مَتَّى 17

المسيح في نور المجْد

١ وَ بَعَدْ سِتَّةْ يَوْم، عِيسَى شَالْ مَعَايَهْ بُطْرُسْ وَ يَعْقُوبْ وَ يُوحَنَّا أَخُوهْ وَ وَدَّاهُمْ وِحَيْدهُمْ فِي رَاسْ حَجَرْ طَوِيلْ. ٢ وَ عِيسَى أَلْغَيَّرْ قِدَّامْهُمْ. وِجْهَهْ نَوَّرْ مِثِلْ نُورْ الْحَرَّايْ وَ خَلَقَهْ بِقِي أَبْيَضْ كَرّ مِثِلْ النُّورْ. ٣ وَ طَوَّالِي، النَّبِي مُوسَى وَ النَّبِي إِلِيَاسْ بَانَوْا قِدَّامْهُمْ وَ قَاعِدِينْ يِحَجُّوا مَعَ عِيسَى.

٤ وَ بُطْرُسْ حَجَّى لِعِيسَى وَ قَالْ: «سَيِّدْنَا، بِقِي لَيْنَا سَمَحْ كَدَرْ أَنِحْنَ قَاعِدِينْ هِنِي. وَ كَنْ تِدَوْرَهْ، نِسَوِّي لَقَادِيبْ تَلَاتَةْ، وَاحِدَةْ لَيْك وَ وَاحِدَةْ لِمُوسَى وَ وَاحِدَةْ لِإِلِيَاسْ.» ٥ وَ وَكِتْ هُو لِسَّاعْ قَاعِدْ يِحَجِّي، سَحَابَايْ الْعِنْدَهَا نُورْ جَاتْ وَ غَطَّتْهُمْ بِضُلَّهَا وَ حِسّ مِنْ لُبّ السَّحَابَايْ أَنْسَمَعْ وَ قَالْ: «دَا بَسْ إِبْنِي النِّحِبَّهْ وَ أَنَا فَرْحَانْ بَيَّهْ بِلْحَيْن. أَسْمَعَوْا كَلَامَهْ.»

٦ وَ التَّلَامِيذ سِمْعَوْا الْحِسّ وَ خَافَوْا مَرَّةْ وَاحِدْ وَ وَقَعَوْا بِوُجُوهُّمْ فِي الْأَرْض. ٧ وَ عِيسَى جَاءْ لَيْهُمْ وَ خَطَّ إِيدَهْ فَوْقهُمْ وَ قَالْ: «قُمُّوا! مَا تَخَافَوْا!» ٨ وَ رَفَعَوْا رُوسَيْنهُمْ وَ مَا شَافَوْا نَادُمْ إِلَّا عِيسَى وِحَيْدَهْ.

٩ وَ وَكِتْ قَاعِدِينْ يَنْزُلُوا مِنْ رَاسْ الْحَجَرْ، عِيسَى أَمَرَاهُمْ وَ قَالْ: «مَا تِحَجُّوا لِنَادُمْ وَاحِدْ كُلَ بِالشَّيّءْ الشِّفْتُوهْ قُبَّالْ إِبْن الْإِنْسَانْ مَا يَبْعَثْ مِنْ أُسْط الْمَيْتِينْ.» ١٠ وَ تَلَامِيذَهْ سَأَلَوْه وَ قَالَوْا: «مَالَا الْعُلَمَاءْ قَاعِدِينْ يُقُولُوا أَكِيدْ إِلِيَاسْ يَجِي قُبَّالَكْ؟» ١١ وَ عِيسَى رَدَّ لَيْهُمْ وَ قَالْ: «صَحِيحْ إِلِيَاسْ يَجِي قُبَّالِي أَشَانْ يِعَدِّلْ كُلَّ شَيّءْ. ١٢ وَ نِأَوْرِيكُو إِلِيَاسْ جَاءْ خَلَاصْ وَ مَا عِرْفَوْه وَ سَوَّوْا فَوْقَهْ مِثِلْ دَوَّرَوْا. وَ بَعَدْ شِيَّةْ يِتَعُّبُونِي أَنَا إِبْن الْإِنْسَانْ كُلَ.» ١٣ وَ خَلَاصْ التَّلَامِيذ فِهْمَوْا هُو يِحَجِّي لَيْهُمْ بِيَحْيَى الْمُغَطِّسْ.

الوِلَيْد العِنْده أم فِتْفِت

١٤ وَ قَبَّلَوْا فِي الْبَكَانْ اللَّمَّوْا فَوْقَهْ النَّاسْ وَ رَاجِلْ وَاحِدْ جَاءْ لِعِيسَى وَ سَجَدْ قِدَّامَهْ. ١٥ وَ الرَّاجِلْ قَالْ: «يَا سَيِّدْنَا، أَرْحَمْ وِلَيْدِي. عِنْدَهْ أَمْ فِتْفِتْ وَ هُو تَعْبَانْ بِلْحَيْن. هُو يَقَعْ كَتِيرْ. مَرَّاتْ يَقَعْ فِي النَّارْ وَ مَرَّاتْ يَقَعْ فِي الْأَلْمِي. ١٦ وَ وَدَّيْتَهْ لِتَلَامِيذَكْ وَ مَا قِدْرَوْا يَشْفُوهْ.» ١٧ وَ عِيسَى رَدَّ وَ قَالْ: «يَا النَّاسْ الْعُوُجْ وَ مَا عِنْدُكُو إِيمَانْ! لَحَدِّي مَتَى نَقْعُدْ مَعَاكُو؟ لَحَدِّي مَتَى نِلْحَمَّلْكُو؟ جِيبُوا لَيِّ الْوِلَيْد هِنِي.» ١٨ وَ عِيسَى كَشَّ لِلشَّيْطَانْ وَ الشَّيْطَانْ مَرَقْ مِنْ الْوِلَيْد وَ فِي الْوَكِتْ دَا بَسْ الْوِلَيْد لِقِي الْعَافَيْ.

