حِزْقِيال 14

واجِب بني إسرائيل يخلّوا الأصْنام

١ وَ وَاحِدِينْ مِنْ شُيُوخْ بَنِي إِسْرَائِيلْ الْقَاعِدِينْ فِي الْغُرْبَةْ جَوْا لَيِّ وَ قَعَدَوْا قِدَّامِي. ٢ وَ اللّٰهْ حَجَّى لَيِّ وَ قَالْ: ٣ «يَا إِبْن آدَمْ، الرُّجَالْ دَوْل قَلِبْهُمْ مُعَلَّقْ فِي أَصْنَامْهُمْ. هُمَّنْ خَطَّوْا قِدَّامْهُمْ شَيّءْ الْيِلِزُّهُمْ فِي الْخَطَا. هَلْ نَسْمَعْ سُؤَالْهُمْ وَلَّا؟ ٤ وَ فِي شَانْ دَا، قُولْ لَيْهُمْ: ‹دَاهُو اللّٰهْ الرَّبّ قَالْ: ”أَيِّ نَادُمْ مِنْ بَنِي إِسْرَائِيلْ الْقَلْبَهْ مُعَلَّقْ فِي أَصْنَامَهْ وَ يُخُطّ قِدَّامَهْ شَيّءْ الْيِلِزَّهْ فِي الْخَطَا وَ بَعَدْ دَا، يَمْشِي لِلنَّبِي لِيَسْأَلْنِي، أَنَا اللّٰهْ بَسْ نُرُدّ لَيَّهْ. نُرُدّ لَيَّهْ حَسَبْ كَتَرَةْ أَصْنَامَهْ. ٥ أَيْوَى، نَكْرُبْ قُلُوبْ بَنِي إِسْرَائِيلْ أَشَانْ هُمَّنْ كُلُّهُمْ أَبَوْنِي بِسَبَبْ أَصْنَامْهُمْ.“›

٦ «وَ فِي شَانْ دَا، قُولْ لِبَنِي إِسْرَائِيلْ: ‹دَاهُو اللّٰهْ الرَّبّ قَالْ: ”تَعَالُوا قَبُّلُوا مِنْ أَصْنَامْكُو وَ خَلُّوا كُلَّ مُحَرَّمَاتْكُو. ٧ كَنْ نَادُمْ مِنْ بَنِي إِسْرَائِيلْ أَوْ مِنْ الْأَجَانِبْ السَّاكْنِينْ أَمْبَيْنَاتْهُمْ يِبَعِّدْ مِنِّي وَ يِعَلِّقْ قَلْبَهْ فِي أَصْنَامَهْ وَ يُخُطّ قِدَّامَهْ شَيّءْ الْيِلِزَّهْ فِي الْخَطَا وَ بَعَدْ دَا، يَمْشِي لِلنَّبِي لِيَسْأَلْنِي، خَلَاصْ النَّادُمْ دَا، أَنَا اللّٰهْ بَسْ نُرُدّ لَيَّهْ. ٨ وَ النَّادُمْ دَا، أَنَا نُقُمّ ضِدَّهْ وَ نِسَوِّيهْ عَلَامَةْ وَ مَثَلْ لِلنَّاسْ وَ نَفْصُلَهْ مِنْ شَعَبِي. وَ بَيْدَا، تَعَرْفُوا كَدَرْ أَنَا بَسْ اللّٰهْ.

٩ «‹”وَ كَنْ النَّبِي يُغُشّ نَفْسَهْ وَ يُرُدّ لِلنَّادُمْ دَا بِأَيِّ كَلَامْ، أَنَا اللّٰهْ بَسْ غَشَّيْتَهْ لِلنَّبِي دَا. وَ أَنَا نَرْفَعْ إِيدِي ضِدَّهْ وَ نِدَمِّرَهْ مِنْ أُسُطْ شَعَبِي بَنِي إِسْرَائِيلْ. ١٠ وَ النَّبِي وَ النَّاسْ الْيَسْمَعَوْه يِلْحَمَّلَوْا نَتِيجَةْ خَطَاهُمْ. وَ خَطَا النَّاسْ الْمَشَوْا سَأَلَوْا اللّٰهْ يَبْقَى مِثِلْ خَطَا النَّبِي. ١١ وَ بَيْدَا، بَنِي إِسْرَائِيلْ مَا يِوَدُّرُوا بَعِيدْ مِنِّي وَ بَتَّانْ مَا يِنَّجَّسَوْا بِعِصْيَانْهُمْ. وَ خَلَاصْ، هُمَّنْ يَبْقَوْا شَعَبِي وَ أَنَا نَبْقَى إِلٰـهُّمْ.“›» وَ دَا كَلَامْ اللّٰهْ الرَّبّ.

