دَنْيال 5

عازومة بَلْشَاصَر

١ وَ فِي أَيَّامْ مُلُكْ بَلْشَاصَرْ، هُو سَوَّى عَازُومَةْ كَبِيرَةْ لِأَلِفْ مِنْ مُوَظَّفِينَهْ وَ شِرِبْ مَعَاهُمْ خَمَرْ. ٢ وَ وَكِتْ هُو قَاعِدْ يَشْرَبْ الْخَمَرْ دَا، هُو أَمَرْ يِجِيبُوا الْمَوَاعِينْ هَنَا الدَّهَبْ وَ الْفُضَّةْ الْأَبُوهْ نَبُوخَدْنَصَرْ شَالَاهُمْ وَ جَابَاهُمْ مِنْ بَيْت اللّٰهْ الْقَاعِدْ فِي مَدِينَةْ الْقُدُسْ. وَ دَا أَشَانْ الْمَلِكْ وَ مُوَظَّفِينَهْ وَ عَوِينَهْ وَ سِرِّيَّاتَهْ يَشَرْبَوْا بَيْهُمْ. ٣ وَ خَلَاصْ، هُمَّنْ جَابَوْا الْمَوَاعِينْ هَنَا الدَّهَبْ الْأَوَّلْ شَالَوْهُمْ مِنْ بَيْت اللّٰهْ الْقَاعِدْ فِي مَدِينَةْ الْقُدُسْ وَ الْمَلِكْ وَ مُوَظَّفِينَهْ وَ عَوِينَهْ وَ سِرِّيَّاتَهْ شِرْبَوْا بَيْهُمْ. ٤ هُمَّنْ شِرْبَوْا الْخَمَرْ وَ غَنَّوْا لِإِلٰـهَاتْهُمْ الْمِنْ دَهَبْ وَ فُضَّةْ وَ نَحَاسْ وَ حَدِيدْ وَ خَشَبْ وَ حُجَارْ.

٥ وَ طَوَّالِي، بَانَوْا جَنْب الْفَانُوسْ أَصَابِعْ هَنَا إِيدْ إِنْسَانْ وَ قَاعِدِينْ يَكْتُبُوا فِي بَيَاضْ الدُّرْدُرْ هَنَا قَصِرْ الْمَلِكْ. وَ الْمَلِكْ شَافْ الْإِيدْ الْقَاعِدَةْ تَكْتِبْ. ٦ خَلَاصْ الْمَلِكْ وِجْهَهْ أَلْغَيَّرْ وَ خَافْ وَ حَيْلَهْ بَرَدْ وَ رِجِلَيْنَهْ قَاعِدِينْ يَرْجُفُوا. ٧ وَ الْمَلِكْ نَادَى بِحِسّ شَدِيدْ وَ قَالْ يِجِيبُوا قِدَّامَهْ كُلَّ الشَّوَّافِينْ وَ الْمُنَجِّمِينْ وَ الْخَطَّاطِينْ الْهُمَّنْ مُسْتَشَارِينْ هَنَا بَابِلْ. وَ قَالْ لَيْهُمْ: «أَيِّ نَادُمْ مِنْكُو الْقِدِرْ قَرَى الْكِتَابَة دِي وَ فَسَّرْهَا لَيِّ، نِلَبِّسَهْ خَلَقْ غَالِي الْيَلْبَسَوْه الْمُلُوكْ وَ نِدِسّ لَيَّهْ سِلْسِلَةْ هَنَا دَهَبْ فِي رَقَبَتَهْ وَ نِدَرِّجَهْ تَالِتْ رَجُلْ فِي الْمَمْلَكَةْ.» ٨ وَ وَكِتْ كُلَّ الْمُسْتَشَارِينْ جَوْا لِلْمَلِكْ، مَا قِدْرَوْا قَرَوْا الْكِتَابَة وَ لَا قِدْرَوْا فَسَّرَوْهَا لَيَّهْ. ٩ الْمَلِكْ بَلْشَاصَرْ خَافْ زِيَادَةْ وَ وِجْهَهْ أَلْغَيَّرْ مَرَّةْ وَاحِدْ وَ مُوَظَّفِينَهْ كُلَ بَرْجَلَوْا.

