيْهَا: «تِدَوْرِي شُنُو؟» وَ رَدَّتْ لَيَّهْ وَ قَالَتْ: «وَكِتْ تَبْقَى مَلِكْ، أَنْطِي إِذِنْ لِأَوْلَادِي دَوْل أَشَانْ يَحْكُمُوا مَعَاكْ، الْوَاحِدْ بِإِيدَكْ الزَّيْنَةْ وَ الْآخَرْ بِإِيدَكْ الْإِسْرَةْ.»

٢٢ وَ عِيسَى رَدَّ وَ قَالْ لِيَعْقُوبْ وَ يُوحَنَّا: «إِنْتُو مَا فِهِمْتُوا الشَّيّءْ التِّدَوْرُوهْ. تَقْدَرَوْا تَشَرْبَوْا مِنْ كَاسْ التَّعَبْ الْأَنَا نَشْرَبْ مِنَّهْ وَلَّا؟» وَ رَدَّوْا لَيَّهْ وَ قَالَوْا: «أَيْوَى، نَقْدَرَوْا.» ٢٣ وَ قَالْ لَيْهُمْ: «أَكِيدْ، تَشَرْبَوْا مِنْ كَاسِي لَاكِنْ مَا نَقْدَرْ نَعَزِلْ النَّاسْ الْيَقْعُدُوا بِإِيدِي الزَّيْنَةْ وَ بِإِيدِي الْإِسْرَةْ. اللّٰهْ جَهَّزْ الْبَكَانَاتْ دَوْل لِلنَّاسْ الْهُو بَسْ عَزَلَاهُمْ.»

٢٤ وَكِتْ التَّلَامِيذ الْعَشَرَةْ سِمْعَوْا الْكَلَامْ دَا، زِعِلَوْا مِنْ الْأَخْوَانْ الْإِتْنَيْن. ٢٥ وَ عِيسَى نَادَى كُلَّ تَلَامِيذَهْ أَشَانْ يَجُوا لَيَّهْ وَ قَالْ: «تَعَرْفُوا كَدَرْ أَيِّ حَاكِمْ هَنَا النَّاسْ مَا مُؤمِنِينْ يَمْلُكْ بِشِدَّةْ فِي شَعَبَهْ. وَ تَعَرْفُوا كِكَّيْف الْكُبَارَاتْ كُلَ يِتْمَلَّكَوْا فِي النَّاسْ. ٢٦ وَ لَاكِنْ إِنْتُو مَا وَاجِبْ تَبْقَوْا مِثِلْهُمْ. أَيِّ نَادُمْ مِنْكُو الْيِدَوْر يَبْقَى كَبِيرْ، خَلِّي يَبْقَى خَدَّامْكُو. ٢٧ وَ أَيِّ نَادُمْ الْيِدَوْر يَبْقَى كَبِيرْكُو، خَلِّي يَبْقَى عَبِدْكُو. ٢٨ سَوُّوا مِثْلِي أَنَا، إِبْن الْإِنْسَانْ. أَنَا مَا جِيتْ أَشَانْ النَّاسْ يَخْدُمُوا لَيِّ لَاكِنْ أَشَانْ نَخْدِمْ لِلنَّاسْ. وَ جِيتْ أَشَانْ نَفْدَى نَاسْ كَتِيرِينْ بِرُوحِي.»

المسيح داوى عمْيانين إتْنَيْن

٢٩ وَ وَكِتْ عِيسَى وَ تَلَامِيذَهْ مَارْقِينْ مِنْ حِلَّةْ أَرِيحَا، نَاسْ كَتِيرِينْ مَشَوْا وَرَايَهْ. ٣٠ وَ عَمْيَانِينْ إِتْنَيْن قَاعِدِينْ جَنْب الشَّارِعْ. وَ سِمْعَوْا عِيسَى مَاشِي بِالدَّرِبْ وَ عَاطَوْا وَ قَالَوْا: «يَا سَيِّدْنَا! يَا إِبْن دَاوُدْ! أَرْحَمْنَا!» ٣١ وَ النَّاسْ هَرَجَوْهُمْ أَشَانْ يَسْكُتُوا وَ لَاكِنْ الْعَمْيَانِينْ قَمَّوْا يِعِيطُوا بِزِيَادَةْ: «يَا سَيِّدْنَا! يَا إِبْن دَاوُدْ! أَرْحَمْنَا!»

٣٢ وَ عِيسَى وَقَفْ وَ نَادَاهُمْ أَشَانْ يَجُوا لَيَّهْ. وَ سَأَلَاهُمْ وَ قَالْ: «تِدَوْرُوا نِسَوِّي لَيْكُو شُنُو؟» ٣٣ وَ رَدَّوْا لَيَّهْ وَ قَالَوْا: «سَيِّدْنَا، خَلِّي عُيُونَّا يِنْفَتْحُوا.» ٣٤ وَ عِيسَى حَنَّ فَوْقهُمْ وَ لِمِسْ عُيُونْهُمْ وَ طَوَّالِي عُيُونْهُمْ أَنْفَتَحَوْا وَ شَافَوْا. وَ خَلَاصْ قَمَّوْا يِتَابُعُوهْ.