كتاب هُوشَع
من كتب الأنبياء
مقدمة
اللّه سوّى هُوشَع نبي في مملكة إسرائيل في المُنْشاق و دا بعد النبي عَمُوس. و هُوشَع قاعد يحجّي بكلام اللّه حوالَي 25 سنة. و دا قُبّال ناس بلد أَشُور ما يشيلوا مملكة إسرائيل. و قُبّال دمار مملكة إسرائيل، الحُكُم برْجل و مُلوك كتيرين حكموا الواحِد بعد الآخر و جابوا الظُلُم في المُجْتمع.
و إيمان شعب اللّه كل برْجل لحدي واحِدين مِنهم أبوا اللّه و عبدوا إلٰـهات آخرين. و في شان دا، النبي هُوشَع قال همن قاعدين يشّرْمطوا مع الإلٰـهات. و حسب أمُر اللّه، هُوشَع أخد مرة شرْموطة. و بعد هي أشّرْمطت، هو قبّلها في بَيْته. و دا يمثِّل محبّة اللّه لشعبه. كن همن أشّرْمطوا مع إلٰـهات آخرين كل، وكت يقبُّلوا ليه، هو يقْبلهم و يحِبُّهم بتان.
في الكتاب دا، هُوشَع كلّم كتير في قبيلة أَفْرَايِم. في مملكة إسرائيل، أَفْرَايِم هي بس القبيلة الكبيرة و بكان واحِد الأُسُم أَفْرَايِم يمثِّل كل مملكة إسرائيل.