كلام اللّه ضِدّ بلد مَصِر
٢٩
١ وَ فِي يَوْم 12 هَنَا الشَّهَرْ الْعَاشِرْ فِي السَّنَةْ الْعَاشِرْ مِنْ وَدَّوْنَا فِي الْغُرْبَةْ،
اللّٰهْ حَجَّى لَيِّ وَ قَالْ:
٢ «يَا إِبْن آدَمْ،
وَجِّهْ عَلَيْ فِرْعَوْن مَلِكْ مَصِرْ وَ أَتْنَبَّأْ ضِدَّهْ وَ ضِدّ كُلَّ الْمَصْرِيِّينْ.
٣ وَ قُولْ لَيْهُمْ:
دَاهُو اللّٰهْ الرَّبّ قَالْ:
‹أَكِيدْ أَنَا نُقُمّ ضِدَّكْ،
يَا فِرْعَوْن مَلِكْ مَصِرْ،
إِنْتَ الْمِثِلْ تُمْسَاحْ كَبِيرْ
الرَّاقِدْ فِي أُسْط النِّيلْ.
وَ إِنْتَ قُلْت:
”النِّيلْ دَا هَنَايِ
وَ أَنَا بَسْ خَلَقْتَهْ!“
٤ وَ لَاكِنْ أَنَا نِدِسّ لَيْك جَنْبَاتْ فِي خَشْمَكْ
وَ نَرْبُطْ كُلَّ حُوتْ نِيلَكْ فِي قِرْفَكْ.
وَ نَمُرْقَكْ مِنْ أُسُطْ نِيلَكْ
مَعَ كُلَّ حُوتْ نِيلَكْ الْمَرْبُوطْ فِي قِرْفَكْ.
٥ وَ نِخَلِّيكْ فِي الصَّحَرَاءْ
مَعَ كُلَّ حُوتْ نِيلَكْ.
تَقَعْ فِي الْكَدَادَةْ
وَ لَا تِنْجَابْ وَ لَا تِنْلَمَّ.
تَبْقَى أَكِلْ لِحَيْوَانَاتْ الْكَدَادَةْ
وَ طُيُورْ السَّمَاءْ.
٦ وَ بَيْدَا،
كُلَّ سُكَّانْ مَصِرْ
يَعَرْفُوا كَدَرْ أَنَا بَسْ اللّٰهْ.
«‹يَا بَلَدْ مَصِرْ،
إِنْتِ بِقِيتِ مِثِلْ عَقَيْقَايْ ضَعِيفَةْ
الْيِرَّكَّزَوْا فَوْقهَا بَنِي إِسْرَائِيلْ.
٧ وَ وَكِتْ شَالَوْكِ فِي إِيدَيْهُمْ،
إِنْتِ أَلْكَسَّرْتِ وَ جَرَحْتِ كَتَافَيْهُمْ.
وَ وَكِتْ يِرَّكَّزَوْا فَوْقكِ إِنْتِ الْمُكَسَّرَةْ،
إِنْتِ كَسَّرْتِ كُلَّ صَلَبَاهُمْ.›»
٨ وَ فِي شَانْ دَا،
دَاهُو اللّٰهْ الرَّبّ قَالْ:
«أَكِيدْ أَنَا نِقَوِّمْ حَرِبْ ضِدّ بَلَدْ مَصِرْ وَ نَكْتُلْ النَّاسْ وَ الْبَهَايِمْ.
٩ وَ مَصِرْ تَخْرَبْ وَ تَبْقَى كَوْم هَنَا تُرَابْ.
وَ بَيْدَا،
يَعَرْفُوا كَدَرْ أَنَا بَسْ اللّٰهْ.
«إِنْتَ قُلْت:
‹النِّيلْ دَا هَنَايِ وَ أَنَا بَسْ خَلَقْتَهْ.›
١٠ وَ بِسَبَبْ دَا،
أَكِيدْ أَنَا نُقُمّ ضِدَّكْ وَ ضِدّ نِيلَكْ وَ نِسَوِّي بَلَدْ مَصِرْ كَوْم هَنَا تُرَابْ وَ خَرَابْ مِنْ مِقْدُولْ لَحَدِّي أَسْوَانْ وَ لَحَدِّي حُدُودْ الْحَبَشَةْ.
١١ وَ لِمُدَّةْ 40 سَنَةْ،
وَ لَا رِجِلْ إِنْسَانْ وَ لَا رِجِلْ بَهِيمَةْ مَا تُشُقّ الْبَكَانْ دَا.
١٢ وَ بَلَدْ مَصِرْ تَخْرَبْ زِيَادَةْ مِنْ خَرَابْ الْبُلْدَانْ الْآخَرِينْ.
