مَتَّى 7

ما تُلوموا الناس

١ «مَا تِحَاكُمُوا النَّاسْ أَشَانْ اللّٰهْ مَا يِحَاكِمْكُو. ٢ أَشَانْ مِثِلْ إِنْتُو تِحَاكُمُوا النَّاسْ، مِثِلْ دَا بَسْ اللّٰهْ يِحَاكِمْكُو. هُو يِكِيل لَيْكُو بِنَفْس الْمِكْيَالْ الْإِنْتُو تِكِيلُوا بَيَّهْ لِلنَّاسْ. ٣ كِكَّيْف تِشِيفْ قَشَّايْ فِي عَيْن أَخُوكْ وَ لَاكِنْ مَا تِشِيفْ الْعُودْ الْكَبِيرْ الْقَاعِدْ فِي عَيْنَكْ إِنْتَ؟ ٤ وَلَّا كِكَّيْف تُقُولْ لِأَخُوكْ: ‹خَلِّينِي نِسِلّ الْقَشَّايْ مِنْ عَيْنَكْ› وَ الْعُودْ لِسَّاعْ قَاعِدْ فِي عَيْنَكْ؟ ٥ يَا الْمُنَافِقْ، أَوَّلْ كَيْ سِلّ الْعُودْ الْفِي عَيْنَكْ إِنْتَ وَ مِثِلْ دَا تِشِيفْ عَدِيلْ وَ خَلَاصْ تَقْدَرْ تِسِلّ الْقَشَّايْ الْفِي عَيْن أَخُوكْ.

٦ «مَا تَنْطُوا شُغُلْ مُقَدَّسْ لِكُلابْ وَ لَا تِدَفُّقُوا شَيّءْ جَمِيلْ لِخَنَازِيرْ. أَشَانْ الْخَنَازِيرْ يِفَجُّقُوهْ بَسْ وَ الْكُلابْ يِقَبُّلُوا وَ يَاكُلُوكُو.

الدُعا

٧ «أَسْأَلَوْا اللّٰهْ وَ هُو يَنْطِيكُو. فَتُّشُوا وَ تَلْقَوْا. دُقُّوا بَابْ اللّٰهْ وَ يِنْفَتِحْ لَيْكُو. ٨ أَشَانْ أَيِّ نَادُمْ الْيَسْأَلْ، اللّٰهْ يَنْطِيهْ. وَ أَيِّ نَادُمْ الْيِفَتِّشْ، يَلْقَى. وَ أَيِّ نَادُمْ الْبُدُقّ بَابْ اللّٰهْ، الْبَابْ يِنْفَتِحْ لَيَّهْ. ٩ هَلْ فِي نَادُمْ مِنْكُو كَنْ وِلَيْدَهْ يَطْلُبْ مِنَّهْ عَيْش، يَنْطِيهْ حَجَرْ وَلَّا؟ ١٠ وَ كَنْ وِلَيْدَهْ يَطْلُبْ مِنَّهْ حُوتَايْ، يَنْطِيهْ دَابِي وَلَّا؟ ١١ صَحِيحْ، إِنْتُو مُذْنِبِينْ وَ لَاكِنْ تَعَرْفُوا كِكَّيْف تَنْطُوا شُغُلْ سَمَحْ لِعِيَالْكُو. وَ أَكِيدْ أَبُوكُو اللّٰهْ أَخَيْر زِيَادَةْ مِنْكُو. وَ كِكَّيْف هُو مَا يَنْطِي شُغُلْ سَمَحْ لِلنَّاسْ الْيَسْأَلَوْه؟

١٢ «وَ خَلَاصْ، الشَّيّءْ التِّدَوْرُوا النَّاسْ يِسَوُّوهْ لَيْكُو، دَا بَسْ الشَّيّءْ الْوَاجِبْ تِسَوُّوهْ لِلنَّاسْ. وَ دِي بَسْ زِبْدَةْ كَلَامْ التَّوْرَاةْ وَ الْأَنْبِيَاء.

مَثَل الدُروب الإتْنَيْن

١٣ «أَدْخُلُوا بِالْبَابْ الضَّيِّقْ. أَشَانْ الْبَابْ الْيِوَدِّي النَّاسْ لِلْهَلَاكْ، هُو وَسِيعْ وَ شَيْلِينَهْ هَيِّنْ. وَ نَاسْ كَتِيرِينْ يَدْخُلُوا بَيَّهْ. ١٤ وَ لَاكِنْ الدَّرِبْ الْيِوَدِّي النَّاسْ لِلْحَيَاةْ، هُو قَاسِي بِلْحَيْن وَ بَابَهْ ضَيِّقْ مَرَّةْ وَاحِدْ. وَ نَاسْ شِيَّةْ بَسْ يَمْشُوا عَلَيَّهْ.

