صلاة دَنْيال
٩
١ وَ بَعَدْ دَا،
دَارِيُوسْ وِلَيْد أَشَوِرُوشْ مِنْ قَبِيلَةْ الْمَادِيِّينْ بِقِي مَلِكْ فِي بَلَدْ بَابِلْ.
٢ وَ فِي أَوَّلْ سَنَةْ هَنَا حُكْمَهْ،
أَنَا دَنْيَالْ فِهِمْت مِنْ كُتُبْ الْأَنْبِيَاء كَدَرْ اللّٰهْ حَجَّى لِلنَّبِي إِرْمِيَا وَ قَالْ خَرَابْ مَدِينَةْ الْقُدُسْ يَقْعُدْ 70 سَنَةْ* لَحَدِّي الْوَكِتْ دَا يِتِمّ.
٣ وَ فِي الْبَكَانْ دَا،
طَوَّالِي أَنَا وَجَّهْت لِلرَّبّ إِلٰـهِي وَ شَحَدْتَهْ بِالصَّلَاةْ وَ الصِّيَامْ.
وَ لِبِسْت خَلَقْ التَّوْبَةْ وَ صَبَّيْت رُمَادْ فِي رَاسِي.
٤ وَ طَوَّالِي أَنَا قَمَّيْت صَلَّيْت صَلَاةْ التَّوْبَةْ وَ قُلْت لِلّٰهْ إِلٰـهِي:
«يَا رَبّ،
إِنْتَ الْإِلٰـهْ الْعَظِيمْ وَ الْقَادِرْ.
وَ إِنْتَ دَايْماً أَمِينْ فِي مُعَاهَدَتَكْ لِلنَّاسْ الْيِحِبُّوكْ وَ يِتَابُعُوا وَصِيَّاتَكْ.
٥ أَنِحْنَ أَذْنَبْنَا وَ خِطِينَا وَ سَوَّيْنَا الشَّرّ وَ عِصِينَاكْ وَ خَلَّيْنَا وَصِيَّاتَكْ وَ شَرِيعْتَكْ.
٦ وَ مَا سِمِعْنَا كَلَامْ عَبِيدَكْ الْأَنْبِيَاء.
هُمَّنْ كَلَّمَوْا بِأُسْمَكْ لِمُلُوكْنَا وَ كُبَارَاتْنَا وَ جُدُودْنَا وَ كُلَّ شَعَبْ بَلَدْنَا.
٧ إِنْتَ عَادِلْ،
يَا رَبّ،
وَ الْيَوْم الْعَيْب فَوْقنَا أَنِحْنَ نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ وَ كُلَّ بَنِي إِسْرَائِيلْ الْقَاعِدِينْ وَ الْمُشَتَّتِينْ فِي كُلَّ الْبُلْدَانْ.
إِنْتَ طَرَدْتُهُمْ وَ وَدَّيْتهُمْ فِي الْبُلْدَانْ دَوْل بِسَبَبْ عِصْيَانْهُمْ لَيْك.
٨ أَيْوَى،
يَا اللّٰهْ،
الْعَيْب فَوْقنَا أَنِحْنَ وَ فَوْق مُلُوكْنَا وَ كُبَارَاتْنَا وَ جُدُودْنَا أَشَانْ أَنِحْنَ أَذْنَبْنَا قِدَّامَكْ.
٩ وَ لَاكِنْ،
يَا رَبِّنَا وَ إِلٰـهْنَا،
إِنْتَ غَفُورْ وَ رَحِيمْ حَتَّى كَانْ أَنِحْنَ عِصِينَاكْ كُلَ.
١٠ وَ أَنِحْنَ مَا سِمِعْنَا كَلَامَكْ،
إِنْتَ اللّٰهْ إِلٰـهْنَا.
وَ مَا تَابَعْنَا شُرُوطْ التَّوْرَاةْ الْكَلَّمْتِنَا بَيْهُمْ بِوَاسِطَةْ عَبِيدَكْ الْأَنْبِيَاء.
١١ وَ أَنِحْنَ بَنِي إِسْرَائِيلْ كُلِّنَا خَالَفْنَا شُرُوطْ التَّوْرَاةْ وَ أَبَيْنَا مَا سِمِعْنَا كَلَامَكْ.
وَ خَلَاصْ،
إِنْتَ نَزَّلْت فَوْقنَا اللَّعَنَةْ وَ الْحُكُمْ الْمَكْتُوبْ فِي تَوْرَاةْ مُوسَى عَبْدَكْ أَشَانْ أَنِحْنَ أَذْنَبْنَا قِدَّامَكْ.
١٢ «وَ إِنْتَ حَقَّقْت كَلَامَكْ الْقُلْتَهْ فَوْقنَا أَنِحْنَ وَ كُبَارَاتْنَا وَ نَزَّلْت فَوْقنَا مَصِيبَةْ كَبِيرَةْ.