الملك نادى دَنْيال

١٠ وَ وَكِتْ الْمَلِكَةْ أَمّ الْمَلِكْ سِمْعَتْ بِالشَّيّءْ الْكَانْ لِلْمَلِكْ وَ مُوَظَّفِينَهْ، جَاتْ وَ دَخَلَتْ فِي بَكَانْ الْعَازُومَةْ وَ قَالَتْ: «الْمَلِكْ، اللّٰهْ يَنْصُرَكْ. مَا تَخَافْ وَ وِجْهَكْ كُلَ خَلِّي مَا يِلْغَيَّرْ. ١١ أَشَانْ فِيَّهْ رَاجِلْ فِي مَمْلَكَتَكْ الرُّوحْ الْإِلٰـهَاتْ الْقُدُّوسِينْ قَاعِدَةْ فَوْقَهْ. وَ فِي وَكِتْ أَبُوكْ، الرَّاجِلْ دَا مَعْرُوفْ بِالْعِلِمْ وَ الْفِهِمْ وَ الْحِكْمَةْ مِثِلْ حِكْمَةْ الْإِلٰـهَاتْ. وَ أَبُوكْ الْمَلِكْ نَبُوخَدْنَصَرْ فِي زَمَنَهْ خَطَّاهْ كَبِيرْ السَّحَّارِينْ وَ الشَّوَّافِينْ وَ الْمُنَجِّمِينْ وَ الْخَطَّاطِينْ. ١٢ وَ الرَّاجِلْ دَا أُسْمَهْ دَنْيَالْ وَ الْمَلِكْ سَمَّاهْ بَلْطَشَاصَرْ. وَ هُو عِنْدَهْ عَقُلْ كَبِيرْ وَ مَعْرَفَةْ وَ فِهِمْ الْبَيْهُمْ يِفَسِّرْ الْحِلِمْ وَ يَعَرِفْ الْحِجَيْ الْعِنْدَهْ مَعَنَى قَوِي وَ يِحِلّ الْمَشَاكِلْ الْقَاسِيِينْ. هَسَّعْ دَا، نَادِي دَنْيَالْ وَ هُو يِفَسِّرْ لَيْك الْكِتَابَة دِي.»

١٣ وَ خَلَاصْ، جَابَوْا دَنْيَالْ قِدَّامْ الْمَلِكْ وَ الْمَلِكْ سَأَلَهْ وَ قَالْ: «إِنْتَ بَسْ دَنْيَالْ وَلَّا؟ إِنْتَ مِنْ النَّاسْ الْأَبُويِ كَرَبَاهُمْ وَ جَابَاهُمْ مِنْ بَلَدْ يَهُوذَا؟ ١٤ أَنَا سِمِعْت كَدَرْ رُوحْ الْإِلٰـهَاتْ قَاعِدَةْ فَوْقَكْ وَ إِنْتَ مَعْرُوفْ بِالْعِلِمْ وَ الْفِهِمْ وَ الْحِكْمَةْ الزِّيَادَةْ. ١٥ وَ جَابَوْا قِدَّامِي كُلَّ الْمُسْتَشَارِينْ وَ الشَّوَّافِينْ أَشَانْ يَقْرُوا لَيِّ الْكِتَابَة دِي وَ يِفَسُّرُوهَا وَ لَاكِنْ مَا قِدْرَوْا يِفَسُّرُوهَا. ١٦ وَ أَنَا سِمِعْت كَدَرْ إِنْتَ تِفَسِّرْ الْحِلِمْ وَ تِحِلّ الْمَشَاكِلْ الْقَاسِيِينْ. وَ كَنْ قِدِرْت قَرَيْت الْكِتَابَة دِي وَ فَسَّرْتَهَا لَيِّ، أَنَا نِلَبِّسَكْ خَلَقْ غَالِي الْيَلْبَسَوْه الْمُلُوكْ وَ نِدِسّ لَيْك سِلْسِلَةْ هَنَا دَهَبْ فِي رَقَبَتَكْ وَ نِدَرِّجَكْ تَالِتْ رَجُلْ فِي الْمَمْلَكَةْ.»

١٧ وَ دَنْيَالْ رَدَّ لِلْمَلِكْ وَ قَالْ: «خَلِّي هَدَايَاكْ يَقْعُدُوا لَيْك إِنْتَ. وَ كَنْ تَنْطِي، أَنْطِي الْآخَرِينْ. وَ لَاكِنْ أَنَا كَمَانْ نَقْرِي الْكِتَابَة دِي وَ نِفَسِّرْهَا لَيْك. ١٨ يَا الْمَلِكْ، اللّٰهْ الْعَالِي أَنْطَى أَبُوكْ نَبُوخَدْنَصَرْ مُلُكْ وَ عَظَمَةْ وَ شَرَفْ وَ مَجْد. ١٩ وَ مِنْ شِدَّةْ الْعَظَمَةْ الْأَنْطَاهَا لَيَّهْ، كُلَّ النَّاسْ مِنْ الشُّعُوبْ وَ الْأُمَمْ وَ اللُّغَّاتْ يَرْجُفُوا قِدَّامَهْ مِنْ الْخَوْف. الْهُو يِدَوْر يَكْتُلَهْ، يَكْتُلَهْ وَ الْيِدَوْر يِخَلِّيهْ، يِخَلِّيهْ. وَ الْيِدَوْر يَرْفَعَهْ، يَرْفَعَهْ وَ الْيِدَوْر يَرْمِيهْ، يَرْمِيهْ. ٢٠ وَ لَاكِنْ وَكِتْ قَلْبَهْ قَمَّ وَ أَشَّدَّدْ وَ أَسْتَكْبَرْ، خَلَاصْ الْمَمْلَكَةْ مَرَقَتْ مِنَّهْ وَ شَرَفَهْ كُلَ شَالَوْه مِنَّهْ. ٢١ وَ طَرَدَوْه مِنْ أُسْط النَّاسْ وَ عَقْلَهْ أَلْبَدَّلْ مِنْ عَقُلْ إِنْسَانْ لِعَقُلْ حَيْوَانْ. وَ عَاشْ مَعَ حَمِيرْ الْكَدَادَةْ وَ أَكَلْ قَشّ مِثِلْ تَوْر. وَ جِسْمَهْ أَنْبَلَّ بِكَرَنْج النَّزَلْ فَوْقَهْ مِنْ السَّمَاءْ لَحَدِّي عَلَّمْ كَدَرْ اللّٰهْ الْعَالِي، هُو بَسْ سِيدْ الْمُلُكْ وَ يَنْطِي مُلْكَهْ لِلنَّادُمْ الْهُو يِدَوْرَهْ.