مَثَل عيال الشدر

١٥ «أَنْقَرْعُوا مِنْ النَّاسْ الْيِسَوُّوا نُفُوسْهُمْ أَنْبِيَاء. يَجُوا لَيْكُو ضَلُولِينْ مِثِلْ عِيَالْ غَنَمْ وَ لَاكِنْ فِي قُلُوبْهُمْ هُمَّنْ مِثِلْ مَرَافْعِينْ الْيِدَوْرُوا يَاكُلُوكُو. ١٦ تَعَرْفُوا نَفَرْ هَنَا شَدَرَةْ مِنْ عِيَالْهَا وَ تَعَرْفُوا الْكَدَّابِينْ دَوْل مِنْ خِدْمِتْهُمْ. النَّاسْ يَقْطَعَوْا عِنَبْ مِنْ شَدَرَةْ هَنَا شَوْك وَلَّا؟ وَ يَقْطَعَوْا عِيَالْ الْجِمَّيْز مِنْ أَنْدِرَيْسَةْ وَلَّا؟ ١٧ وَ مِثِلْ دَا، كُلِّ شَدَرَةْ عَدِيلَةْ تَلْدَ عِيَالْ عَدِيلِينْ وَ لَاكِنْ الشَّدَرَةْ الْفَسْلَةْ تَلْدَ عِيَالْ فَسْلِينْ. ١٨ الشَّدَرَةْ الْعَدِيلَةْ مَا تَقْدَرْ تَلْدَ عِيَالْ فَسْلِينْ وَ الشَّدَرَةْ الْفَسْلَةْ مَا تَقْدَرْ تَلْدَ عِيَالْ عَدِيلِينْ. ١٩ أَيِّ شَدَرَةْ الْمَا تَلْدَ عِيَالْ عَدِيلِينْ، يَقْطَعَوْهَا وَ يَزْقُلُوهَا فِي النَّارْ. ٢٠ وَ خَلَاصْ، مِثِلْ تَعَرْفُوا الشَّدَرْ مِنْ عِيَالْهُمْ، تَعَرْفُوا النَّاسْ دَوْل مِنْ خِدْمِتْهُمْ.

في يوم الحِساب

٢١ «مَا كُلَّ النَّاسْ الْيِنَادُونِي: ‹يَا سَيِّدْنَا، يَا سَيِّدْنَا› يَدْخُلُوا فِي مَمْلَكَةْ اللّٰهْ، إِلَّا النَّاسْ الْيِسَوُّوا حَسَبْ الْأَبُويِ اللّٰهْ يِدَوْرَهْ يَدْخُلُوا. ٢٢ فِي يَوْم الْحِسَابْ، نَاسْ كَتِيرِينْ يُقُولُوا لَيِّ: ‹يَا سَيِّدْنَا، يَا سَيِّدْنَا. أَنِحْنَ مَا أَتْنَبَّأْنَا بِأُسْمَكْ وَلَّا؟ وَ بِأُسْمَكْ مَا طَرَدْنَا الشَّوَاطِينْ وَلَّا؟ وَ بِأُسْمَكْ مَا سَوَّيْنَا عَجَايِبْ كَتِيرِينْ وَلَّا؟› ٢٣ وَ لَاكِنْ نِأَوْرِيهُمْ بِكَلَامْ وَاضِحْ وَ نُقُولْ: ‹أَبَداً مَا عِرِفْتُكُو! يَلَّا! كِسُّوا مِنِّي بَعِيدْ! خِدْمِتْكُو دِي شَرّ بَسْ.›

مَثَل البُيوت الإتْنَيْن

٢٤ «أَيِّ نَادُمْ الْيَسْمَعْ كَلَامِي دَا وَ يِتَابِعَهْ، يَبْقَى مِثِلْ رَاجِلْ عَاقِلْ الْبَنَى بَيْتَهْ فِي الْحَجَرْ. ٢٥ وَ الْمَطَرْ صَبَّ وَ السَّيْل جَاءْ وَ الرِّيحْ سَاقَتْ شَدِيدْ وَ كُلُّهُمْ ضَرَبَوْا الْبَيْت وَ الْبَيْت مَا وَقَعْ أَشَانْ أَسَاسَهْ فِي الْحَجَرْ. ٢٦ وَ لَاكِنْ أَيِّ نَادُمْ الْيَسْمَعْ كَلَامِي دَا وَ مَا يِتَابِعَهْ، هُو مِثِلْ رَاجِلْ مَطْمُوسْ الْبَنَى بَيْتَهْ فِي الرَّمْلَةْ. ٢٧ وَ الْمَطَرْ صَبَّ وَ السَّيْل جَاءْ وَ الرِّيحْ سَاقَتْ شَدِيدْ وَ ضَرَبَوْا الْبَيْت. وَ خَلَاصْ، الْبَيْت وَقَعْ وَ تِلِفْ مَرَّةْ وَاحِدْ.»

٢٨ وَ وَكِتْ عِيسَى كَمَّلْ كَلَامَهْ، كُلَّ النَّاسْ اللَّمَّوْا أَشَانْ يَسْمَعَوْا كَلَامَهْ أَلْعَجَّبَوْا بِلْحَيْن مِنْ تَعْلِيمَهْ ٢٩ أَشَانْ هُو عَلَّمَاهُمْ بِالْقُدْرَةْ الْاللّٰهْ أَنْطَاهَا لَيَّهْ وَ مَا مِثِلْ كَلَامْ عُلَمَاهُمْ.