الأرْبعة عِقاب هنا القدس

١٢ وَ اللّٰهْ حَجَّى لَيِّ وَ قَالْ: ١٣ «يَا إِبْن آدَمْ، أَكُونْ بَلَدْ وَاحِدَةْ تِسَوِّي ذَنِبْ هَنَا خِيَانَةْ ضِدِّي وَ أَنَا نِمِدّ إِيدِي لِنَضْرُبْهَا وَ نِقَلِّلْ الْمَعَاشْ وَ نِرَسِّلْ لَيْهَا الْجُوعْ لِنَكْتُلْ النَّاسْ وَ الْبَهَايِمْ. ١٤ حَتَّى كَانْ الرُّجَالْ التَّلَاتَةْ دَوْل نُوحْ وَ دَنْيَالْ وَ أَيُّوبْ قَاعِدِينْ فِي لُبّ الْبَلَدْ دِي كُلَ، هُمَّنْ يِنَجُّوا إِلَّا نُفُوسْهُمْ بَسْ بِعَدَالِتْهُمْ. وَ دَا كَلَامْ اللّٰهْ الرَّبّ.

١٥ «وَ أَكُونْ نِرَسِّلْ حَيْوَانَاتْ فَسْلِينْ فِي الْبَلَدْ دِي أَشَانْ يَاكُلُوا عِيَالْهَا وَ الْبَلَدْ تَبْقَى خَرَابْ وَ مَا فِي نَادُمْ يُشُقَّهَا بِسَبَبْ الْحَيْوَانَاتْ دَوْل. ١٦ حَتَّى كَانْ الرُّجَالْ التَّلَاتَةْ دَوْل قَاعِدِينْ فِي لُبّ الْبَلَدْ دِي كُلَ، نَحْلِفْ بِأُسْمِي الْحَيّ، هُمَّنْ مَا يِنَجُّوا وَ لَا بِنْت وَ لَا وَلَدْ. يِنَجُّوا إِلَّا نُفُوسْهُمْ بَسْ وَ الْبَلَدْ دِي تَبْقَى خَرَابْ. وَ دَا كَلَامْ اللّٰهْ الرَّبّ.

١٧ «وَ أَكُونْ نِجِيبْ الْحَرِبْ فِي الْبَلَدْ دِي وَ نِقَرِّرْ كَدَرْ الْحَرِبْ يُقُمّ فَوْقهَا وَ يَكْتُلْ النَّاسْ وَ الْبَهَايِمْ. ١٨ حَتَّى كَانْ الرُّجَالْ التَّلَاتَةْ دَوْل قَاعِدِينْ فِي لُبّ الْبَلَدْ دِي كُلَ، نَحْلِفْ بِأُسْمِي الْحَيّ، هُمَّنْ مَا يِنَجُّوا وَ لَا بِنْت وَ لَا وَلَدْ. يِنَجُّوا إِلَّا نُفُوسْهُمْ بَسْ. وَ دَا كَلَامْ اللّٰهْ الرَّبّ.

١٩ «وَ أَكُونْ نِرَسِّلْ الْوَبَاءْ فِي الْبَلَدْ دِي وَ نِنَزِّلْ فَوْقهَا غَضَبِي الْيِدَفِّقْ دَمُّهُمْ وَ يَكْتُلْ النَّاسْ وَ الْبَهَايِمْ. ٢٠ حَتَّى كَانْ نُوحْ وَ دَنْيَالْ وَ أَيُّوبْ قَاعِدِينْ فِي لُبّ الْبَلَدْ دِي كُلَ، نَحْلِفْ بِأُسْمِي الْحَيّ، هُمَّنْ مَا يِنَجُّوا وَ لَا بِنْت وَ لَا وَلَدْ. يِنَجُّوا إِلَّا نُفُوسْهُمْ بَسْ بِعَدَالِتْهُمْ.» وَ دَا كَلَامْ اللّٰهْ الرَّبّ.

٢١ وَ دَاهُو اللّٰهْ الرَّبّ قَالْ: «حَتَّى كَانْ رَسَّلْت ضِدّ مَدِينَةْ الْقُدُسْ عِقَابِي الْأَرْبَعَةْ الشَّدِيدْ، وَ هُمَّنْ الْحَرِبْ وَ الْجُوعْ وَ الْحَيْوَانَاتْ الْفَسْلِينْ وَ الْوَبَاءْ لِيَكْتُلُوا النَّاسْ وَ الْبَهَايِمْ، ٢٢ دَاهُو فِيَّهْ نَاسْ وَاحِدِينْ يِفَضُّلُوا. رُجَالْ وَ عَوِينْ كُلَ، يَمُرْقُوهُمْ مِنْ الْمَدِينَةْ وَ هُمَّنْ يَجُوا لَيْكُو هِنِي فِي بَابِلْ. وَ إِنْتُو ذَاتْكُو تَعَرْفُوا دَرِبْهُمْ وَ عَمَلْهُمْ الْفَسْلِينْ. وَ خَلَاصْ، تِصَبُّرُوا نُفُوسْكُو فِي شَانْ الْفَسَالَةْ الْأَنَا جِبْتَهَا فِي مَدِينَةْ الْقُدُسْ وَ كُلَّ الْعِقَابْ الْجِبْتَهْ فَوْقهَا. ٢٣ وَ تِصَبُّرُوا نُفُوسْكُو وَكِتْ تَعَرْفُوا دَرِبْهُمْ وَ عَمَلْهُمْ الْفَسْلِينْ. وَ بَيْدَا، تَعَرْفُوا كَدَرْ دَا مَا بَلَا سَبَبْ أَنَا حَقَّقْت كُلَّ الْعِقَابْ دَا فِي الْمَدِينَةْ.» وَ دَا كَلَامْ اللّٰهْ الرَّبّ.