هُوشَع 3

هُوشَع دوّر الأمان من مرْته

١ وَ اللّٰهْ قَالْ لَيِّ: «أَمْشِي حِبّ بَتَّانْ مَرْتَكْ الزَّانِيَةْ التِّحِبّ رَاجِلْ آخَرْ. وَ دَا مِثِلْ حُبِّي أَنَا اللّٰهْ لِبَنِي إِسْرَائِيلْ حَتَّى كَانْ هُمَّنْ مَشَوْا لِإِلٰـهَاتْ آخَرِينْ كُلَ وَ حَبَّوْا عَبُّودْ الْعِنَبْ الْقَدَّمَوْه لِلْإِلٰـهَاتْ دَوْل.»

٢ خَلَاصْ، أَنَا مَشَيْت فَدَيْت مَرْتِي بِـ‍ 15 حَجَرْ فُضَّةْ وَ 4 شُوَالْ هَنَا قَمَحْ أَبْيَضْ. ٣ وَ قُلْت لَيْهَا: «أَقْعُدِي دَايْماً لَيِّ أَنَا وِحَيْدِي. مَا تِشَّرْمَطَيْ وَ لَا تَمْشِي لِرَاجِلْ آخَرْ. وَ أَنَا كُلَ مَا نِقَرِّبْ لَيْكِ.»

٤ وَ مِثِلْ دَا، بَنِي إِسْرَائِيلْ يَقْعُدُوا مُدَّةْ طَوِيلَةْ بَلَا مَلِكْ وَ بَلَا كَبِيرْ وَ بَلَا ضَحِيَّةْ وَ بَلَا حُجَارْ الْغَزَّوْهُمْ لِلْعِبَادَةْ وَ بَلَا فَرْمَلَةْ هَنَا رَاجِلْ الدِّينْ وَ بَلَا أَصْنَامْ. ٥ وَ بَعَدْ دَا، بَنِي إِسْرَائِيلْ يِقَبُّلُوا يِتَابُعُوا اللّٰهْ إِلٰـهُّمْ وَ مَلِكْهُمْ الْمِنْ ذُرِّيَّةْ دَاوُدْ. وَ فِي آخِرْ الْوَكِتْ، يَخَافَوْا مِنْ اللّٰهْ وَ يَلْقَوْا خَيْرَهْ.