وَ لِمُدَّةْ 40 سَنَةْ،
مُدُنْهَا يَقْعُدُوا خَرَابْ زِيَادَةْ مِنْ خَرَابْ الْمُدُنْ الْآخَرِينْ.
وَ أَنَا نِشَتِّتْ الْمَصْرِيِّينْ بَيْن الْأُمَمْ وَ نِفَرِّقْهُمْ فِي أُسْط الْبُلْدَانْ.»
١٣ وَ دَاهُو اللّٰهْ الرَّبّ قَالْ:
«بَعَدْ 40 سَنَةْ،
أَنَا نِلِمّ الْمَصْرِيِّينْ مِنْ بَيْن الشُّعُوبْ الْهُمَّنْ مُشَتَّتِينْ فِي لُبُّهُمْ.
١٤ وَ نِقَبِّلْ الْمَصْرِيِّينْ مِنْ بَلَدْ الْغُرْبَةْ وَ نِجِيبْهُمْ فِي أَرْض جُدُودْهُمْ فِي جُنُوبْ مَصِرْ وَ هُمَّنْ يِكَوُّنُوا مَمْلَكَةْ ضَعِيفَةْ.
١٥ وَ الْمَمْلَكَةْ دِي تَبْقَى ضَعِيفَةْ مِنْ كُلَّ الْمَمَالِكْ وَ بَتَّانْ مَا تَقْدَرْ تِسَوِّي نَفِسْهَا عَالِيَةْ فِي الْأُمَمْ.
وَ نِسَوِّي نَاسْهَا شِيَّةْ لَحَدِّي مَا يَقْدَرَوْا يَمُلْكُوا فِي الْأُمَمْ.
١٦ وَ بَتَّانْ بَنِي إِسْرَائِيلْ مَا يِتْوَكَّلَوْا عَلَيْ الْمَصْرِيِّينْ.
بَلَدْ مَصِرْ تَقْعُدْ أَشَانْ بَنِي إِسْرَائِيلْ يِذَّكَّرَوْا خَطَاهُمْ السَّوَّوْه وَكِتْ وَجَّهَوْا عَلَيْهَا.
وَ يَعَرْفُوا كَدَرْ أَنَا بَسْ اللّٰهْ الرَّبّ.»
نَبُوخَدْنَصَر يشيل مَصِر
١٧ وَ فِي الْيَوْم الْأَوَّلْ هَنَا الشَّهَرْ الْأَوَّلْ فِي سَنِةْ 27 مِنْ وَدَّوْنَا فِي الْغُرْبَةْ،
اللّٰهْ حَجَّى لَيِّ وَ قَالْ:
١٨ «يَا إِبْن آدَمْ،
نَبُوخَدْنَصَرْ مَلِكْ بَابِلْ كَلَّفْ عَسْكَرَهْ بِخِدْمَةْ تَقِيلَةْ ضِدّ مَدِينَةْ صُورْ لَحَدِّي رُوسَيْهُمْ صَلَّعَوْا وَ كَتَافَيْهُمْ أَنْجَرَحَوْا.
وَ لَاكِنْ مَا لِقَوْا فَايْدَةْ التَّكْفِي لِلْمَلِكْ وَ لَا لِعَسْكَرَهْ بِكُلَّ الْخِدْمَةْ السَّوَّوْهَا ضِدّ مَدِينَةْ صُورْ.»
١٩ وَ فِي شَانْ دَا،
دَاهُو اللّٰهْ الرَّبّ قَالْ:
«دَاهُو أَنَا نَنْطِي بَلَدْ مَصِرْ لِنَبُوخَدْنَصَرْ مَلِكْ بَابِلْ.
وَ يِشِيلْ غُنَاهَا وَ يِسَوِّيهَا كَسِيبَةْ وَ يَنْهَبْهَا نَهِبْ شَدِيدْ.
وَ مَصِرْ تَبْقَى فَايْدَةْ لِعَسْكَرَهْ.
٢٠ وَ أَنَا نَنْطِيهْ بَلَدْ مَصِرْ مِثِلْ مُكَافَاةْ أَشَانْ هُو وَ عَسْكَرَهْ خَدَمَوْا لَيِّ.
وَ دَا كَلَامْ اللّٰهْ الرَّبّ.
٢١ وَ فِي الْيَوْم دَا،
أَنَا نِزِيدْ قُوَّةْ بَنِي إِسْرَائِيلْ.
وَ لَيْك إِنْتَ،
يَا إِبْن آدَمْ،
نَنْطِيكْ فُرْصَةْ لِتِحَجِّي فِي أُسُطْهُمْ.
وَ بَيْدَا،
هُمَّنْ يَعَرْفُوا كَدَرْ أَنَا بَسْ اللّٰهْ.»