حِزْقِيال 47

عَيْن ألْمي الجاري من بيت اللّه

١ وَ الرَّاجِلْ وَدَّانِي عَلَيْ مَدَخَلْ الْبَيْت الْمُقَدَّسْ. وَ دَاهُو أَلْمِي مَارِقْ مِنْ تِحِتْ الْبَيْت مِنْ نُصَّهْ الصَّبْحَانِي أَشَانْ الْبَيْت مُوَجِّهْ صَبَاحْ. وَ الْأَلْمِي سَالْ عَلَيْ الْوَطِي وَ جَرَى وَطِي الْمَدْبَحْ. ٢ وَ الرَّاجِلْ مَرَقَانِي بِبَيْت الْمَدَخَلْ الْمُنْشَاقِي وَ حَوَّقَانِي فِي الْفَضَايْ الْبَرَّانِيَّةْ لَحَدِّي بَيْت الْمَدَخَلْ الصَّبْحَانِي. وَ دَاهُو أَلْمِي جَارِي وَطِي الْبَابْ دَا.

٣ وَ الرَّاجِلْ مَرَقْ عَلَيْ الصَّبَاحْ وَ الْحَبِلْ الْيِقَاوُسُوا بَيَّهْ فِي إِيدَهْ. وَ مِنْ الْبَابْ، هُو كَالْ 1 000 دُرَاعْ بَرَّا. وَ هِنَاكْ، قَطَّعَانِي الْأَلْمِي وَ الْأَلْمِي لِحِقْ سِيقَانِي. ٤ وَ بَتَّانْ كَالْ 1 000 دُرَاعْ وَ قَطَّعَانِي الْأَلْمِي وَ الْأَلْمِي لِحِقْ رِكَبِّي. وَ بَتَّانْ كَالْ 1 000 دُرَاعْ وَ قَطَّعَانِي الْأَلْمِي وَ الْأَلْمِي لِحِقْ صُلْبِي. ٥ وَ بَتَّانْ كَالْ 1 000 دُرَاعْ وَ الْأَلْمِي بِقِي وَادِي الْمَا نَقْدَرْ نَقْطَعَهْ أَشَانْ الْأَلْمِي غَرِيقْ وَ إِلَّا نَادُمْ يُعُومْ. وَ دَا وَادِي الْأَبَداً نَادُمْ مَا يَقْدَرْ يَقْطَعَهْ.

٦ وَ هُو قَالْ لَيِّ: «يَا إِبْن آدَمْ، إِنْتَ قَاعِدْ تِشِيفْ وَلَّا؟» وَ هُو وَدَّانِي وَ قَبَّلَانِي فِي خَشُمْ الْوَادِي. ٧ وَ وَكِتْ قَبَّلَانِي، دَاهُو أَنَا شِفْت شَدَرْ كَتِيرْ فِي خَشُمْ الْوَادِي جَايْ وَ جَايْ. ٨ وَ هُو قَالْ لَيِّ: «الْأَلْمِي دَا يَمْشِي عَلَيْ بَلَدْ الصَّبَاحْ وَ يَمْشِي لِوَادِي الْأُرْدُنْ وَ يَدْخُلْ فِي الْبَحَرْ الْمَيِّتْ. وَ وَكِتْ أَلْمِي مِنْ الْعَيْن دِي يَدْخُلْ فِي الْبَحَرْ الْمَيِّتْ، كُلَّ أَلْمِي الْبَحَرْ دَا يَبْقَى حَلُو. ٩ وَ فِي أَيِّ بَكَانْ الْيَدْخُلْ فَوْقَهْ الْأَلْمِي دَا، الْمَخْلُوقِينْ الْحَيِّينْ يَبْقَوْا كَتِيرِينْ وَ يِعِيشُوا. وَ الْحُوتْ يَبْقَى كَتِيرْ زِيَادَةْ أَشَانْ أَلْمِي الْعَيْن دِي يَجِي وَ يِسَوِّي أَلْمِي الْبَحَرْ دَا حَلُو. وَ الْحَيَاةْ تُكُونْ فِي أَيِّ بَكَانْ الْيَدْخُلْ فَوْقَهْ الْأَلْمِي دَا. ١٠ وَ خَلَاصْ، الْحَوَّاتِينْ يَقْعُدُوا فِي خَشُمْ الْأَلْمِي وَ مِنْ عَيْن جِدِي لَحَدِّي عَيْن عَقْلَايِمْ يَبْقَى بَكَانْ الْيُشُرُّوا فَوْقَهْ الشُّرُكَّ. وَ نَفَرْ الْحُوتْ فِي الْبَحَرْ الْمَيِّتْ يَبْقَى كَتِيرْ مِنْ نَفَرْ الْحُوتْ فِي الْبَحَرْ الْأَبْيَضْ. ١١ وَ لَاكِنْ أَلْمِي رُهُودَهْ وَ بِرَكَّهْ مَا يَبْقَى حَلُو وَ لَاكِنْ يَقْعُدْ أَشَانْ يَلْقَوْا مِنَّهْ مِلِحْ. ١٢ وَ فِي خَشُمْ الْوَادِي جَايْ وَ جَايْ، يُقُمّ نَفَرْ كَتِيرْ هَنَا شَدَرْ الْعِنْدُهُمْ عِيَالْ. وَرْشَالْهُمْ أَبَداً مَا يَيْبَسْ وَ عِيَالْهُمْ مَا يِكَمُّلُوا. وَ هُمَّنْ يَلْدَوْا فِي أَيِّ شَهَرْ أَشَانْ الْأَلْمِي دَا مَارِقْ مِنْ الْبَيْت الْمُقَدَّسْ. وَ عِيَالْهُمْ، يَاكُلُوهُمْ وَ وَرْشَالْهُمْ يَنْطِي الْعَافَيْ.»

