فِرْعَوْن يقع مِثِل أرْز لُبْنَان
٣١
١ وَ فِي الْيَوْم الْأَوَّلْ هَنَا الشَّهَرْ التَّالِتْ فِي سَنِةْ 11 مِنْ وَدَّوْنَا فِي الْغُرْبَةْ،
اللّٰهْ حَجَّى لَيِّ وَ قَالْ:
٢ «يَا إِبْن آدَمْ،
قُولْ لِفِرْعَوْن مَلِكْ مَصِرْ وَ عَسْكَرَهْ:
‹إِنْتَ تِشَابِهْ يَاتُو بِعَظَمَتَكْ؟
٣ إِنْتَ تِشَابِهْ أَرْز لُبْنَانْ
الْعِنْدَهْ فُرُوعْ جَمِيلِينْ.
هُو شَدَرْ عِنْدَهْ ضُلّ وَ طَوِيلْ
وَ طُولَهْ لِحِقْ السَّحَابْ.
٤ الْأَلْمِي كَبَّرَهْ
وَ عُيُونْ أَلْمِي الْغَرِيقْ قَوَّمَوْه.
وَ الْبُحُورْ جَارِيِينْ
حَوَالَيْ الْبَكَانْ
الْهُو مُمَقَّنْ فَوْقَهْ.
وَ مَجَارِي الْأَلْمِي يَجْرُوا
لِكُلَّ شَدَرْ الْكَدَادَةْ.
٥ وَ فِي شَانْ دَا،
طُولَهْ بِقِي عَالِي
وَ فَاتْ كُلَّ شَدَرْ الْكَدَادَةْ.
فُرُوعَهْ بِقَوْا كَتِيرِينْ وَ طُوَالْ
وَ سَوَّوْا وَرَقْ بِسَبَبْ الْأَلْمِي الْكَتِيرْ.
٦ كُلَّ طُيُورْ السَّمَاءْ
سَوَّوْا عُشُوشْهُمْ فِي فُرُوعَهْ
وَ كُلَّ حَيْوَانَاتْ الْكَدَادَةْ
وِلْدَوْا عِيَالْهُمْ تِحْتَهْ
وَ كُلَّ الْأُمَمْ الْكَتِيرِينْ
أَنْجَمَّوْا فِي ضُلَّهْ.
٧ هُو جَمِيلْ فِي عَظَمَتَهْ وَ فِي طُولْ فُرُوعَهْ
أَشَانْ عُرُوقَهْ وَصَّلَوْا الْأَلْمِي الْكَتِيرْ.
٨ شَدَرْ الْأَرْز فِي جِنَيْنَةْ الرَّبّ
مَا يِسَاوِيهْ
وَ شَدَرْ السَّرْوِي
مَا يِشَابِهْ فُرُوعَهْ
وَ الشَّدَرْ الْآخَرِينْ
مَا يِسَوُّوا مِثِلْ ضُلَّهْ
وَ أَيِّ شَدَرَةْ فِي جِنَيْنَةْ الرَّبّ
مَا جَمِيلَةْ مِنَّهْ.
٩ أَنَا جَمَّلْتَهْ
بِكَتَرَةْ فُرُوعَهْ
وَ أَيِّ شَدَرَةْ فِي عَدِنْ جِنَيْنَةْ الرَّبّ
قَاعِدَةْ تَحْسِدَهْ.›»
١٠ وَ فِي شَانْ دَا،
دَاهُو اللّٰهْ الرَّبّ قَالْ:
«الشَّدَرْ دَا كِبِرْ وَ بِقِي طَوِيلْ وَ طُولَهْ لِحِقْ السَّحَابْ وَ أَسْتَكْبَرْ بِطُولَهْ.
١١ وَ فِي شَانْ دَا،
أَنَا سَلَّمْتَهْ فِي إِيدْ مَسْؤُولْ الْأُمَمْ لِيِسَوُّوا فَوْقَهْ حَسَبْ فَسَالْتَهْ أَشَانْ أَنَا طَرَدْتَهْ.
١٢ وَ الْأَجَانِبْ الْمُجْرِمِينْ مِنْ الْأُمَمْ قَطَعَوْه وَ خَلَّوْه.