٢٢ «يَا بَلْشَاصَرْ، إِنْتَ وِلَيْدَهْ وَ تَعَرِفْ كُلَّ شَيّءْ الْكَانْ لِأَبُوكْ نَبُوخَدْنَصَرْ. وَ لَاكِنْ مَا مَسْكَنْت نَفْسَكْ. ٢٣ إِنْتَ قَمَّيْت ضِدّ اللّٰهْ رَبّ السَّمَاوَاتْ وَ جَابَوْا لَيْك مَوَاعِينْ بَيْتَهْ وَ شِرِبْتُوا بَيْهُمْ الْخَمَرْ، إِنْتَ وَ مُوَظَّفِينَكْ وَ عَوِينَكْ وَ سِرِّيَّاتَكْ. وَ غَنَّيْت لِإِلٰـهَاتَكْ الْمِنْ دَهَبْ وَ فُضَّةْ وَ نَحَاسْ وَ حَدِيدْ وَ خَشَبْ وَ حُجَارْ. وَ هُمَّنْ إِلٰـهَاتْ الْمَا يِشِيفُوا وَ لَا يَسْمَعَوْا وَ لَا يَعَرْفُوا شَيّءْ. وَ بَيْدَا كُلَ، إِنْتَ أَبَيْت مَا تِمَجِّدْ اللّٰهْ الْأَنْطَاكْ الْحَيَاةْ وَ قَاعِدْ يِرَاقِبْ دَرْبَكْ. ٢٤ وَ فِي شَانْ دَا، اللّٰهْ رَسَّلْ الْإِيدْ الْكَتَبَتْ الْكَلَامْ دَا.

٢٥ «وَ دَاهُو الْكَلَامْ الْمَكْتُوبْ.

‹مَنَا مَنَا تَقِلْ وَ فَارْسِينْ›.

٢٦ وَ دَاهُو تَفْسِيرَهْ.

‹مَنَا› يَعْنِي حَسَبْ.

مَعَنَاتَهْ اللّٰهْ حَسَبْ أَيَّامْ مُلْكَكْ

وَ خَلَاصْ، مُلْكَكْ كَمَّلْ.

٢٧ ‹تَقِلْ› يَعْنِي وَزِنْ.

مَعَنَاتَهْ وَزَنَوْك فِي الْمِيزَانْ

وَ وَزْنَكْ مَا تَقِيلْ.

٢٨ ‹فَارْسِينْ› يَعْنِي كَسَّرَوْه.

مَعَنَاتَهْ مُلْكَكْ أَنْكَسَرْ

وَ مَمْلَكَتَكْ أَنْطَوْهَا

لِمَمْلَكَةْ الْمَادِيِّينْ وَ الْفَارِسِيِّينْ.»

٢٩ وَ خَلَاصْ، بَلْشَاصَرْ أَمَرْ يِلَبُّسُوا دَنْيَالْ خَلَقْ غَالِي الْيَلْبَسَوْه الْمُلُوكْ وَ يِدِسُّوا لَيَّهْ سِلْسِلَةْ هَنَا دَهَبْ فِي رَقَبَتَهْ وَ يِدَرُّجُوهْ تَالِتْ رَجُلْ فِي الْمَمْلَكَةْ. ٣٠ وَ لَاكِنْ فِي نَفْس اللَّيْلَةْ دِي، بَلْشَاصَرْ مَلِكْ بَابِلْ، كَتَلَوْه. ٣١ وَ خَلَاصْ، جَاءْ الْمَلِكْ دَارِيُوسْ مِنْ بَلَدْ الْمَادِيِّينْ وَ شَالْ الْمَمْلَكَةْ. وَ فِي الْوَكِتْ دَاكْ، عُمْرَهْ 62 سَنَةْ.