وَ الْمَصِيبَةْ النَّزَلَتْ فِي مَدِينَةْ الْقُدُسْ دِي أَبَداً مَا كَانَتْ مِثِلْهَا فِي الدُّنْيَا.
١٣ وَ الْمَصِيبَةْ دِي نَزَلَتْ فَوْقنَا مِثِلْ مَكْتُوبْ فِي تَوْرَاةْ مُوسَى.
وَ بَيْدَا كُلَ،
يَا اللّٰهْ إِلٰـهْنَا،
مَا وَجَّهْنَا عَلَيْك وَ مَا شَحَدْنَاكْ وَ مَا خَلَّيْنَا الْخَطَايَا الْقَاعِدِينْ نِسَوُّوهُمْ وَ مَا سِمِعْنَا كَلَامَكْ الْحَقّ.
١٤ يَا اللّٰهْ،
إِنْتَ بَسْ جَهَّزْت الْمَصِيبَةْ دِي حَسَبْ ذُنُوبْنَا وَ نَزَّلْتَهَا فَوْقنَا.
يَا اللّٰهْ إِلٰـهْنَا،
إِنْتَ دَايْماً عَادِلْ فِي كُلَّ شَيّءْ التِّسَوِّيهْ لَاكِنْ أَنِحْنَ مَا سِمِعْنَا كَلَامَكْ.
١٥ «يَا رَبِّنَا وَ إِلٰـهْنَا،
إِنْتَ مَرَقْت شَعَبَكْ مِنْ بَلَدْ مَصِرْ بِإِيدَكْ الشَّدِيدَةْ وَ أَشَانْ دَا،
أُسْمَكْ مَعْرُوفْ لَحَدِّي الْيَوْم دَا فِي كُلَّ الْأَرْض.
لَاكِنْ أَنِحْنَ أَذْنَبْنَا وَ سَوَّيْنَا الشَّرّ.
١٦ يَا رَبّ،
إِنْتَ عَادِلْ.
وَ أَشَانْ دَا،
مَا تِنَزِّلْ غَضَبَكْ الشَّدِيدْ فِي جَبَلَكْ الْمُقَدَّسْ الْفَوْقَهْ مَدِينْتَكْ.
أَشَانْ بِسَبَبْ ذُنُوبْنَا وَ الْخَطَايَا السَّوَّوْهُمْ جُدُودْنَا،
دَاهُو النَّاسْ الْحَوَالَيْنَا قَاعِدِينْ يِشَّمَّتَوْا لِمَدِينَةْ الْقُدُسْ وَ لَيْنَا أَنِحْنَ شَعَبَكْ.
١٧ وَ هَسَّعْ دَا،
يَا إِلٰـهْنَا،
أَسْمَعْ الصَّلَاةْ وَ الدُّعَا هَنَا عَبْدَكْ.
فِي شَانْ أُسْمَكْ،
يَا رَبّ،
وَجِّهْ نُورْ وِجْهَكْ عَلَيْ بَيْتَكْ الْمُقَدَّسْ الْخِرِبْ.
١٨ يَا إِلٰـهِي،
أَسْمَعْ وَ شِيفْ الْخَرَابْ الْجَاءْ فِي مَدِينْتَكْ الْفَوْقهَا أُسْمَكْ.
وَ أَنِحْنَ مَا شَحَدْنَاكْ بِسَبَبْ أَنِحْنَ صَالِحِينْ لَاكِنْ أَشَانْ رَحْمَتَكْ إِنْتَ وَسِيعَةْ.
١٩ يَا رَبّ،
أَسْمَعْنِي!
يَا رَبّ،
أَغْفِرْ لَيْنَا!
يَا رَبّ،
أَسْمَعْ دُعَايِ وَ أَفْزَعْنَا بَلَا تَأخِيرْ فِي شَانْ أُسْمَكْ،
يَا إِلٰـهِي!
أَشَانْ إِنْتَ خَصَّصْت الْمَدِينَةْ دِي لِتَبْقَى مَدِينْتَكْ وَ الشَّعَبْ كُلَ لِيَبْقَى شَعَبَكْ.»
جِبْرِيل خبّر دَنْيال باليبْقى
٢٠ وَ أَنَا قَاعِدْ نِصَلِّي وَ نُتُوبْ مِنْ ذُنُوبِي وَ ذُنُوبْ شَعَبِي بَنِي إِسْرَائِيلْ وَ نَشْحَدْ اللّٰهْ إِلٰـهِي فِي شَانْ جَبَلَهْ الْمُقَدَّسْ.
٢١ وَ وَكِتْ أَنَا قَاعِدْ نِصَلِّي،
شِفْت الْمَلَكْ جِبْرِيلْ وَ دَا الْمَلَكْ الْأَوَّلْ أَنَا شِفْتَهْ فِي الرُّؤْيَةْ.