وَ فُرُوعَهْ وَقَعَوْا فِي رُوسَيْ الْجِبَالْ وَ فِي كُلَّ الْوُدْيَانْ وَ وَرَقَهْ شَتَّ فِي كُلَّ رُجُولْ الْبَلَدْ.
وَ كُلَّ شُعُوبْ الْأَرْض قَمَّوْا مِنْ ضُلَّهْ وَ خَلَّوْه.
١٣ وَ كُلَّ طُيُورْ السَّمَاءْ سَاكْنِينْ فِي دُنْبُرَهْ وَ كُلَّ حَيْوَانَاتْ الْكَدَادَةْ يِلَّبَّدَوْا تِحِتْ فُرُوعَهْ.
١٤ وَ بَيْدَا،
مَا فِي شَدَرْ بَتَّانْ الْقَاعِدْ جَنْب الْأَلْمِي وَ بِقِي طَوِيلْ وَ لِحِقْ السَّحَابْ.
وَ مَا فِي شَدَرْ مَزْقِي عَدِيلْ الْيِسْتَكْبَرْ فِي الْآخَرِينْ.
أَشَانْ كُلُّهُمْ سَلَّمَوْهُمْ لِلْمَوْت وَ يَنْزُلُوا تِحِتْ الْأَرْض بَيْن النَّاسْ النَّازْلِينْ فِي الْقُبُورْ.»
١٥ دَاهُو اللّٰهْ الرَّبّ قَالْ:
«يَوْم شَدَرْ الْأَرْز مَاتْ وَ نَزَلْ فِي الْهَاوِيَةْ،
أَنَا أَمَرْت الطَّبِيعَةْ تَحْزَنْ فِي شَانَهْ وَ أَنَا سَدَّيْت أَلْمِي الْغَرِيقْ وَ وَقَّفْت الْبُحُورْ وَ الْأَلْمِي الْكَتِيرْ مَا يَجْرِي.
وَ فِي شَانَهْ هُو،
أَنَا ضَلَّمْت جِبَالْ لُبْنَانْ وَ كُلَّ شَدَرْ الْكَدَادَةْ يِبِسْ.
١٦ وَ بِحِسّ وَقَعَانَهْ،
نِرَجِّفْ الْأُمَمْ وَكِتْ نَزَّلْتَهْ فِي الْهَاوِيَةْ مَعَ النَّاسْ النَّازْلِينْ فِي الْقُبُورْ.
وَ هِنَاكْ تِحِتْ الْأَرْض،
كُلَّ شَدَرْ عَدِنْ وَ كُلَّ الشَّدَرْ السَّمْحِينْ زِيَادَةْ وَ مَزْقِيِّينْ عَدِيلْ فِي جِبَالْ لُبْنَانْ يَفْرَحَوْا.
١٧ وَ هُمَّنْ دَوْل كُلَ نَزَلَوْا مَعَايَهْ فِي الْهَاوِيَةْ مَعَ النَّاسْ الْمَاتَوْا فِي الْحَرِبْ.
وَ أَوَّلْ،
هُمَّنْ دَوْل مُسَاعِدِينْ شَدَرْ الْأَرْز دَا وَ أَنْجَمَّوْا فِي ضُلَّهْ فِي أُسْط الْأُمَمْ.
١٨ «يَا فِرْعَوْن،
إِنْتَ تَحْسِبْ تِشَابِهْ شَدَرْ عَدِنْ بِعَظَمَتَكْ وَ شَرَفَكْ وَلَّا؟
وَ لَاكِنْ بَيْدَا كُلَ،
نِنَزِّلَكْ مَعَ شَدَرْ عَدِنْ تِحِتْ الْأَرْض.
وَ إِنْتَ تَرْقُدْ فِي أُسْط الْمَا مُطَهَّرِينْ وَ مَعَ النَّاسْ الْمَاتَوْا فِي الْحَرِبْ.
وَ دَا الشَّيّءْ الْيَبْقَى لِفِرْعَوْن وَ كُلَّ عَسْكَرَهْ.»
وَ دَا كَلَامْ اللّٰهْ الرَّبّ.