١٩ وَ بَعَدَيْن التَّلَامِيذ جَوْا وَ حَجَّوْا لِعِيسَى وِحَيْدهُمْ. وَ سَأَلَوْه وَ قَالَوْا: «مَالَا مَا قِدِرْنَا طَرَدْنَا الشَّيْطَانْ دَا؟» ٢٠ وَ رَدَّ لَيْهُمْ وَ قَالْ: «أَشَانْ إِيمَانْكُو ضَعِيفْ. وَ نُقُولْ لَيْكُو الْحَقّ، كَنْ إِيمَانْكُو صَغَيَّرْ مِثِلْ حَبَّةْ كِرَيْب كُلَ، تَقْدَرَوْا تُقُولُوا لِلْحَجَرْ دَا: ‹أَزْحَفْ مِنْ هِنِي وَ أَمْشِي هِنَاكْ!› وَ خَلَاصْ، الْحَجَرْ يَزْحَفْ. وَ أَيِّ شَيّءْ يَبْقَى لَيْكُو مُمْكِنْ. ٢١ وَ لَاكِنْ الشَّيْطَانْ النَّفَرْ دَا، مَا يِنْطَرِدْ إِلَّا بِالدُّعَا وَ الصِّيَامْ.»

المسيح حجّى بتان بمَوْته

٢٢ وَ وَكِتْ عِيسَى وَ تَلَامِيذَهْ قَاعِدِينْ يِلِمُّوا فِي دَارْ الْجَلِيلْ، عِيسَى قَالْ لَيْهُمْ: «بَعَدْ شِيَّةْ إِبْن الْإِنْسَانْ يِسَلُّمُوهْ لِلنَّاسْ ٢٣ وَ يَكْتُلُوهْ. وَ فِي الْيَوْم التَّالِتْ، اللّٰهْ يَبْعَثَهْ مِنْ أُسْط الْمَيْتِينْ.» وَ تَلَامِيذَهْ بِقَوْا حَزْنَانِينْ بِلْحَيْن.

ميري هنا بيت اللّه

٢٤ وَ بَعَدْ وِصْلَوْا فِي حِلَّةْ كَفَرْ نَاحُومْ، جَوْا النَّاسْ الْيِشِيلُوا الْمِيرِي الْيِكَفُّوهْ كُلَّ الْيَهُودْ لِبَيْت اللّٰهْ. وَ جَوْا لِبُطْرُسْ وَ قَالَوْا: «سَيِّدْكُو يِكَفِّي الْمِيرِي وَلَّا؟» وَ رَدَّ لَيْهُمْ وَ قَالْ: «أَيْوَى، يِكَفِّيهْ.»

٢٥ وَ وَكِتْ بُطْرُسْ أَنْدَسَّ فِي الْبَيْت، عِيسَى حَجَّى لَيَّهْ وَ سَأَلَهْ وَ قَالْ: «سِمْعَانْ، فِكْرَكْ شُنُو؟ الْمُلُوكْ الْفِي الدُّنْيَا يِشِيلُوا مِيرِي وَ جَمَارِكْ مِنْ يَاتُو؟ يِشِيلُوا مِنْ عِيَالْهُمْ وَلَّا مِنْ النَّاسْ الْآخَرِينْ؟» ٢٦ وَ بُطْرُسْ رَدَّ لَيَّهْ وَ قَالْ: «يِشِيلُوهْ مِنْ النَّاسْ الْآخَرِينْ.»

وَ عِيسَى قَالْ لَيَّهْ: «خَلَاصْ، مَا وَاجِبْ لِعِيَالْ الْمَلِكْ يِكَفُّوهْ. ٢٧ وَ لَاكِنْ مَا نِدَوْرُوا نِبَشْتُنُوا النَّاسْ السَّأَلَوْك الْمِيرِي دَوْل. وَ أَشَانْ دَا، أَمْشِي فِي خَشُمْ الْبَحَرْ وَ أَزْقُلْ جَنْبَاتَكْ فِي الْأَلْمِي. وَ الْحُوتَايْ الْأَوَّلْ تَكْرُبْهَا، فُكّ خَشُمْهَا وَ تَلْقَى دَاخَلْ رِيَالْ وَاحِدْ قِيمْتَهْ تِكَفِّي مِيرِي هَنَا نَاسَيْن. وَ شِيلَهْ وَ كَفِّي بَيَّهْ الْمِيرِي هَنَايِ وَ هَنَاكْ.»