وَ هُو جَانِي طَايِرْ بِسُرْعَةْ فِي وَكِتْ قَدِّمِينْ هَدِيَّةْ الْعَشِيَّةْ.
٢٢ وَ حَجَّى لَيِّ وَ قَالْ:
«يَا دَنْيَالْ،
دَاهُو أَنَا جِيتْ لِنِعَلِّمَكْ وَ نِفَهِّمَكْ.
٢٣ يَا دَنْيَالْ،
مِنْ إِنْتَ بَدَيْت تَشْحَدْ اللّٰهْ،
هُو أَمَرَانِي وَ دَاهُو أَنَا جِيتْ لِنِخَبِّرَكْ أَشَانْ إِنْتَ دَا،
اللّٰهْ بِرِيدَكْ.
خُطّ بَالَكْ لِلْكَلَامْ دَا وَ أَفْهَمْ الرُّؤْيَةْ دِي.
٢٤ «أَعَرِفْ كَدَرْ اللّٰهْ قَرَّرْ وَكِتْ مُحَدَّدْ لِشَعَبَكْ وَ لِمَدِينَةْ الْقُدُسْ.
وَ الْعَدَدْ دَا 70 فِي 7 سَنَةْ يَعْنِي 490 سَنَةْ.
وَ حَدَّدْ لَيْهُمْ الْوَكِتْ دَا أَشَانْ يِخَلُّوا مِنْهُمْ الْعِصْيَانْ وَ الذَّنِبْ وَ يَلْقَوْا كَفَّارَةْ لِخَطَايَاهُمْ وَ يِعِيشُوا دَايْماً فِي الْعَدَالَةْ.
وَ الرُّؤْيَةْ وَ كَلَامْ الْأَنْبِيَاء يِلْحَقَّقَوْا وَ الْبَيْت الْمُقَدَّسْ كُلَ بَتَّانْ يَمْسَحَوْه لِيِخَصُّصُوهْ.
٢٥ أَعَرِفْ وَ أَفْهَمْ!
الْوَكِتْ الْمُحَدَّدْ دَا يِلْقَاسَمْ مِثِلْ نُقُولَهْ لَيْك.
يَمْرُقْ قَرَارْ هَنَا قَبِّلِينْ بَنِي إِسْرَائِيلْ وَ بَنِيِينْ مَدِينَةْ الْقُدُسْ بَتَّانْ.
وَ مِنْ مَرِقِينْ الْقَرَارْ دَا لَحَدِّي جَايِينْ النَّادُمْ الْمَسَحَوْه وَ دَرَّجَوْه مَلِكْ،
يِسَاوِي 7 فِي 7 سَنَةْ يَعْنِي 49 سَنَةْ.
وَ بَعَدْ 62 فِي 7 سَنَةْ يَعْنِي 434 سَنَةْ،
الْمَدِينَةْ دِي يَبْنُوهَا بَتَّانْ هِي وَ شَوَارِعْهَا وَ يِقَوُّوا دَرَادِرْهَا حَتَّى كَانْ دَا وَكْت الضِّيقَةْ كُلَ.
٢٦ وَ بَعَدْ الْأُرْبُعْمِيَةْ وَ تَلَاتِينْ وَ أَرْبَعَةْ سَنَةْ دَوْل،
النَّادُمْ الْمَسَحَوْه وَ دَرَّجَوْه مَلِكْ دَا يَكْتُلُوهْ وَ نَادُمْ يِدَافِعْ لَيَّهْ كَيْ مَا فِيهْ.
وَ يَجِي مَلِكْ آخَرْ بِعَسْكَرَهْ وَ يِدَمِّرْ الْمَدِينَةْ وَ الْبَيْت الْمُقَدَّسْ.
وَ لَاكِنْ الْمَلِكْ دَا،
نِهَايَةْ حُكْمَهْ تَجِي عَجَلَةْ مِثِلْ السَّيْل.
وَ فِي الأَخِيرْ،
الْحَرِبْ وَ الدَّمَارْ الشَّدِيدْ يَبْقَوْا مِثِلْ مُقَرَّرْ.
٢٧ وَ الْمَلِكْ دَا يَجْبُرْ نَاسْ كَتِيرِينْ لِيِسَوُّوا مَعَايَهْ مُعَاهَدَةْ لِمُدَّةْ 7 سَنَةْ.
وَ بَعَدْ نُصّ الْمُدَّةْ دِي،
الضَّحَايَا وَ الْهَدَايَا الْيِقَدُّمُوهُمْ دَايْماً،
هُو يَمْنَعْهُمْ.
وَ عَجَلَةْ بَسْ،
الْمُخَرِّبْ دَا يِسَوِّي الْحَرَامْ الْيِجِيبْ الْخَرَابْ.
وَ فِي الأَخِيرْ،
هُو ذَاتَهْ يِدَّمَّرْ مِثِلْ مُقَرَّرْ.»