حُدود البلد

١٣ وَ اللّٰهْ الرَّبّ قَالْ: «دَاهُو حُدُودْ الْبَلَدْ التِّقَسُّمُوهَا وَرَثَةْ أَمْبَيْنَاتْكُو إِنْتُو قَبَايِلْ بَنِي إِسْرَائِيلْ الْأَتْنَا عَشَرْ. وَ ذُرِّيَّةْ يُوسُفْ قِسِمْهُمْ يَبْقَى مَرَّتَيْن. ١٤ وَ تَلْقَوْا وَرَثَتْكُو أَمْبَيْنَاتْكُو سَوَا سَوَا أَشَانْ أَنَا حَلَفْت وَ قُلْت نَنْطِيهَا لِجُدُودْكُو. وَ الْبَلَدْ دِي تَبْقَى لَيْكُو وَرَثَةْ.

١٥ «وَ دَاهُو حُدُودْ الْبَلَدْ. فِي الْمُنْشَاقْ، الْحُدُودْ يُقُمُّوا مِنْ الْبَحَرْ الْأَبْيَضْ وَ يَمْشُوا لَحَدِّي دَرِبْ حَتْلُونْ وَ لَحَدِّي صَدَادْ ١٦ وَ حَمَاتْ وَ بِرُوتَةْ وَ سِبْرَايِمْ أَمْبَيْن أَرْض دِمَشْق وَ أَرْض حَمَاتْ وَ مِنْ حَصَرْ تِكُونْ عَلَيْ حُدُودْ حَوْرَانْ. ١٧ وَ مِثِلْ دَا، الْحُدُودْ يَمْشُوا مِنْ الْبَحَرْ الْأَبْيَضْ لَحَدِّي حَصَرْ عَيْنَانْ فِي أَرْض دِمَشْق وَ يُفُوتُوا أَرْض حَمَاتْ عَلَيْ جِيهَةْ الْمُنْشَاقْ.

١٨ «وَ فِي الصَّبَاحْ، الْحُدُودْ يُقُمُّوا مِنْ بَيْن حَوْرَانْ وَ أَرْض دِمَشْق وَ يَمْشُوا بَيْن قِلْعَادْ وَ بَلَدْ إِسْرَائِيلْ. وَادِي الْأُرْدُنْ يَبْقَى حُدُودْكُو لَحَدِّي الْبَحَرْ الْمَيِّتْ. وَ دَا عَلَيْ جِيهَةْ الصَّبَاحْ.

١٩ «وَ فِي الْوَطِي فِي صَحَرَاءْ نَقَبْ، الْحُدُودْ يُقُمُّوا مِنْ تَامَارْ وَ يَمْشُوا لَحَدِّي أَلْمِي مَرِيبَةْ هَنَا قَادِشْ وَ لَحَدِّي وَادِي مَصِرْ وَ لَحَدِّي الْبَحَرْ الْأَبْيَضْ. وَ دَا عَلَيْ جِيهَةْ النَّقَبْ فِي الْوَطِي.

٢٠ «وَ فِي الْغَرِبْ، الْحُدُودْ هُمَّنْ الْبَحَرْ الْأَبْيَضْ. وَ الْحُدُودْ يَمْشُوا مِنْ حُدُودْ الْوَطِي لَحَدِّي بَكَانْ الْمُقَابِلْ لَبُو حَمَاتْ فِي الْمُنْشَاقْ. وَ دَا عَلَيْ جِيهَةْ الْغَرِبْ.

٢١ «يَا بَنِي إِسْرَائِيلْ، قَسُّمُوا الْبَلَدْ دِي أَمْبَيْنَاتْكُو حَسَبْ قَبَايِلْكُو. ٢٢ وَ قَسُّمُوا الْبَلَدْ دِي وَرَثَةْ أَمْبَيْنَاتْكُو بِأَمْ عِيَيْدَاتْ لِنُفُوسْكُو وَ الْأَجَانِبْ السَّاكْنِينْ مَعَاكُو وَ وِلْدَوْا عِيَالْهُمْ فِي أُسُطْكُو وَ بِقَوْا مُوَاطِنِينْ مَعَاكُو إِنْتُو بَنِي إِسْرَائِيلْ. وَ هُمَّنْ يَلْقَوْا قِسِمْهُمْ هَنَا الْبَلَدْ دِي بِأَمْ عِيَيْدَاتْ مَعَاكُو فِي لُبّ قَبَايِلْ بَنِي إِسْرَائِيلْ. ٢٣ وَ لِأَيِّ أَجْنَبِي، تَنْطُوهْ وَرَثَتَهْ فِي لُبّ الْقَبِيلَةْ الْهُو سَاكِنْ مَعَاهَا.» وَ دَا كَلَامْ اللّٰهْ الرَّبّ.